1-2. (a) Cossa che vedemo nel batésimo nte un congresso o assemblea? (b) Cossa che ndaremo imparar in questo stùdio?

 TUTE le stimane, miliari de persone desside batesarse e le deventa Testimònie de Geovà. Gheto belche visto el batésimo nte un congresso o nte una assemblea? Fursi te te ricordi de come quei che i ndea batesarse i era sicuri quando i ga rispondesto le due domande. Pol esser che te te ricordi dela alegria dela so fameia e amighi, e anca come tuti i era contenti intanto che lori i vegnea fora dela àqua.

² E ti, pénsito de batesarte? Alora, te pol esser sicuro che te sì una persona tanto spessial parché te sì drio ndar ‘in serca de Geovà’. (Sal. 14:1, 2) In questo stùdio, ndaremo veder al manco tre dei bei motivi che ghemo par servir a Geovà. Alora, no vol mia dir se ti sì gióveno o vècio, questo stùdio ndarà giutarte tanto. E se te sì belche batesà, te sarè bon de far pi forte la to voia de servir a Geovà par sempre.

3. Parché che i servi de Geovà i ama quel che l’è vera e giusto? (Salmo 119:128, 163)

³ Sicuro che te ami quel che l’è vera e giusto. Par quela, te ghè òdio dele busie e de quel che l’è sbalià. (Ledi Salmo 119:128, b 163. c) Quei che i conta busie i fà compagno a Sàtana, che l’è el governante de questo mondo. (Gioani 8:44; 12:31) Sàtana el ga scominsià a contar busie sora Geovà ancora nel giardin del Èden parché el volea  che le persone le pensesse robe sbaliade sora Geovà Dio. Lu el vol che le persone le pense che Geovà el tien le robe bone sol par lu e che no’l ghe conta mia la verità. (Gén. 3:1, 4, 5) E tanti ancoi i crede in queste busie de Sàtana. Lu el dopera persone cossita, che no le ama mia la verità, par far tante robe brute ancoi. (Rom. 1:25-31) Magari, i servi de Geovà i ama quel che l’è vera e i se sforsa de far quel che l’è giusto. Parché? Parché Geovà e Gesù i ghe ga domandà de farlo. (Zac. 8:19; Mat. 5:6) Alora, noantri volemo sempre far quel che Geovà el dise che l’è giusto e bon.

4. Come che savemo che Geovà l’è el ‘Dio dela verità’? (Varda anca la ilustrassion.)

⁴ Geovà l’è el ‘Dio dela verità’. (Sal. 31:5) Lu el ghe insegna la verità e quel che l’è giusto ale persone che lo ama. Par quela, lore le ga pace e le sente che le ga valor. (Pro. 13:5, 6) Cossita, queste persone no le ze mia schiave dele busie de Sàtana. Fursi te ghè imparà questo nel to stùdio dela Bìblia e te ghè visto che Geovà sempre el fà el meio par tute le persone, anca par ti. (Sal. 77:13) Par quela, te vol far quel che Dio el dise che l’è giusto. (Mat. 6:33) Ti te vol che tute le persone le sàpia che l’è una busia quel che Sàtana el dise sora Geovà. Ma come che ti te pol mostrar che Sàtana l’è un busier?

5. Come che te pol mostrar che te ami quel che l’è vera e giusto?

⁵ La to maniera de viver la pol mostrar che te vol che Geovà el sìpia el to governante e che no te credi nele busie de Sàtana. Te pol mostrar che te vol far quel che Geovà el dise che l’è giusto. Come? Prega a Geovà e dighe che te vol servirlo par sempre. Dopo, sìpia batesà. Se te ami quel che l’è vera e giusto, l’è sicuro che te gavarè voia de esser batesà.

6. Parché che amemo a Gesù? (Salmo 45:4)

⁶ Parché che te ami a Gesù? Parché lu ama quel che l’è vero, fà quel che l’è giusto e l’è ùmile. (Ledi Salmo 45:4. d) Alora, se te piase quel che l’è vera e giusto, te amarè a Gesù. Lu el ga mostrà coraio quando el ga difendesto quel che  l’è giusto. (Gioani 18:37) Ma come che Gesù el ne ga insegnà a esser ùmili?

7. Cossa che te piase de pi dela umiltà de Gesù?

⁷ Gesù el ne ga insegnà a esser ùmili par meso del so esémpio. Invesse de farse veder, lu sempre el ga dato la glòria a so Pare, Geovà. (Mar. 10:17, 18; Gioani 5:19) Gesù l’è ùmile parché el ama a so Pare e el vol far compagno a lu. (Sal. 18:35; Ebr. 1:3) Gesù el ga mostrà le medèsime qualità de Geovà de maniera perfeta. Par quela, quando pensemo nele qualità che Gesù el ga mostrà, lo amemo ancora de pi, volemo obedirlo e far compagno al so esémpio.

8. Parché che semo contenti de gaver Gesù come el nostro Rè?

⁸ Semo tanto contenti de gaver Gesù come el nostro Rè, parché lu l’è un governante tanto bon. L’è stà Geovà che ghe ga insegnà e lo ga scoliesto par esser Rè. (Isa. 50:4, 5) Gesù el ga mostrà che el ne ama tanto par meso del sacrifìssio che el ga fato par giutarne. (Gioani 13:1) Sicuro che Gesù el mèrita el nostro amor. E lu el ga spiegà che quei che lo ama, i lo obedisse e che quei che i lo obedisse i ze so amighi. (Gioani 14:15; 15:14, 15) Che bel che l’è esser amigo del Fiol de Geovà!

9. Come che el batésimo de Gesù l’è compagno al nostro?

⁹ Un dei comandamenti de Gesù l’è che ghemo de esser batesadi. (Mat. 28:19, 20) E lu stesso l’è stà batesà. Anca se el batésimo de Gesù e el nostro i sìpia difarenti, ghen’è robe che le ze compagne. (Varda el quadro “ Quala che la ze la difarensa intrà el batésimo de Gesù e quel dei so dissìpoli?”.) Quando Gesù l’è stà batesà, lu el ga mostrà che el volea tanto far la volontà del so Pare. (Ebr. 10:7) Dela medèsima maniera, quando noantri semo batesadi, mostremo a tuti che ghemo dedicà la nostra vita a Geovà. De lì avanti, ndaremo far quel che lu el vol e nò quel che noantri volemo. Cossita, femo compagno al esémpio de Gesù.

10. (a) Parché che ti te ami a Gesù? (b) Cossa che te ghè de far par mostrar che te ami a Gesù?

¹⁰ Ti te credi che Gesù l’è el ùnico Fiol de Geovà e el Rè che Dio el ga scoliesto par governar. De maniera perfeta e ùmile, lu el ga fato tuto compagno a so Pare. Te ghè imparà che Gesù el ga dato de magnar a quei che i gavea fame, el ga consolà quei che i era desanimadi e el ga fin curà persone che le era malade. (Mat. 14:14-21) Anca te vedi come lu el tende ben dele congregassion. (Mat. 23:10) Te sè che Gesù el farà robe ancora pi bele nel futuro come el Rè del Regno de Dio. Alora, come che ti te pol mostrar che te ami a Gesù? Te pol far compagno el so esémpio, dedicar la to vita a Geovà e esser batesà. — Gioani 14:21.

11. Quala che la ze la rason pi importante par noantri esser batesadi?

¹¹ Quala che la ze la rason pi importante par noantri esser batesadi? Gesù el ne ga dito che l’è el amor a Dio. In Marco 12:30, lu el ga dito: “Te ghè de amar a Geovà, el to Dio, con tuto el to cuor, con tuta la to ànima, con tuta la to mente e con tuta la to forsa.” Ti te ami a Geovà cossita?

12. Parché che te ami a Geovà? (Varda anca la ilustrassion.)

¹² Ghemo tante rason par amar a Geovà. Par esémpio, la vita e “tuti i presenti boni e perfeti” i vien de Geovà.  (Sal. 36:9; Tia. 1:17) Geovà l’è generoso e el ne ama tanto. Alora, tuto quel che te ghè de bon l’è stà lu che el te ga dato.

13. Parché che el sacrifìssio de Gesù l’è tanto valioso?

¹³ El sacrifìssio de Gesù l’è un bel presente de Geovà e l’è la rason pi importante che ghemo par amarlo. Come cossita? Pensa come l’è granda la amicìssia intrà Geovà e Gesù. Lori i ze restadi bilioni de ani insieme. (Pro. 8:22, 23, 30) E Gesù el ga dito che ‘el ama el Pare’ e che ‘el Pare lo ama’. (Gioani 10:17; 14:31) Alora, imagina come che l’è stà fadiga par Geovà veder el sofrimento e la morte de so caro Fiol. Seto parché che Geovà el ga assà questo suceder? Parché lu el ama tanto a tute le persone e anca a ti. Par quela, lu el volea che tuti i gavesse la speransa de viver par sempre. — Gioani 3:16; Gàl. 2:20.

14. Quala che la ze la meio dessision che te pol far nela vita?

¹⁴ To amor par Geovà l’è deventà ancora pi grando intanto che te ghè imparà sora lu. Par quela, ti te vol gaver una amicìssia cada volta pi forte con Dio. E Geovà el vol che te fè contento so cuor e te sìpie so amigo par sempre. (Pro. 23:15, 16) Ti te pol contentarlo par  meso de quel che te parli e anca de quel che te fè. Cossita, la to maniera de viver la mostrarà che te ami pròpio a Geovà. (1 Gio. 5:3) Sicuro che viver par contentar a Geovà l’è la meio desission che te pol far nela vita.

15. Come che te pol mostrar che te ami a Geovà?

¹⁵ Come che ti te pol mostrar che te ami a Geovà? Prima, par meso de una orassion spessial, te fè la to dedicassion, o sia, te prometi a Geovà che te vè viver par far quel che lu el vol. (Sal. 40:8) Dopo, te mostri a tuti la to dessision par meso del batésimo. Come ghemo belche visto in questo stùdio, el batésimo l’è una dessision tanto importante e felice. De lì avanti, no te ndarè pi viver par ti, ma par Geovà. (Rom. 14:8; 1 Pie. 4:1, 2) Questa la ze pròpio una dessision tanto importante. Ma la to vita la deventa ancora meio. Come cossita?

16. De acordo con Salmo 41:12, cossa che Geovà el darà a quei che i lo serve?

¹⁶ Geovà l’è la persona pi generosa che ghen’è. Alora, no importa quel che te ghe dè, lu sempre el te darà tanto de pi. (Mar. 10:29, 30) Dopo che te te batesi, Geovà el te dà la meio vita che te podarissi gaver in questo bruto mondo, e nel futuro, el te darà la vita eterna. Alora, to amor par to caro Pare el deventarà cada volta pi grando e te podarè seitar a servirlo par sempre! — Ledi Salmo 41:12. e

17. Cossa che te pol dar a Geovà che lu gnancora no’l ga?

¹⁷ L’è stà Geovà che el te ga dato tute le bele robe che te ghè bio fin ancoi. E lu l’è el paron dela tera e del cielo. Ancora cossita, ti te pol dar a Geovà una roba che lu gnancora no’l ga. Cossa? La to lealtà. (Giò 1:8; 41:11; Pro. 27:11) Quando te dedichi la to vita e te te batesi, te sì drio dar a Geovà una roba che lo assa tanto contento. Sicuro che el to amor a Geovà l’è la meio rason par esser batesà,  e questa la ze la meio maniera de doperar la to vita.

18. Che domande te pol farte?

¹⁸ Alora, cossa veto dir se qualchedun el te domanda: ‘Te ndarè batesarte?’ Te toca a ti far questa dessision. Ma una roba che te pol domandarte la ze: ‘Parché che mi gnancora no me go batesà?’ (Ati 8:36) Ricòrdate de quel che ghemo imparà in questo stùdio: Prima, te ami quel che l’è vera e giusto. Seconda, te ami a Gesù Cristo. E tersa, el pi importante l’è che te ami a Geovà. Alora, domàndate: ‘Son premoso che rive el giorno quando tuti i ndarà parlar la verità e far quel che l’è giusto? Son contento de gaver Gesù come el me Rè e vao drio al so esémpio? Mi vui contentar a Geovà e obedir sol a lu?’ Alora, se te ghè rispondesto de si a queste domande, parché no te sì gnancora batesà? Ghen’è qualcossa che te intriga? — Ati 16:33.

19. Parché che no te ocore gaver paura de esser batesà? Spiega. (Gioani 4:34)

¹⁹ Pensar sora quel che Gesù el ga dito podarà giutarte a dessidir cossa far. (Ledi Gioani 4:34. f) Lu el ga dito che obedir a Geovà l’era compagno el magnar. Parché? Parché Gesù el savea che el magnar ne fà ben, cossita come obedir a Dio. Alora, ti te pol fidarte che obedirlo sempre sarà el meio, e che lu mai el ndaria domandarte de far qualcossa che te fesse mal. Geovà el ga dito che ghemo de esser batesadi. (Ati 2:38) Alora, compagno no te ghè paura de mandar do un bon magnar, no te ocore gaver paura de batesarte.

20. Cossa che ndaremo imparar nel pròssimo stùdio?

²⁰ Fursi arquanti i dise che no i ze gnancora stati batesadi parché no i ze mia pronti. E questa la ze la dessision pi importante che podemo far nela nostra vita. Par quela, te ghè de pensarghe sora questa dessision e far arquante robe vanti de esser batesà. Ma se te vol pròpio dedicar la to vita a Geovà, cossa te ghè de far? Nel pròssimo stùdio, ndaremo veder cossa pol giutarte a esser pronto par el batésimo.