1. Parché che Geovà el ga creà la vita?

VANTI de crear Gesù e i àngeli, Geovà l’era Lu sol. Ma lu no’l se sentia triste, parché Geovà no’l ga bisogno dei altri par esser felice. Ancora cossita, par causa del so amor el volea che altri i gavesse vita e i fusse felici. Alora, Geovà el ga scominsià a crear. — Sal. 36:9; 1 Gio. 4:19.

2. Come che Gesù e i àngeli i se ga sentio de veder le creassion de Geovà?

² Prima, Geovà el ga creà una persona par laorar con Lu, che l’è stà so Fiol, Gesù. Lu el ga giutà el so Pare a ‘crear tute le altre robe’ e anca i àngeli. (Col. 1:16) Come che Gesù el se ga sentio de giutar el so Pare? Sicuro che lu l’è restà tanto contento. (Pro. 8:30) E come che i àngeli i se ga sentio de veder tuto questo? Sicuro che i ze restadi tanto contenti. Lori i era insieme quando Gesù, che l’era un laorador con tanta abilità, el ga giutà Geovà a crear el cielo e la Tera. I àngeli i ‘osea par lodar a Geovà’ intanto che Lu l’era drio crear la Tera e tute le altre robe. Sicuro che i àngeli i ze restadi tanto contenti quando i ga visto la ùltima e pi importante creassion, che la ze stata i umani. (Giò 38:7; Pro. 8:31, nota) Tute le creassion de Geovà le mostra el so amor e la so sabedoria. — Sal. 104:24; Rom. 1:20.

3. De acordo con 1 Corinti 15:21, 22, cossa che el sacrifìssio de Gesù el fà par i umani?

 ³ Geovà el volea che i umani i vivesse par sempre nel bel paradiso che el gavea creà. Ma Adon e Eva no i ga obedio el so amoroso Pare e cossita tuti umani i ga eredità el pecato e la morte. (Rom. 5:12) Cossa che Geovà el ga fato? Pena dopo che Adon e Eva i ga desobedio, lu el ga dito quel che el ndaria far par salvar i umani. (Gén. 3:15) Geovà el daria so Fiol Gesù come risgate. Cossita, par meso del sacrifìssio de Gesù tuti i umani saria lìberi del pecato e dela morte. Tuti i podaria scòlier servir a Geovà e ricever la vita eterna. — Gioani 3:16; Rom. 6:23; ledi 1 Corinti 15:21, 22. *

4. Che domande ndaremo risponder?

⁴ Fursi se femo tante domande sora la ressuression. Come par esémpio, come sarà la ressuression? Sarà che i nostri parenti e amighi i va tornar a viver come che i era vanti? Che bele robe gavaremo cola ressuression? Cossa che ela la ne insegna sora el amor, la sabedoria e la passiensa de Geovà? Ndaremo risponder cada una de queste domande.

5. Parché che podemo dir che i morti no i sarà ressussitadi tuti nte un colpo?

⁵ Nel Paradiso, Geovà el va doperar el so Fiol par ressussitar le persone. Ma sarà che i morti i sarà ressussitadi tuti nte un colpo? Nò. Parché se tuti i ressussitesse nte un colpo, saria fadiga mantegner tuto organisà. Geovà sempre el fà tuto de maniera organisada. Lu el sa che quando le robe le ze tuto  a posto, alora ghen’è pace. (1 Cor. 14:33) Quando Geovà el ga laorà con Gesù par far i cieli e la Tera lu l’è stà pròpio passiente e sàbio. Geovà el ga creà cada roba nel so tempo giusto. Gesù el ndarà far come el so Pare quando lu laorar insieme coi umani par pareciar la Tera e ricever i ressussitadi.

6. De acordo con Ati 24:15, anca chi che sarà ressussità?

⁶ Quei che i sarà salvi nel Armagedon i gavarà un laoro tanto importante. Lori i gavarà de insegnar i ressussitadi sora el Regno e le lege de Dio. Parché che i gavarà de far questo? Parché quasi tuti che i tornarà a viver i fà parte dei “ingiusti”. (Ledi Ati 24:15. *) Questi “ingiusti” i gavarà de far tanti cambiamenti nela vita par viver par sempre. Sicuro che gavaremo tanto de insegnar ale persone che no le cognosse a Geovà. Sarà che cada persona che ressussitar la gavarà nantra persona par insegnarla, come femo nte un stùdio dela Bìblia ancoi? Sarà che i ressussitadi i sarà designadi par qualche congregassion? Sarà che lori i ndarà imparar e i ndarà anca lori insegnar quei che i ndarà ressussitar dopo de lori? Noantri ghemo de spetar par veder. Ancoi, sol semo sicuri che nel fin dei Mila Ani del Regno de Cristo ‘tuti i umani i gavarà la cognossensa de Geovà’. (Isa. 11:9) Ndaremo laorar tanto nei mila ani, ma sarà un laoro tanto bel de far!

7. Parché che el pòpolo de Dio el sarà bon de capir le dificoltà dei ressussitadi?

⁷ Nei Mila Ani del Governo de Cristo, tuti i servi de Geovà i seitarà far cambiamenti nela so vita. Lori i sarà boni de capir i ressusssitadi, parché i sa che ghe vol sforso par far i cambiamenti nela vita e obedir a Geovà. (1 Pie. 3:8) I ressussitadi i ndarà veder che el pòpolo de Geovà l’è ùmile e che el fà sforso par contentar a Geovà. Cossita, anca lori i gavarà voia de far parte de questo pòpolo. — Fil. 2:12.

8. Parché che podemo dir che saremo boni de ricognosser i nostri amighi e parenti ressussitadi?

⁸ Noantri podemo dir che ndaremo ricognosser i nostri amighi e parenti che i sarà ressussitadi. Parché? Parché quando pensemo nele ressuression che le ga belche sucedesto, resta pi fàcile de capir. Noantri vedemo che Geovà el ga fato la persona tornar a viver come che la era poco vanti de morir. La medèsima persona, cola medèsima maneira de pensar e parlar. Proa pensar nel esémpio de Làsaro. Lu l’era morto fea quatro giorni e romai l’era drio smarsirse. Ma quando Gesù lo ga ressussità, le so sorele lo ga ricognossesto suito e anca lu el ga ricognossesto lore. (Gioani 11:38-44; 12:1, 2) Anca, ricorda che Gesù el ga dito che la persona che la more la ze come se la fusse drio dormir e la ressuression la ze come desmissiarse. (Mat. 9:18, 24; Gioani 11:11-13) Quando la persona la se desmìssia la ze compagna de quando la ze ndata dormir. La persona la se ricorda ancora de tuto. Alora, la ze la medèsima persona.

9. Parché che i morti no i sarà ressussitadi belche perfeti?

⁹ Geovà el promete che nel Paradiso nissuni i va dir: “Son malà.” (Isa. 33:24; Rom. 6:7) Cossita, quei che i sarà ressussitadi i gavarà un corpo novo e bona salute. Ma lori no i sarà belche perfeti. Parché se i fusse perfeti  no saria mia fàcile par i amighi e i parenti ricognósserli. Podemo dir che ghe meterà mila ani par i umani esser pròpio perfeti. Sol nel fin dei mila ani che Gesù el va darghe indrio el Regno al so Pare. Alora, Geovà el gavarà fato tuto quel che el volea par meso del so Regno, anca darghe la perfession ai umani. — 1 Cor. 15:24-28; Apo. 20:1-3.

10. Come che te vè sentirte quando te ndarè ricever i ressussitadi?

¹⁰ Imagina quando te ndarè ricever un parente o un amigo che te ami tanto. Cossa che te vè far? Sarà che te vè rider o piander de alegria? O te vè cantar par ringrassiar a Geovà? Te pol esser sicuro che la ressuression la te farà amar ancora de pi a Geovà e a Gesù. Noantri riceveremo questo presente maraveioso sol par causa del amor e dela bontà de lori!

11. De acordo con Gioani 5:28, 29, cossa che ndarà suceder con quei che i obedisse a Geovà?

¹¹ Sicuro che i ressussitadi i sarà tanto contenti de pin pian, assar indrio la vècia personalità e far i cambiamenti par obedir a Geovà. Quei che i farà questi cambiamenti i gavarà una ressuression de vita. Ma Geovà no’l va assar che le persone che no le vol cambiar le intrighe la pace del Paradiso. — Isa. 65:20; ledi Gioani 5:28, 29. *

12. Come che sarà la vita de quei che i ndarà viver nela Tera?

¹² Quando el Regno governar tuta la Tera, el pòpolo de Dio el sarà de acordo con quel che dise Proverbi 10:22: “La benedission de Geovà la ne fà siori, e ela no la ghe donta gnanca un dolor.” Par meso del spìrito santo, i servi de Geovà i deventarà perfeti e i ndarà imitar cada volta meio a Cristo. (Gioani 13:15-17; Efe. 4:23, 24) Lori i gavarà cada volta pi salute e anca i sarà pi perfeti. La vita la sarà tanto felice! (Giò 33:25) Ma sarà che pensar sora la ressuression pol giutarne anca ancoi?

13. De acordo con Salmi 139:1-4, come che la ressuression la mostra che Geovà el cognosse ben cada un de noantri?

¹³ Come ghemo visto fin adesso, le persone le tornarà a viver coi so ricordi e le sarà come le era vanti de morir. Cossa che questo vol dir? Vol dir che Geovà el te ama tanto e che lu l’è atento a tuto quel che ti te pensi, te senti, te parli e te fè. Lu l’è bon de ricordarse de tuto questo! Se Geovà el gavesse de ressussitarte, saria tanto fàcile par Lu farte tornar a viver come te eri vanti de morir. El rè Davi l’era sicuro che Geovà el se interessa tanto par cada un de noantri. (Ledi Salmi 139:1-4. *) Parché che l’è bon saver che Geovà el ne cognosse tanto?

14. Parché che l’è bon saver che Geovà el ne cognosse tanto ben?

¹⁴ Saver che Geovà el ne cognosse ben ne giuta a no restar preocupadi. Come cossita? Ricòrdate che Geovà el se importa tanto con ti. Geovà el vede come che cada persona la ze. Alora Lu el ghe piase de come che ti te sì. Lu l’è atento a quel che te infronti nela vita.  Che bon che l’è saver de questo! Questo el mostra che Geovà l’è sempre darente de ti par giutarte. Cossita, mai te vè sentirte ti sol. — 2 Cró. 16:9.

15. Come che la speransa dela ressuresion la mostra che Geovà l’è pròpio sàbio?

¹⁵ Sàtana el dopera la paura dela morte par far le persone tradir i so amighi e abandonar quel che lore le crede. Ma i servi de Geovà no i ga mia paura dela morte. Noantri savemo che se i nostri nemighi i ne copa, Geovà el pol darne la vita nantra volta. (Apo. 2:10) Semo sicuri che lori mai i sarà boni de farne restar distanti de Geovà. (Rom. 8:35-39) La speransa dela ressuression la mostra che Geovà l’è pròpio sàbio! Parché? Parchè la ne dà coraio par infrontar fin la morte e anca la assa Sàtana sensa saver cossa far contra noantri.

16. (a) Che domande te ghè de farte? (b) Cossa che le risposte de queste domande te giutarà a saver?

¹⁶ Se i nemighi de Geovà i dise che i va coparte, cossa farìssito? Ti te te fidi che Geovà el ndarà ressussitarte? Proa domandarte: ‘Mostro che me fido in Geovà nele pìcole dessision?’ (Luc. 16:10) Nela me maneira de viver, mostro che meto el Regno in primo posto e me fido che Geovà el va tender de quel che mi go de bisogno? (Mat. 6:31-33) Se te ghè rispondesto si a queste domande, alora questo el prova che te te fidi in Geovà par infrontar qualche situassion. — Pro. 3:5, 6.

17. (a) Come che la speransa dela ressuression la mostra che Geovà l’è passiente? (b) Come podemo mostrar che semo grati par la passiensa de Geovà?

¹⁷ Geovà el ga belche marcà el giorno e la ora par finir cola bruta situassion de questo mondo. (Mat. 24:36) Par causa dela so passiensa, Lu el va spetar fin la ora giusta. Ancora che el sìpia premoso par ressuscitar i morti, lu el ga passiensa. (Giò 14:14, 15) Lu l’è drio spetar la ora giusta par scominsiar la ressuression. (Gioani 5:28) Podemo imparar tante robe dela passiensa de Geovà. Par esémpio, tante persone le ga bio la oportunità de ‘ciamarse grame’, e anca noantri! (2 Pie. 3:9) Geovà el vol che tante persone le gàpie la vita eterna. Ma come che podemo mostrar che semo grati par la so passiensa? Ghemo de far el nostro meio par giutar quei che i ga “la giusta disposission par la vita  eterna”. Ghemo de giutarli a amar e servir a Geovà. (Ati 13:48) Cossita, anca lori i sarà benefissiadi par la passiensa de Geovà.

18. Parché che ghemo de esser passienti coi altri?

¹⁸ Geovà el sa che saremo perfeti sol nel fin dei mila ani. Alora, come Lu l’è passiente lu el va perdonar noantri fin el fin dei mila ani. Par quela che anca noantri ghemo de esser passienti coi altri e vardar le so bone qualità. Varda el esémpio de una sorela. El so sposo el ga scominsià a sentirse tanto mal par causa dela ansietà e el se ga fermà de ndar ale riunion. Ela la ga dito: “Mi son restada tanto triste. Tuto quel che noantri gavea in mente de far, adesso no se podea far pi gnente.” Ma ancora cossita, questa amorosa sposa la ga bio passiensa col so sposo. Ela la se ga fidà in Geovà e no la ga desistio. Ela la ga fato come Geovà. No la ga vardà i problemi ma si le qualità del so sposo. E ela la ga dito: “El me sposo el ga tante bone qualità e pin pian e con sforso lu l’è drio restar meio.” Cossita, imparemo che ghemo de esser passienti cola nostra fameia e coi fradei dela congregassion che i ze drio far sforsi par infrontar le so dificoltà.

19. Cossa che ghemo de seitar a far?

¹⁹ Gesù e i àngeli i ze restadi tanto contenti cola creassion dela Tera. Adesso, proa imaginar la felicità de lori quando la Tera la sarà piena de umani perfeti che i ama e i serve a Geovà. Anca imagina la alegria che i untadi e Gesù i gavarà de veder tante bele robe suceder qua nela Tera. (Apo. 4:4, 9-11; 5:9, 10) No ghen sarà pi le malatie, la tristessa e gnanca la morte, alora sarà tanto bel piander de alegria e nò par causa del sofrimento. (Apo. 21:4) Alora, seita a imitar el amor, la sabedoria e la passiensa de Geovà. Cossita, no importa la dificoltà o el problema che te ghè de infrontar, mai te ndarè perder la alegria. (Tiago 1:2-4) Sicuro che ghemo de ringrassiar a Geovà par la promessa che “ghen sarà una ressuression”! — Ati 24:15.