STÙDIO 30
Mostra a Geovà che te vol far parte dela so fameia
‘Ti te lo ghè fato un pochetin pi pìcolo che i àngeli e te ghè dato a lu una corona de glòria e onor.’ — SAL. 8:5, nota.
CÀNTICO 124 Sempre leai
COSSA CHE NDAREMO IMPARAR? *
1. Cossa che fursi pensemo quando vedemo tuto quel che Geovà el ga creà?
DAVI el ga pregà a Geovà e el ghe ga domandà: ‘Quando vardo i to cieli, i laori dele to man, la luna, le stele, me domando chi che semo par ricordarte e tender de noantri?’ (Sal. 8:3, 4) Fursi, anca noantri se sentimo pròpio gnente quando vardemo el grando Universo che Geovà el ga creà. Par quela, restemo maraveiadi de veder che el se preocupa con noantri. In questo stùdio, ndaremo imparar che Geovà nò sol el se ga preocupà cole prime persone, Adon e Eva, ma anca li ga assà far parte dela so fameia.
2. Che laoro Geovà el ga dato a Adon e Eva?
2 Geovà l’è un Pare amoroso e el spetea che i so primi fioi, Adon e Eva, i gavesse fioi e i tendesse ben dela Tera. Par quela che el ghe ga dito: “Gavé de gaver tanti fioi, impienir la tera e gavé de esser paroni dela tera.” (Gén. 1:28) Se Adon e Eva i fesse questo, lori e i so fioi i podaria far parte dela fameia de Geovà par sempre.
3. Parché podemo dir che Adon e Eva i era persone importante nela fameia de Geovà?
3 Quando Geovà el ga creà Adon e Eva, lu el ghe ga dato una vita tanto bela e lori i era persone pròpio importante nela so fameia. Nel Salmo 8:5 Davi el ga dito: ‘Ti te lo ghè fato un pochetin pi pìcolo che i àngeli e te ghè dato a lu una corona de glòria e onor.’ I umani no i ga el medèsimo poder, saver e abilità che i àngeli. (Sal. 103:20) Ma lori i ze sol ‘un pochetin pi pìcoli che i àngeli’. Alora, l’è sicuro che restemo maraveiadi de pensar in questo!
4. (a) Cossa che ga sucedesto con Adon e Eva? (b) Cossa che ndaremo imparar in questo stùdio?
4 Adon e Eva i ga desobedio a Geovà e par quela no i ga podesto pi far parte dela so fameia. Par causa de lori, tuti i so fioi i patisse. Geovà ancora el vol che i umani obedienti i sìpie i so fioi par sempre. In questo stùdio, ndaremo imparar: ‘Cossa che Geovà el ga fato par mostrar che ghemo tanto valor par lu? Come che podemo mostrar che volemo far parte dela fameia de Geovà? Che benedission i fioi de Geovà i gavarà nela Tera par sempre?’.
COME GEOVÀ EL GA MOSTRÀ CHE EL GHE DÀ VALOR AI UMANI?
Come Geovà el ga mostrà che ghemo tanto valor par lu? (Vedi i paràgrafi 5 a 11.) *
5. Come podemo mostrar che semo grati de esser creadi cole medèsime qualità de Dio?
5 Geovà el ne ga creà cole medèsime qualità de lu. (Gén. 1:26, 27) Geovà el ne ga fato de una maniera che podemo gaver le medèsime qualità de lu. Se ghemo qualità come el amor, compassion, lealtà e giustìssia, podemo far parte dela fameia de Geovà. (Sal. 86:15; 145:17) Quando femo sforso par gaver queste qualità, mostremo a Geovà che semo grati de esser creadi cossita e anca ghe demo onor. (1 Pie. 1:14-16) Quando femo questo, la nostra vita la ze pi bela e felice.
6. Come che la maniera che Geovà el ga creà la Tera mostra che lu el ghe dà tanto valor ale persone?
6 Geovà el ga creà un bel posto par noantri. Tanto tempo vanti de Geovà crear i umani, el ga parecià la Tera par lori. (Giò 38:4-6; Ger. 10:12) Quando Geovà el vardea tuto quel che el gavea creà, el vedea che tuto l’era tanto bon! (Gén. 1:10, 12, 31) Geovà l’è tanto amoroso e generoso, par quela che el ga fato tante robe che ne assa contenti. (Sal. 104:14, 15, 24) Geovà anca el ga dato ale persone la autorità sora tute le robe che lu el ga creà nela Tera. (Sal. 8:6) Dio el vol che le persone le sìpia perfete e le reste contente de tender de tuto quel che el ga fato, par sempre. Te seiti a ringrassiar a Geovà par questa bela speransa?
7. Come Giosuè 24:15 mostra che le persone le ga la libertà de scòlier?
7 Geovà el ne ga dato la libertà de scòlier. Alora, podemo scòlier quel che volemo far dela nostra vita. (Ledi Giosuè 24:15. *) Questa libertà pol giutarne a far tante bone dessision. Par esémpio, podemo scòlier servir a Geovà e quando scoliemo far questo, lo assemo tanto contento. (Sal. 84:11; Pro. 27:11) Vedemo come Gesù el ga doperà ben la so libertà de scòlier.
8. Come che Gesù el ga doperà ben la so libertà de scòlier?
8 Gesù e i so apòstoli i era tanto strachi e i ze ndati fin un posto par riposar un pochetin. Alora, tante persone le ze ndate drio a lori parché le volea scoltar quel che Gesù el insegnea. Ma, Gesù no’l se ga mia inrabià con lore parché quele persone le ghe fea pecà. Par quela, lu el ga scominsià a insegnarghe tante robe. (Mar. 6:30-34) Come che podemo far come Gesù? Podemo scòlier far quel che l’è meio ai altri, invesse de pensar in noantri. Par esémpio, podemo doperar el nostro tempo e la nostra forsa par giutar ai altri. Se femo questo, ghe demo onor a Geovà e mostremo che volemo far parte dela so fameia. — Mat. 5:14-16.
9. Che capassità Geovà el ga dato ale persone?
9 Geovà el ga dato ale persone la capassità de gaver fioi e el laoro de insegnarghe a amar e a servir a Geovà. Geovà el ga dato tante abilità ai àngeli, ma no’l ghe ga dato mia la capassità de gaver fioi. Insegnar ai fioi sora Geovà l’è un laoro sacro e Geovà el se fida che i genitori i ndarà far questo laoro polito. Alora, i genitori i ga de dar tanto valor a questo. (Efe. 6:4; Deu. 6:5-7; Sal. 127:3) Geovà el giuta i genitori a slevar i fioi par meso dela Bìblia, dele publicassion, dei vìdei, dele mùsiche e dei artìcoli nel site jw.org. Questo ne assa pròpio sicuri che Geovà e Gesù i ghe piase tanto dei gióveni. (Luc. 18:15-17) Quando i genitori i se fida in Geovà e i se sforsa par slevar ben i so cari fioi, Geovà el resta tanto contento. Cossita, i genitori i pol giutar i so fioi a far parte dela fameia de Geovà par sempre.
10-11. Cossa che Geovà el ne dà par meso del sacrifìssio de Gesù?
10 Geovà el ga dato la vita del so Fiol amà par noantri tornar a far parte dela so fameia. Come ghemo visto nel paràgrafo 4, Adon e Eva i ga assà de far parte dela fameia de Dio e anca i so fioi. (Rom. 5:12) Parché? Parché lori i ga scoliesto desobedir a Dio. Ma cossa che ndaria suceder con tute le persone che le ndaria nasser dopo de Adon e Eva? Geovà el ga dato el so ùnico Fiol come sacrifìssio, e cossita 144.000 umani obedienti i podea far parte dela fameia de Dio. (Rom. 8:15-17; Apo. 14:1) Quel che Geovà el ga fato mostra che el ga un grando amor par le persone. — Gioani 3:16; Rom. 5:19.
11 I 144.000 che i ga la speransa de viver nel cielo, i ze drio far sforso par obedir a Dio. Ma ghen’è anca altri milioni de persone che i ze drio far questo, e i speta esser fioi de Dio dopo dela prova nel fin dei mila ani. (Sal. 25:14; Rom. 8:20, 21) Par quela che ancoi queste persone belche le ciama a Geovà, el so Creador, de “Pare”. (Mat. 6:9) Anca quei che i sarà ressussitadi i podarà far parte dela fameia de Geovà se i impara sora lu e i lo obedisse.
12. Cossa che ndaremo imparar adesso?
12 Fin qua, ghemo visto arquante robe che mostra che Geovà el ghe dà tanto valor ale persone. Par esémpio, lu el ga scoliesto persone par far parte dela so fameia e viver nel cielo. Lu anca el dà la speransa a tute le altre persone obediente de esser so fioi nel novo mondo. (Apo. 7:9) Adesso ndaremo imparar sora cossa che ghemo de far par mostrar che volemo far parte dela so fameia par sempre.
MOSTRA A GEOVÀ CHE TE VOL FAR PARTE DELA SO FAMEIA
13. Cossa che ghemo de far se volemo far parte dela fameia de Dio? (Marco 12:30)
13 Servi a Geovà de tuto el to cuor. (Ledi Marco 12:30. *) Dio el ne ama tanto e el ne ga dato tanti presenti, come la capassità de amarlo. Noantri mostremo che lo amemo, quando ‘obedimo ai so comandamenti’. (1 Gio. 5:3) Par esémpio, par meso de Gesù, Geovà el ne ga dato el comandamento de far dissìpoli e batesarli. (Mat. 28:19) Lu el ne ga anca dato el comandamento de amar un al altro. (Gioani 13:35) Quei che i obedisse a Geovà i podarà far parte dela so fameia. — Sal. 15:1, 2.
14. Come che podemo mostrar che amemo ai altri? (Mateo 9:36-38; Romani 12:10)
14 Mostra amor ai altri. El amor l’è la pi bela qualità de Geovà e lu el ne ga amà vanti de noantri cognosserlo. (1 Gio. 4:8-10) Noantri femo come Geovà quando amemo ai altri. (Efe. 5:1) Noantri mostremo amor come Geovà quando giutemo ai altri a imparar sora lu intanto che no riva el fin. (Ledi Mateo 9:36-38. *) Cossita, anca lori i pol far parte dela fameia de Geovà. Ma come che podemo seitar a mostrar amor par lori quando i deventa nostri fradei? (1 Gio. 4:20, 21) Par esémpio, quando un fradel el fà qualcossa che ne assa disgustadi, no ndaremo pensar che el ga fato aposta. Invesse, ghemo de darghe onor e pensar che lu l’è pi importante che noantri. — Ledi Romani 12:10; * Fil. 2:3.
15. Ghemo de mostrar misericòrdia e bontà a chi?
15 Sìpia misericordioso e bondoso con tute le persone. Se volemo ciamar Geovà de nostro Pare, ghemo de meter in pràtica tuto quel che la Bìblia la dise. Par esémpio, Gesù el ga dito che ghemo de esser misericordiosi e bondosi con tute le persone, fin coi nostri nemighi. (Luc. 6:32-36) Ma se l’è fadiga far questo, ghemo de imparar a pensar e a far le robe compagno a Gesù. Alora, quando se sforsemo par obedir a Geovà e far come Gesù, mostremo a Geovà che volemo far parte dela so fameia par sempre.
16. Cossa che no ghemo de far nela fameia de Geovà?
16 Sìpia un bon esémpio nela fameia de Geovà. Nte una fameia, el fradel pi gióveno fursi el vol far le robe come el so fradel pi vècio. Se el fradel pi vècio l’è bravo e el mete in pràtica quel che el impara dela Bìblia, el sarà un bel esémpio par el so fradel pi gióveno. Ma se quel pi vècio el fà robe sbaliade, fursi el pi gióveno el ghe vae drio. La medèsima roba la pol suceder nela fameia de Geovà. Par esémpio, se un fradel el scomìnsia a parlar mal de Geovà o dela so organisassion, far robe imorai o far altre robe sbaliade, arquanti i pol scominsiar a ndarghe drio al so esémpio. Par causa de questi fradei, arquante persone le pol parlar o pensar robe rugne dela fameia de Geovà. (1 Tes. 4:3-8) Alora, no ghemo de ndar drio ai esempi rugni che i pol intrigar la nostra amicìssia col nostro caro Pare Geovà.
17. Cossa che mai ghemo de pensar, e parché?
17 Fìdate in Geovà e nò nei soldi o nele robe. Geovà el promete che se lo obedimo e lo metemo in primo posto nela nostra vita el ndarà darne de magnar, de vestir e un posto de star. (Sal. 55:22; Mat. 6:33) Noantri savemo che se obedimo a Geovà, podemo sentir la vera pace che vien de lu. (Fil. 4:6, 7) Alora, no ghemo de pensar che i soldi o le altre robe i pol assarne tranquili o farne felici. Par quela che anca se ghemo i soldi par comprar tante robe, ghemo de pensar se ghemo el tempo e la forsa par doperarle. Ghemo de ricordarse che Geovà el ne ga dato un laoro par far e no volemo che gnente ne intrighe de farlo. Ghemo anca de domandarse: ‘Sarà che mi ghe dao massa valor ale robe che go?’. Noantri no volemo mai esser come el gióveno che no’l ga volesto servir a Geovà e esser so fiol parché el dea massa valor ale poche robe che el gavea. — Mar. 10:17-22.
I FIOI DE GEOVÀ I SARÀ BENEDIDI PAR SEMPRE
18. Che benedission le persone obediente le gavarà?
18 Le persone che le obedisse a Dio le gavarà le benedission de amar e adorar a Geovà par sempre. Par meso del governo de Dio, la Tera la tornarà a esser un paradiso come la era nel scomìnsio e tute le persone le restarà contente de tenderla. Gesù el ndarà finir fora con tuti i problemi che i ze vegnesti fora par causa de Adon e Eva. Geovà el ndarà ressussitar milioni de persone e lori i podarà viver con salute perfeta. (Luc. 23:42, 43) Gavaremo anca la benedission de deventar perfeti e de gaver la glòria e el onor cossita come Davi el ga scrito. — Sal. 8:5.
19. Cossa che te vol sforsarte de far?
19 Se te ghè la speransa de viver nela Tera, te sì drio spetar una roba maraveiosa. Geovà el te ama tanto e el vol che te fae parte dela so fameia. Alora, sfòrsate par assar Geovà contento e gàpia sempre in mente le bele promesse che el te ga fato. Sìpia grato par el privilègio de adorar el to Pare Geovà e daghe valor ala speransa che te ghè de lodarlo par sempre!
CÀNTICO 107 Geovà el ne insegna a amar
^ paràgrafo 5 Una fameia la sarà felice quando el omo el fà el so laoro de paron con amor, la dona lo giuta, i fioi i obedisse i genitori e tuti i se giuta intrà de lori. La medèsima roba la sucede cola fameia de Geovà. Lu el speta che femo arquante robe par far parte dela so fameia par sempre.
^ paràgrafo 7 (Giosuè 24:15) Adesso, se valtri pensé che no l’è mia bon servir a Geovà, fé la vostra scólia. Valtri gavé de scòlier se valtri ndaré servir ai dèi dei vostri antenati che i era de quel’altra banda del rio Eufrate o ai dèi dei amorei che i ze nel posto ndove che valtri sì de star. Ma mi e la me fameia ndaremo servir a Geovà.
^ paràgrafo 13 (Marco 12:30) Te ghè de amar a Geovà, el to Dio, con tuto el to cuor, con tuta la to ànima, con tuta la to mente e con tuta la to forsa.
^ paràgrafo 14 (Mateo 9:36-38) Vedendo le moltitùdine el ga sentio compassion de lore, parché le era maltratade e butade de una banda a l’altra come piegore sensa pastor. 37 Lu el ga dito ai so dissìpoli: “La racolta la ze pròpio granda, ma i laoradori i ze pochi. 38 Alora, domandé al Signor dela racolta che el mande de pi laoradori par la So racolta.”
^ paràgrafo 14 (Romani 12:10) Mostré amor con afeto un par el altro. Sforséve de dar onor un par el altro.
^ paràgrafo 59 ILUSTRASSION: Un omo e una dona i ze boni de mostrar amor e compassion un al altro e ai fioi parché Dio li ga creà cole medèsime qualità che lu. Lori i ama a Geovà e i ze pròpio grati de gaver la capassità de gaver fioi. Alora, lori i se sforsa par giutar i fioi a amar e a servir a Geovà. Lori i dopera un vìdeo par spiegar ai fioi parché Geovà el ga dato la vita de Gesù come sacrifìssio. Lori anca i insegna ai fioi che in Paradiso ndaremo tender dela Tera e dele bèstie par sempre.
