1. Che prova de fede Giusepe el ga infrontà, e cossa che el ga fato?

 GIUSEPE, fiol de Giacò, el ga infrontà una prova de fede. La dona del so paron, Potifar, la ghe ga dito: “Bùtete do con mi.” Giusepe l’era un schiavo, el so paron no l’era casa e la dona de Potifar la podea farlo sofrir se lu no’l fesse quel che ela la volea. Ancora cossita, Giusepe no’l ga volesto butarse do con ela. Fursi arquanti ancoi i podaria domandarse: ‘Parché che Giusepe no’l se ga butà do con quela dona?’ Lu el ga dito: “Come che mi podaria far una roba bruta cossita e far un pecato contra Dio?” — Gén. 39:7-12.

2. Come che Giusepe el savea che far adultèrio l’era un bruto pecato?

² La Lege de Moisè la disea: “No stà far adultèrio!” (Éso. 20:14) Ma questa lege la ze stata scrita sol 200 ani dopo de quel che ga sucedesto con Giusepe. Alora, come che Giusepe el savea che el adultèrio l’era un bruto pecato par Geovà? Giusepe el cognossea a Geovà e el savea cossa che el pensea sora la imoralità sessual. Par esémpio, Giusepe el savea che Dio el gavea creà el matrimònio sol intrà un omo e una dona. Giusepe anca el savea che Geovà el gavea protegesto due volte la so bisnona Sara de esser violentada e una volta Rebeca, che la era sposa de Isache. (Gén. 2:24; 12:14-20; 20:2-7; 26:6-11) Lu el ga pensà sora tuto quel lì e el ga capio quel che l’era giusto e sbalià par Geovà. Giusepe el amea tanto a Geovà e quel che l’era giusto. Par quela, lu el ga sempre fato polito.

3. Cossa che ndaremo imparar in questo stùdio?

³ Sicuro che tuti noantri amemo quel che Geovà el dise che l’è giusto. Ma ghemo de ricordarse che semo imperfeti,  e dele volte, quel che le persone del mondo le dise che l’è giusto o sbalià pol farne pensar come lore. (Isa. 5:20; Rom. 12:2) Par quela, in questo stùdio, ndaremo veder cossa vol dir esser giusti par Geovà e come che amar quel che l’è giusto l’è bon par noantri. Dopo, ndaremo veder tre robe che pol giutarne a amar ancora de pi quel che Geovà el dise che l’è giusto.

4. Come che arquanti i pensa che una persona giusta la ze?

⁴ Come che arquanti i pensa che una persona giusta la ze? Tanti i pensa che una persona giusta la ze sprosiona, orgoliosa e la giulga i altri. Ma savemo che Dio no’l ghe piase de persone cossita. Quando Gesù l’era qua nela Tera, el ga parlà contra i lìderi religiosi che i dessidia quel che l’era giusto o sbalià. (Ecl. 7:16; Luc. 16:15) Alora, la persona che la ze giusta no la pensa che la ze meio che i altri.

5. De acordo cola Bìblia, come che la ze una persona giusta? Parla de arquanti esempi.

⁵ La giustìssia la ze una bela qualità. La Bìblia la dise che la persona che la ga questa qualità la vive de acordo con quel che Dio el dise che l’è giusto. Par esémpio, Geovà el ga dito che quei che i ndaria vender o comprar qualcossa, i gavaria de doperar el ‘peso giusto’. (Deu. 25:15) Nela léngua ebraica, la parola “giusto” anca la vol dir “onesto”. Alora, un servo de Dio el ga de far quel che l’è giusto nel so laoro e nei negossi. La persona giusta anca la ama la giustìssia. Alora, la òdia quando la vede che qualchedun no l’è tratà con giustìssia. E una persona giusta la vol sempre contentar a Geovà. Par quela, vanti de far una scòlia, ela la pensa in quel che lu el dise che l’è giusto. — Col. 1:10.

6. Parché podemo esser sicuri che sol Geovà el pol dessider quel che l’è giusto o sbalià? (Isaia 55:8, 9)

⁶ La Bìblia la dise che la giustìssia la vien de Geovà. (Ger. 50:7) Sol lu el pol dessider quel che l’è giusto o sbalià parché el ga creà tuto quel che ghen’è. Noantri semo imperfeti e, par quela, ne fà fadiga capir che una roba la ze giusta o sbaliada. Ma semo sicuri che quel che Geovà el desside l’è giusto parché lu l’è perfeto. (Pro. 14:12; ledi Isaia 55:8, 9. b) Come semo stati fati cole medèsime qualità che lu, semo boni de far quel che lu el dise che l’è giusto. (Gén. 1:27) E noantri se sforsemo tanto par farlo parché lo amemo tanto. — Efe. 5:1.

7. Parché che ghemo de ndar drio quel che Geovà el dise che l’è giusto o sbalià? Parla due esempi.

⁷ Se ndemo drio quel che Geovà el dise che l’è giusto o sbalià, gavaremo protession de brute robe. Varda due esempi che pol giutarne a capir questo. Se cada un che el vol far su una costrussion la fesse sensa doperar le mesure giuste, vegnaria fora una desgràssia. Se cada dotor el tratesse una malatia come che el volesse lu, tante persone le podaria morir. Alora, ghen’è una maniera giusta de far arquante robe, e l’è una protession ndarghe drio. Dela medèsima maniera, ndar drio a quel che Geovà el dise che l’è giusto o sbalià l’è una protession par noantri.

8. Che benedission Geovà el ghe darà a quei che i fà quel che l’è giusto?

 ⁸ Geovà el ndarà benedir tanto le persone che le va drio quel che lu el dise che l’è giusto. Lu el ga prometesto: “I giusti i sarà paroni dela tera e i viverà par sempre ntela tera.” (Salmo 37:29) Te ghè belche imaginà come sarà bon viver in union, pace e con tanta felicità quando tute le persone le farà sol quel che l’è giusto? Geovà l’è premoso de darte questa vita. Come ghemo visto, amar quel che Geovà el dise che l’è giusto l’è tanto bon par noantri. Ma come che podemo amar cada volta de pi la giustìssia? Ndemo veder tre robe che podemo far.

9. Cossa che pol giutarne a amar quel che Geovà el dise che l’è giusto?

⁹ Primo: Ama la persona che la ga dessidio quel che l’è giusto e quel che l’è sbalià. Sol saremo boni de amar quel che l’è giusto se femo pi forte el nostro amor par Geovà. Se noantri amemo tanto a Geovà, volaremo viver de acordo con quel che lu el dise che l’è giusto. Par esémpio, se Adon e Eva i amesse a Geovà, lori i seitaria a obedirlo par sempre. — Gén. 3:1-6, 16-19.

10. Cossa che ga giutà Abraon a capir la maniera che Geovà el pensa?

¹⁰ Sicuro che no volemo far el medèsimo sbàlio che Adon e Eva. Par quela ghemo de seitar far pi forte el nostro amor par Geovà. Come che podemo farlo? Ghemo de seitar a imparar sora Geovà e sora le so qualità, e sforsarse par capir la so maniera de pensar. Varda el esémpio de Abraon. Lu el amea tanto a Geovà. Anca quando lu no’l gavea capio le dessision de Dio, lu no lo ga desobedio. Invesse, lu el se ga sforsà par cognosser meio a Geovà. Par esémpio, quando Geovà el ga dessidio finir fora con Sodoma e Gomora, Abraon el ga bio paura che anca le persone bone le saria finide fora. Lu no l’era bon de capir quel che Geovà el pensea. Alora, Abraon el ghe ga fato tante domande, e Geovà le ga rispondeste. Cossita, Abraon l’è stà bon de capir che Geovà el cognosse el cuor de tute le persone e che mai el ndarà finir fora coi boni insieme coi rugni. — Gén. 18:20-32.

11. Come che Abraon el ga mostrà che el amea e el se fidea in Geovà?

¹¹ Dopo che Geovà el ga parlà con Abraon sora quel che el ndaria far cole persone de Sodoma e Gomora, Abraon lo ga amà e rispetà ancora de pi. Arquanti ani dopo, Geovà el ga domandà che lu el desse so caro fiol, Isache, come sacrifìssio. L’è stà fadiga mostrar che el se fidea in Geovà e obedirlo. Ma questa volta, Abraon no’l ghe ga fato gnanca una domanda parché lu lo cognossea meio. Cossa che lo ga giutà a obedir a Geovà? Pol esser che Abraon el ga pensà sora quel che el gavea belche imparà sora Dio. Par quela, Abraon el savea che Dio mai el ndaria far una roba rugna. La Bìblia la dise che Abraon anca el savea che Geovà el podaria ressussitar so fiol, Isache. (Ebr. 11:17-19) Abraon el cognossea la promessa de Geovà che Isache el saria pare de una granda nassion, ma Isache gnancora no’l gavea fioi. Abraon el amea tanto a Geovà. Par quela, lu el se fidea che Dio sempre el ndaria far quel che l’è giusto. Alora, anca quando no l’era fàcile, lu el obedia a Geovà. — Gén. 22:1-12.

12. Come che podemo far compagno a Abraon? (Salmo 73:28)

 ¹² Come che podemo far compagno a Abraon? Ghemo de seitar a imparar sora Geovà. Cossita, gavaremo una amicìssia pi forte con lu e ndaremo amarlo de pi. (Ledi Salmo 73:28. c) Noantri anca saremo boni de pensar dela medèsima maniera che Geovà. (Ebr. 5:14) Cossita, quando qualchedun el vol che femo qualcossa de sbalià, saremo boni de seitar a far quel che l’è giusto. Noantri sentiremo òdio par tuto quel che pol rovinar la nostra amicìssia con Geovà, o che lo asse disgustà. Ma sarà che podemo far altre robe par mostrar che amemo quel che Geovà el dise che l’è giusto?

13. Cossa che ghemo de far par amar cada volta de pi quel che l’è giusto? (Proverbi 15:9)

¹³ Secondo: Sfòrsate par amar cada volta de pi la giustìssia. Se volemo far pi forte un mùscolo, ne ocore far esersissi tuti i giorni. Ghemo de far la medèsima roba se volemo esser boni de amar quel che Geovà el dise che l’è giusto. Alora, ne ocore sforsarse tuti i giorni. L’è vera che Geovà no’l vol che femo de pi de quel che podemo. (Sal. 103:14) Ma ghemo de ricordarse che lu el ama le persone che le se sforsa par far quel che l’è giusto. (Ledi Proverbi 15:9. d) Cossita come ghemo de seitar a sforsarse par far de pi par Geovà, ne ocore seitar a sforsarse par far quel che l’è giusto. Sicuro che Geovà el ndarà giutarne! — Sal. 84:5, 7.

14. Cossa che la ze la corassa dela giustìssia, e parché che ghemo de doperarla?

¹⁴ Geovà el ne fà ricordar che no l’è mia fadiga far quel che lu el ne domanda. (1 Gio. 5:3) Invesse, quel che el ne domanda ne dà protession, e ne ocore questo tuti i giorni. Ghemo de ricordarse dela  armadura che el apòstolo Paolo el ga parlà che un soldà el doperea. (Efe. 6:14-18) La corassa la protegea el cuor de un soldà. Dela medèsima maniera, la corassa dela giustìssia, che la ze quel che Geovà el dise che l’è giusto, la pol proteger el nostro cuor. Alora, sfòrsate par sempre doperar la corassa dela giustìssia. — Pro. 4:23.

15. Come che te pol doperar la corassa dela giutìssia?

¹⁵ Come che te doperi la corassa dela giustìssia? Te ghè de ndar drio quel che Geovà el dise che l’è giusto tuti i giorni e in tute le robe che te fè. Par esémpio, in quel che te ndarè parlar, le mùsiche che te ndarè scoltar, i libri che te ndarè leder o quel che te ndarè veder par divertirte. Te pol domandarte: ‘Cossa che Geovà el pensa sora questo? Sarà che se vardo o scolto questa roba son drio proteger el me cuor dela imoralità, dela violensa, del orgòlio e dele altre robe che Geovà el òdia?’ (Fil. 4:8) Ndaremo proteger el nostro cuor se scoliemo far robe che ghe piase a Geovà.

16-17. Come che Isaia 48:18 ne giuta a capir che podemo seitar a far quel che l’è giusto par sempre?

¹⁶ Gheto belche pensà che no te sarè bon de sempre far quel che l’è giusto? Varda quel che Geovà el dise in Isaia 48:18. e (Ledi.) Geovà el dise che la nostra giustìssia la pol esser “come le onde del mar”. Come cossita? Proa imaginar che te sì davanti el mar e te sì drio vardar le onde che le seita a ndar vanti e indrio. Sarà che qualche giorno le onde le ndarà finirse? Nò, parché sempre ghen’è stà e sempre ghen sarà onde nel mar.

¹⁷ Come che la to giustìssia la pol esser come le onde del mar? Quando te ghè de dessider qualcossa, proa pensar quel che Geovà el volaria che te fessi, e dopo sfòrsate de farlo. Anca quando no l’è fàcile, te pol esser sicuro che el to caro Pare, Geovà, el sarà dela to banda par giutarte. Lu el ndarà darte la forsa e el aiuto che te ghè de bisogno par far quel che l’è giusto par sempre. — Isa. 40:29-31.

18. Parché che no ghemo de giulgar i altri de acordo con quel che noantri pensemo che l’è giusto?

¹⁸ Terso: Assa che Geovà el dessida se quel che i altri i fà l’è giusto o sbalià. Tuti noantri femo sforso par far quel che Geovà el dise che l’è giusto. Ma ghemo de star atenti par no giulgar quel che i altri i fà de acordo con quel che pensemo che l’è giusto. Invesse, ghemo de ricordarse che l’è Geovà “el Giuis de tuta la tera”. (Gén. 18:25) Geovà no’l ne ga dato la libertà de giulgar i altri, e no’l vol che lo femo. Anca Gesù el ga dito: “Ferméve de giulgar, cossita valtri no saré giulgadi.”— Mat. 7:1. f

19. Come che Giusepe el ga mostrà che el se fidea nela maniera de Geovà giulgar i altri?

¹⁹ Varda el esémpio de Giusepe. Lu no’l ga giulgà i altri, gnanca quei che i lo ga tratà mal. Par esémpio, i so fradei i lo ga vendesto come schiavo e i ga dito al so pare, Giacò, che Giusepe l’era morto. Dopo de arquanti ani, lu e so fradei i se ga catà nantra volta. Adesso, Giusepe el gavea autorità e el podaria vingarse de lori e castigarli. Anca se i so fradei i se gavesse  ciamà grami, lori i gavea paura de quel che Giusepe el podaria farghe. Ma lu el ga dito a lori che no i gavesse paura parché sol Dio el podaria giulgarli. (Gén. 37:18-20, 27, 28, 31-35; 50:15-21) Alora, Giusepe el capia che sol Dio el pol giulgar i altri.

20-21. Cossa che no volemo far, e parché?

²⁰ Dela medèsima maniera che Giusepe, volemo assar che Geovà el giulghe le persone. Sol lu l’è bon de veder quel che lore le pensa e le sente. (Pro. 16:2) Par quela, no ghemo de proar dir parché che una persona la ga fato qualcossa. Geovà el ama le persone de tuto el mondo e el vol che se sforsemo de amar i altri cada volta de pi. (2 Cor. 6:13) Alora, ghemo de sforsarse par amar i nostri fradei e mai giulgarli.

²¹ Noantri no ghemo de giulgar gnanca quei che no i ze nostri fradei. (1 Tim. 2:3, 4) Par esémpio, no ghemo de assar de parlar sora Geovà a qualchedun dela nostra fameia parché pensemo che mai el deventarà una Testimònia de Geovà. Se féssino cossita, sarìssino drio giulgarlo, e come ghemo belche visto, no podemo mia farlo. Noantri savemo che Geovà l’è ancora drio dar a tute le persone la oportunità de ciamarse grame. (Ati 17:30) Alora, ricòrdate che se pensemo che femo pi polito che i altri o li giulghemo, no saremo drio mostrar giustìssia.

22. Parché che te vol seitar a amar quel che l’è giusto?

²² El nostro amor par quel che Geovà el dise che l’è giusto, ne farà esser pi felici e un bel esémpio par i altri. Cossita, saremo pi amighi de lori e li giutaremo a gaver una amicìssia pi forte con Geovà. Par quela, volemo sempre amar quel che l’è giusto e mai fermarse de farlo. (Mat. 5:6) L’è vera che le persone del mondo no le vol saver quel che Geovà el dise. Ma lu el resta contento de veder che te sì drio sforsarte par far quel che l’è giusto. E te pol esser sicuro che “Geovà el ama i giusti”. — Sal. 146:8.