1. Parché che ne piase persone che le ga passiensa?

 A TUTI ghe piase star insieme de persone che le ga passiensa. Parché? Parché queste persone no le resta disgustade quando ghe toca spetar qualcossa, e le porta passiensa con noantri quando femo un sbàlio. Fursi anca se ricordemo come che i altri i ga portà passiensa quando i ne ga insegnà la Bìblia anca se ne ga volesto tanto tempo par acetar e meter in pràtica quel che impareino! E ancora pi importante, semo tanto contenti de saver come che Geovà el mostra passiensa con tuti noantri. — Rom. 2:4.

2. Quando che fursi sìpia fadiga portar passiensa?

² Ancora che ghe demo valor a quei che i ga passiensa, fursi ne fà fadiga gaverla. Par esémpio, pol esser fadiga seitar calmi se ghen’è tanti auti par strada e pensemo che no saremo boni de rivar nela giusta nte un compromisso. O fursi no semo boni portar passiensa quando qualchedun l’è drio sgionfarne. Anca pol esser che femo fadiga spetar con passiensa fin che rive el novo mondo che Geovà el ne ga prometesto. Te piaseria gaver de pi passiensa? In questo stùdio, ndaremo imparar cossa vol dir gaver passiensa e parché dimostrar questa qualità l’è tanto importante. Anca ndaremo veder cossa che pol giutarne a gaver de pi passiensa.

3. Cossa che la persona che la ga passiensa la fà quando qualchedun el proa sgionfarla?

³ Varda quatro robe che una persona che la ga passiensa la fà. Prima, no la resta suito cativa. Par esémpio, se ghemo  passiensa, saremo boni de seitar calmi e no volaremo vingarse quando una persona la fà qualcossa contra noantri. Anca Geovà l’è cossita. In Salmo 86:5 dise che Geovà el ga ‘misericòrdia, compassion, no’l resta suito cativo, l’è pien de amor leal e l’è fedele’. — Éso. 34:6.

4. Cossa che la persona che la ga passiensa la fà quando ghe toca spetar?

⁴ Seconda, la persona che la ga passiensa la seita calma anca quando ghe toca spetar. Invesse de restar cativa, ela la seita calma anca se qualcossa ghe mete pi tempo de quel che la spetea. (Mat. 18:26, 27) Varda arquanti esempi de situassion che ne ocore seitar calmi. Quando i altri i ze drio parlar, ghemo de scoltarli con atension invesse de tacar a parlar anca noantri. (Giò 36:2) Noantri ghemo anca de portar passiensa par giutar el studiante a capir quel che la Bìblia la dise o a cambiar qualcossa nela so vita.

5. De che nantra maniera ghemo de mostrar che ghemo passiensa?

⁵ Tersa, la persona che la ga passiensa la pensa ben vanti de far qualcossa. Noantri savemo ben che, dele volte, ghemo de moverse fora e far qualcossa presto. Magari, quei che i ga passiensa no i proa finir fora tuti i so mestieri svelto e con prèssia. Invesse, lori i se tol el tempo che ghe vol e i pensa ben vanti de far qualcossa.

6. Cossa che quei che i ga passiensa i fà quando i ze drio infrontar dificoltà?

⁶ Quarta, la persona che la porta passiensa la proa dàrghene fora cole dificoltà sensa sbrontolar. Par perseverar, ne ocore gaver passiensa. Savemo che no l’è mia sbalià contarghe a un amigo sora un problema o quel che semo drio sentir. Magari, invesse de pensar sol nele so dificoltà, quei che i ga passiensa i proa pensar nele robe bone che sucede nela so vita e i fà el so meio par seitar a servir a Geovà con alegria. (Col. 1:11)  Noantri che servimo a Geovà ghemo de seitar a portar passiensa. Parché?

7. De acordo con Tiago 5:7, 8, parché che l’è importante gaver passiensa? (Varda anca la ilustrassion.)

⁷ Se volemo viver par sempre, ghemo de dimostrar passiensa. Arquanti servi fedeli del passà i ga portà passiensa fin che Geovà el fesse quel che el gavea prometesto. (Ebr. 6:11, 12) La Bìblia la fà una comparassion intrà noantri e un colono. (Ledi Tiago 5:7, 8. b) Un colono el laora tanto par piantar, darghe àqua e tender dela piantassion. Ancora cossita, lu no’l sa quando che la sarà pronta par tor su. Par quela, lu el porta passiensa fin che rive la ora de tor su quel che el ga semenà. Anca noantri ghemo de ndar drio el esémpio de Gesù e spetar, ‘parché no savemo che giorno el vegnarà’. (Mat. 24:42) Alora, l’è tanto importante portar passiensa e esser sicuri che Geovà el ndarà far quel che el ga prometesto nela ora giusta. Parché? Parché se no ghemo passiensa, restaremo stufi e scominsiaremo a tirarse distante de Geovà o ndaremo drio le robe de questo mondo che pensemo che ne darà alegria. Magari, se ghemo passiensa, saremo boni de perseverar fin el fin. — Mic. 7:7; Mat. 24:13.

8. Come che la passiensa la ne giuta a gaver bone amicìssie? (Colossensi 3:12, 13)

⁸ La passiensa anca la ne giuta a gaver bone amicìssie. Par esémpio, la ne giuta a star atenti intanto che i altri i ze drio parlar con noantri. (Tia. 1:19) La passiensa anca la ne giuta a esser in pace coi altri parché, anca se ghemo massa pensieri, no ndaremo parlar sensa pensar gnanca dirghe su. E se una persona la ne assa disgustadi, no ndaremo risponderghe de maniera stùpida. Invesse, ‘seitaremo a soportar i altri e a perdonarli’. — Ledi Colossensi 3:12, 13. c

9. Come che la passiensa la ne giuta a far bone dessision? (Proverbi 21:5)

⁹ La passiensa anca la ne giuta a far bone dessision. Come cossita? Invesse de far la prima roba che ghemo in mente, ndaremo torse tempo par pensar nela meio dessision. (Ledi Proverbi 21:5. d) Metemo dir che ne ocore catar un laoro. Fursi volemo acetar el primo laoro che vedemo, anca se ne tocarà perder riunion o ndar manco ala predicassion. Magari, se ghemo passiensa, ndaremo pensar ndove l’è el laoro, quanto tempo ne tocarà laorar, e se el ndarà intrigar la nostra amicìssia con Geovà e el tempo che ghemo cola nostra fameia. Cossita vedemo che, se portemo passiensa, saremo boni de far sempre la meio dessision.

10. Cossa ghemo de far par gaver passiensa?

¹⁰ Prega a Geovà e domanda passiensa. La passiensa la fà parte del fruto del spìrito. (Gàl. 5:22, 23) Par quela, ghemo de domandar che Geovà el ne dae so spìrito santo. Alora, se semo drio infrontar un problema e ne fà fadiga restar calmi, ‘seitaremo a domandar’ spìrito santo par esser boni de portar passiensa. (Luc. 11:9, 13) Podemo  anca domandar che Geovà el ne giute a veder le robe come lu el vede e sforsarse par portar passiensa tuti i giorni. Se seitemo a domandar che Geovà el ne giute a gaver passiensa, gavaremo questa qualità pi forte nel nostro cuor.

11-12. Come che Geovà el ga mostrà passiensa?

¹¹ Pensaghe sora i esempi dela Bìblia. La Bìblia la parla de arquanti servi de Geovà che i ga bio passiensa. Quando pensemo sora quel che lori i ga fato, imparemo come che podemo gaver passiensa anca noantri. Ma vanti de veder arquanti de questi esempi, ndemo imparar sora Geovà, el meio esémpio de passiensa che ghen’è.

¹² Nel giardin del Èden, Sàtana el ga contà busie sora Geovà. Lu el ga dito che Dio no l’era mia giusto e che no l’era un bon Governante. Ancora che Geovà el gavesse poder par finir fora con Sàtana, lu el ga portà passiensa. Parché? Parché Geovà el savea che ghe meteria tempo fin che tuti i savesse che lu l’è el meio Governante che ghen’è. E fin ancoi, Geovà el porta passiensa anca se tante persone le seita a dir busie contra lu. Lu el vol che tuti i cognossa le so promesse par el futuro e gàpia la oportunità de viver felici par sempre. (2 Pie. 3:9, 15) Par quela, tante persone ancoi le cognosse e le serve a Geovà. Sicuro che la passiensa de Dio la ne ga portà tante benedission. Alora, anca noantri volemo portar passiensa fin el fin.

13. Come che Gesù l’è stà bon de portar passiensa compagno a Geovà? (Varda anca la ilustrassion.)

¹³ Compagno a Geovà, anca Gesù el ga portà passiensa. Dele volte, no l’era mia fàcile gaver passiensa coi scribi e farisei che i fea tante robe sbaliade. (Gio. 8:25-27) Magari, compagno a so Pare, Gesù no’l restea  suito cativo. Anca quando i ghe vegnea contra, lu no’l ghe disea su. (1 Pie. 2:23) Gesù anca el ga infrontà le dificoltà sensa sbrontolar. Par quela che la Bìblia la dise che ghemo de ‘vardar con atension quel che el ga soportà tante brute parole dei pecadori’. (Ebr. 12:2, 3) Col aiuto de Geovà, anca noantri saremo boni de portar passiensa e dàrghene fora cole dificoltà.

14. Cossa che podemo imparar col esémpio de Abraon? (Ebrei 6:15) (Varda anca la ilustrassion.)

¹⁴ Pol esser che te sì drio spetar el fin de questo mondo fà tanto tempo, e ancoi te pensi che fursi no te sarè pi vivo fin el fin. Ancora cossita, cossa che pol giutarte a portar passiensa? Pensa in quel che ga sucedesto con Abraon. Lu el gavea belche 75 ani e no’l gavea mia fioi quando Geovà el ghe ga dito: “Farò de ti una granda nassion.” (Gén. 12:1-4) Sarà che Abraon el ga visto suceder quel che Geovà el gavea prometesto? Lu el ga visto sol una parte de questa promessa. Come cossita? Dopo de 25 ani, lu l’è ndato a quel’altra banda del Rio Eufrate e el ga bio Isache par meso de un miràcolo. Sol dopo altri 60 ani, Abraon el ga visto nasser so due neti, Esaù e Giacò. (Ledi Ebrei 6:15. e) Magari, Abraon no’l ga mia visto i so fioi deventar una granda nassion e ciapar la Tera Prometesta come eransa. Ancora cossita, lu el ga seità fedele e la so amicìssia con Geovà la ze restada ancora pi forte. (Tia. 2:23) Sicuro che quando Abraon el sarà ressussità, lu el restarà tanto contento de saver che, par causa dela so fede e dela so passiensa, tute le nassion dela Tera le ze state benedide! (Gén. 22:18)  Cossa che imparemo? Fursi no vederemo suceder tuto quel che Geovà el ga prometesto. Ma se semo boni de portar passiensa, Geovà el ndarà benedirne ancoi e ancora de pi nel futuro. — Mar. 10:29, 30.

15. Sora cossa che te pol studiar quando te studi la Bìblia ti sol?

¹⁵ La Bìblia la parla de arquante persone che le ga portà passiensa. (Tia. 5:10) Alora, cossa pénsito de far una peschisa sora questi bei esempi? f Par esémpio, Davi l’era un gióveno quando Geovà lo ga scoliesto par esser rè de Israel. Magari, ghe ga tocà spetar tanti ani fin che el deventesse rè. Nantro esémpio l’è Simeon e Ana. Lori i ga seità a adorar a Geovà intanto che i spetea el Messia. (Luc. 2:25, 36-38) Intanto che te studi sora questi servi fedeli del passà, proa domandarte: ‘Cossa li ga giutadi a portar passiensa? Parché che gaver passiensa l’è stà bon par lori? Come che mi posso far compagno al so esémpio?’ Ma te pol imparar anca de quei che no i ga mostrà passiensa. (1 Sam. 13:8-14) Intanto che te studi sora queste persone, proa domandarte: ‘Parché che questa persona no la ze stata bona de portar passiensa? Che brute robe le ga sucedesto?’

16. Parché che l’è bon portar passiensa?

¹⁶ Pensa sora parché che l’è bon mostrar passiensa. Quei che i ga passiensa, i ze pi contenti e calmi. La passiensa anca la ne giuta a gaver una bona salute e manco pensieri in testa. Se ghemo passiensa coi altri, gavaremo anca bone amicìssie e la nostra congregassion la restarà pi unida. E se qualchedun el proa sgionfarne, no restaremo suito cativi e no assaremo che el problema el vegna ancora pedo. (Sal. 37:8; Pro. 14:29) Ma ancora pi importante: Se portemo passiensa, saremo drio far compagno a Geovà e la nostra amicìssia la restarà ancora pi forte.

17. Cossa semo dessididi a far?

¹⁷ Sicuro che la passiensa la ze una bela qualità che la giuta a tuti. Magari, savemo che no l’è sempre fàcile mostrar passiensa. Ancora cossita, col aiuto de Geovà, saremo boni gaver questa qualità. Intanto che spetemo el novo mondo con passiensa, podemo esser sicuri che Geovà l’è drio vardar ‘quei che i lo rispeta e i porta passiensa nel so amor leal’. (Sal. 33:18) Par quela, ghemo de esser dessidi come mai a seitar a mostrar passiensa.