1. Parché che Gesù el ga domandà a Geovà che el tendesse dei so dissìpoli?

 NELA NOTE vanti de morir, Gesù el ga domandà che Geovà el tendesse dei so dissìpoli. (Gioani 17:15, 20) Ma parché che Gesù el ghe ga domandà una roba cossita se el savea che Geovà el gavea sempre tendesto del so pòpolo? Parché el savea che Sàtana el ndaria far tuto quel che el podea contra i so dissìpoli, e che lori sol i saria boni de dàrghene fora con queste dificoltà se i gavesse el aiuto de Geovà.

2. De acordo col Salmo 33:18-20, parché che no ne ocore gaver paura dele dificoltà?

² I dissìpoli de Gesù ancoi i infronta tanti problemi in questo mondo de Sàtana. Par quela, pol esser che restemo desanimadi e ghemo de sforsarse tanto par seitar leai a Geovà. Ma questo stùdio el ndarà mostrarne che no ne ocore gaver paura. Geovà el sa quel che semo drio infrontar e el ne giuta sempre che ghemo de bisogno. Adesso, ndaremo imparar sora due esempi dela Bìblia che i mostra che Geovà l’è sempre drio tenderne. — Ledi Salmo 33:18-20. b

3. Parché che fursi podemo sentirse soli?

³ Anca se ghemo tanti fradei e sorele in tuto el mondo, pol esser che dele volte se sentimo soli. Podemo sentirse  cossita par via de tante robe. Par esémpio, i gióveni i pol sentirse soli quando i ga de parlar sora quel che i crede nela scola o quando i càmbia de congregassion. Altri fradei i resta desanimadi e i pensa che i ga de dàrghene fora con questo sentimento lori soli. Pol esser che lori no i parle ai altri quel che i ze drio sentir parché i pensa che nissuni ndarà capirli. Dele volte, i pol anca pensar che nissuni i se preocupa con lori. Quando lori i se sente cossita, pol esser che i reste ansiosi e i se sinta abandonadi. Ma Geovà no’l vol che se sentimo cossita. Parché che podemo esser sicuri de questo?

4. Parché che Elia l’era drio sentirse lu sol?

⁴ Varda el esémpio de Elia, che l’era un servo fedele de Geovà. La regina Gesabel la ga dito che la ndaria coparlo. Par quela, par 40 giorni ghe ga tocà scampar via de Gesabel. (1 Rè 19:1-9) Dopo che el se ga sconto nte una caverna, Elia el ga dito a Geovà: ‘Son restà mi sol de profeta.’ (1 Rè 19:10) Ma ghen’era tanti altri profeti, parché Obadia l’è stà bon de salvar 100 profeti de Gesabel. (1 Rè 18:7, 13) Alora, parché Elia l’era drio sentirse lu sol? Fursi lu no’l savea che ghen’era ancora altri profeti vivi. Pol esser che lu l’è restà desanimà parché nissuni i volea servir a Geovà, anca dopo de tuto quel che ga sucedesto nel Monte Carmelo. O fursi el pensea che nissuni i savea quel che l’era drio infrontar e che nissuni i se preocupea con lu. No savemo parché che Elia l’era drio sentirse cossita. Ma podemo esser sicuri che Geovà el capia parché che Elia l’era drio sentirse lu sol e el savea come giutarlo.

5. Cossa che Geovà el ga fato par giutar Elia?

⁵ Geovà el ga fato tante robe par giutar Elia. Par esémpio, Geovà el volea tanto che Elia el parlesse quel che l’era drio sentir, parché el ghe ga domandà due volte: ‘Cossa sito drio far qua?’. (1 Rè 19:9, 13) E quando Elia el ga parlà quel che l’era drio sentir, Geovà lo ga scoltà e el ghe ga dito che l’era un Dio poderoso e che el ndaria sempre giutarlo. Geovà el ga anca dito che  ghen’era anca altri israeliti che i lo servia. (1 Rè 19:11, 12, 18) Sicuro che Elia el se ga sentio tanto meio dopo che el ga parlà a Geovà tuto quel che l’era drio sentir. Dopo, Geovà ghe ga anca dato tanti laori importanti. Par esémpio, Geovà el ga domandà a Elia che el scoliesse Azael come rè dela Assìria, Geù come rè de Israel e Eliseo come profeta. (1 Rè 19:15, 16) Cossita, Geovà el ga giutà Elia a vardar le robe bone che el gavea de far e a gaver un amigo, el profeta Eliseo. Come che Geovà el pol giutar anca ti se te te senti come Elia?

6. Cossa che podemo parlar a Geovà quando se sentimo soli? (Salmo 62:8)

⁶ Geovà el sa de tuto quel che te sì drio infrontar e el promete che el ndarà scoltarte quando che te preghi a lu. (1 Tes. 5:17) Geovà el resta pròpio contento de scoltar le orassion dei so servi. (Pro. 15:8) Ma cossa che te podarissi parlar a Geovà quando te sì drio sentirte ti sol? Fà compagno a Elia e parla a Geovà tuto quel che te sì drio sentir. (Ledi Salmo 62:8. c) Domanda el aiuto de Geovà par saver cossa pol giutarte a dàrghene fora con quel che te sì drio sentir. Par esémpio, se te te senti massa ansioso quando i to coleghi de scola i te fà domande sora la Bìblia, prega a Geovà che el te dae coraio. Te pol anca domandarghe sabedoria par esser bon de parlar a lori quel che te credi. (Luc. 21:14, 15) E se te te senti desanimà, domanda che Geovà el te giute a parlar con un fradel. Te pol anca domandar a Geovà che el giute questo fradel a capir quel che te sì drio sentir. E no stà desmentegarte de proar veder come che Geovà el te ga rispondesto e de acetar el aiuto dei altri. Cossita, te ndarè veder che Geovà l’è dela to banda.

7. Cossa che te ghè imparà col esémpio de Mauricio?

⁷ Geovà el te ga dato un laoro tanto importante, e te pol esser sicuro che Geovà el dà tanto valor a tuto quel che te fè nela predicassion e nela congregassion. (Sal. 110:3) Alora, come che far de pi par Geovà pol giutarte a no sentirte ti sol? Varda el esémpio del fradel che el ga nome Mauricio. d Poco tempo dopo del so batésimo, un dei so meio amighi l’era drio assar de servir a Geovà. Mauricio el ga dito: “Veder el me amigo fermarse de servir a Geovà me ga fato perder el coraio. Mi no ero pi sicuro che saria bon de servir a Geovà e far parte dela so fameia. Mi me sentia mi sol e pensea che no ghen’era  nissuni che i capia quel che ero drio sentir.” Cossa che ga giutà Mauricio? Lu el ga dito: “Mi go scominsià a laorar de pi nela predicassion. Cossita, no pensea massa in mi stesso e gnanca in quel che ero drio sentir. Quando mi laorea coi altri nela predicassion, restea contento e vedea che no ero mi sol.” L’è vera che dele volte noantri no semo boni de ndar ala predicassion insieme coi nostri fradei, ma podemo predicar con lori par meso del telèfono o carte. Sicuro che far questo ndarà giutarne tanto. Cossa che ancora ga giutà Mauricio? Lu el ga dito: “Mi go scominsià a laorar de pi nela congregassion e a pareciarme meio par le parte che mi gavea nele riunion. Questi laori i me ga giutà a veder che mi gavea tanto valor par Geovà e par i fradei.”

8. Cossa che podemo sentir par via dele dificoltà?

⁸ Come semo drio viver nei ùltimi giorni, savemo che ndaremo infrontar tante dificoltà. (2 Tim. 3:1) Anca cossita, fursi suceda robe che no spetemo mia. Par esémpio, pol esser che ne manche i soldi che ghemo de bisogno par viver, che infrontemo una bruta malatia o la morte de qualchedun che amemo. Se infrontemo una dificoltà cossita, fursi restemo tanto desanimadi. Pol esser pedo ancora se infrontemo tante al medèsimo tempo. Alora, cossa che pol giutarne? Ricordarse che Geovà el sa dele dificoltà che infrontemo e che el pol darne el aiuto e el coraio che ghemo de bisogno par ndar avanti.

9. Cossa che Giò el ga infrontà?

⁹ Varda come che Geovà el ga giutà Giò, un servo fedele che el ga infrontà tante brute dificoltà al medèsimo tempo. Prima, lu el ga perso tute le so bèstie. Dopo, i so schiavi e i so cari fioi i ze morti. (Giò 1:13-19) Poco tempo dopo, Giò el ga bio una bruta malatia. (Giò 2:7) Lu l’è restà tanto desanimà che el ga dito: “Mi òdio la me vita, no vui pi viver.” — Giò 7:16.

10. Come che Geovà el ga giutà Giò? (Vedi la ilustrassion dela prima pàgina.)

¹⁰ Geovà el savea quel che Giò l’era drio infrontar. Lu el amea Giò e el ghe ga dato forsa par infrontar le dificoltà. Par esémpio, Geovà el ga parlà de arquante bèstie par mostrar a Giò che lu el ga tanta sabedoria e che el tende con amor dele persone e de tuto quel che el ga creà. (Giò 38:1, 2; 39:9, 13, 19, 27; 40:15; 41:1, 2) Geovà anca el ga doperà Eliù par incoraiar e consolar Giò. Eliù el ga assà Giò sicuro che Geovà sempre el benedisse quei che i se sforsa par seitar leai a lu. Dopo, Geovà el ga anca doperà Eliù par darghe consili. Questi consili i ga giutà Giò a fermarse de pensar sol in lu stesso e a capir come che lu l’era pìcolo davanti del Creador del Universo. (Giò 37:14) Geovà anca el ghe ga dato un laoro. Geovà el ga dito che el gavea de pregar par i so tre falsi amighi. (Giò 42:8-10) Alora, come che Geovà el pol giutar anca noantri quando infrontemo dificoltà?

11. Come che la Bìblia la pol consolarne quando infrontemo dificoltà?

¹¹ Anca se Geovà no’l parle con noantri compagno el ga fato con Giò, lu el ne giuta par meso dela Bìblia. (Rom. 15:4) Varda arquanti testi dela Bìblia che i pol consolarne quando infrontemo dificoltà. Par esémpio, Geovà el ne assa sicuri che gnente sarà bon de spartirne del so amor.  (Rom. 8:38, 39) Lu el promete che l’è darente de quei che i lo ciama. (Sal. 145:18) Lu anca el ne dise che, se se fidemo in lu, saremo boni de infrontar con alegria tute le dificoltà. (1 Cor. 10:13; Tia. 1:2, 12) Geovà anca el ne promete che suito el ndarà finir fora con Sàtana e con quei che i ghe va drio, che no ndaremo pi infrontar queste brute dificoltà e che viveremo par sempre. (2 Cor. 4:16-18; Sal. 37:10) Sicuro che quel che la Bìblia la dise pol consolarne tanto. Alora, proa sempre pensar nei testi che i podarà giutarte a infrontar le dificoltà nel futuro.

12. Cossa che Geovà el vol che femo?

¹² Geovà el vol che noantri ledemo e studiemo la Bìblia tuti i giorni e che pensemo sora quel che ledemo. Quando metemo in pràtica quel che imparemo nela Bìblia, la nostra fede e la nostra amicìssia con Geovà le resta pi forte. Cossita, ghemo pi forsa par infrontar le dificoltà. Geovà anca el dà el so spìrito santo a quei che i mostra che i se fida nela Bìblia. E, el spìrito santo el pol darne el poder che ghemo de bisogno par infrontar tute le dificoltà. — 2 Cor. 4:7-10.

13. Come quel che el schiavo fedele e prudente el ne dà ne giuta a infrontar le dificoltà?

¹³ Geovà el dopera el schiavo fedele e prudente par darne vìdei e mùsiche che i ne giuta a gaver una fede pi forte e seitar atenti. (Mat. 24:45) Alora, ghemo de far el meio che podemo par doperar tute queste robe che Geovà el ne dà. Varda el esémpio de una sorela dei Stati Unidi che la dà tanto valor a tuto quel che el schiavo fedele e prudente el ne dà. Ela la ga dito: “Fà 40 ani che mi sirvo a Geovà e go bio de sforsarme tanto par seitar leal a lu.” Par esémpio, ela la ga sofrio tanto quando un omo, che l’era ciuco, l’è vegnesto dosso so nono e lo ga copà. I so genitori i ze morti dopo che i ga infrontà una bruta malatia e ela la ga bio càncaro due volte. Cossa che ga giutà questa sorela a infrontar le dificoltà? Ela la ga dito: “Geovà sempre el me ga tendesto. Tuto quel che el schiavo fedele e prudente el fà l’è drio giutarme a seitar leal a Geovà. Cossita, mi posso parlar la medèsima roba che Giò: ‘Fin la me morte, mi mai ndarò assar de esser leal a Geovà!’” — Giò 27:5.

14. Come che Geovà el pol doperar i nostri fradei par giutarne a infrontar le dificoltà? (1 Tessalonissensi 4:9)

 ¹⁴ Geovà anca el dopera i nostri fradei e sorele par giutarne quando infrontemo dificoltà. (2 Cor. 1:3, 4; ledi 1 Tessalonissensi 4:9. e) I nostri cari fradei i fà compagno a Eliù e i vol tanto giutarne a dàrghene fora coi nostri problemi. (Ati 14:22) Varda el esémpio de Diane. I fradei dela so congregassion i ghe ga giutà tanto quando el so omo el ga bio un bruto problema de salute. Ela la ga dito: “No l’è stà mia fàcile, ma in tuti questi mesi go sentio che Geovà l’era drio giutarme e tenderme. I fradei i fea el meio che i podea par giutarne in quel che gaveino de bisogno. Tanti fradei i vegnea visitarne, i ne ciamea par telèfono e anca i ne dea strucon. Cossita ghemo bio la forsa che gaveino de bisogno. Come no sò guidar el auto, i fradei dela congregassion i me portea ale riunion e ala predicassion.” Sicuro che restemo tanto contenti de far parte de una fameia cossita.

15. Parché che podemo esser sicuri che saremo boni de infrontar le dificoltà?

¹⁵ Tuti noantri ndaremo infrontar dificoltà. Ma, come ghemo imparà, no ne ocore sentirse noantri soli. Geovà l’è come un Pare che el ga tanto amor, parché el vede tuto quel che semo drio infrontar, l’è dela nostra banda, el scolta le nostre orassion e el vol tanto giutarne. (Isa. 43:2) Podemo esser sicuri che saremo boni de infrontar tute le dificoltà parché Geovà el ne giuta par meso dela Bìblia, dele orassion, dele publicassion, dei vìdei e dei nostri cari fradei.

16. Cossa che Geovà el speta che femo?

¹⁶ Sicuro che restemo tanto contenti de saver che Geovà el se preocupa con tuti noantri. Come dise el Salmo 33:21: ‘Geovà el fà el nostro cuor contento.’ Come che podemo mostrar che demo tanto valor a tuto quel che lu el ne dà? Ghemo de sforsarse par obedirlo e far tuto quel che el dise che l’è giusto. Cossita, podemo esser sicuri che lu el ndarà tender de tuti noantri par sempre! — 1 Pie. 3:12.