• “Me parea che el me omo el me gavesse tradio diverse volte.”

• “Me go sentio umiliada, bruta e sensa valor.”

• “Mi go sofrio mi mi sola e no ghen’era nissuni par consolarme.”

• “Me sentia come se Geovà no’l me volesse pi ben.”

Queste parole le mostra come che una dona la sofre quando el so omo el varda pornografia. E se ela la vien a saverlo che lu el fea cossita par tanti mesi o fin par ani, fursi ela la pensa che no la podarà mai pi fidarse in lu. Una dona la ga dito: “Mi me domandea: ‘Chi che l’è questo omo che me go maridà? Elo drio far altre robe sconto de mi?’”

Questo artìcolo el ndarà giutar le done che le sofre parché el so omo el varda pornografia. a Ndaremo veder prinsipi dela Bìblia che i ndarà consolarle e mostrarghe che Geovà le ghe vol ben e el vol giutarle a gaver pace e a esser so amighe. b

Anca se no te pol star sempre drio el to omo par veder cossa lu l’è drio far, ghen’è diverse robe che ndarà giutarte a gaver pace. Varda adesso arquante robe che te pol far.

No stà sentirte in colpa. Fursi una dona la pense che el so omo el varda pornografia parché la fà qualcossa sbaliada. Una dona de nome Alice c la ga dito che la sentia che no la era bona che basta par so omo. Ela la se domandea: “Parché el me omo el cata meio vardar altre done invesse de mi?” Altre done le se sente in colpa parché le resta tanto cative e disgustade. Par quela, le pensa che el so matrimònio l’è drio deventar pedo par colpa soa. Varda cossa che una dona de nome Danielle la ga dito: “Mi son deventada rugna e cativa, e ero drio finir fora col me matrimònio par causa dela me ràbia.”

Se anca ti te senti cossita, te ghè de ricordarte che Geovà no’l pensa che ti te ghè la colpa de quel che el to omo el fà. Tiago  1:14 dise: “Cada un l’è proà par esser provocà e inganà par la so pròpia voia.” (Rom. 14:12; Fil. 2:12) Pitosto de darte la colpa, Geovà el resta tanto contento de veder che ti te sì leal a lu. — 2 Cró. 16:9.

Te ghè anca de capir che, se el to omo el varda pornografia, no vol mia dir che no te sì bona che basta. Studiosi i dise che la pornografia fà le persone pensar che le pol gaver robe che no le esiste mia e che nissuni i podaria far.

No stà preocuparte massa. Catherine la pensea che el so omo l’era drio vardar pornografia tuto el tempo. Una sorela de nome Frances la ga dito: “Mi resto pròpio preocupada quando no sò ndove l’è el me omo. Par quela, me sento ansiosa tuto el giorno.” Altre done le ga dito che le se sente in vergogna quando le ze insieme a altri fradei che i sa che el so omo el varda pornografia. Ancora altre le se sente pròpio sole parché le pensa che nissun l’è bon de capir quel che le infronta.

Tante done le se sente cossita. Ma se ti te seiti a pensar in queste robe, te vè restar ancora pi ansiosa. Alora, dopera el to tempo par far cada volta pi forte la to amicìssia con Geovà. Cossita, te gavarè pi forsa par dàrghene fora con questa dificoltà. — Sal. 62:2; Efe. 6:10.

Sfòrsate par leder la Bìblia e pensarghe sora le stòrie de done che le ga pregà a Geovà par gaver consolo. Gnanca sempre Geovà el ga finio col problema che le gavea, ma lu ghe ga dato pace. Par esémpio, Ana la era pròpio desanimada par causa del problema che la gavea, ma la ga seità a pregar a Geovà. Alora, ela la ga bio pace, anca se no la savesse se el so problema el se finiria. — 1 Sam. 1:10, 12, 18; 2 Cor. 1:3, 4.

Domanda el aiuto dei ansiani. Lori i pol esser “come una protession contra el vento, come un posto par protegerse dela tempesta”. (Isa. 32:2) I ansiani i pol fin giutarte a catar una sorela che la podarà consolarte. — Pro. 17:17.

La Bìblia la dise che ‘l’è meio due che un’. (Ecl. 4:9-12) Studi i mostra che quando tuti due i se sforsa insieme, l’è pi fàcile fermarse col vìssio dela pornografia e tornar a gaver  confiansa nel matrimònio. Alora, te pol far un per de robe che fursi giutarà el to omo a fermarse de vardar pornografia.

Magari, anca el to omo el ga de esser dessidio a no vardar pi pornografia. Lu el ghe toca domandar forsa a Geovà e aiuto ai ansiani. (2 Cor. 4:7; Tia. 5:14, 15) Lu anca el ga de star distante de tuto quel che podaria darghe voia de vardar pornografia. Par quela, ghe ocore pensar quando e come che el ndarà doperar el telèfono, el tablet, el computador e la television. (Pro. 27:12) L’è tanto importante che el to omo el acete el to aiuto e che sempre el te diga la verità. Se lu el fà cossita, te sarè bona de giutarlo.

Varda cossa che ga sucedesto con Felicia e so omo Ethan. Lu el ga scominsià a gaver el vìssio dela pornografia ancora quando l’era gióveno. Alora, Felicia la proa giutarlo e sempre lo scolta con passiensa quando ghe vien voia de vardar pornografia. Ethan el ga dito: “Mi ghe digo neta scieta ala me dona. Ela la me giuta a star distante dela pornografia e sempre la me domanda come son drio sentirme. Felicia anca la me giuta a saver doperar la internet dela maniera giusta.” L’è vera che Felicia la resta disgustada de saver che el so omo el ga voia de vardar pornografia. Ma ela la ga dito: “Se mi resto cativa o triste, no vao mia giutarlo a dàrghene fora col so vìssio. Cossita, dopo che parlemo sora el so problema, Ethan el me giuta a infrontar la me tristessa.”

Quando la dona la discore col so omo sora el vìssio che lu el ga, ela la pol giutarlo a star distante dela pornografia e anca la sarà bona de fidarse in lu nantra volta. Ma sarà pi fàcile che ela la se fide in lu nantra volta se la sa che lu no l’è drio sconderghe gnente. Alora, el omo el ga de contar ala so dona le voie che el ga, ndove el va e cossa che el fà fora par el giorno.

Se te pensi che anca ti te pol giutar el to omo, ledi insieme de lu questo artìcolo e proé discorer sora quel che gavé capio. d Lu el ga de esser dessidio a fermarse de vardar pornografia e el ga de sforsarse par gaver la to confiansa nantra volta. Invesse de restar cativo parché te vol parlar del so vìssio, lu el ga sforsarse par capir come te te senti. E ti te ghè de restar sempre dela so banda par giutarlo a dàrghene fora con questo problema. Anca te ghè de mostraghe che, se el seita a sforsarse cossita, te ndarè fidarte un lu nantra volta. Valtri due gavé anca de capir cossa che fà una  persona gaver voia de vardar pornografia e come che la pol dàrghene fora con questo problema.

Se te pensi che no te sarè mia bona de discorer con calma, te pol ciamar un ansiano che ve fidé par restar insieme. Proa ricordarte che anca dopo che el to omo l’è stà bon de vinser el vìssio dela pornografia, ghen volarà tempo fin che te sìpia bona de fidarte in lu nantra volta. Ma no stà desister. Invesse, resta contenta anca cole pìcole robe che el to omo l’è stà belche bon de cambiar. Se valtri due porté passiensa, pian pianeto el vostro matrimònio el restarà forte nantra volta. — Ecl. 7:8; 1 Cor. 13:4.

Ma cossa che te podarissi far se el to omo ancora el varda pornografia? Ricòrdate che questo no vol mia dir che lu no’l se ga ciamà gramo o che no’l cambiarà mai. Se el ga fato ora gaver el vìssio, ghe tocarà seitar a sforsarse tuta la vita par no vardar pornografia. E ancora che el sìpia stà bon de no vardar pornografia par tanti ani, pol esser che el torne a vardar. (Pro. 28:14; Mat. 5:29; 1 Cor. 10:12) Par quela, ghe tocarà gaver òdio de robe brute come la pornografia e la masturbassion. (Efe. 4:23; Sal. 97:10; Rom. 12:9) Se lu l’è disposto de sforsarse, fursi el sarà bon de dàrghene fora con questo vìssio del bon! e

Magari, cossa che te toca far se el to omo no’l ga mia voia de cambiar? L’è vera che, tante volte, te podarè sentirte desanimada, inrabiada e tradia. Ma te pol sentirte in pace se te assi el problema nele man de Geovà. (1 Pie. 5:7) Seita a pregar, studiar la Bìblia e pensarghe sora par assar ancora pi forte la to amicìssia con Geovà. Cossita, te ndarè sentir che lu l’è con ti. De acordo con Isaia 57:15, Geovà ‘l’è de star insieme coi schissadi e coi ùmili de spìrito par darghe forsa’. Fà el meio che te pol par adorar a Geovà e assarlo contento, e domanda el aiuto dei ansiani. No stà mai perder la speransa de che, un giorno, el to omo el dessida cambiar. — Rom. 2:4; 2 Pie. 3:9.