1. Cossa che Davi el ga parlà sora Geovà?

SARÀ che podemo dir che Geovà l’è ùmile? Sicuro che si! Varda quel che el rè Davi el ga dito sora Geovà: “Ti te me salvi col to scudo, E la to umiltà la me fà gaver de pi valor.” (2 Sam. 22:36; Sal. 18:35) Pol esser che Davi el gavea in mente el giorno che el profeta Samuel lo ga untà par esser el rè de Israel. Davi el gavea sete fradei e lu l’era el pi gióveno de lori. Ancora cossita, Geovà lo ga scoliesto par esser el novo rè nel posto de Saul. — 1 Sam. 16:1, 10-13.

2. Cossa che ndaremo studiar?

² Sicuro che Davi el gavea el medèsimo sentimento de quel che el ga scrito el Salmo 113, che el ga dito sora Geovà: ‘Lu el se sbassa par vardar el cielo e la tera e el leva su el ùmile dela polver. Lu el leva su el poareto par sentarse coi prìnsipi.’ (Sal. 113:6-8) In questo stùdio, ndaremo parlar sora arquante situassion che Geovà el ga mostrà umiltà e cossa che podemo imparar del so esémpio. Anca, ndaremo imparar sora la umiltà coi esempi del rè Saul, del profeta Daniel e de Gesù.

3. Come che Geovà el ne vede e cossa che questo el prova?

³ Podemo esser sicuri che Geovà l’è ùmile quando vedemo la maniera che lu el trata i umani imperfeti. Geovà  el ne vede come i so adoradori ma anca el ne vede come i so amighi. (Sal. 25:14) Semo boni de esser amighi de Geovà sol parché el ga dato el so Fiol come sacrifìssio par i nostri pecati. Geovà el ga mostrà tanta misericòrdia e compassion par noantri! E tuto questo el prova che Geovà l’è un Dio ùmile!

4. Cossa che Geovà el ne ga dato e parché?

⁴ Ndemo veder nantra prova che Geovà l’è ùmile. Geovà l’è el Creador, alora, lu el ga el dirito de dir come cada un el ga de viver. Ma lu no’l fà questo. Lu el ne ga creà ala so imàgine e el ne ga dato la libertà de scòlier, ancora che semo pìcoli e fiachi davanti de lu. Lu no’l vol che lo servimo par obrigassion, ma par amor e parché capimo che l’è meio esser obedienti. (Deu. 10:12; Isa. 48:17, 18) L’è pròpio bon servir a un Dio che l’è tanto ùmile!

5. Come che Geovà el ne insegna a esser ùmili? (Vedi la ilustrassion dela capa.)

⁵ Geovà el ne insegna a esser ùmili par meso del so esémpio. Geovà l’è la persona che la sa de pi nel Universo, ancora cossita, el aceta el aiuto dei altri. Par esémpio, Geovà el ga assà che el so Fiol lo giutesse a crear tute le robe. (Pro. 8:27-30; Col. 1:15, 16) Ancora che Geovà el sìpia la persona pi poderosa che ghen’è, lu el dà responsabilità ai altri. Par esémpio, Geovà el ga designà Gesù par esser Rè del so Regno e el ga dato autorità ai 144 mila par governar con Gesù. (Luc. 12:32) Sicuro che Geovà el ga insegnà Gesù a esser Rè e Somo Sasserdote. (Ebr. 5:8, 9) Geovà anca l’è drio insegnar quei che i va governar insieme con Gesù. Ma, Geovà no’l ndarà mia controlar tute le robe che lori i ndarà far. Lu l’è sicuro che lori i sarà  boni de far quel che Lu el ga domandà. — Apo. 5:10.

6-7. Come che podemo imitar a Geovà?

⁶ Nostro Pare nel cielo no’l ga mia bisogno dei altri, ma ancora cossita el ghe dà laori de far. Alora, se Geovà el fà questo, imagina noantri! Sito un paron de fameia o un ansiano nela congregassion? Alora, imita a Geovà e daghe laori anca ai altri e fìdate che lori i ndarà farlo ben. Se te fè come Geovà, te gavarè la alegria de veder el laoro fato, anca te ndarè insegnar i altri e te vè giutarli a esser pi confianti. (Isa. 41:10) Cossa che quei che i ga autorità ancora i pol imparar con Geovà?

⁷ La Bìblia la dise che Geovà l’è interessà in quel che i àngeli i pensa. (1 Rè 22:19-22) Come un pare el pol imitar el esémpio de Geovà? Domanda ai to fioi se lori i ga idea de come far meio i laori de casa, e se la ze una bona idea, fà come che lori i ga parlà.

8. Come che Geovà el ga mostrà passiensa con Abraon e Sara?

⁸ Geovà anca el mostra che l’è ùmile parché lu l’è passiente. Par esémpio, Lu el scolta quando i so servi i ghe domanda qualcossa sora una dessision che el ga fato. Abraon el ga bio dubi sora la dessision de Geovà de finir fora con Sodoma e Gomora. Abraon el ga parlà sora le so preocupassion a Geovà e Lu lo ga scoltà. (Gén. 18:22-33) Quando Geovà el ga dito che Sara la gavaria un fiol, ela la ga ridesto dela promessa. Ma Lu, no l’è restà disgustà e gnanca inrabià con ela. (Gén. 18:10-14) Invesse, Geovà la ga tratada con rispeto.

9. Se te sì pare o ansiano, come che te pol imitar a Geovà?

⁹ Se te sì pare o ansiano, come che te pol imitar a Geovà? Cossa che te fè quando i to fioi o i fradei dela congregassion i te domanda qualcossa sora una dessision che te ghè fato? Invesse de difender la to dessision, proa capir quel che lori i pensa. Le fameie e la congregassion le ze benefissiade quando quei che i ga autorità i ze ùmili come Geovà. Fin adesso, ghemo visto come che podemo imitar a Geovà. Adesso, ndaremo imparar come podemo esser ùmili par meso de arquanti esempi dela Bìblia.

10. Come che Geovà el ne insegna?

¹⁰ Geovà, el nostro “Grandioso Istrutor”, el ne insegna par meso dei esempi che el ne ga dato nela Bìblia. (Isa. 30:20, 21) Nela Bìblia, ghen’è esempi de persone che le ga mostrà qualità che le ghe piase a Dio, come la umiltà. Ma ghen’è anca esempi de persone che no le ga mostrà queste qualità e la Bìblia la parla quel che ga sucedesto con lore. Quando studiemo e pensemo sora questi esempi, noantri imparemo tanto. — Sal. 37:37; 1 Cor. 10:11.

11. Cossa che ga sucedesto col rè Saul e cossa che imparemo col so bruto esémpio?

¹¹ Proa pensar in quel che ga sucedesto col rè Saul. Nel scomìnsio, lu l’era un gióveno ùmile. Lu el savea quel che lu el podea far e quel che no’l podea e anca lu el pensea che no l’era bon de acetar de pi responsabilità. (1 Sam. 9:21; 10:20-22) Ma dopo che Saul l’è stà scoliesto come rè, lu el ga scominsià a esser orgolioso. Una volta, Saul el ga perso la passiensa e no’l ga volesto spetar el profeta Samuel. Invesse de fidarse che Geovà el ndaria giutar el pòpolo, Saul el ga fato un sacrifìssio che lu no’l podea mia far. Cossa che ga sucedesto dopo? Saul el ga perso la aprovassion  de Geovà e lu l’è stà rigetà come rè. (1 Sam. 13:8-14) Cossa che imparemo col so esémpio? Volemo far tanto sforso par mai esser orgoliosi come Saul.

12. Come che Daniel el ga mostrà che l’era ùmile?

¹² Adesso, ndaremo parlar del bel esémpio del profeta Daniel. Daniel sempre l’è stà un servo ùmile e lu sempre el ndea in serca dela orientassion de Geovà. Quando Geovà el ga doperà Daniel par spiegar el sogno de Nabudonosor, lu el ga dato el onor par Geovà. (Dan. 2:26-28) Cossa che imparemo? Se i altri i parla ben de un discorso che ghemo fato o se femo un bel laoro de predicassion, ghemo de dar tuto el onor par Geovà. Ghemo de ricordarse che tuto quel che semo boni de far l’è col so aiuto. (Fil. 4:13) Quando femo cossita, imitemo a Daniel. Adesso, vedemo come che podemo imitar el bel esémpio de Gesù.

13. De acordo con Gioani 5:19, 30, cossa che imparemo col esémpio de Gesù?

¹³ Ancora che Gesù el fusse el Fiol perfeto de Dio, lu el mostrea che el gavea bisogno del aiuto de Geovà. (Ledi Gioani 5:19, * 30. *) Gesù mai el ga volesto gaver la autorità de so Pare. Filipensi 2:6 dise che Gesù ‘mai el ga pensà in esser compagno a Dio’. Lu el savea quel che el podea e quel che no’l podea far e el rispetea la autorità de so Pare.

14. Cossa che Gesù el ga fato quando i ghe ga domandà par far una roba che lu no’l podea far?

¹⁴ Pensa in quel che Gesù el ga fato quando Tiago, Gioani e la so mare i ghe ga domandà un posto ala so drita e ala so sanca nel Regno. Gesù no’l gavea autorità par dessider questo, alora, suito el ga dito che sol el so Pare del cielo el podea dessider. (Mat. 20:20-23) Gesù el savea quel che el podea e quel che no’l podea far. Gesù l’è stà ùmile parché el ga fato sempre quel che Geovà el ghe ga domandà. (Gioani 12:49) Come che podemo imitar el bel esémpio de Gesù?

15-16. Come che podemo meter in pràtica el consìlio de 1 Corinti 4:6?

 ¹⁵ Noantri podemo imitar la umiltà de Gesù quando metemo in pràtica el consìlio de 1 Corinti 4:6, che dise: “Gavé de far sol quel che l’è scrito.” Alora, quando i altri i ne domanda un consìlio, no ndaremo parlar quel che pensemo o la prima roba che la ne vien in mente. Invesse, ndaremo giutar la persona par meso dela Bìblia e dele publicassion. Cossita, ndaremo mostrar che se fidemo in quel che Geovà el dise e nò in noantri stessi. Se semo ùmili, saremo sicuri che i consili de Geovà i ze sempre meio che i consili che podemo dar. — Apo. 15:3, 4.

¹⁶ Quando semo ùmili, noantri demo onor a Geovà. Ma anca volemo esser ùmili, parché questo ne fà felici e ne giuta a gaver bone amicìssie. Ndaremo parlar sora questo adesso.

17. Parché che quei che i ze ùmili i ze pi felici?

¹⁷ Se semo ùmili semo pi felici. Parché? Parché quando capimo quel che semo boni de far o nò, semo grati par qualche aiuto che ricevemo. Par esémpio, ricòrdate de quando Gesù el ga guario i diese leprosi? Sol un de lori l’è tornà par ringrassiar a Gesù. Lu no’l saria mia bon de esser guario sensa el aiuto de Gesù. La umiltà de quel omo lo ga fato ringrassiar e dar glòria a Geovà par el aiuto che el ga ricevesto. — Luc. 17:11-19.

18. De acordo con Romani 12:10, come che la umiltà la ne giuta a darse ben coi altri?

¹⁸ La persona che la ze ùmile la ze bona de darse ben coi altri e de far bone amicìssie. Parché? Parché le persone che le ze cossita le ze bone de veder le qualità dei altri e le se fida in lori. Persone ùmile anca le resta  contente quando le vede che i altri i ze drio tender ben dele so designassion. Lore no le ga dificoltà de lodar e darghe onor ai altri. — Ledi Romani 12:10. *

19. Parché che no l’è mia bon esser orgoliosi?

¹⁹ Ma una persona orgoliosa la ze mia cossita. Persone orgoliose le cata pi fadiga lodar i altri e le vol sempre esser lodade. Lore le fà comparassion e sempre le proa esser meio che i altri. Invesse de giutar i altri a far el so laoro, lore le pensa: ‘Se te vol una roba ben fata, te toca fàrsela.’ Lore le pensa che la so maniera de far le robe la ze sempre la meio. Le persone orgoliose anca le vol esser pi importante e le ga invìdia dei altri. (Gàl. 5:26) L’è tanto fadiga una persona orgoliosa gaver veri amighi. Se ghemo una s-cianta de orgòlio rento de noantri, ghemo de domandar a Geovà che el ne giute a ‘far nova la nostra mente’. Cossita, la semensa del orgòlio no la va far radise nel nostro cuor. — Rom. 12:2.

20. Parché che ghemo de esser ùmili?

²⁰ Semo tanto grati par gaver el esémpio de Geovà! Vedemo che lu l’è tanto ùmile e volemo imitarlo. Anca volemo imitar el esémpio dele persone ùmile che ghen’è nela Bìblia e che le ga obedio a Geovà. Se femo cossita, demo a Geovà el onor e la glòria che sol Lu el mèrita. (Apo. 4:11) Se femo questo, saremo amighi de Geovà par sempre, parché Lu el ama le persone ùmile.