1. De acordo con 1 Tessalonissensi 5:11, che bel laoro noantri podemo far?

 SITO belche ndato nela prima riunion nte un Salon che l’era stà pena fato su? Sicuro che te eri tanto contento e fursi no te sì stà gnanca bon de cantar el primo càntico. Noantri savemo che ghe demo tanto onor a Geovà quando giutemo a far su o a rangiar un Salon del Regno. Ma ghen’è nantro laoro che podemo far che ghe dà ancora de pi onor a Geovà. Che laoro l’è questo? El laoro de incoraiar e edificar i nostri fradei. Paolo l’era drio pensar pròpio in questo quando el ga scrito quel che ghen’è in 1 Tessalonissensi 5:11. b — Ledi.

2. Cossa che ndaremo imparar in questo stùdio?

² El apòstolo Paolo l’è un bel esémpio parché el se sforsea de capir quel che i so fradei infrontea e el savea come incoraiarli. In questo stùdio, ndaremo imparar come che lu el ga giutà i fradei a (1) infrontar le so dificoltà, (2) viver in pace intrà de lori, e (3) far pi forte la so fede in Geovà. Alora, ndaremo veder come che podemo far compagno al esémpio del apòstolo Paolo. — 1 Cor. 11:1.

3. Cossa che Paolo el pensea sora laorar par gaver quel che ghe ocorea par viver e sora laorar par Dio?

³ Paolo el amea i so fradei e l’era bon de capirli tanto ben. Parché? Parché lu el gavea belche infrontà tante dificoltà  nela so vita. Par esémpio, una volta Paolo l’è restà sensa soldi e el ga bio de laorar par gaver quel che lu e i fradei che i viaiea insieme a lu i gavea de bisogno. (Ati 20:34) Par quela che, quando l’è rivà in Corinto, Paolo el ga scominsià a far tende insieme a Prissila e Àquila. Anca cossita, tuti i sabi, lu el predichea par i giudei e i grechi. Dopo, quando Sila e Timòteo i ze rivadi in Corinto, Paolo el ga doperà tuto el so tempo par predicar. (Ati 18:2-5) Anca se Paolo el gavesse de laorar par gaver quel che ghe ocorea par viver, la roba pi importante nela so vita la era servir a Geovà. Par quela, lu l’era bon de capir quel che i so fradei i era drio infrontar, e l’era bon de incoraiarli. Lu el ghe ga dito che el so laoro e le so preocupassion de gaver le robe par viver no i gavea de intrigarli de adorar a Geovà. — Fil. 1:10.

4. Come che Paolo e Timòteo i ga giutà i so fradei?

⁴ Fea poco tempo che ghen’era una congregassion in Tessalònica quando tante persone le ga scominsià a ndar contra i fradei. Par esémpio, una volta una mùcia de gente cativa la volea catar Paolo e Sila. Ma come quele persone no le ze state bone de catarli, lore le ga portà arquanti fradei fin le autorità dela cità. Lore le osea che quei i fradei i era “drio desobedir ale lege de César”. (Ati 17:6, 7) Lori i era pena deventadi dissìpoli de Gesù. Alora, proa imaginar quel che i era drio sentir de saver che tute quele persone li odiea. Fursi lori i podaria scominsiar a far manco par Geovà. Anca se Paolo e Sila i era ndati via de Tessalònica, lori i se preocupea con quei fradei. Par quela, Paolo el ga mandà Timòteo par incoraiarli, consolarli e giutarli a no desanimar par via dele tribolassion. (1 Tes. 3:2, 3) E podemo creder che Timòteo l’è stà bon de incoraiar tanto i fradei de Tessalònica. Parché? Quando lu l’era ancora in Listra, arquante persone le ze vegneste contra i fradei. Alora, lu el ga visto come Paolo li ga incoraiadi e come Geovà li ga giutadi. Cossita, lu l’è stà bon de giutar i fradei de Tessalònica a esser sicuri che i saria boni de dàrghene fora con quela dificoltà. — Ati 14:8, 19-22; Ebr. 12:2.

5. Parché che l’è stà bel par Bryant gaver el aiuto de un ansiano?

⁵ Cossa che Paolo ancora el ga fato par incoraiar i so fradei? Quando Paolo e Barnabè i ze tornadi ale congregassion de Listra, Iconio e Antiochia, lori i ga dato a arquanti fradei el privilègio de esser ansiani nele congregassion. (Ati 14:21-23) Sicuro che quei ansiani i ga giutà tanto le congregassion. La medèsima roba la sucede ancoi. Un fradel de nome Bryant el ga dito: “Quando mi gavea 15 ani, me pare el ne ga abandonà, e me mama la ga assà de servir a Geovà. Mi son restà tanto desanimà e me sentia mi sol.” Cossa che ga giutà Bryant? Lu el ga dito: “Un ansiano, che el ga nome Tony, sempre el discorea con mi nele riunion e in altre ore. Lu el ga ledesto Salmo 27:10 e el me ga parlà del esémpio de arquanti servi de Geovà che i ga infrontà dificoltà, ma che i era felici. Lu sempre el parlea del esémpio de Ezechia, che l’è stà fedele a Geovà anca che el so pare no’l fusse un bel esémpio.” Come che questo ga giutà Bryant? Lu el ga dito: “Quel che Tony el ga fato me ga giutà a esser un pioniero.” Alora, se te sì un ansiano, sfòrsate par incoraiar quei che i ga bisogno de aiuto, come Bryant. — Pro. 12:25.

6. De che nantra maniera Paolo el ga incoraià i fradei?

 ⁶ Paolo el ga giutà i so fradei anca de nantra maniera. Lu el ghe ga parlà sora come Geovà el ga giutà tanti dei so servi a dàrghene fora cole so dificoltà. (Ebr. 12:1) Paolo el savea che questi esempi i ndaria giutar i fradei e sorele a gaver de pi coraio e a ricordarse dela bela speransa che i gavea par el futuro. (Ebr. 12:22) Ancoi, anca noantri semo incoraiadi quando imparemo come Geovà el ga giutà Gideon, Barache, Davi, Samuel e altri servi fedeli. (Ebr. 11:32-35) E i esempi de fradei de ancoi anca i ne incoraia tanto. La sede mondial la riceve tante carte de fradei e sorele che i ze stati incoraiadi dopo de leder una stòria de vita.

7. Cossa che te ghè imparà con quel che Paolo el ga dito in Romani 14:19-21?

⁷ Quando parlemo e femo robe che giuta i nostri fradei a viver in pace nela congregassion, semo drio incoraiarli. Savemo che un fradel el pol pensar e far le robe difarente un del altro. Ma se la so maniera de pensar o far le robe no la va contra un prinsìpio dela Bìblia, no ghemo de assar che questo intrighe la pace intrà de noantri. Pensa in quel che ga sucedesto nte una congregassion in Roma nela època del apòstolo Paolo. Arquanti fradei no i era giudei e no i cognossea la Lege de Moisè. Altri fradei i era giudei e i obedia a questa lege vanti de ndar drio a Cristo. La Lege la disea che no i podea magnar arquante robe, ma lori no i gavea pi de obedirla. (Mar. 7:19) Par quela, arquanti giudei i pensea che i podea magnar de tuto e altri i pensea che saria sbalià farlo. Alora, no ghen’era pi pace e union intrà i fradei. Ma quel che Paolo el ga parlà mostra che l’era tanto importante viver in pace. Lu el ga dito: “L’è meio no magnar carne, gnanca bever vin, gnanca far qualche altra roba che la pol far mal ala fede del to fradel.” (Ledi Romani 14:19-21. c) Cossita, Paolo el ga giutà i so fradei a capir che ghe ocorea gaver union nela congregassion. Quel che lu el ga dito anca ne mostra che lu no’l ndaria magnar qualcossa che la fesse i altri strabucarse. (1 Cor. 9:19-22) Anca noantri incoraiemo i nostri fradei e li giutemo a viver in pace quando rispetemo le so dessision.

8. Cossa che Paolo el ga fato quando i fradei i era drio pensar de maniera difarente un del altro sora la sirconsision?

⁸ El apòstolo Paolo el ga dato un bel esémpio de come mantegner la pace quando le persone le pensa tanto difarente una del’altra. Par esémpio, nela època dei apòstoli, arquanti i volea che quei che i no i era giudei i fusse sircunsidadi. Fursi lori i pensea che se i fesse cossita, i giudei no i ghe ndaria pi contra. (Gàl. 6:12) Paolo no l’era mia de acordo con quel che lori i pensea. Ma lu no’l ga volesto che le robe le fusse fate dela so maniera. Invesse, lu l’è stà ùmile e el ga domandà aiuto dei apòstoli e dei ansiani de Gerusalen par far una dessision. (Ati 15:1, 2) Cossita, lu el ga giutà i fradei a seitar contenti e a viver in pace nela congregassion. — Ati 15:30, 31.

9. Come che podemo far compagno a Paolo?

 ⁹ Come che podemo far compagno a Paolo? Se ghen’è qualcossa che la ze drio intrigar la pace dela congregassion, ghemo de ndar drio ale orientassion che Geovà el ne dà par meso dela so organisassion. Noantri podemo ndar in serca de orientassion nele nostre publicassion. Se noantri ndemo drio a quel che la organisassion la ne dise invesse de voler che le robe le sìpia fate dela nostra maniera, giutaremo la congregassion a viver in pace.

10. Cossa che Paolo el ga fato par giutar i fradei a viver in pace?

¹⁰ Nantra roba che Paolo el fea par giutar i so fradei a viver in pace l’era veder le so qualità e nò quel che lori i fea de sbalià. Par esémpio, nel fin dela carta ai romani, Paolo el ga parlà el nome de tanti fradei e el ga lodà arquanti de lori. Noantri podemo far come lu quando parlemo sora le bone qualità dei nostri fradei e sorele. Se femo cossita, la union e el amor nela congregassion i restarà pi forti.

11. Cossa che ne ocore far se ghemo qualche problema con un fradel?

¹¹ Pol esser che no ghen sìpia pi pace intrà due bravi fradei parché no i ze mia de acordo. L’è stà pròpio questo che ga sucedesto con Paolo e el so amigo, Barnabè. Lori due no i era mia de acordo se i gavaria de portar Marco insieme nel so viaio par predicar e incoraiar le congregassion. Paolo e Barnabè i ga barufà, e cada un l’è ndato par un posto difarente. (Ati 15:37-39) Dopo de un tempo, Paolo, Barnabè e Marco i ga fato la pace. Lori i savea che la pace e la union le era tanto importante nela congregassion. Paolo anca el ga lodà Barnabè e Marco nele so carte. (1 Cor. 9:6; Col. 4:10) Alora, se ghemo qualche problema con un fradel, ne ocore suito ndar parlar con lu e sforsarse par veder le so bele qualità. Cossita, ghen sarà pace e union nela congregassion. — Efe. 4:3.

12. Che dificoltà i nostri fradei i infronta ancoi?

¹² Noantri anca incoraiemo i nostri fradei quando li giutemo a gaver una fede pi forte in Geovà. Savemo che ghen’è tante robe che pol far la nostra fede restar pi fiaca. Par esémpio, pol esser che la fameia, i coleghi del laoro o dela scola i ghe dise su a arquanti dei nostri fradei. Pol esser che altri fradei i ze drio infrontar arquanti problemi de salute, o i ga dificoltà de perdonar qualchedun che li ga disgustà. E altri i ze drio spetar el fin rivar fà tanto tempo. Arquanti fradei del passà anca i ga infrontà queste dificoltà. Cossa che el apòstolo Paolo el ga fato par giutarli a gaver una fede pi forte?

13. Come che Paolo el ga giutà i fradei quando le persone ghe vegnea contra?

¹³ Paolo el ga doperà le Scriture par far pi forte la fede dei fradei. Par esémpio, arquante fameie dei fradei che i era giudei le disea che l’era giusto ndar drio al giudaismo invesse de a Cristo. Questi fradei fursi no i savea cossa far, ma la carta de Paolo ai ebrei li ga incoraià tanto. (Ebr. 1:5, 6; 2:2, 3; 9:24, 25) Lori i podea doperar quel che Paolo el gavea scrito par darghe una risposta a quei che ghe vegnea contra. Ancoi, ghen’è tante persone che ghe vien contra i nostri fradei e noantri podemo giutarli a difender quel che lori i crede. E se i altri i ride de un fradel gióveno parché el crede nela creassion, podarìssino giutarlo a catar de pi informassion nele reviste A Vida Teve  Um Criador? e A Origem da Vida — Cinco Perguntas que Merecem Respostas.

14. Cossa che Paolo el fea, anca se el laorea tanto nela predicassion e nela congregassion?

¹⁴ Paolo el ga incoraià i so fradei a mostrar amor un al altro. (Ebr. 10:24) Lu el ga giutà i fradei e sorele par meso de quel che el parlea e el fea. Par esémpio, quando i fradei nela Giudea i era drio patir la fame, Paolo el ghe ga portà arquante robe che i gavea de bisogno. (Ati 11:27-30) L’è vera che Paolo el gavea tanto laoro nela predicassion, ma lu sempre el se sforsea par giutar i fradei. (Gàl. 2:10) Queste robe ga assà i fradei pi sicuri che Geovà sempre el ndaria tenderli. Anca noantri podemo giutar i nostri fradei a gaver una fede pi forte quando doperemo del nostro tempo, forsa e abilità par giutar i fradei che i infronta qualche desgràssia. Podemo anca dar i nostri donativi par giutar el laoro che l’è fato in tuto el mondo. Se noantri femo cossita, assaremo i nostri fradei pi sicuri che Geovà mai li abandonarà.

15-16. Come che podemo giutar i nostri fradei che no i ga pi una forte fede?

¹⁵ Paolo el ga seità a incoraiar quei che no i gavea pi una forte fede. Paolo el sentia tanta compassion par questi fradei e el parlea de una maniera bondosa e che ghe giutea. (Ebr. 6:9; 10:39) Par esémpio, nela so carta ai ebrei, lu el ghe ga dato consili tante volte doperando la parola “noantri”. Cossita, lu el ga mostrà che anca lu el gavea de meterli in pràtica. (Ebr. 2:1, 3) Come Paolo, noantri no assemo de giutar i fradei che no i ga pi una forte fede. Noantri incoraiemo i nostri fradei quando mostremo che li amemo e se preocupemo con lori. E ghemo anca de ricordarse che incoraiemo tanto i nostri  fradei quando parlemo de una maniera bondosa con lori.

¹⁶ Paolo anca el ga assà i fradei sicuri che Geovà l’era atento a tute le robe bone che lori i fea. (Ebr. 10:32-34) Noantri podemo far come Paolo quando semo drio incoraiar un fradel che no’l ga pi una forte fede. Podemo domandarghe come che lu l’è deventà una Testimònia de Geovà. Podemo anca incoraiarlo a ricordarse de come Geovà lo ga belche giutà nel passà. Dopo, podemo assarlo sicuro che Geovà no’l se ga desmentegà del amor che lu el ghe ga mostrà e che Geovà mai el ndarà abandonarlo. (Ebr. 6:10; 13:5, 6) Se femo cossita, ndaremo incoraiar i nostri fradei a seitar a servir a Geovà.

17. Cossa che podemo far par incoraiar i nostri fradei?

¹⁷ Qualchedun che el laora con costrussion el deventa cada volta pi bravo in quel che el fà. Dela medèsima maniera, se noantri sempre proemo giutar i nostri fradei, ndaremo incoraiarli cada volta meio. Noantri podemo incoraiarli col esémpio de altri servi de Geovà che i ze stati boni de dàrghene fora cole so dificoltà. Noantri anca podemo incoraiar i nostri fradei quando ghe parlemo bele robe che ghen’è nela Bìblia, quando giutemo in quel che lori i ga de bisogno e quando seitemo a giutar quei che no i ga pi una forte fede. Podemo anca giutar la congregassion a viver in pace se parlemo ben dei altri e se femo la pace con qualche fradel che semo disgustadi.

18. Cossa che ghemo de seitar a far?

¹⁸ I fradei che i laora nele costrussion i resta tanto contenti col laoro che lori i fà. Anca noantri podemo sentirse cossita quando giutemo e incoraiemo i nostri fradei. Pol esser che le costrussion che femo no le reste par sempre. Ma i nostri fradei i podarà ricever benedission par sempre se li incoraiemo adesso. Alora ghemo de seitar a incoraiarse un al altro. — 1 Tes. 5:11.