1. Parché che tanti i resta maraveiadi dopo che i vien la prima volta nte una riunion? (Varda anca el ritrato.)

 PROA imaginar che un omo e la so dona i va par la prima volta nte una riunion nel Salon del Regno. Lori i ze restadi maraveiadi parché tuti li ga tratadi tanto ben e lori i ga visto tanto amor intrà i fradei. Dopo dela riunion, lori i dise un al altro che ghe ga piasesto tanto ndar, e che i ga visto che le Testimònie de Geovà le ze tanto difarente dele altre persone.

2. Parché che arquanti i ga assà de servir a Geovà?

² Semo difarenti par causa del amor che gavemo intrà de noantri. Magari, no ghen’è gnanca una Testimònia de Geovà che la sìpia perfeta. (1 Gio. 1:8) Par quela, quando cognossemo meio i nostri fradei, vedemo de pi so difeti. (Rom. 3:23) E par causa dei difeti dei altri, arquanti fradei i ga assà de servir a Geovà.

3. De acordo con Gioani 13:34, 35, cossa che i veri dissìpoli de Cristo i ndaria far?

³ Varda nantra volta el testo de questo stùdio. (Ledi Gioani 13:34, 35. b) Gesù no’l ga dito: ‘Par meso de questo, valtri saveré che sì i me dissìpoli.’ Invesse, lu el ga dito: “Par meso de questo, tuti i saverà che sì i me dissìpoli.” Alora, la Bìblia no la dise che i veri dissìpoli de Cristo  i saria perfeti. Magari, Gesù el ga dito che lori i gavaria amor un al altro, e che fin altre persone le vederia questo amor.

4. Cossa che tanti fursi i se domanda?

⁴ Arquanti che no i ze Testimònie de Geovà fursi i se domanda: ‘Come che el amor el mostra chi che ze i veri dissìpoli de Gesù? Come che Gesù el ga mostrà che el amea i so apòstoli? Come che podemo ndar drio el so esémpio ancoi?’ L’è importante che anca noantri ghe pensemo sora queste domande. Cossita, saremo boni de mostrar cada volta de pi amor, ancora che restemo disgustadi coi difeti dei altri. — Efe. 5:2.

5. Cossa che imparemo dele parole de Gesù in Gioani 15:12, 13?

⁵ Ledi Gioani 15:12, 13. c Gesù el ga dito: “Amé un al altro come mi ve go amà.” Alora, lu el ga mostrà che i so veri dissìpoli i gavaria de amar tanto un al altro. Come cossita? Gesù el volea dir che ghemo de amar ai altri de pi che a noantri stessi, o sia, esser pareciadi fin par morir par salvar un fradel. d

6. Come che la Bìblia la mostra che el amor l’è pròpio importante?

⁶ La Parola de Dio la mostra che el amor l’è tanto importante. Par esémpio, ela la dise che “Dio l’è amor”, che ‘ghemo de amar ai altri come a noantri stessi’, che el amor el ne giuta a perdonar e che “el amor no’l se finisse mai”. (1 Gio. 4:8; Mat. 22:39; 1 Pie. 4:8; 1 Cor. 13:8) Arquante persone le ghe piase tanto queste parole. Questi e altri testi i mostra che l’è pròpio importante amar e mostrar che gavemo questa bela qualità.

7. Parché che Sàtana no’l sarà mai bon de giutar le persone a esser unide e a amarse una al’altra?

 ⁷ Arquante persone le pensa: “Le religion le insegna robe difarente una del’altra, ma tute le dise che le insegna la verità sora Dio. Alora, come che podemo saver quala che la ze la religion giusta?” Tanti fà fadiga saver chi che adora a Dio dela maniera giusta parché Sàtana el ga creà una mùcia de religion false. Ma, lu mai el sarà bon de giutar persone de tuto el mondo a esser unide e a amarse una al’altra. Parché? Parché el vero amor el vien de Geovà. Alora, sol quei che i ga el spìrito santo de Dio e el so aiuto i ga el vero amor. (1 Gio. 4:7) Par quela che Gesù el ga dito che el amor el ndaria mostrar chi che i ze so veri dissìpoli.

8-9. Come che John el se ga sentio dopo de veder el amor che ghen’è intrà i fradei?

⁸ Gesù el ga dito che tanti i saria boni veder chi che i ze so veri dissìpoli par causa del amor che ghen’è intrà de lori. Varda cossa che un fradel de nome Ian el ga contà del primo congresso che l’è ndato. Questo congresso l’è stà fato nte un posto ndove lu l’era ndato un per de mesi vanti par vardar un giugo. Lu el ga dito: “El giugo e el congresso i ze stati pròpio difarenti. Nel congresso, le Testimònie de Geovà le se portea ben, le era ben vestide e i tosatei i gavea bona creansa. Tuti i me parea pròpio contenti e in pace, e l’era pròpio quel che volea par mi. No me ricordo de gnanca un discorso che i ga fato in quel giorno, ma ancora me ricordo de come le Testimònie de Geovà le se portea.” e Questo sucede sol parché ghemo el vero amor intrà de noantri. E par causa de questo amor, semo boni tratarse con bontà e rispeto.

⁹ Un fradel de nome John anca el se ga sentio cossita la prima volta che l’è ndato nte una riunion. Lu el ga dito: “Mi son restà maraveià de veder che quele persone le tratea ben a tuti. Lori i me parea fin santi. El amor che i mostrea intrà de lori me ga assà sicuro che gavea catà la vera religion.” f Robe come queste sucede sempre, e le mostra che i servi de Geovà i ze i veri dissìpoli de Gesù.

10. Quando che podemo mostrar el vero amor? (Varda anca la nota.)

¹⁰ Come savemo, nissuni ze perfeti. Alora, dele volte, nostri fradei e sorele i ndarà dir o far qualcossa che ne assa disgustadi o cativi. g (Tia. 3:2) Ma, quando sucede una roba cossita, podemo mostrar el vero amor par meso de quel che femo e de quel che parlemo. Adesso, ndemo veder cossa che podemo imparar col esémpio de Gesù. — Gioani 13:15.

11. Cossa che Tiago e Gioani i ga mostrà quando i ga domandà un posto importante nel Regno? (Varda anca la ilustrassion.)

¹¹ Gesù el savea che so dissìpoli no i era perfeti. Par quela, lu no’l spetea che i fesse de pi de quel che i era boni. Ancora cossita, Gesù sempre li ga giutadi a cambiar quel che ghe ocorea. Par esémpio, una volta, Tiago e Gioani i ga dito che so mare la ndesse parlar con  Gesù par domandarghe un posto importante nel Regno. (Mat. 20:20, 21) Cossita, lori i ga mostrà che i era orgoliosi e che i volea esser pi importanti che i altri. — Pro. 16:18.

12. Sarà che l’è stà sol Tiago e Gioani che i ga sbalià? Spiega.

¹² No l’è mia stà sol Tiago e Gioani che i ga sbalià quela volta. Quando i altri diese apòstoli i ga sentio quel che gavea sucedesto, i se ga incativà con Tiago e Gioani. (Mat. 20:24) Podemo fin pensar le parole che le ze vegneste fora intrà de lori. Fursi lori i ghe ga dito: ‘Pensé che sì chi valtri par domandar un posto importante nel Regno? No sì mia stati sol valtri che gavé laorà tanto insieme de Gesù. Se l’è par quela, anca noantri meritemo quei posti importanti.’ Alora, par un tempo, i apòstoli i se ga desmentegà che i gavea de mostrar amor e bontà un al altro.

13. Cossa che Gesù el ga fato dopo che i so apòstoli i ga sbalià? (Mateo 20:25-28)

¹³ Alora, cossa che Gesù el ga fato? Lu no l’è restà inrabià, gnanca el ga dito che el ndaria scòlier altri apòstoli che i fusse boni de mostrar amor e umiltà. Invesse, Gesù el ghe ga insegnà con passiensa parché el savea che lori i volea far quel che l’era giusto. (Ledi Mateo 20:25-28. h) Quela no la ze stata la prima e gnanca la ùltima volta che lori i ga proà veder chi che l’era el pi importante.  Ma Gesù el ga seità tratarli con amor. — Mar. 9:34; Luc. 22:24.

14. Come che le era le persone nel posto ndove i apòstoli i era stati slevadi?

¹⁴ Sicuro che Gesù el se ga ricordà de come le persone le era in quel posto ndove so apòstoli i era stati slevadi. (Gioani 2:24, 25) I lìderi religiosi de quela època i insegnea le persone che lore le gavaria valor sol se le fesse un laoro importante. (Mat. 23:6; varda anca el vìdeo Primeiros assentos na sinagoga, nela nota de stùdio in Mateo 23:6.) I lìderi dei giudei anca i pensea che i era meio che le altre persone. i (Luc. 18:9-12) Par quela, Gesù el savea che i apòstoli i podaria pensar de maniera sbaliada de si stessi e anca dei altri. (Pro. 19:11) Alora, lu el portea passiensa parché el savea che so apòstoli i ndaria sbaliar, ma i volea far quel che l’era giusto. Cossita, Gesù li ga giutadi a mostrar amor invesse de esser orgoliosi e de voler esser meio che i altri.

15. Cossa che noantri imparemo de quel che ga sucedesto con Tiago e Gioani?

¹⁵ Noantri podemo imparar tanto de quel che ga sucedesto con Tiago e Gioani. L’è vera che lori i ga fato sbalià quando i ga domandà un posto importante nel Regno de Dio. Magari, anca i altri apòstoli i ga sbalià parché i ga assà che quela roba rovinesse la so union. Ma Gesù li ga giutadi con bontà e amor. Cossa che questo ne insegna? Noantri ghemo de star atenti a quel che femo e parlemo quando un fradel el fà qualcossa contra noantri. Alora, se un fradel el te ga assà disgustà, proa domandarte: ‘Parché che quel che lu el me ga fato me ga assà disgustà cossita? Sarà che questo mostra che me toca cambiar qualcossa? Sarà che lu l’è drio infrontar qualche dificoltà? Anca se lu el ga pròpio fato sbalià, posso mostrarghe amor e perdonarlo?’ Quando mostremo amor ai fradei, anca mostremo che semo veri dissìpoli de Gesù.

16. Cossa che podemo imparar del esémpio de Gesù?

¹⁶ L’è vera che Gesù l’era bon de saver quel che le persone le gavea rento el cuor, ma noantri no semo mia boni. Ancora cossita, podemo imparar del esémpio de Gesù. Quando i fradei i fà qualcossa che ne assa inrabiadi, ghemo de proar capirli e portar passiensa con lori. (Pro. 20:5; Efe. 4:1, 2; 1 Pie. 3:8) Sarà pi fàcile far cossita se proemo cognosser meio i nostri fradei e sorele. Proa varda un esémpio.

17. Parché che l’è stà bon par el superintendente cognosser meio el fradel?

¹⁷ Varda quel che ga sucedesto con un superintendente che l’era drio servir nela Àfrica. Lu el pensea che un fradel no’l ghe mostrea mia bontà ai altri. Lu el ga dito: “Invesse de assarlo de banda, mi go volesto cognosserlo meio. Cossita, quando go savesto de tuto quel che el ga  infrontà e de tuto quel che l’è stà bon de cambiar, go visto che l’era un bravo fradel. Noantri semo deventadi boni amighi.” Quando el superintendente el se ga tolto tempo par cognosser meio quel fradel, lu el ga capio parché che lu el fea quele robe. Alora, se proemo cognosser e capir i nostri fradei, sarà pi fàcile mostrarghe amor.

18. Che domande podemo farse se qualchedun el ne ga ofendesto? (Proverbi 26:20)

¹⁸ Dele volte, pol esser che pensemo che l’è meio ndar parlar cola persona che la ne ga ofendesto. Ma prima, saria meio farse arquante domande: ‘Sarà che capisso ben tuto quel che ga sucedesto? Sarà che la persona la ga fato aposta disgustarme? Sarà che anca mi no go belche fato un sbàlio come questo? Se vao parlar cola persona, sarà che no vao far vegner fora un problema ancora pi grando?’ (Pro. 18:13; Ecl. 7:20-22; ledi Proverbi 26:20. j) Se noantri se tolemo tempo par pensar sora queste domande, pol esser che ndaremo nicorderse che l’è meio mostrar amor e proar desmentegarse de quel che ga sucedesto.

19. Cossa che volemo sforsarse de far?

¹⁹ Le Testimònie de Geovà le mostra che le ze i veri dissìpoli de Gesù parché le mostra el vero amor una al’altra. E cada un de noantri ndemo drio el esémpio de Gesù quando mostremo amor ai nostri fradei, anca quando i ne disgusta. Cossita, i altri i pol veder che adoremo a Geovà dela maniera giusta, e fursi i volarà adorar el Dio de amor insieme noantri. Alora, volemo sforsarse par sempre amar un al altro e mostrar che semo veri dissìpoli de Gesù.