1. Parché che i babiloni i ze restadi maraveiadi con Daniel?

 EL PROFETA Daniel l’era sol un gióveno quando l’è stà portà via de Gerusalen par deventar un presonero in Babilònia. Ma, i babiloni i ze restadi maraveiadi con Daniel. Parché? Parché lori i ga visto che lu no’l gavea difeto, l’era bel e el vegnea de una fameia importante. (1 Sam. 16:7) Par quela, lori i ga dessidio pareciar Daniel par laorar nel palàssio del rè. — Dan. 1:3, 4, 6.

2. Cossa che Geovà el sentia par Daniel? (Ezechiel 14:14)

² Geovà el amea tanto a Daniel par causa dele so bele qualità e nò parché l’era bel o el gavea un laoro importante. Par esémpio, quando Daniel el gavea intorno de 20 ani, Geovà el ga dito che lu l’era fedele compagno a Noè e Giò, persone che lo gavea servio par tanti ani. (Gén. 5:32; 6:9, 10; Giò 42:16, 17; ledi Ezechiel 14:14. b) E Geovà el ga sempre amà a Daniel. — Dan. 10:11, 19.

3. Cossa che ndaremo imparar in questo stùdio?

³ In questo stùdio, ndaremo veder due bele qualità de Daniel che lo ga fato gaver tanto valor par Geovà. Prima, ndaremo imparar sora cada una de queste qualità e veder come Daniel le ga mostrade. Dopo, ndaremo veder come che lu l’è stà bon de gaver queste qualità e cossa ghemo de far par ndar drio el so bel esémpio. Ancora che questo stùdio el sìpia stà fato par i gióveni, sicuro che tuti noantri podemo imparar tanto del esémpio de Daniel.

4. Come che Daniel el ga mostrà che el gavea coraio? Parla de un esémpio.

⁴ Persone che le ze coraiose dele volte le sente paura. Anca cossita, lore no le assa mai de far quel che l’è giusto. Daniel l’è un bel esémpio de coraio. Varda due prove. Un tempo dopo che i babiloni i ga finio fora con Gerusalen, el rè Nabucodonosor el se ga insognà con una granda stàtua. Alora, lu el ga dito che, se i so òmini sabi no i fusse boni de spiegar cossa che lu el gavea visto e cossa volea dir, lu el ndaria coparli tuti. Anca Daniel el podaria esser copà. (Dan. 2:3-5) Alora, cossa galo fato? Daniel el ga dito al rè che, se el ghe desse pi tempo, lu el saria bon de spiegar quel che el rè el volea saver. (Dan. 2:16) Lu el ga mostrà coraio e fede, parché la Bìblia no la dise mia che Daniel el gavea belche spiegà quel che una persona la se gavea insognà. Lu el ga domandà che i so amighi, Sadrache, Mesache e Abednego, i preghesse a Geovà par domandarghe che lo giutesse. (Dan. 2:18) E Geovà el ga giutà Daniel a spiegar cossa che el rè el se gavea insognà. Cossita, lori no i ze stati copadi.

5. De che nantra maniera Daniel ghe ga tocà mostrar coraio?

⁵ Un tempo dopo che Daniel el ga spiegà cossa volea dir quela granda stàtua, el rè Nabucodonosor l’è restà spaventà con nantra roba che el se gavea insognà. Lu el ga visto una granda pianta. Alora, Daniel el ga bio bisogno de coraio parché el gavaria de spiegarghe al rè che lu el deventaria mato e che no’l ndaria governar par un tempo. (Dan. 4:25) Fursi, el rè el podaria pensar che Daniel l’era drio ndar contra el so governo, e el podaria mandar coparlo. Ancora cossita, Daniel el ga bio coraio e el ga giutà el rè a capir quel che lu el se gavea insognà.

6. Cossa che ga giutà Daniel a gaver coraio?

⁶ Come che Daniel l’è stà bon de gaver coraio? Sicuro che lu el ga imparà del esémpio de so pare e so mare quando l’era gióveno. Lori i obedia la Lege de Geovà e la ghe ga insegnada a so fiol.  (Deu. 6:6-9) Par quela, Daniel el cognossea i Diese Comandamenti e anca el capia tante robe importante, come cossa che i israeliti no i podea mia magnar. c (Lev. 11:4-8; Dan. 1:8, 11-13) Lu anca el ga imparà sora la stòria dei israeliti, come che Geovà li gavea giutadi e cossa ga sucedesto con quei che i ga desobedio a Dio. (Dan. 9:10, 11) Par via de quel che ga sucedesto nela so vita, Daniel l’era sicuro che Geovà e i so àngeli sempre i ndaria giutarlo. — Dan. 2:19-24; 10:12, 18, 19.

7. Che nantra roba ga giutà Daniel a gaver coraio? (Varda anca la ilustrassion.)

⁷ Daniel el studiea quel che i profeti de Geovà i gavea scrito, come el profeta Geremia. Par quela, lu l’è stà bon de capir che ghe manchea poco tempo fin che i israeliti i fusse lìberi de Babilònia. (Dan. 9:2) Sicuro che la so fede in Geovà la ze restada tanto forte de veder le robe suceder de acordo con quel che l’era scrito. Cossita, lu l’è stà bon de gaver tanto coraio. (Varda anca Romani 8:31, 32, 37-39.) E Daniel sempre el preghea a Geovà. (Dan. 6:10) Lu el ghe domandea scusa par i so sbali, el parlea dei so pensieri e sentimenti e el ghe domandea aiuto. (Dan. 9:4, 5, 19) Compagno a noantri, Daniel no l’è nassesto con coraio. Lu l’è stà bon de deventar coraioso parché el ga studià la Parola de Dio, el ga sempre pregà e el se ga fidà del tuto in Geovà.

8. Cossa ghemo de far par gaver coraio?

⁸ Cossa ghemo de far par esser boni de gaver coraio? Noantri no deventaremo coraiosi sol parché el nostro pare e mare i ga coraio. Invesse, ghemo de sforsarse compagno femo quando ne ocore imparar a far qualcossa. Podemo imparar con quei che i ga belche coraio e proar ndar drio al so esémpio. E cossa che imparemo del esémpio de Daniel? Ghemo de sempre studiar la Bìblia, pregar a Geovà, fidarse del tuto in lu e esser sicuri che lu el ndarà giutarne. Cossita, quando vien fora una dificoltà, saremo boni de mostrar coraio.

9. Come che gaver coraio pol giutarne?

⁹ Gaver coraio ne giuta tanto. Varda cossa che ga sucedesto con Ben. Lu el ndea nte una scola nela Alemagna ndove tuti i credea nela evolussion e i pensea che quel che la Bìblia la dise l’è sol una storieta. Alora, una volta, Ben ghe ga tocà spiegar a tuti parché che lu el crede che Dio l’è el Creador. Lu el ga bio de mostrar tanto coraio. Ma cossa che ga sucedesto? Ben el ga dito: “Intanto che mi spieghea, el me maestro l’era pròpio atento. Dopo, lu el ga fato còpie dele robe che go doperà par parlar e le ghe ga dato a cada un dei me coleghi. Tanti de lori ghe ga piasesto e i me ga dito che son stà pròpio bravo.” Come ghemo visto, se mostremo coraio, sarà pi fàcile che le persone le ne rispete, e pol esser che le volerà fin cognosser a Geovà. Sicuro che volemo esser coraiosi anca noantri.

10. Cossa che l’è lealtà?

¹⁰ Quando la Bìblia la parla sora “lealtà”  o el “amor leal” vol dir (1) el amor che Geovà el mostra a quei che i lo adora, e (2) el amor che ghen’è intrà i so servi. (2 Samuel 9:6, 7) Ma Geovà el speta che semo leai a lu compagno a Daniel e che femo la nostra lealtà cada volta pi forte. Adesso, ndemo veder cossa che Daniel el ga fato par seitar leal.

11. Come che Daniel el ga mostrà lealtà quando l’era belche vècio? (Varda la ilustrassion dela prima pàgina.)

¹¹ Tante volte, Daniel ghe ga tocà mostrar se el saria leal a Geovà o nò. Ma l’è stà pi fadiga nte un colpo quando lu el gavea belche 90 ani. In quela època, quei dela Mèdia e dela Pèrsia i gavea tolto el poder de Babilònia e la ga scominsià a esser governada par el rè Dario. Tanti de quei che i era servi del rè no i gavea mia rispeto par Geovà, i odiea a Daniel e i volea coparlo. Par quela, lori i ga imbroià el rè e i lo ga fato acetar una lege che la parlea che le persone le gavaria de esser leai sol al rè e che no le podaria pregar par gnanca un dio par 30 giorni. Alora, Daniel no’l podaria pregar a Geovà par 30 giorni. Cossa che lu el ga fato? Lu el ga seità leal a Geovà. Par quela, lu l’è stà metesto nte un buso pien de leoni. Ma Geovà lo ga salvà par causa dela so lealtà. (Dan. 6:12-15, 20-22) Come che noantri podemo seitar sempre leai compagno a Daniel?

12. Come che Daniel l’è stà bon de seitar sempre leal a Geovà?

¹² Come ghemo belche visto, par seitar leai a Geovà ne ocore gaver un forte amor par lu. Daniel l’è stà bon de seitar sempre leal parché el amea tanto a Dio. Cossa che lo ga giutà? Sicuro che lu el ghe pensea sora le bele qualità de Geovà e come che le mostrea. (Dan. 9:4) Daniel anca el pensea e el ghe dea tanto valor a tute le robe che Geovà el gavea fato par tender de lu e dei israeliti. — Dan. 2:20-23; 9:15, 16.

13. (a) Che dificoltà i gióveni i infronta ancoi par esser leai? Parla de un esémpio. (Varda anca el ritrato.) (b) De acordo col vìdeo, cossa che te risponderissi se qualchedun te domandesse cossa le Testimònie de Geovà le pensa sora el omossessualismo?

¹³ Ancoi, ghen’è tante persone che no  le ga rispeto par Dio gnanca par quel che el dise che l’è giusto o sbalià. Queste persone no le ghe piase nissuni che dise che vol adorar a Geovà. Tante fin le trata mal o le ghe ride drio dei gióveni che i serve a Geovà par proar finir fora la so lealtà. Varda cossa ga sucedesto con un gióveno dela Austràlia de nome Graeme. Nela scola, la so maestra la ga domandà a tuti cossa lori i ndaria far se un dei so coleghi ghe disesse che l’è omossessual. Ela la ga dito che quei che i fusse de acordo i gavaria de ndar par una banda dela sala. Magari quei che no i fusse de acordo i restaria de quel’altra banda. Questo no l’è stà mia fàcile par Graeme. Lu el ga dito: “Sol mi e nantro fradel semo restadi de una banda dela sala e tuti i altri i ze ndati de quel’altra banda parché i era de acordo col omossessualismo.” Ma quel che ga sucedesto dopo l’è stà ancora pi fadiga. Graeme el ga dito: “I me coleghi e fin la maestra i ne ga dito su. Go proà restar calmo e spiegar parché che mi penso cossita, ma lori gnanca i scoltea quel che mi parlea.” Cossa che Graeme el ga sentio? Lu el ga dito: “Son restà disgustà parché i ne ga dito su cossita. Ma, son restà pròpio contento de saver che son stà bon de seitar leal a Geovà e de parlar sora quel che mi credo.” d

14. Cossa che ghemo de far se volemo seitar sempre leai a Geovà?

¹⁴ Se volemo sempre esser leai a Geovà compagno a Daniel, ne ocore gaver un grando amor par Geovà. E come che podemo gaverlo? Ghemo de imparar sora le so bele qualità e studiar sora quel che lu el ga creà. (Rom. 1:20) Alora, se te vol amar e rispetar ancora de pi a Geovà, proa ndar in serca dei artìcoli e dei vìdei “Qualchedun lo ga fato?”. Te pol anca leder le reviste A vida — Teve um Criador? e A origem da vida — Cinco perguntas que merecem resposta. Varda cossa che Esther, una sorela dela Dinamarca, la ga dito: “Quel che queste reviste le dise l’è tanto bel. Invesse de parlar che ne toca creder nte una roba, le reviste le spiega la verità e le ne giuta a pensar e a dessider noantri soli.” Ben, che ghemo parlà prima el ga dito: “Quel che la organisassion la ne dà, ne giuta a far pi forte la nostra fede e mostra che l’è stà pròpio Geovà che el ga fato tuto quel che ghen’è.” Sicuro che dopo de studiar queste robe, anca ti te ndarè dir: “Geovà, nostro Dio, ti te mèriti ricever la glòria, el onor e el poder, parché te ghè creà tute le cose, e par la to volontà le ze vegneste a esister e le ze state creade.” — Apo. 4:11. e

15. Che nantra roba podemo far par gaver una forte amicìssia con Geovà?

¹⁵ Nantra roba che pol far la nostra amicìssia con Geovà deventar ancora pi forte la ze studiar sora la vita de Gesù. Una sorela de nome Samira, che la ze de star nela Alemagna la ga dito: “Par meso de quel che Gesù el ga fato, son stà bona de cognosser a Geovà ancora meio.” Ela la ga dito che quando la era una toseta, l’era fadiga creder che Geovà el ga sentimenti. Ma ela la podaria capir come che Gesù el se sentia. Samira la ga dito: “Me piasea imparar sora Gesù parché lu l’era  tanto caro e el tratea pròpio ben i tosatei. Alora, son nicorta che ero drio amar a Geovà cada volta de pi. Go capio che Gesù el fea tuto compagno a so Pare. Par quela che Geovà lo ga mandà qua nela Tera. Cossita, quando imparemo sora la vita de Gesù, podemo cognosserlo ancora meio.” (Gio. 14:9) Alora, se te vol far la to amicìssia con Geovà restar ancora pi forte, proa studiar sora la vita de Gesù. Cossita, sicuro che el to amor a Geovà el deventarà cada volta pi grando.

16. Parché che ghemo de esser leai? (Salmo 18:25; Michea 6:8)

¹⁶ Quando semo leai coi altri, ghemo amighi boni e leai. (Rut. 1:14-17) E se semo leai a Geovà, gavaremo pace e alegria parché lu l’è leal con quei che ghe mostra lealtà. (Ledi Salmo 18:25; f Michea 6:8. g) Ancora che Geovà el sìpia el Creador Tuto Poderoso, lu el promete amarte par sempre. Se semo amighi de Geovà, gnanca una dificoltà, gnanca una persona e gnanca la morte podarà finir fora con questa amicìssia. (Dan. 12:13; Luc. 20:37, 38; Rom. 8:38, 39) Sicuro che volemo far compagno a Daniel e sempre esser leai a Geovà!

17-18. Che altre robe podemo imparar de Daniel?

¹⁷ In questo stùdio, ghemo visto sol due dele bele qualità de Daniel. Ma podemo imparar ancora de pi sora lu. Par esémpio, Geovà el ga fato che lu el se insognesse diverse volte e che el gavesse vision sora cossa sucederia nel futuro e lo ga giutà a capir quel che el gavea visto. Arquante de queste professie le ga belche sucedesto e altre le parla sora robe che ancora le ndarà suceder e che le ndarà cambiar la vita de tute le persone.

¹⁸ Nel pròssimo stùdio, ndaremo veder due de queste professie. Se capimo ben queste professie, saremo pi boni de far meio dessision adesso e faremo pi forte el nostro coraio e la nostra lealtà a Geovà. Cossita, saremo pareciadi del bon par infrontar quel che ndarà suceder pi avanti!