STÙDIO 35
CÀNTICO 89 Quei che i obedisse i sarà benedidi
Come che i ansiani i pol giutar quei che i ze stati cavadi via dela congregassion?
“Ghen sarà de pi alegria nel cielo quando un pecador el se ciama gramo che coi 99 giusti che no ghe ocore ciamarse grami.” — LUC. 15:7.
COSSA CHE NDAREMO IMPARAR?
In questo stùdio, ndaremo veder parché che arquanti i ga de esser cavadi via dela congregassion, e come che i ansiani i pol giutarli a ciamarse grami e a tornar a Geovà.
1-2. (a) Cossa che Geovà el pensa sora quei che i fà bruti pecati e no i se ciama grami? (b) Cossa che Geovà el vol che una persona che la ga fato un bruto pecato la fae?
GEOVÀ no’l aceta che i so servi i fae robe sbaliade e el ga òdio par el pecato. (Sal. 5:4-6) Lu el sa che nissuni i ze perfeti, ma el vol che i so servi i obedisse ai so comandamenti. (Sal. 130:3, 4) Ancora cossita, lu no’l aceta mia ‘òmini che no i rispeta a Dio e che i dopera la maraveiosa bontà de Dio come una scusa par far robe sbaliade’. (Giuda 4) Par quela che la Bìblia la dise che nel Armagedon, ‘i òmini rugni i sarà destruti’. — 2 Pie. 3:7; Apo. 16:16.
2 Geovà no’l vol che gnanca una persona la sìpia destruta. Come ghemo visto nei studi prima, lu “el vol che tuti i se ciame grami”. (2 Pie. 3:9) I ansiani i pensa compagno a Geovà e i porta passiensa quando i proa giutar un fradel che el ga fato un bruto pecato. Lori i se sforsa de giutarlo a fermarse de far quel che l’è sbalia e de gaver una forte amicìssia con Geovà nantra volta. Ma pol esser che lu no’l ndarà acetar questo aiuto gnanca el ndarà ciamarse gramo. (Isa. 6:9) Anca se i ansiani i proa giutarlo, pol esser che lu el seite a far el sbàlio. Alora, cossa che i ansiani i ga de far?
“CAVÉ VIA DE INTRÀ DE VALTRI LA PERSONA RUGNA”
3. (a) Cossa che la Bìblia la dise che sucede con un fradel che no’l se ciama gramo? (b) Parché che podemo dir che l’è stà el fradel che el ga scoliesto esser cavà via dela congregassion?
3 Quando un fradel el fà un bruto pecato e no’l se ciama gramo, i ansiani i ga de far quel che l’è scrito in 1 Corinti 5:13: “Cavé via de intrà de valtri la persona rugna.” Podemo dir che l’è stà el fradel a che el ga scoliesto esser cavà via dela congregassion. Parché? Lu el savea quel che ndaria suceder se lu el seitesse a far questo pecato, e l’è stà lu che no’l ga volesto cambiar e gnanca el se ga ciamà gramo. (Gàl. 6:7) Lu gnanca no’l ga acetà el aiuto che i ansiani i ga proà darghe tante volte. (2 Rè 17:12-15) Alora, par meso de quel che el ga fato, lu el ga mostrà che no’l vol obedir a Geovà. — Deu. 30:19, 20.
4. Parché che i ansiani i ga de far un anùnsio quando un fradel l’è cavà via dela congregassion?
4 Quando un fradel el fà un bruto pecato, no’l se ciama gramo e l’è cavà via dela congregassion, i ansiani i ga de far un anùnsio e dir ala congregassion che lu no l’è pi una Testimònia de Geovà. b Lori no i fà questo anùnsio par invergognar quel fradel. Invesse, i ansiani i vol avisar a tuti dela congregassion che lori i ga de “assar de star insieme” a quel fradel e che no i ga “gnanca de magnar” con lu. (1 Cor. 5:9-11) Questo l’è tanto importante, parché Paolo el ga dito che “un poco de levà el fà cresser tuta la massa”. (1 Cor. 5:6) Alora, se un fradel che el ga fato un bruto pecato e no’l se ga ciamà gramo no’l fusse cavà via dela congregassion, i fradei i podaria pensar che no ghe ocore obedir ale lege de Geovà. — Pro. 13:20; 1 Cor. 15:33.
5. Come che noantri ghemo de tratar un fradel che l’è stà cavà via dela congregassion, e parché?
5 Come che noantri ghemo de tratar un fradel che l’è stà cavà via dela congregassion? Noantri no gavaremo pi amicìssia con lu, ma no ghemo de pensar che lu mai el podarà servir a Geovà nantra volta. Ghemo de vederlo come una piégora persa. Anca se una piégora la pol perderse dele altre, la pol tornar. L’è vera che questo fradel no l’è pi drio viver come el ga prometesto a Geovà, e el pol fin perder la vita par causa de questo, ma ghemo de ricordarse che lu ancora l’è dedicà a Geovà. (Eze. 18:31) Alora, intanto che ghen’è tempo, Geovà el pol mostrar misericòrdia e el vol ancora che questo fradel el torne a servirlo insieme a noantri. Ma come che anca i ansiani i pol mostrar che i ga speransa che el torne?
COME CHE I ANSIANI I POL GIUTAR QUEI CHE I ZE STATI CAVADI VIA?
6. Cossa che i ansiani i ga de far par giutar una persona che la ze stata cavada via dela congregassion?
6 Quando un fradel l’è cavà via dela congregassion, sarà che i ansiani i lo abandona? L’è sicuro che nò! Quando lori i ghe dise che lu el sarà cavà via dela congregassion, lori anca i ghe dise cossa el ga de far par tornar a esser un servo de Geovà. E i ansiani i fà ancora de pi. Lori i ndarà dir che nte un per de mesi i ndarà farghe nantra vìsita par veder se lu el ga cambià quel che ghe ocorea. E se lu el aceta nantra vìsita, i ansiani i ndarà riunirse con lu par incoraiarlo a ciamarse gramo e a tornar a Geovà. Ma anca se lu no’l se ciama gramo, i ansiani i seitarà a proar farghe altre vìsite.
7. Come che i ansiani i mostra misericòrdia compagno a Geovà quando un fradel l’è cavà via dela congregassion? (Geremia 3:12)
7 Nel passà, quando i israeliti i fea bruti sbali, Geovà no’l spetea che lori i se ciamesse grami par sol dopo giutarli. Invesse, lu suito el proea giutarli a ciamarse grami e a cambiar. Come ghemo visto nel secondo stùdio, Geovà el ga domandà che Oseia el perdonesse e el acetesse nantra volta la so dona, che la era ancora drio tradirlo. Cossita, Geovà el ga mostrà che el ndaria perdonar e acetar el so pòpolo nantra volta, se i se ciamesse grami. (Ose. 3:1; Mal. 3:7) Ancoi, compagno a Geovà, i ansiani i se sforsa par mostrar misericòrdia a un fradel che l’è stà cavà via dela congregassion. Lori i vol che questo fradel el se ciame gramo e el torne ala congregassion. Par quela, i ansiani i ndarà far tuto quel che i pol par giutarlo e mai i ndarà far gnente che podaria intrigarlo de tornar ala congregassion. — Ledi Geremia 3:12. c
8. Come che la stòria che Gesù el ga contà ne giuta a capir meio la misericòrdia de Geovà? (Luca 15:7)
8 Nel secondo stùdio de questa revista, ghemo visto una stòria che Gesù el ga contà. In questa stòria, un fiol l’è ndato via de casa e el ga fato bruti sbali. Ma dopo, l’è tornà. Alora, quando so pare lo ga visto de distante, “lu l’è ndato de carera e el ghe ga dato un strucon e lo ga basà con tanto amor”. (Luc. 15:20) El pare de questa stòria no’l ga mia spetà che so fiol el rivesse casa e el domandesse scusa par i so sbali. Invesse, lu l’è ndato de carera par catarse con so fiol, parché lo amea tanto. Geovà el se sente cossita con quei che i ze stati cavadi via dela congregassion. E i ansiani i fà tuto quel che i pol par far compagno a Geovà. Lori i vol che quei che i ze stati cavadi via dela congregassion i torne a servir a Geovà. (Luc. 15:22-24, 32) La Bìblia la dise che Geovà, Gesù e i àngeli i resta pròpio contenti quando una persona la torna ala congregassion. E sicuro che anca tuti i altri nela congregassion i resta contenti! — Ledi Luca 15:7. d
9. Cossa che Geovà el incoraia le persone che le ga fato un bruto pecato a far?
9 Fin adesso, ghemo visto che Geovà no’l aceta che un servo suo el seite a far parte dela congregassion se el ga fato un bruto pecato e se no’l se ga ciamà gramo. Ma ancora cossita, Geovà el proa giutarlo parché el vol che lu el torne a servirlo. El testo de Oseia 14:4 mostra cossa che Geovà el sente sora queste persone: ‘Mi vao curarli, e lori no i ndarà pi far sbali. Mi vao amarli de volentiera parché no go pi ràbia.’ Come i ansiani i sa cossa Geovà el vol, lori i restarà atenti a qualche pìcolo cambiamento che mostra che una persona la ze drio scominsiar a ciamarse grama. E questo testo anca assa ciaro che Geovà ancora el ama quei che i lo ga abandonà e el vol che lori i torne presto.
10-11. Come che i ansiani i pol giutar una persona che la ze stata cavada via dela congregassion fà tanto tempo?
10 Ma sarà che i ansiani i pol giutar un fradel che l’è stà cavà via dela congregassion tanti ani indrio? Pol esser che questa persona no la fà pi el bruto pecato che la gavea fato o gnanca la se ricorde ben parché la era stata cavada via. Ma, no importa a quanto tempo qualchedun l’è stà cavà via dela congregassion, i ansiani i ndarà sforsarse par catarlo e visitarlo. In questa vìsita, i ansiani i pol pregar insieme a lu e incoraiarlo a tornar ala congregassion. Ma come fà tanti ani che lu l’è fora dela congregassion, lu el gavarà de imparar sora Geovà e sora le verità dela Bìblia nantra volta. Alora, se lu el dise che el vol tornar ala congregassion, i ansiani i pol domandar che qualchedun ghe fae el stùdio, ancora vanti de lu tornar a esser una Testimònia de Geovà. Ma sarà i ansiani che i ndarà scòlier un fradel o una sorela che ndarà farghe el stùdio.
11 I ansiani i vol mostrar compassion compagno a Geovà. Par quela, lori i vol giutar tuti quei che i ze stati cavadi via dela congregassion a tornar a Geovà. Alora, se una persona la se ferma de far un bruto pecato e la se ciama grama, la podarà suito tornar a esser Testimònia de Geovà. — 2 Cor. 2:6-8.
12. (a) Quando che i ansiani i ga de restar ancora pi atenti? (b) Parché che no ghemo de pensar che qualchedun el ga fato un pecato che Geovà mai el ndarà perdonar? (Varda anca la nota.)
12 Ma dele volte, i ansiani i ga de esser ben atenti vanti de acetar che una persona la torne ala congregassion. Par esémpio, pol esser che ela la ga violentà un toseto, la ze stata apòstata o la ga fato adultèrio par divorsiarse e esser lìbera par maridarse nantra volta. Alora, i ansiani i ga de esser pròpio sicuri che questa persona la se ga ciamà grama. (Mal. 2:14; 2 Tim. 3:6) I ansiani i ga de proteger la congregassion, ma anca i ga de ricordarse che Geovà sempre el aceta tuti quei che i se ciama grami e i se ferma de far quel che l’è sbalià. Alora, in situassion come queste, i ansiani i ga de esser ancora pi sicuri che una persona la se ga ciamà grama dei so sbali vanti de acetarla nela congregassion. Ma mai i ga de pensar che qualchedun ga fato un pecato che Geovà mai el ndarà perdonar. e — 1 Pie. 2:10.
COSSA CHE TUTI NELA CONGREGASSION I POL FAR?
13. Che difarensa ghen’è intrà una persona che la riceve consili e dissiplina e una persona che la ze cavada via dela congregassion?
13 Come ghemo visto nel stùdio prima, quando un fradel el fà un bruto pecato ma el se ferma de farlo e el se ciama gramo, lu el riceve consili e dissiplina. Alora, pol esser che i ansiani i farà un anùnsio par tuta la congregassion che lu el ga ricevesto consili e dissiplina. Ma noantri podaremo seitar a star insieme con lu parché el ga assà de far quel che l’è sbalià. (1 Tim. 5:20) Lu ancora el fà parte dela congregassion e el gavarà bisogno del aiuto dei so cari fradei e sorele. (Ebr. 10:24, 25) Ma no l’è mia cossita quando una persona la ze cavada via dela congregassion. Se questo sucede, tuti noantri ‘assemo de star insieme’ a questa persona e ‘gnanca magnemo insieme’ con ela. — 1 Cor. 5:11.
14. Come che podemo doperar i prinsipi dela Bìblia par dessider cossa far quando catemo una persona che la ze stata cavada via dela congregassion? (Varda anca la ilustrassion.)
14 Ma sarà che questo vol dir che, se vedemo una persona che la ze stata cavada via dela congregassion, ghemo de far finta che no la ghemo mia vista? Nò. Sicuro che no saremo amighi gnanca ndaremo ciacolar o divertirse insieme. Ma podemo doperar prinsipi dela Bìblia par dessider se ndaremo convidar questa persona che la ze stata cavada via dela congregassion par ndar ale riunion. Par esémpio, fursi dessidimo convidar qualchedun dela nostra fameia o un amigo che gaveino nel passà. E cossa ghemo de far se la catemo nte una riunion? Prima, noantri no podeino mia saludarla. Ma adesso, ghemo capio che cada un el pol doperar i prinsipi dela Bìblia par dessider se el ndarà saludarla o nò. Se dessidimo saludar questa persona, sicuro che no ndaremo mia ciacolar tanto gnanca passar tempo insieme.
Noantri podemo doperar i prinsipi dela Bìblia par dessider se ndaremo convidar una persona che la ze stata cavada via dela congregassion par ndar ale riunion. Noantri anca podemo dessider se ndaremo saludarla o nò se la catemo nte una riunion. (Varda el paràgrafo 14.)
15. De che tipo de persone 2 Gioani 9-11 el parla? (Varda anca el quadro “ Sarà che Gioani e Paolo i era drio parlar sora el medèsimo pecato?”)
15 Pol esser che arquanti fursi i se domande: ‘Ma la Bìblia no la dise che se saludemo una persona che la ze stata cavada via semo drio partissipar dei so sbali?’ (Ledi 2 Gioani 9-11. f) El testo de 2 Gioani 9-11 parla de persone che le ze apòstate o che le proa far che i altri i desobedisse a quel che la Bìblia la dise. (Apo. 2:20) Alora, se una persona la ze apòstata o se la insegna robe sbaliade ai altri, gnanca i ansiani i ndarà visitarla. Sicuro che volemo tanto che questa persona la càmbie quel che la ze drio far. Ma intanto che la seita a far queste robe sbaliade, no ndaremo mia convidarla par ndar nte una riunion gnanca ndaremo saludarla.
GHEMO DE MOSTRAR MISERICÒRDIA COMPAGNO A GEOVÀ
16-17. (a) De acordo con Ezechiel 18:32, cossa che Geovà el vol che tuti quei che i ga fato bruti pecati i fae? (b) Come che i ansiani i laora insieme a Geovà par giutar quei che i ga fato bruti pecati?
16 Cossa che ghemo imparà coi studi de questa revista? Geovà no’l vol che gnanca una persona la sìpia destruta. (Ledi Ezechiel 18:32. g) Invesse, lu el vol che tuti quei che i ga fato bruti pecati i se ciame grami e i sìpie so amighi nantra volta. (2 Cor. 5:20) Par quela che Geovà tante volte el ga proà giutar el so pòpolo e tanti dei so servi del passà a ciamarse grami e a tornar adorarlo. Ancoi nela congregassion, i ansiani i laora insieme a Geovà par giutar quei che i ga fato bruti pecati a ciamarse grami. — Rom. 2:4; 1 Cor. 3:9.
17 Proa pensar come Geovà, Gesù e i àngeli i resta contenti quando una persona la càmbia la so vita e la se ciama grama. Nostro Pare, Geovà, el resta tanto contento quando una persona che la gavea assà de adorarlo la torna ala congregassion. E el nostro amor par Geovà el resta cada volta pi grando quando pensemo nela so misericòrdia e nela so granda bontà. — Luc. 1:78.
CÀNTICO 111 I motivi dela nostra alegria
a In questo stùdio, ndaremo doperar la parola “fradel” par parlar de qualchedun che ga fato un bruto pecato. Ma le orientassion le ze compagne anca par le sorele.
b Noantri no doperaremo pi la parola “desassossiada” par parlar de una persona la ga assà de esser Testimònia de Geovà. De acordo con quel che Paolo el ga dito in 1 Corinti 5:13, noantri ghemo de dir che questa persona la ze stata cavada via dela congregassion.
c (Geremia 3:12) Và e parla al norte: “‘Cossita dise Geovà’: “Torna a mi, Israel rebelde. No te vardarò con ràbia, parché mi son leal”, el dise Geovà.’ “No restarò inrabià par sempre.
d (Luca 15:7) Ve digo che dela medèsima maniera, ghen sarà de pi alegria nel cielo quando un pecador el se ciama gramo che coi 99 giusti che no ghe ocore ciamarse grami.
e La Bìblia la parla che ghen’è persone che Geovà mai el ndarà perdonarle. Ghemo de capir che no l’è par causa del pecato che una persona la ga fato, ma parché la ga dessidio de mai fermarse de ndar contra Geovà. I ze sol Geovà e Gesù che i pol dessider se una persona no la pol mia esser perdonada. — Mar. 3:29; Ebr. 10:26, 27.
f (2 Gioani 9-11) Se qualchedun no’l obedisse quel che Cristo el ga insegnà, no’l ga la aprovassion del Pare. Ma quei che seita obedir al Pare i ga la aprovassion del Pare e del Fiol. 10 Se qualchedun el vien a valtri e no’l porta questo insegnamento, no gavé de riceverlo nela vostra casa, gnanca sté saludarlo. 11 Parché quei che lo saluda i partissipa dele so òpere rugne.
g (Ezechiel 18:32) “‘No go caro che nissuni i mora’, el dise el Sovrano Signor Geovà. ‘Alora, cambié quel che si drio far e seité a viver.’”
