1. Cossa che Geovà el dà a cada un dei so servi?

GEOVÀ el ama tuti i so servi, par quela che cada un de noantri el ga un posto nela so organisassion. Stesso che cada un el ga el so posto, tuti noantri ghemo tanto valor par Geovà e tuti ghemo bisogno un dei altri. El apòstolo Paolo el ne giuta a capir cossa che questo vol dir. Come?

2. De acordo con Efesi 4:16, parché che ghemo de rispetar un al altro e laorar in union?

² Nel testo de questo stùdio, Paolo el ga dito che no podemo vardar par nantro fradel e dir: “No go bisogno de ti.” (1 Cor. 12:21) Parché che ghemo de rispetar un al altro e laorar insieme? Parché cossita ghen sarà pace nela congregassion. (Ledi Efesi 4:16. *) Quando noantri laoremo in union coi nostri fradei, la congregassion la resta pi forte e sentimo che ghen’è amor intrà de noantri.

3. Cossa che ndaremo imparar in questo stùdio?

³ Come che noantri podemo mostrar rispeto par i fradei nela congregassion? In questo stùdio, ndaremo imparar: (1) Come che i ansiani i pol rispetar i altri ansiani? (2) Come che noantri podemo mostrar rispeto e amor par quei che no i ze maridadi? (3) Come che podemo mostrar rispeto par quei che ancora no i parla tanto ben la nostra léngua?

4. De acordo con Romani 12:10, cossa che i ansiani i ga de far?

⁴ Tuti i ansiani i ze designadi par el spìrito santo. Cada ansiano el ga le so pròpie abilità. (1 Cor. 12:17, 18) Arquanti fradei i ze ansiani a poco tempo e no i ga ancora tanta speriensa. Altri i ga belche una bela età e i ga problemi de salute, alora no i ze pi boni de far quel che i fea vanti. Ma stesso cossita, gnanca un de questi ansiani i varda a quel altro e el dise: “No go bisogno de ti.” Pitosto, lori i fà quel che el apòstolo Paolo el ga dito in Romani 12:10. * — Ledi.

5. (a) Come che un ansiano el pol mostrar che el rispeta i altri ansiani? (b) Parché che l’è importante far questo?

⁵ Un ansiano el mostra che el rispeta i altri ansiani quando li scolta con atension. Una oportunità de far questo l’è quando i ansiani i ga de riunirse par parlar sora assunti importanti. Parché? Varda cossa che l’è scrito nela Sentinela de 1.º de otobre de 1988: “I ansiani i sa che Cristo el pol doperar el spìrito santo par giutar qualchedun dei ansiani a ricordar dei prinsipi bìblichi che i ga de bisogno par far una dessision importante. (Ati 15:6-15) Cristo el pol doperar el spìrito santo par giutar tuti i ansiani, e nò sol un.”

6. (a) Come che i ansiani i mostra che i ga rispeto intrà de lori? (b) Parché che questo l’è bon par la congregassion?

⁶ Un ansiano el pol mostrar che el rispeta i altri ansiani quando lori i ga le so riunion. Ma come che el pol mostrar rispeto? Par esémpio, lu no l’è sempre el primo a parlar, lu no’l seita parlar tuto el tempo e gnanca el pensa che la so idea la ze sempre la meio. Invesse, lu el parla quel che el pensa, ma sempre de maniera ùmile e anca quando i altri i parla, lu li scolta con atension. Lu sempre el parla quel che la Bìblia la dise e  lu l’è disposto a obedir quel che el “schiavo fedele e prudente” el dise. (Mat. 24:45-47) Quando lori i mostra rispeto e amor un al altro, el spìrito santo el ndarà giutarli a far le meio dessision par la congregassion. — Tiago 3:17, 18.

7. Cossa che Gesù el pensea de quei che no i era maridadi?

⁷ Nela congregassion, ghen’è quei che i ze maridadi, ma anca tanti che no i ze. Cossa che ghemo de pensar sora quei che no i ze maridadi? Vedemo cossa che Gesù el pensea de lori. Gesù no’l se ga maridà parché lu el ga doperà tuto el so tempo e le so forse nela so designassion qua nela Tera. Gesù mai el ga dito che una persona la gavaria de esser maridada o nò, par seghir a lu. Ma lu el ga dito che arquanti i ndaria scòlier no maridarse. (Mat. 19:11, 12; vedi la nota de stùdio in Mateo 19:12.) Gesù el rispetea quei che i gavea dessidio no maridarse. Gesù no’l pensea che lori i era drio perder qualcossa nela vita o i era manco importanti che i altri.

8. De acordo con 1 Corinti 7:7-9, cossa che Paolo el ga insentivà i cristiani a far?

⁸ Come Gesù, Paolo el ga scoliesto no maridarse par doperar el tempo che el gavea par predicar. Ma Paolo mai el ga dito che l’è sbalià una persona maridarse. Lu el ga dito che questa la era una dessision de cada persona. Ma l’è vera che Paolo el ga anca insentivà i cristiani a restar sensa maridarse parché i podaria far de pi par Geovà. (Ledi 1 Corinti 7:7-9. *) Alora, l’è sicuro che Paolo no’l pensea che quei che no i era maridadi i era manco importanti che i altri. Vedemo questo parché lu el ga scoliesto el gióveno Timòteo par tender de grande responsabilità. * (Fil. 2:19-22) Cossita, noantri capimo che qualche persona la pol ricever un privilègio, no importa se la ze maridada o nò. — 1 Cor. 7:32-35, 38.

9. Cossa che ghemo de pensar sora maridarse o nò?

 ⁹ Gesù e Paolo mai i ga dito che i cristiani i ga de maridarse o nò. Alora, cossa che ghemo de pensar sora questo assunto? Nela Sentinela de 1º de otobre de 2012 l’è scrito: ‘Podemo dir che esser maridadi e no esser maridadi i ze presenti de Geovà . . . Geovà no’l pensa che quel che no l’è maridà el ga de sentir vergogna o restar disgustà.’ Alora, tuti noantri ghemo de rispetar el posto che quei che no i ze maridadi i ga nela congregassion.

10. Come che podemo mostrar rispeto par quei che no i ze maridadi?

¹⁰ Ghemo de ricordarse che arquanti i ga dessidio no maridarse. Altri i volaria maridarse, ma no i ga ancora cognossesto la persona giusta. E ghen’è altri fradei che i ze védovi. Come che podemo mostrar rispeto par quei che no i ze maridadi? Mostremo rispeto par lori, par no domandarghe parché che no i se ga maridà ancora. Anca no saria bel voler catarghe un moroso o una morosa. Sicuro che lori i restaria disgustadi se noantri féssino questo sensa lori domandar aiuto. (1 Tes. 4:11; 1 Tim. 5:13) Adesso, vedemo quel che i nostri fradei e sorele, che no i ze maridadi, i ga parlà.

11-12. Parché che questi fradei i ze restadi disgustadi?

¹¹ Un superintendente de sircuito, che no l’è maridà, el ga dito che ghen’è tante robe bone de restar sensa maridarse. Ma lu el resta disgustà quando i fradei e sorele i ghe domanda: “Parché che no te sì maridà?” Un fradel che no l’è maridà, che el laora in Betel, el ga dito: “Arquanti fradei i me dà de capir che una persona che no la ze maridada no la pol esser felice o che restar sensa maridarse l’è un problema e nò una roba bona.”

¹² Una sorela che no la ze maridada, che la laora in Betel, la ga dito: “Arquanti i pensa che quei che no i ze mia maridadi i ze sempre in serca de catar un moroso. Una volta, Betel me ga designà par far un laoro in nantra cità. Mi ero nela casa de una sorela e suito la me ga parlà sora due fradei dela so congregassion. Ela la me ga dito che no la volea catarme un moroso. Ma quando semo rivadi nela riunion, suito ela la me ga fato cognósserli. Noantri tre no savéino gnanca cossa far.”

13. Cossa che ga incoraià una sorela?

¹³ Una sorela nò maridada che la laora in Betel la ga dito: “Mi cognosso pionieri che no i ze maridadi che i ga sempre metesto el servìssio a Geovà in primo posto. Lori i vol sempre giutar i altri e i ze tanto contenti nel so servìssio a Geovà. Lori i giuta tanto la congregassion. E lori no i pensa che i ze meio che quei altri e gnanca i se sente disgustadi parché no i se ga mia maridà.” L’è par quela che se sentimo tanto ben nela congregassion! Alora, no bisogna sentirte sensa valor e gnanca sentirte pi importante che i altri. Basta saver che tuti nela congregassion i te ama.

14. Come che mostremo rispeto par quei che no i ze maridadi?

¹⁴ Quei che no i ze maridadi i vol che i fradei dela congregassion i dae valor par le so qualità e nò se i ze maridadi. Alora, cossa che ghemo de far? Invesse de pensar che lori i ze drio perder qualcossa, noantri ghemo de dar valor ala so lealtà a Geovà. Se femo cossita, lori no i ndarà mai sentir che semo drio dir: “No go bisogno de ti.” (1 Cor. 12:21) Pitosto, lori i ndarà sentir che demo valor a lori e al posto che i ga nela congregassion.

15. Cossa che arquanti fradei i ga dessidio far?

¹⁵ Tanti fradei i ga dessidio imparar una nova léngua e cambiar de congregassion. No l’è stà fàcile, parché i ga bio de cambiar tante robe nela so vita. Lori i ga assà la congregassion dela so léngua par ndar giutar nte una congregassion de nantra léngua. (Ati 16:9) Lori i ga fato questo parché i vol far de pi par Geovà. Fursi, ndarà méterghe tempo par imparar la nova léngua, ma stesso cossita lori i ze una benedission par la congregassion. Lori i giuta tanto la congregassion par meso dele so bele qualità e de quel che lori i fà. L’è sicuro che questi fradei i ga tanto valor par noantri!

16. Cossa che l’è importante par designar un fradel come ansiano o servo ministerial?

¹⁶ I ansiani no i ga de pensar che un fradel no’l pol esser ansiano o servo ministerial parché ancora no’l ga imparà a parlar ben la léngua. I ansiani i ndarà veder se el fradel l’è belche drio far quel che el ga de bisogno par esser un ansiano o servo ministerial.— 1 Tim. 3:1-10, 12, 13; Tito 1:5-9.

17. Cossa che arquante fameie le ga de dessider quando le va de star in nantro paese?

¹⁷ Tante fameie le ga bio de ndar via del so paese parché romai l’era massa fadiga de viver là o par ndar in serca de laoro. Alora, i fioi i ghe tocarà studiar nte una scola che parla la léngua del novo paese e i genitori i ghe tocarà imparar la nova léngua par catar laoro. Ma pol esser che nel paese che i ze adesso ghen’è una congregassion che parla la so léngua. Alora, ndove che lori i gavarà de ndar ale riunion? Saria meio ndar ale riunion nela léngua del paese o nela so léngua?

18. De acordo con Gàlati 6:5, come che mostremo rispeto par la dessision del paron dela fameia?

¹⁸ El paron dela fameia el ndarà dessider ndove la fameia la ndarà partissipar dele riunion. Lu el ga de pensar in quel che l’è meio par la so fameia. (Ledi Gàlati 6:5. *) Alora, noantri ghemo de rispetar la so dessision e ricever la fameia con tanto amor nela nostra congregassion. — Rom. 15:7.

19. Cossa che el paron dela fameia el ga de pensar quando i va de star in nantro paese?

¹⁹ Pensa nte una situassion cossita: Una fameia la ze de star in nantro paese e la va nte una congregassion dela so pròpia léngua. Ma i so fioi no i capisse ben la léngua dei so genitori parché nela scola lori i impara la léngua del paese. Alora, pol esser fadiga par lori capir quel che i scolta nele riunion e gaver una forte amicìssia con Geovà.  Cossa che un paron de fameia el ga de far nte una situassion cossita? Sarà che saria meio i fioi imparar ben la léngua dei genitori o cambiar par una congregassion dela léngua che i fioi i capisse ben? El paron dela fameia el ga de pregar a Geovà e pensar in quel che l’è meio par la relassion dei fioi con Geovà. I fradei i ga de rispetar la so dessision e ricéverli con tanto amor nela congregassion.

20. Come che podemo mostrar che rispetemo i nostri fradei che i ze drio imparar una nova léngua?

²⁰ In tante congregassion, vedemo che ghen’è fradei che i ze drio sforsarse tanto par imparar una nova léngua. Pol esser fadiga par lori parlar quel che i ze drio pensar. Invesse de vardar quel che lori no i ze boni de far, ghemo de vardar le so bele qualità. Cossita, noantri saremo boni de veder el grando amor che i ga par Geovà, ndaremo rispetarli e mostrar che lori i ze valiosi par noantri. Alora, stesso che no i sìpia ancora boni de parlar la nostra léngua, noantri no ndaremo dirghe: “No go bisogno de ti.”

21-22. Che grando privilègio Geovà el ne dà?

²¹ Geovà el ne dà el grando privilègio de gaver un posto nela so organisassion. Alora, no importa se semo òmini, done, maridadi o nò, gióveni, pi veci o quei che ancora no i parla ben una lèngua, tuti semo pressiosi par Geovà e par i fradei. — Rom. 12:4, 5; Col. 3:10, 11.

²² Sicuro che ghemo imparà tanto dela ilustrassion del apòstolo Paolo sora el corpo umano! Alora, ghemo de far sforso par meter in pràtica quel che ghemo imparà de questa ilustrassion. Cossita, ndaremo mostrar che demo tanto valor al nostro posto e al posto dei altri nela organisassion de Geovà.