1-2. Parché che no te ghè de restar desanimà se ancora te ghè de cambiar qualcossa par esser batesà? (Varda la ilustrassion dela prima pàgina.)

 PÉNSITO de esser batesà? Questa la ze una bela roba. Se te credi che te sì belche drio far quel che te ocore e i ansiani i pensa compagno, te podarè suito batesarte. Se te lo fè, te restarè tanto contento de servir a Geovà.

² Magari, pol esser che ti te sì nicorto o qualchedun el te ga dito che te toca ancora cambiar qualcossa par esser batesà. Alora, no stà restar desanimà. Parché? Parché ancora te pol cambiar quel che te ocore par esser batesà, no importa se te sì gióveno o pi vècio.

3. Cossa che un omo dela Etiòpia el ga domandà a Filipe, e cossa che fursi se domandemo? (Ati 8:36, 38)

³ Ledi Ati 8:36, b 38. c Un omo importante dela Etiòpia el ghe ga domandà a Filipe se ghen’era ancora qualcossa che el gavea de far par esser batesà. Lu el volea esser batesà. Ma, fursi se domandemo: ‘Sarà che quel omo l’era pronto par far questa desission importante?’

4. Parché che podemo dir che quel omo dela Etiòpia el volea imparar cada volta de pi sora le Scriture?

⁴ Quel omo dela Etiòpia ‘l’era drio ndar a Gerusalen par adorar a Dio’ nel témpio. (Ati 8:27) Alora, lu belche  el gavea acetà la religion dei giudei e gavea imparà tante robe sora Geovà e sora le Scriture Ebraiche. Magari, lu el volea imparar ancora de pi. Come che lo savemo? Quando Filipe lo ga cata par la strada, quel omo dela Etiòpia l’era drio leder le parole del profeta Isaia. (Ati 8:28) Cossita, invesse de imparar sol le verità importante e che le era fàcile de capir, lu el volea seitar imparar sora Dio.

5. Cossa che quel omo dela Etiòpia el ga fato dopo che el ga imparà sora le Scriture?

⁵ Quel omo el laorea par la regina dela Etiòpia e ‘el tendea de tuto quel che la gavea’. (Ati 8:27) Alora, sicuro che ghe tochea laorar tanto. Ma come el gavea imparà sora le Scriture, lu el ga volesto far quel che gavea imparà. Par quela, el se ga tolto tempo par far el viaio dela Etiòpia fin Gerusalen par adorar a Geovà nel tèmpio. Ghe ga volesto tanto tempo e soldi par far quel viaio lì. Ancora cossita, lu l’è ndato parché el volea adorar a Geovà.

6-7. Parché che quel omo dela Etiòpia el amea a Geovà cada volta de pi?

⁶ Filipe el ga insegnà a quel omo sora el Messia e tante altre verità importante. (Ati 8:34, 35) Cossita, quel omo dela Etiòpia l’è restà maraveià quando el ga imparà tuto quel che Gesù el gavea fato par lu. Alora, el so amor a Geovà e al so Fiol l’è restà ancora pi grando. E invesse de seitar adorar a Dio insieme ai giudei, lu el ga volesto esser batesà come un dissìpolo de Gesù. Filipe el ga visto che quel omo l’era pronto e lo ga batesà.

⁷ Quel omo dela Etiòpia el ga seità cognosser a Geovà e a meter in pràtica tuto quel che imparea. Par quela, lu el amea a Geovà cada volta de pi. Se te fè cossita, anca ti te podarè dir: “Cossa me intriga de esser batesà?” Adesso ndemo veder come ti te pol far compagno al so esémpio.

8. Cossa che le parole de Gioani 17:3 le mostra?

⁸ Ledi Gioani 17:3. d Arquanti i ga scominsià a studiar la Bìblia par causa de quel che dise questo testo. Ma le parole de Gesù le mostra che noantri ghemo de seitar a cognosser a Geovà. Par quela, noantri ndaremo seitar a imparar del “vero Dio” par sempre. (Ecl. 3:11) Cossita, deventaremo cada volta pi amighi de Geovà. — Sal. 73:28.

9. Cossa ghemo de far dopo de imparar le verità che le ze importante e fàcile de capir?

 ⁹ Quando te ghè scominsià cognosser a Geovà, te ghè imparà robe importante e fàcile de capir. Ma varda cossa che el apòstolo Paolo el ga scrito ai ebrei. Lu el ga dito che queste verità, che le ze fàcile de capir, le ze compagno al late che un bambin el beve. (Ebr. 5:12; 6:1) Lu no’l volea dir che queste robe le ze sensa valor. Invesse, el volea incoraiarli a studiar altre verità, anca che no le fusse fàcile de capir. Alora, domandate: ‘Gonti voia de seitar a studiar la Bìblia? Son premoso de imparar cada volta de pi sora Geovà e sora quel che lu el ndarà far?’

10. Parché che arquanti i ghe fà fadiga studiar?

¹⁰ Tanti i ghe fà fadiga studiar. Fursi, lori no i ga imparà come studiar quando i era nela scola. Par quela, pol esser che ancora i pensa che no i ze mia boni de imparar quel che i lede, o che no i sà come studiar. E ti, pénsito cossita? Alora, ricòrdate che Geovà el pol giutarte parché lu l’è el meio maestro che ghen’è.

11. Come che Geovà el mostra che l’è el “Grandioso Istrutor”?

¹¹ Geovà el dise che lu l’è el “Grandioso Istrutor”. (Isa. 30:20, 21) Lu l’è pròpio el meio istrutor che ghen’è parché el ne trata con passiensa, con bontà, el ne capisse e sempre el vol el meio par noantri. (Sal. 130:3) Geovà no’l vol che femo de pi de quel che semo boni. Ma ghemo de seitar a imparar. Parché? Parché lu el ne ga fato par imparar par sempre. Par quela che Geovà el ne ga dato el nostro sarvel e la voia de imparar cada volta de pi. (Sal. 139:14) Alora, l’è importante voler imparar de pi sora la Bìblia ancora adesso. (1 Pie. 2:2) Come che ti te pol farlo? Sfòrsate par sempre leder e studiar la Bìblia e pensa in come che ti te pol far meio el to stùdio. (Giosuè 1:8) Sicuro che, col aiuto de Geovà, te piaserà studiar la Bìblia e te sarè bon de imparar cada volta de pi.

12. Parché che te ghè de torte tempo par studiar sora la vita de Gesù?

¹² Te ghè de torte tempo par studiar e pensarghe sora la vita de Gesù. Parché? Parché el so esémpio el ndarà giutarte a seitar a servir a Geovà, anca cole dificoltà. (1 Pie. 2:21) Gesù el ga dito che i so dissìpoli i ndaria infrontar tanti problemi, ma che i saria boni de seitar fedeli a Geovà compagno a lu. (Luc. 14:27, 28; Gioani 16:33) Alora, sfòrsate par sempre studiar la so vita e pensa come che ti te pol far compagno a Gesù.

13. Cossa che ghemo de domandar a Geovà, e parché?

¹³ L’è importante seitar a studiar la Bìblia parché cossita, ndaremo cognosser de pi a Geovà e nostro amor e nostra fede in lu i restarà cada volta pi grandi. (1 Cor. 8:1-3) Ma ghemo de far de pi che sol studiar. Ne ocore domandar che Geovà el ne dae pi fede. (Luc. 17:5) Parché? Parché quando ghemo fede in quel che savemo sora Geovà, semo boni de meter in pràtica quel che imparemo. (Tia. 2:26) Alora, ghemo de pregar a Geovà, e podemo esser sicuri che lu el ndarà scoltarne.

14. Come che Piero el ga mostrà che l’è importante meter in pràtica quel che imparemo? (Varda anca la ilustrassion.)

¹⁴ El apòstolo Piero el ga parlà del esémpio de Noè par mostrar che l’è importante meter in pràtica quel che imparemo. Geovà el ga dito a Noè che el  ndaria mandar un Dilùvio par finir fora cole persone rugne. Ma sarà che Noè e la so fameia i saria salvi sol parché i savea che Geovà el ndaria mandar un Dilùvio? Nò, lori i gavea de obedir a Geovà. E savemo che Noè e la so fameia i ga obedio parché i ga pròpio ‘fato su la arca’. (1 Pie. 3:20; Ebr. 11:7) Par quela, Piero el ga dito che ‘el batésimo el salva anca a noantri’, compagno la arca che Noè el ga fato su. (1 Pie. 3:21) Alora, cossita come Noè e la so fameia i ga bio de laorar tanti ani par far su la arca, anca ti te te ghè de sforsarte de cambiar quel che te ocore par esser batesà.

15. Cossa che una persona la ga de far se la se ga pròpio ciamà grama?

¹⁵ La persona che la vol batesarse la ga de ciamarse grama dei so pecati. (Ati 2:37, 38) Se la persona la se ga pròpio ciamà grama de quel che la ga fato, la ndarà cambiar. Alora, la ga de fermarse de far qualcossa che disgusta a Geovà come, far imoralità, fumar sigri, dirghe su ai altri o parlar robe sporche. (1 Cor. 6:9, 10; 2 Cor. 7:1; Efe. 4:29) Se questa persona no la ze gnancora stata bona de cambiar, la ga de seitar a sforsarse. Ela la podarà domandarghe aiuto al fradel o ala sorela che ghe insegna la Bìblia o ai ansiani dela so congregassion. E se ancora la ze de star con so pare o so mare, la pol domandarghe che i ghe giute a cambiar quel che la ga de bisogno.

16. Cossa ghemo de far se volemo seitar adorar a Geovà?

¹⁶ L’è importante seitar adorar a Geovà. Alora, ghemo de sempre ndar e partissipar nele riunion. (Ebr. 10:24, 25) Se ti te sì belche drio predicar cola congregassion, proa farlo sempre che te pol. Te piaserà cada volta de pi parlar cole persone se te seiti predicar. (2 Tim. 4:5) E se te sì un gióveno e ancora te sì de star casa con to pare e to mare, sarà che ghe toca a lori ricordarte de ndar ala riunion e ala predicassion o sito bon de moverte fora ti sol? Queste robe le ze importante parché le mostra la to fede e el to amor a Geovà. E questo l’è un presente che te pol darghe a lu. (2 Pie. 3:11; Ebr. 13:15)  Geovà el resta tanto contento con tuto quel che femo de volentiera par lu. (Varda anca 2 Corinti 9:7.) E anca noantri restemo tanto contenti de dar el nostro meio a Geovà.

17-18. Cossa che ndarà giutarte a seitar sforsarte par esser batesà, e parché? (Proverbi 3:3-6)

¹⁷ Se te sì drio sforsarte par esser batesà, te ndarè infrontar tante dificoltà. Par esémpio, pol esser che arquante persone le ghe ride drio de quel che te credi, le te dise su o le vol che te te fermi de servir a Geovà. (2 Tim. 3:12) Fursi te sì drio sforsarte par fermarte de far una roba sbaliada, e ancora cossita, dele volte, te torni a farla. O te resti desanimà parché gnancora te sì stà bon de far tuto quel che te piaseria. Ma el to amor par Geovà el te giutarà a seitar sforsarte par esser batesà.

¹⁸ El to amor par Geovà l’è la roba pi bela che te ghè. (Ledi Proverbi 3:3-6. e) Questo amor ndarà giutarte a dàrghene fora con qualche dificoltà e seitar a servirlo. La Bìblia la mostra che anca Geovà el ama tanto so servi. Par quela, podemo esser sicuri che lu no’l va mai abandonarne o fermarse de amarne. (Sal. 100:5) E come semo stati fati cole medèsime qualità che lu, anca noantri podemo mostrarghe questo amor. (Gén. 1:26) Ma come?

19. Come che te pol mostrar che te ghe dè valor a quel che Geovà el fà par ti? (Gàlati 2:20)

¹⁹ Daghe valor a quel che Geovà el fà par ti. (1 Tes. 5:18) Cossa che pol giutarte? Tuti giorni, pensa in come che Geovà l’è drio mostrar che el te ama. Dopo, quando te preghi, ringràssia tuto quel che lu el ga fato par ti. Cossita, te sarè bon de veder che Geovà el te ama, compagno el apòstolo Paolo el ga capio. (Ledi Gàlati 2:20. f) Alora, pensa anca  come che ti te pol mostrar che te lo ami. El to amor par Geovà te giutarà a dàrghene fora cole dificoltà e seitar leal a lu. Cossita, te sarè bon de seitar a ndar ale riunion, a predicar e te mostrarè tuti giorni che te ami tanto to caro Pare.

20. (a) Cossa che te ghè de far se te vol dedicarte a Geovà? (b) Parché che questa dessision la ze tanto importante?

²⁰ Quando el to amor a Geovà el resta pi grando, te volarè dedicar to vita a lu. Alora, te farè una orassion, o sia, una promessa tanto spessial. De lì avanti, te ndarè sempre viver par Geovà, no importa cossa che ndarà suceder. E questa promessa te la fè sol una volta. De tute le dessision che te ndarè far, questa la ze la meio e la pi importante. (Sal. 50:14) Savemo che Sàtana el proarà fermarte de amar e de servir a Geovà. Ma no stà desistir! (Giò 27:5) Se te ghè un forte amor par Geovà, te sarè bon de far quel che te ghè prometesto a lu e te sarè cada volta pi amigo de Dio.

21. Parché che te gavarè una vita tanto bela dopo del batésimo?

²¹ Dopo che te fè la to dedicassion a Geovà, parla coi ansiani dela to congregassion par dirghe che te vol esser batesà. E ricòrdate che dopo de quel bel giorno, te ndarè scominsiar a servir a Geovà, e te podarè farlo par sempre. Par quela, seita a imparar sora Geovà par amarlo cada volta de pi. Cossita, te sarè bon de far quel che te ocore par esser batesà. Noantri volemo tanto che el to amor par Geovà e par Gesù el sìpia cada volta pi grando. Alora, te sarè bon de amarli par sempre!