STÙDIO 31
CÀNTICO 1 Le qualità de Geovà
Cossa che Geovà el ga fato par salvarne del pecato e dela morte?
“Dio el ga amà tanto el mondo, che el ga dato el so ùnico Fiol.” — GIO. 3:16.
COSSA CHE NDAREMO IMPARAR?
Ndaremo veder come Geovà el ne giuta a contentarlo anca se ghemo el pecato, e cossa che el ga fato par darne la speransa de viver par sempre nantra volta.
1-2. (a) Cossa che l’è el pecato, e come che podemo dàrghene fora? (Varda anca “Par capir meio”.) (b) Cossa che ndaremo veder in questo stùdio e nei altri studi de questa revista? (Varda anca la nota nela pàgina 32 “Caro letor” in questa revista.)
VUTO saver quanto Geovà Dio el te ama? Par saver la risposta, stùdia quel che lu el ga fato par salvarne del pecato e dela morte. El pecato a l’è un bruto nemigo che no podemo dàrghene fora noantri soli. Come tuti noantri semo pecadori, femo sbali e morimo. (Rom. 5:12) Ma ghen’è una bona notìssia! Par causa de quel che Geovà el ga fato, podemo dàrghene fora col pecato e cola morte.
2 Fà de pi de sei mila ani che Geovà el giuta tute le persone imperfete a gaver una forte amicìssia con lu. Parché? Parché lu el ne ama. Lu el ga scominsià a amarne ancora quando el ne ga creà. Par causa del so amor, lu el ga fato tante robe par esser nostro amigo e par darne la speransa de viver par sempre. Geovà el vol tanto che vivemo par sempre. (Rom. 6:23) Alora, Geovà el vol che anca ti te vivi par sempre. In questo stùdio, ndaremo risponder a queste tre domande: (1) Come che Geovà el ne dà speransa? (2) Come che arquante persone imperfete che la Bìblia la parla le ze state bone de contentarlo? (3) Come che Gesù el ne salva del pecato e dela morte?
CHE SPERANSA GEOVÀ EL NE GA DATO?
3. Come che Adon e Eva i ze deventadi pecadori?
3 Quando Geovà el ga creà el primo omo e la prima dona, lu el volea che lori i fusse contenti. Lu el ghe ga dato un bel posto de star, un bel laoro de far e un bel matrimònio. Lori i gavea de impienir la Tera con fioi e far che tuto el pianeta el deventesse un paradiso come el giardin del Èden. Geovà el ga dito che ghen’era sol una roba che no i podea mia far. E lu ga dito che, se lori i desobedisse, i ndaria morir. E l’è stà pròpio quel lì che ga sucedesto. Sàtana, un àngelo rugno che no ghe volea ben a Dio gnanca ale persone, el ghe ga dito una busia e lori i ga credesto. Cossita, i ga pecà. Invesse de creder nel so Pare che ghe volea tanto ben, Adon e Eva i ze ndati drio a Sàtana. De quel giorno avanti, lori i ga scominsià a deventar veci, e i ze morti. — Gén. 1:28, 29; 2:8, 9, 16-18; 3:1-6, 17-19, 24; 5:5.
4. Parché che Geovà el òdia el pecato e el ne giuta a esser so amighi? (Romani 8:20, 21)
4 Geovà el ga fato che questa stòria la fusse scrita nela Bìblia par giutarne a capir quanto che lu el òdia el pecato. Parché che lu el òdia el pecato? Par causa del pecato, rovinemo la nostra amicìssia con lu e morimo. (Isa. 59:2) Sàtana el òdia a Geovà e a tute le persone. Lu el ga dito quela busia a Adon e Eva, lori i ga credesto in lu e i ga pecà. Par quela, fursi lu el ga pensà che Geovà el assaria star quel che el volea far. Ma Sàtana no’l capia quanto che Geovà el ne ama. Come el nostro Pare el ne ama tanto e mai el ndaria cambiar quel che lu el volea par tute le persone, el ne ga suito dato una speransa. (Ledi Romani 8:20, 21. b) Geovà el savea che ghen saria persone che le ndaria amarlo e obedirghe. Lu l’è el nostro Pare e Creador, alora lu el vol che i so amighi i sìpia liberadi del pecato e dela morte. Come che Geovà el ne libera del pecato?
5. De acordo con Génesi 3:15, quando che Geovà el ga dato una speransa ale persone? Spiega.
5 Ledi Génesi 3:15. c Quando che Geovà el ga dato speransa ale persone? Pena dopo che Adon e Eva i ga pecà, Geovà el ga dito che el ndaria finir fora con Sàtana. Geovà el ga dito che un “dissendente” el ndaria salvar le persone, finir fora con Sàtana e con tuti i problemi che lu el ga fato vegner fora. (1 Gio. 3:8) Ma, el dissendente el ndaria sofrir, parché Sàtana ghe faria mal fin coparlo. Geovà el ga sofrio tanto de veder so caro Fiol esser tratà cossita, ma el ga sofrio de volentiera. Parché? Parché el savea che questo dissendente el ndaria salvar le persone.
COME CHE PERSONE IMPERFETE NEL PASSÀ LE GA CONTENTÀ A GEOVÀ?
6. Cossa che Abel, Noè e altri i ga fato par deventar amighi de Geovà?
6 Nei sècoli dopo, Geovà el ne ga giutà a capir cada volta meio come che persone imperfete le pol gaver una amicìssia con lu. Abel, el secondo fiol de Adon e Eva, l’è stà el primo omo a gaver fede in Geovà dopo che i so genitori i ga pecà nel giardin del Èden. Abel el amea Geovà e el volea contentarlo e deventar so amigo. Par quela, lu el ga fato un sacrifìssio. Come lu l’era un pastor, Abel el ga scoliesto arquante dele so bèstie par far un sacrifìssio par Geovà. Cossa che Geovà el ga pensà del so sacrifìssio? La Bìblia la dise che “Geovà el ga aprovà Abel e la so oferta”. (Gén. 4:4) Geovà el ga mostrà che ghe piasea dei sacrifissi de altre persone che lo amea e che le se fidea in lu, come Noè. (Gén. 8:20, 21) Quando Geovà el ga acetà questi sacrifissi, lu el ga mostrà che persone imperfete le pol gaver una amicìssia con lu e contentarlo. d
7. Cossa che imparemo con quel che Abraon l’era disposto a far col so fiol? (Varda anca la ilustrassion.)
7 Abraon el gavea una forte fede in Geovà. E Geovà el ghe ga domandà de sacrificar so fiol, Isache. Anca se l’era una roba tanto fadiga de far par Abraon, lu el ga obedio. Quando Abraon l’era quasi drio copar so fiol, Dio lo ga fermà. Quel che Abraon el ga fato ne insegna quel che Geovà el ndaria far pi avanti, o sia, lu el ndaria dar de volentiera el so Fiol come sacrifìssio. Geovà el ama pròpio tanto le persone. — Gén. 22:1-18.
8. Cossa che i sacrifissi che i israeliti i fea nel passà i ne insegna? (Levìtico 4:27-29; 17:11)
8 Quando Geovà el ga dato la Lege ai israeliti, lu el ghe ga dito che i gavea de far sacrifissi par gaver el perdon dei pecati. (Ledi Levìtico 4:27-29; e 17:11. f) Questi sacrifissi i mostrea che Geovà el faria un sacrifìssio ancora meio che el ndaria salvar le persone del pecato. Par meso dei profeti, Geovà el ga dito che ghen saria un dissendente, o sia, el Fiol de Dio, che el ndaria sofrir e morir par noantri. Lu el saria come el piegoreto che i israeliti i doperea par far sacrifissi nel passà. (Isa. 53:1-12) Proa pensar: Geovà el ndaria dar el so Fiol come sacrifìssio par salvar tute le persone del pecato e dela morte. Lu el ga fato questo anca par ti!
COME CHE GESÙ EL NE SALVA DEL PECATO?
9. Cossa che Gioani Batista el ga dito sora Gesù? (Ebrei 9:22; 10:1-4, 12)
9 Nel ano 29, Gioani Batista el ga dito sora Gesù de Nazarè: ‘Eco el Piegoreto de Dio che cava via el pecato del mondo!’ (Gio. 1:29) Con queste parole, lu el ga mostrà che Gesù l’era el dissendente che Dio el gavea prometesto. Lu el ndaria dar la so vita come sacrifìssio par salvar la umanità del pecato. — Ledi Ebrei 9:22; g 10:1-4, h 12. i
10. Come che Gesù el ga mostrà che “l’è vegnesto ciamar pecadori”?
10 Gesù l’è vegnesto par giutar le persone che le era desanimade par causa dei so pecati. Lu el savea che l’era par causa del pecato che le persone le era drio sofrir. Alora, lu el ga giutà òmini e done che altri li vedea come pecadori. Lu el ga spiegà una verità importante: “Quei che i ga salute no ghe ocore de dotor, ma quei maladi, si . . . No son vegnesto par ciamar i giusti, ma par ciamar i pecadori.” (Mat. 9:12, 13) Gesù el ga fato pròpio cossita. Quando una dona la ga piandesto tanto davanti de lu, lu el ghe ga dito con tanto amor che el perdonea i so pecati. (Luc. 7:37-50) Gesù el ga insegnà a una dona samaritana verità importante, anca se el savea che la era drio viver con un omo che no l’era so sposo. (Gio. 4:7, 17-19, 25, 26) E Dio el ga dato poder a Gesù de finir fora cola morte. Come? Gesù el ga ressussità òmini, done, toseti e anca gente pi granda. — Mat. 11:5.
11. Parché persone imperfete le se sentia ben insieme de Gesù?
11 Parché che le persone imperfete le se sentia ben insieme de Gesù? Parché lu el capia come che le se sentia e le tratea ben. Par quela che lore le volea star con Gesù e no le gavea paura de parlar con lu. (Luc. 15:1, 2) Gesù le lodea e, quando queste persone le mostrea fede in lu, lu el fea robe bele par lori. (Luc. 19:1-10) Par meso de quel che Gesù el fea e el parlea, podemo capir la misericòrdia de so Pare. (Gio. 14:9) Lu el ghe vol ben ai pecadori e el vol giutarne. Gesù el ga giutà i pecadori a cambiar la so maniera de viver e a deventar so dissìpoli. — Luc. 5:27, 28.
12. Cossa che Gesù el ne ga insegnà sora la so morte?
12 Gesù el savea che lu el ndaria dar la so vita come sacrifìssio, parché tante volte lu el ga parlà ai so dissìpoli che el ndaria esser tradio e morir nte un pal. (Mat. 17:22; 20:18, 19) Lu el savea che, col so sacrifìssio, lu el cavaria via i pecati del mondo, come Gioani e altri profeti i gavea belche dito. Gesù el ga anca insegnà che, dopo de dar la so vita, tanti i ndaria deventar so dissìpoli. (Gio. 12:32) Quei che i gavea fede in Gesù e i obedia a quel che lu el disea i podaria contentar a Geovà e esser liberadi del pecato. (Rom. 6:14, 18, 22; Gio. 8:32) Alora, Gesù el ga infrontà con coraio e de volentiera una bruta morte par liberarne del pecato. — Gio. 10:17, 18.
13. Come che Gesù l’è morto, e cossa che la so morte la ne insegna sora Geovà? (Varda anca la ilustrassion.)
13 Cossa che Gesù el ga bio de patir par morir? So amighi i lo ga tradio, i so nemighi i lo ga ciapà, ghe ga dito su e i lo ga acusà de robe che no’l gavea fato. I soldadi i lo ga picà su nte un pal de tortura par coparlo. Anca se Gesù el ga sofrio tanto, Geovà el ga patio ancora de pi de veder so Fiol sofrir cossita. Geovà el gavea el poder e la capacità de finir fora col sofrimento del so Fiol che el amea tanto, ma no’l ga fato gnente. Parché? Par causa del so amor. Gesù el ga dito: “Parché Dio el ga amà tanto el mondo, che el ga dato el so ùnico Fiol, cossita tuti quei che i dimostra fede in lu no i sìpia destruti, ma i possa viver par sempre.” — Gio. 3:16.
Geovà el ga sofrio tanto quando el ga mandà so Fiol par dar la so vita par liberarne del pecato e dela morte (Varda el paràgrafo 13.)
14. Cossa che el sacrifìssio de Gesù el ne insegna?
14 El sacrifìssio de Gesù l’è la prova pi granda che ghemo che Geovà el ama tuti i fioi de Adon e Eva. Alora, el prova che el ama pròpio tanto anca a ti. Lu el ga dato la vita del so caro Fiol e el ga passà par tanto sofrimento par salvar la umanità del pecato e dela morte. (1 Gio. 4:9, 10) Lu el vol giutarne a servirlo, anca se semo pecadori, e el vol cavar via del tuto el pecato.
15. Cossa ghemo de far par ricever el perdon dei nostri pecati?
15 Par meso del sacrifìssio de Gesù, podemo gaver el perdon dei nostri pecati. Ma noantri ghemo de far qualcossa par gaver el perdon de Geovà. Cossa? Gioani Batista e anca Gesù i ga dito cossa che ghemo de far: ‘Gavé de ciamarve grami, parché el Regno del cielo l’è darente.’ (Mat. 3:1, 2; 4:17) Alora, se volemo esser amighi de Geovà e gaver el so perdon, ghemo de ciamarse grami. Ma cossa vol dir ciamarse grami? E come che questo ne giuta contentar a Geovà anca se semo pecadori? Nel pròssimo stùdio, ndaremo veder la risposta.
CÀNTICO 18 Gràssie par el risgate!
a PAR CAPIR MEIO: Nela Bìblia, la parola “pecato” la vol dir far qualcossa che Geovà el dise che l’è sbalià o no far qual che lu el vol de noantri. Ma, dele volte, questa parola anca la ze doperada par dir che semo imperfeti, compagno al nostro pare Adon dopo che el ga pecà. L’è par causa del pecato che l’è vegnesto de Adon che noantri morimo.
b (Romani 8:20, 21) La creassion la ze stata fata schiava del pecato e dela morte, nò parché ela la volea, ma parché Dio el volea e el ga assà una speransa. 21 Lu el liberarà la creassion del pecato e dela morte e ela la gavarà la gloriosa liberassion dei fioi de Dio.
c (Génesi 3:15) E mi farò che ti e la dona sìpie nemighi, e anca el to dissendente e el so dissendente. Lu el te schissarà la to testa, e ti te farè mal al so calcagno.”
d Geovà el ga acetà el sacrifìssio de tante persone fedele parché el savea che, nel futuro, Gesù el ndaria dar la so vita par salvar del tuto a tute le persone. — Rom. 3:25.
e (Levìtico 4:27-29) “‘Se qualchedun del pòpolo el fà un pecato sensa farlo aposta e l’è considerà colpà parché el ga fato qualcossa che Dio el ga dito de nò far, 28 o se el se nicorde che el ga fato un pecato, alora lu el gavarà de dar una cavreta sana come oferta par el pecato che el ga fato. 29 Lu el meterà la man sora la testa dela bèstia par la oferta par el pecato e el coparà la oferta par el pecato nel medèsimo posto dela oferta brusada.
f (Levìtico 17:11) Parché la vita de una bèstia o de una persona la ze nel sangue. Son stà mi che lo go dato a valtri, cossita valtri podé gaver el perdon dei vostri pecati nel altar. Parché la vita che la ze nel sangue la dà el perdon dei pecati.
g (Ebrei 9:22) Infati, tute le robe le ze purificade con sangue, e, se no se spande el sangue, Dio no’l perdona i pecati.
h (Ebrei 10:1-4) Parché la Lege la ze una ombria dele bone cose che le ga de vegner, ma nò la pròpia realità. Ela mai la podaria far deventar perfeti quei che i riva darente de Dio, par meso dei medèsimi sacrifissi che i ze fati tuti i ani. 2 Par nantra banda, no se fermaria de far sacrifissi? Parché quei che i serve a Dio, quando che i ze purificadi, no i se sentiria pi colpadi dei so pecati. 3 Ma, questi sacrifissi i fà le persone ricordarse dei so pecati tuti i ani, 4 parché el sangue de tori e de bechi no’l pol mia finir coi pecati.
i (Ebrei 10:12) Invesse, lu el ga dato sol un sacrifìssio par i pecati, una volta par sempre, e el se ga sentà ala drita de Dio,
