1. Come che tanti i ze drio far el so meio par Geovà?

NOANTRI ghemo tanto laoro de far in questi ùltimi giorni. (Mat. 24:14; Luc. 10:2; 1 Pie. 5:2) Tuti noantri volemo far el nostro meio nel laoro a Geovà. Par esémpio, tanti i ze drio sforsarse par far de pi nela predicassion, par servir come pionieri, servir in Betel o nele costrussion. Tanti fradei anca i ze drio sforsarse par deventar servi ministeriai o ansiani. (1 Tim. 3:1, 8) Sicuro che Geovà l’è contento de vederli far de pi in quel che ghe ocore! — Sal. 110:3; Isa. 6:8.

2. Cossa che pol suceder quando no ghemo ricevesto un laoro che volarìssino nela organisassion?

² Fursi restemo disgustadi parché ancora no ghemo ricevesto i laori che volarìssino nela organisassion. O fursi restemo desanimadi parché no podemo farli par causa dela età o de nantra roba. (Pro. 13:12) Varda quel che ga sucedesto con Melissa. * Ela la volea tanto laorar in Betel o far la Scola par Vangelisadori del Regno. Melissa la ga dito: “Adesso mi son massa vècia par far la petission. Par quela che, dele volte, resto disgustada parché no posso pi far queste robe.”

3. Cossa che arquanti i ga de far vanti de ricever altri laori nela congregassion?

³ Arquanti gióveni, che i ze tanto bravi, i ga tanta voia de laorar e giutar nela congregassion. Ma vanti de far questo, lori i ga de esser pi passienti. Lori i ga anca de pensar de pi vanti de far le robe e gaver ancora de pi rispeto  par i altri. Se lori i se sforsa par gaver bele qualità, i fradei i ndarà fidarse de darghe de pi laori nela congregassion, fursi nte una ora che lori gnanca i speta. Varda el esémpio de Nick. Quando el gavea 20 ani, el volea tanto esser un servo ministerial. Alora, lu l’è restà tanto disgustà quando no i ghe ga dato questo laoro. Lu el ga pensà che no l’era drio far gnente polito. Ma lu el ga seità a far el meio che el podea, e ancoi el laora nte una Comission de Filial.

4. Cossa che ndaremo veder in questo stùdio?

⁴ Sito disgustà parché no te pol ancora far qualche roba che te volarissi nela organisassion? Se questo l’è drio suceder con ti, parla a Geovà come che te te senti. (Sal. 37:5-7) Te pol anca domandar a bravi fradei che lori i te giute a far ancora de pi, e sfòrsate par far quel che i dise. Se te fè questo, fursi te ndarè ricever o far i laori che te vol tanto nela organisassion. Ma pol esser che te suceda compagno ala Melissa, che ghemo pena parlà. Fursi adesso no te pol far un laoro che te piaseria tanto. Cossa che pol giutarte a no seitar disgustà? In questo stùdio, ndaremo veder: (1) ‘Cossa che pol assarte pròpio contento?’ (2) ‘Come esser ancora pi contento?’ (3) ‘Cossa che ancora podemo far a Geovà par esser pi contenti?’.

5. De acordo con Eclesiasti 6:9, cossa che pol assarne pròpio contenti?

⁵ El testo de Eclesiasti 6:9 el mostra che la persona che la resta contenta con quel che la vede la dà valor a quel che la ga. Intanto che quel che el va drio sol ale so voie mai l’è contento. (Ledi Eclesiasti 6:9. *) Alora, cossa che pol assarne pròpio contenti? L’è dar valor a quel che ghemo adesso, e se volemo far de pi, dessider far quel che saremo boni.

6. Che ilustrassion de Gesù ndaremo veder adesso, e cossa che la pol insegnarne?

⁶ Sarà che podemo pròpio esser contenti con quel che semo drio far adesso? Tanti i pensa che sol i pol restar contenti quando i seita a far robe nove. Ma come ghemo belche visto, podemo pròpio restar contenti con quel che femo adesso. La ilustrassion che Gesù el ga fato sora i talenti in Mateo 25:14-30 la ne giuta a saver come far questo e a come restar ancora pi contenti.

7. Parla dela ilustrassion de Gesù sora i talenti.

⁷ Nela ilustrassion dei talenti, Gesù el ga contà che un omo el ndaria far un viaio. Alora, lu el ga ciamà i so schiavi e el ghe ga dato talenti par far negossi. * Lu el savea che cada schiavo el gavea le so abilità, par quela che el ga dato sinque talenti al primo schiavo, due al secondo e un al terso. I due primi schiavi i ze stati bravi de laorar coi soldi. Ma el terso no’l ga fato gnente coi soldi che el so paron el ghe ga dato. Par quela che el so paron lo ga mandà via.

8. Parché che fursi el primo schiavo l’è restà contento?

⁸ Fursi el primo schiavo l’è restà contento de ricever sinque talenti del so  paron, parché i era tanti soldi e mostrea che el so paron el se fidea in lu. Ma el secondo schiavo el podaria restar desanimà parché el gavea ricevesto manco del primo. Ma cossa che el ga fato?

9. De acordo cola ilustrassion de Gesù, cossa che el secondo schiavo no’l ga fato? (Mateo 25:22, 23)

⁹ Ledi Mateo 25:22, 23. * Gesù no’l ga dito che el secondo schiavo l’è restà disgustà de ricever sol due talenti, e gnanca che el ga parlà: ‘No credo mia che el me ga dato sol questo. Mi son bravo compagno al schiavo che el ga guadagnà sinque talenti. Se el pensa che no laoro ben, saria meio che mi fesse un buso, metesse rento i talenti e ndesse drio ai me mestieri.’

10. Cossa che el secondo schiavo el ga fato coi talenti che el ga ricevesto?

¹⁰ El secondo schiavo el se ga sforsà tanto compagno al primo schiavo. Col so laoro, l’è stà bon de guadagnar el dópio de quel che el so paron el ghe gavea dato. Cossita, el so paron l’è restà contento col laoro e col sforso che el ga fato, e el se ga fidà de darghe altri laori.

11. Come che te pol restar ancora pi contento?

¹¹ Se noantri se sforsemo tanto par far tuti i laori che ghemo nela organisassion de Geovà, saremo ancora pi contenti. Cossita, ghemo de sforsarse tanto nela  predicassion e far el meio che podemo nei laori dela congregassion. (Ati 18:5; Ebr. 10:24, 25) Par esémpio, paréciate ben par far comentari e le parte nele riunion. Se i ansiani i te ga dato un laoro par far, fà pròpio come i te ga domandà. No stà mai pensar che un laoro nela congregassion no l’è importante o che no te ocore torte el tempo par farlo. (Pro. 22:29) Se te te sforsi tanto, te gavarè altre bele qualità e te restarè ancora pi contento. (Gàl. 6:4) Questo anca te giutarà a restar contento quando qualchedun el guadagna un laoro che a ti te piaseria farlo. — Rom. 12:15; Gàl. 5:26.

12. Cossa che Melissa e Nick i ga fato par restar ancora pi contenti?

¹² La Melissa, che ghemo parlà prima, no la ga podesto ndar a Betel, gnanca far la Scola par Vangelisadori. Ma la ga dito: “Mi son tanto contenta parché fao el meio che posso come pioniera e par predicar de tute le maniere che ghen’è.” E varda cossa che Nick el ga fato quando no l’è deventà servo ministerial nela ora che el spetea. Lu el ga dito: “Mi go fato el meio che podea nel laoro a Geovà. Par esémpio, nela predicassion e par far boni comentari nele riunion. Mi go anca fato la petission par ndar a Betel, e nel ano dopo, son ndato.”

13. Cossa che ndarà suceder se femo ben i laori che ghemo?

¹³ Se noantri femo ben i laori che ghemo nela organisassion, pol esser che ricevemo de pi laori, come ga sucedesto con Nick. Ma fursi, come Melissa, no femo quel che volarìssino nela organisassion. Anca cossita, podemo restar tanto contenti con quel che femo a Geovà. (Ledi Eclesiasti 2:24. *) E la roba che ne assa ancora pi contenti l’è saver che Gesù Cristo ghe piase tanto de veder che semo drio sforsarse.

14. Cossa che ghemo de ricordarse sora el nostro laoro a Geovà?

¹⁴ Anca se semo drio far el nostro meio a Geovà adesso, questo no vol dir che no ne ocore pi sforsarse. Noantri podemo e ghemo de voler far de pi laori nela organisassion de Geovà. Cossita ndaremo predicar e insegnar meio e giutaremo de pi i nostri fradei. Ma sol saremo boni de far questo se ghemo sabedoria e umiltà. Invesse de pensar in quel che l’è meio par noantri, ghemo de pensar in quel che l’è meio par i altri. — Pro. 11:2; Ati 20:35.

15. Che laori i pol giutarne a esser ancora pi contenti?

¹⁵ Se te vol far ancora de pi a Geovà, domandaghe che el te giute a capir quel che te sì bon de far. (Pro. 16:3; Tiago 1:5) Par esémpio, fursi te podarissi esser pioniero aussiliar, regolar, laorar in Betel o nela costrussion. Fursi te podarissi anca far de pi nela predicassion, come par esémpio, imparar una nova léngua o ndar predicar in nantro posto. Par capir quel che ghe vol par far queste robe, varda el capìtolo 10 del libro Organizados para Fazer a Vontade de Jeová o parla coi ansiani dela to congregassion. Se te te sforsi par far ancora de pi a Geovà, te restarè cada volta pi contento e i fradei  i ndarà veder i cambiamenti che te sì drio far. *

16. Cossa podemo far se no semo ancora boni de far quel che volarìssino a Geovà?

¹⁶ Ma, e se no semo ancora boni de far qualche laoro che ghemo parlà vanti? Podemo pensar nei altri laori che sarìssino boni de far. Vedemo arquanti esempi.

17. De acordo con 1 Timòteo 4:13, 15, cossa che un fradel el ga de far par insegnar meio?

¹⁷ Ledi 1 Timòteo 4:13, * 15. * Se te sì un fradel batesà, sfòrsate par leder, insegnar e far i to discorsi ancora meio. Cossita, te vè giutar de pi a quei che i te scolta. Come che te pol far questo? Stùdia e fà quel che dise la revista Sfòrsate Par Leder e Insegnar Meio. Stùdia ben le lession, paréciate ben casa e sfòrsate par meter in pràtica quel che te ghè imparà. Domanda aiuto al fradel che el dà consili ai ansiani e ai servi ministeriai, o ai altri ansiani che i se sforsa tanto par insegnar ben. * (1 Tim. 5:17) Ricòrdate che te ghè de giutar i fradei a far pi forte la so fede e incoraiarli a meter in pràtica quel che te sì drio insegnarghe. Cossita, ti e anca quei che i te scolta restaré ancora pi contenti.

18. Cossa pol giutarte a predicar e insegnar ancora meio?

¹⁸ Tuti noantri ghemo de predicar e far  dissìpoli. (Mat. 28:19, 20; Rom. 10:14) Te piaseria far questo laoro ancora meio? Alora, te pol studiar la revista Sfòrsate. Proa pensar in arquante robe che te vol meter in pràtica e sfòrsate par farlo. Te pol anca imparar nela riunion Vivemo e Insegnemo come Gesù e coi vìdei dele idee par parlar sora la Bìblia. Dopo te pol doperar quel che l’è meio ndove te predichi. Cossita, te ndarè insegnar cada volta meio e te restarè tanto contento. — 2 Tim. 4:5.

19. Come che te pol gaver cada volta de pi le qualità che ghe piase a Dio?

¹⁹ Mai ghemo de desmentegarse che la roba pi importante l’è gaver cada volta de pi le qualità che ghe piase a Geovà. (Gàl. 5:22, 23; Col. 3:12; 2 Pie. 1:5-8) Metemo dir che te vol far pi forte la to fede. Alora, te pol leder le nostre publicassion che le ga consili par giutarte a far questo. Te pol anca veder i vìdei del JW Broadcasting^® che i parla de fradei e sorele che i ga bio una forte fede quando i ga infrontà problemi. Cossita, te podarè far compagno a lori.

20. Come che podemo restar ancora pi contenti?

²⁰ Sicuro che tuti noantri volemo far de pi par Geovà. In Paradiso, podaremo far questo de maniera perfeta. Ma anca ancoi podemo restar contenti e nò disgustadi. Come? Se proemo far meio quel che belche semo boni de far. Cossita ndaremo dar onor e glòria a Geovà, el Dio felice. (1 Tim. 1:11) Alora, restemo contenti col laoro che ghemo ancoi nela organisassion de Geovà!