1. Che privilègio che noantri ghemo?

L’È UN grando privilègio far parte dela organisassion de Geovà. Podemo adorar al vero Dio insieme con persone manse e felice. Ma qual che l’è el to posto nela organisassion?

2. Che ilustrassion Paolo el ga fato in arquante dele so carte?

² Podemo imparar tanto sora questo assunto par meso de una ilustrassion che el apòstolo Paolo el ga fato in arquante dele so carte. Nela ilustrassion, Paolo el compara la congregassion a un corpo. Lu anca el compara cada persona ale parte del corpo. — Rom. 12:4-8; 1 Cor. 12:12-27; Efe. 4:16.

3. Che tre robe ndaremo imparar sora la ilustrassion che Paolo el ga fato?

³ In questo stùdio, ndaremo imparar tre robe importante sora la ilustrassion che Paolo el ga fato. Prima, ndaremo veder che cada un de noantri el ga un posto * nela organisassion de Geovà. Seconda, ndaremo veder cossa che podemo far se pensemo che no semo pressiosi nela organisassion. E tersa, ndaremo veder parché che ghemo de far el nostro meio rento dela organisassion.

4. Cossa che Paolo el volea dir cole parole de Romani 12:4, 5?

⁴ La prima roba che imparemo dela ilustrassion de Paolo l’è che tuti noantri ghemo un posto importante nela fameia de Geovà. Paolo el ga dito: “Un corpo el ga tante parte e cada parte la ga la so funsion. Cossita, anca noantri, ancora che semo tanti, semo un sol corpo in union con Cristo e tuti i ga bisogno un dei altri.” (Rom. 12:4, 5) Cossa che Paolo el volea dir? Lu el volea dir che cada un de noantri el ga un posto difarente nela organisassion, ma tuti i ga tanto valor.

5. Che presente Geovà el dà par la organisassion?

⁵ Quando scoltemo qualcossa sora quei che i ga un posto nela organisassion, suito pensemo in quei che i ga la responsabilità de ténderla. (1 Tes. 5:12; Ebr. 13:17) L’è vera che questi òmini i ze un presente che Geovà el dà par meso de Cristo! (Efe. 4:8) Questi òmini i ze quei che i fà parte del Corpo Governante, quei che i li giuta, i fradei dele Comission de Filiai, i superintendenti de sircuito, i istrutori dele scole bìbliche, i ansiani e i servi ministeriai. Lori i ze designadi par el spìrito santo e i ga de tender dele pressiose piégore de Geovà e giutar a far pi forte la congregassion. — 1 Pie. 5:2, 3.

6. De acordo con 1 Tessalonissensi 2:6-8, che sforso i fradei designadi par Geovà i fà?

⁶ Fradei i ze designadi par el spìrito santo par tender de diverse responsabilità. Cossita come el corpo el ga bisogno dele man, dei pié e dele altre parte del corpo par laorar ben, anca la organisassion la ga bisogno de questi fradei. Lori no i vol farse veder, ma i vol giutar a far pi forte la fede dei fradei e dele sorele. (Ledi 1 Tessalonissensi 2:6-8. *) Questi òmini i obedisse a Geovà e i se sforsa tanto par giutarne. Ringrassiemo a Geovà par gaver questi òmini intrà de noantri!

7. Che benedission i ga i fradei che i dopera la so vita par predicar e far dissìpoli?

⁷ Nela organisassion de Geovà, ghen’è anca quei che i ze designadi come missionari, pionieri spessiai e regolari. Questi fradei de tuto el mondo i ga scoliesto doperar la so vita par predicar e far dissìpoli. Cossita, lori i ze boni de giutar le persone a seghir a Gesù Cristo. Ancora che no i gàpie tante robe materiai, Geovà li benedisse tanto. (Mar. 10:29, 30) Noantri amemo tanto questi fradei! Noantri semo grati a Geovà parché questi fradei i ze parte dela so organisassion.

8. Parché che tuti i predicadori i ze pressiosi par Geovà?

⁸ Ma sarà che sol i fradei che ghemo parlà fin adesso i ga un posto nela organisassion? Sicuro che nò. Tuti i predicadori i ze tanto pressiosi par Geovà e par la organisassion. (Rom. 10:15; 1 Cor. 3:6-9) Parché? Ghemo de ricordarse che el prinsipal ogetivo dela organisassion l’è far dissìpoli del nostro Signor, Gesù Cristo. (Mat. 28:19, 20; 1 Tim. 2:4) Alora, tuti quei che i fà sforso de meter la predicassion in primo posto, sìpia batesadi o nò, i ze pressiosi par Geovà. — Mat. 24:14.

9. Parché che le sorele le ze tanto pressiose?

 ⁹ Geovà el dà tanto valor ale done che le ze spose, mare, védove, a quele che no le ze maridade e che lo serve con lealtà. Par quela che anca lore le ga un posto importante nela organisassion. La Bìblia la ga tanti esempi de done che le ga assà Geovà contento. Lore le ze un bel esémpio de sabedoria, fede, zelo, coraio, generosità e bone òpere. (Luc. 8:2, 3; Ati 16:14, 15; Rom. 16:3, 6; Fil. 4:3; Ebr. 11:11, 31, 35) L’è sicuro che restemo tanto grati de gaver sorele che le mostra queste bele qualità nela nostra congregassion!

10. Parché che quei de pi età i ze pressiosi par Geovà?

¹⁰ Restemo pròpio contenti de gaver fradei de pi età nele congregassion. Tanti de questi fradei i ga doperà tuta la so vita par servir a Geovà. Altri i ga imparà la verità quando i gavea belche una bela età. Ma par causa dela età, lori i ga tanti problemi de salute. Alora, no i ze pi boni de far tuto quel che i volea nela predicassion e nela congregassion. Ancora cossita, lori i dopera tuta la so forsa par incoraiar e insegnar i altri. Noantri podemo imparar tanto cole speriense de lori. L’è sicuro che questi fradei i ze tanto pressiosi par noantri e par Geovà. — Pro. 16:31.

11-12. Come che noantri se sentimo de veder el bel esémpio dei gióveni?

¹¹ Ndemo parlar un poco sora i nostri gióveni. No l’è mia fàcile viver nte un mondo che le persone le fà quel che Sàtana el vol. (1 Gio. 5:19) Ma restemo pròpio incoraiadi de veder el sforso che lori i fà. I nostri gióveni i partissipa nele riunion, nela predicassion e i difende con coraio i insegnamenti dela Bìblia. Valtri, gióveni, gavé un posto tanto importante nela organisassion! — Sal. 8:2.

¹² Ma arquanti dei nostri fradei e sorele i pensa che no i ze pressiosi nela organisassion de Geovà. Alora, cossa che pol giutarli?

13-14. Parché che arquanti i pensa che no i ze pressiosi par la congregassion?

¹³ Adesso, ndemo veder la seconda roba che podemo imparar dela ilustrassion de Paolo. Ancoi, tanti i pensa che no i ze pressiosi par la congregassion de Geovà. Paolo el dise: “Se el pié el parlesse: ‘Come mi no son la man, mi no son parte del corpo,’ ancora cossita el saria parte del corpo. E se la récia la parlesse: ‘Come mi no son el òcio, mi no son parte del corpo,’ ancora cossita la saria parte del corpo.” (1 Cor. 12:15, 16) Cossa che Paolo el volea dir?

¹⁴ Se noantri vardemo i altri sol par far comparassion con lori, noantri no saremo boni de veder le nostre qualità. Par esémpio, fursi ghen’è nela to congregassion fradei che i insegna tanto ben ai altri, che i ze organisadi e i tende ben dela congregassion. Te pol pensar che no te sì bon de far come lori. L’è vera che se te pensi cossita, mostra che te sì ùmile. (Fil. 2:3) Ma stà atento parché se te seiti vardar quel che i altri i ze boni de far sol par compararte con lori, alora te vè restar desanimà. Cossita come Paolo el ga parlà, te pol pensar che no te sì pressioso par la congregassion. Alora, cossa che te ghè de far?

15. De acordo con 1 Corinti 12:4-11, cossa che ghemo de capir sora le nostre abilità?

¹⁵ Nel primo sècolo, Geovà el ga dato abilità a tanti cristiani par meso del spìrito santo. Ma tuti no i ricevea le medèsime abilità. (Ledi 1 Corinti 12:4-11. *) Geovà el  ghe dea abilità difarente, ma tuti lori i era pressiosi. Ancoi, noantri no ricevemo abilità come i primi cristiani. Ma, ancora che cada un el gàpia una abilità difarente un del altro, tuti noantri semo pressiosi par Geovà.

16. De acordo con Gàlati 6:4, cossa che ghemo de far?

¹⁶ Pitosto de compararte coi altri, fà quel che el apòstolo Paolo el ga dito: “Ma, stà atento a quel che ti te sì bon de far. Alora, ti te restarè contento con ti stesso e nò in comparassion con nantra persona.” — Gàl. 6:4.

17. Parché che l’è bon far quel che Paolo el ga dito?

¹⁷ Paolo el ga dito che noantri ghemo de star atenti a quel che semo boni de far. Se femo cossita, saremo boni de veder le nostre abilità. Par esémpio, pol esser che un ansiano no’l fà boni discorsi, ma el predica tanto ben. O pol esser che no’l sìpia tanto organisà, ma el sìpia tanto amoroso e tuti i ghe piase de parlar con lu. O fursi lu l’è un fradel che el mostra tanta ospitalità. (Ebr. 13:2, 16) Quando semo boni de veder le nostre qualità e abilità, noantri restemo pi contenti. Cossita, podemo giutar la congregassion e invesse de sentir invìdia, ndaremo restar contenti cole abilità che i nostri fradei i ga.

18. Cossa che ne giuta a far meio el laoro de predicassion?

¹⁸ No importa quel che femo nela congregassion, noantri ghemo de sforsarse de farlo cada volta meio. E Geovà el ne giuta a far questo par meso dela so organisassion. Par esémpio, nele riunion del meso dela stimana, lu el ne insegna a far meio el laoro de predicassion. Sito drio meter in pràtica quel che te impari in queste riunion?

19. Cossa che pol giutarte a far la Scola de Vangelisadori del Regno?

¹⁹ Nantra maniera che Geovà el ne insegna la ze par meso dela Scola de Vangelisadori del Regno. Tuti i fradei e sorele che i ga intrà 23 e 65 ani, che i ze drio servir nel tempo integral, i pol far questa scola. Fursi te pensi che no te sarè mai bon de farla. Cossa che pol giutarte? Invesse de pensar parché che no te pol farla, pensa parché che te vol farla. Alora, scrivi quel che te ghè de bisogno par esser bon de farla. Col aiuto de Geovà e tanto sforso, te sarè bon de far quel che te parea tanto fadiga.

20. Cossa che podemo imparar de Romani 12:6-8?

²⁰ La tersa roba che imparemo dela ilustrassion de Paolo la ze in Romani 12:6-8. * (Ledi.) Nantra volta Paolo el ga parlà che cada persona nela congregassion la ga difarente abilità. Ma, adesso lu el parla che ghemo de doperar la abilità che ghemo par giutar e far pi forte la congregassion.

21-22. Cossa che imparemo del esémpio de Robert e Felice?

²¹ Varda el esémpio de un fradel che ndemo ciamar de Robert. Lu el ga servio in nantro paese e dopo l’è stà designà par laorar nel Betel del so paese. Lu el savea che no l’era drio cambiar de designassion parché el gavea fato qualcossa sbaliada, ma ancora cossita el  ga dito: “Mi go bio pensamenti negativi par tanti mesi parché me sentia sensa valor e go fin pensà de ndar via de Betel.” Ma cossa che lo ga giutà a esser contento nantra volta? Un ansiano el ga ricordà Robert che le designassion che el gavea vanti lo gavea parecià par la designassion de adesso. Alora Robert el ga capio che el gavea de fermarse de pensar sol nel passà e consentrarse nela designassion che el gavea adesso.

²² Anca el fradel Felice Episcopo el ga infrontà una dificoltà come questa. In 1956, lu e la so sposa i ze ndati servir nel sircuito nela Bolìvia dopo de far la Scola de Gileade. In 1964, lori i ga bio un fiol. Felice el dise: “L’è stà pròpio difìcile assar indrio la nostra pressiosa designassion. Mi son restà un ano disgustà. Ma col aiuto de Geovà, mi go cambià la me maniera de pensar e go scominsià a consentrarme nele me responsabilità come pare.” Te séntito come Robert o Felice? Sito desanimà parché no te ghè pi i privilegi che te gavei una volta? Se te ghè questi sentimenti, càmbia la to maniera de pensar e conséntrate in quel che te pol far adesso par servir a Geovà e ai fradei. Gàpia sempre tanto de far e dopera le to abilità par giutar i altri. Cossita, ti te restarè contento e te vè giutar la congregassion.

23. (a) L’è importante pensar sora che? (b) Cossa che ndaremo veder nel pròssimo stùdio?

²³ Tuti noantri semo pressiosi par Geovà. Lu el vol che femo parte dela so fameia. L’è tanto importante pensar come che podemo giutar i nostri fradei e dar el nostro meio nel posto che Geovà el ne ga dato nela congregassion. Ma come che podemo mostrar che rispetemo el posto che i altri i ga nela congregassion de Geovà? Nel pròssimo stùdio, ndaremo veder sora questo.