1-2. (a) Parché che Gesù el ga dato la so vita? (b) Parché che l’era Gesù che el gavea de dar la so vita?

QUANDO Adon el ga desobedio a Geovà, lu e i so fioi i ga perso la oportunità de viver par sempre. Adon el gavea dessidio desobedir, alora lu no’l meritea mia viver par sempre. Ma i so fioi no i gavea colpa de quel che lu el gavea fato. (Rom. 5:12, 14) Ma sarà che Geovà el podea far qualcossa par dar la speransa de vita eterna nantra volta ai fioi de Adon? Si! Pena dopo che Adon el ga desobedio, Geovà el ga scominsià a parlar cossa che lu el ndaria far par liberar i fioi de Adon. (Gén. 3:15) Nela ora giusta, Geovà el ndaria mandar do el so Fiol par dar ‘la so vita par salvar tante persone’. — Mar. 10:45; Gioani 6:51.

² Gesù el ga dato la so vita par comprar indrio quel che Adon el gavea perso. (1 Cor. 15:22) Parché che l’era Gesù che el gavea de dar la so vita? Parché Geovà l’è giusto e la lege che lu el gavea dato ai israeliti la disea che se gavaria de dar vita par vita. (Éso. 21:23, 24) Adon el gavea perso la so vita umana perfeta. Alora, par causa dela giustìssia de Geovà, Gesù el gavaria de dar la so vita umana perfeta par comprar indrio quel che Adon el gavea perso. (Rom. 5:17) Cossita, lu l’è deventà el “Pare Eterno” de tuti quei che i ga fede nel so sacrifìssio. — Isa. 9:6; Rom. 3:23, 24.

3. De acordo con Gioani 14:31 e 15:13, parché che Gesù el ga dato la so vita come sacrifìssio?

 ³ Parché che Gesù l’è restà fedele e el ga volesto dar la so vita umana perfeta? Parché lu el ama tanto al so Pare e a noantri. (Ledi Gioani 14:31; * 15:13. *) El amor de Gesù lo ga giutà a seitar fedele e a far la volontà del so Pare.Cossita quel che Geovà el volea par le persone e par la Tera ndaria suceder. In questo stùdio, ndaremo imparar parché che Geovà el ga assà che Gesù el sofrisse e morisse. Noantri ndaremo anca studiar sora un servo de Geovà che el dea tanto valor al sacrifìssio de Gesù. Dopo, ndaremo imparar come podemo mostrar che demo tanto valor a questo sacrifìssio e come che podemo dar cada volta pi valor a quel che Geovà e Gesù i ga fato par noantri.

4. Cossa ga sucedesto vanti dela morte de Gesù?

⁴ Nela note che Gesù el saria morto, lu el podaria ciamar miliari de àngeli par protegerlo dei soldadi romani. Ma el ga assà che i lo ciapesse e i ghe desse bote. (Mat. 26:52-54; Gioani 18:3; 19:1) I soldadi i ga doperà una scùria che la sbrega la carne par darghe nela schena de Gesù. Dopo, i soldadi i ga mandà che Gesù el portesse un pal che el pesea tanto. Lu el ga scominsià a portarlo, ma i soldadi romani i ga mandà che nantro omo lo portesse. (Mat. 27:32) Quando Gesù l’è rivà nel posto che el saria morto, i soldadi i lo ga inciodà nel pal par le man e par i pié. Col tempo ghe fea pi mal le man e i pié par causa dei ciodi. Lu el ga anca visto che i so amighi e la so mare i era drio piander e che i giudei i era drio riderghe drio. (Luc. 23:32-38; Gioani 19:25) Lu l’era drio sofrir tanto. El so cuor e i so palmoni i era drio fermarse e ghe fea fadiga tirar el fià. Cola poca forsa che el gavea, lu el ga pregà a Geovà, dopo el ga sbassà la testa e l’è morto. (Mar. 15:37; Luc. 23:46; Gioani 10:17, 18; 19:30) Gesù el ga sofrio tanto, l’è stà umilià e l’è morto pian pian.

5. Cossa che ga fato Gesù sofrir de pi?

⁵ La pedo roba par Gesù no l’è stà sofrir cossita, ma esser condanà par una roba bruta che no’l gavea mia fato. Le persone le ga parlà che lu no’l gavea rispeto par Dio, gnanca par el so nome. (Mat. 26:64-66) Lu l’era drio sofrir tanto par causa de questo e el ga domandà al so Pare che no lo assesse infrontar quela roba. (Mat. 26:38, 39, 42) Parché che Geovà el ga assà che el so Fiol el sofrisse e morisse? Ndemo veder tre robe.

6. Parché che Gesù el ga bio de esser picà su nte un pal?

⁶ Primo, Gesù l’è stà picà su nte un pal par liberar i giudei dela maledission. (Gàl. 3:10, 13) I giudei i ze stati maledidi parché lori i gavea prometesto obedir a Dio e no i ga mia obedio. Cossita, lori i ndaria morir parché i era fioi de Adon, e anca parché i ze stati maledidi. (Rom. 5:12) La lege de Geovà la disea che la persona che la fesse un bruto pecato che meritea la morte, la gavaria de esser copada. Dopo, el so corpo el podaria esser picà su nte un pal e la lege anca la disea che questa persona la era maledeta. * (Deu. 21:22, 23; 27:26) Alora, l’era come se Gesù el fusse maledio nel posto del lori. Cossita el sacrifìssio de Gesù el podaria salvar anca ai giudei che i lo gavea abandonà.

7. Parché che Geovà el ga assà Gesù sofrir?

⁷ Secondo, Geovà el ga assà che el so Fiol el  sofrisse cossita parché el volea pareciarlo par esser nostro Somo Sasserdote. Gesù el ga capio ben come l’è fadiga obedir a Geovà quando semo drio sofrir tanto. Lu l’era drio sofrir tanto che el ga pregà a Geovà par domandar aiuto e el ga scominsià a piander. L’è sicuro che Gesù el capisse quel che noantri ghemo de bisogno e el ne giuta a infrontar le dificoltà. L’è tanto bon saver che Geovà el ne ga dato un Somo Sasserdote che l’è misericordioso e che l’è bon de “capir le nostre fiachesse”! — Ebr. 2:17, 18; 4:14-16; 5:7-10.

8. Parché che Geovà el ga assà che Gesù el infrontesse tante robe?

⁸ Sàtana el ga dito che le persone no le saria fedele a Dio quando le infrontesse dificoltà. El ga anca dito che lore sol le ndaria servir a Dio parché le volea qualcossa de lu. Sàtana anca el ga dito che le persone no le ama a Geovà. (Giò 1:9-11; 2:4, 5) Alora, Geovà el ga anca assà che el so Fiol el sofrisse cossita par mostrar che Sàtana no l’era mia giusto. Geovà el se fidea tanto nel so Fiol, par quela el ga assà che lu el infrontesse le pedo dificoltà. E Gesù l’è stà fedele e el ga mostrà che Sàtana l’è un busier.

9. Cossa che imparemo del esémpio del apòstolo Gioani?

⁹ Tanti de quei che i ndea drio a Gesù i ga bio una fede pi forte dopo che i ga imparà sora el so sacrifìssio. Lori i ga infrontà tante dificoltà, ma i ga seità a predicar anca che i fusse veci e che le persone le volesse fermarli. Un de questi esempi l’è stà del apòstolo Gioani. Lu el ga predicà sora Cristo e sora el so sacrifìssio intorno de 60 ani. Alora, quando el gavea quasi 100 ani, le autorità de Roma le pensea che lu l’era un perìcolo e lo ga metesto in preson nela ìsola de Patmo. Parché che i ga fato questo? Parché lu el ga predicà sora Dio e sora Cristo. (Apo. 1:9) L’è sicuro che Gioani l’è un bel esémpio parché el gavea una forte fede e el seitea a perseverar!

10. Come che i libri che Gioani el ga scrito i mostra che el ghe dea tanto valor al sacrifìssio de Gesù?

¹⁰ I libri che Gioani el ga scrito i mostra che lu el amea tanto a Gesù e l’era tanto grato par el so sacrifìssio. Nei libri che el ga scrito, lu el ga parlà de pi de 100 volte sora el sacrifìssio de Gesù e come questo l’è importante par noantri. Par esémpio, Gioani el ga scrito: “Ma, se qualchedun el fà un pecato, noantri ghemo un che el ne giuta, che l’è insieme al Pare: Gesù Cristo, un giusto.” (1 Gio. 2:1, 2) Quel che Gioani el ga scrito anca el mostra che l’è tanto importante parlar ai altri sora Gesù. (Apo. 19:10) L’è sicuro che Gioani el ghe dea tanto valor al sacrifìssio de Gesù. Come che noantri podemo far compagno?

11. Cossa che pol giutarne a no sbaliar?

¹¹ Ghemo de far tanto sforso par no sbaliar. Se demo valor al sacrifìssio de Gesù, mai ndaremo pensar: ‘Parché che me sforso tanto par no sbaliar? Dopo l’è sol domandar el perdon.’ Pitosto, se ghemo voia de far qualcossa sbaliada, ghemo de pensar: ‘Come che posso pensar de far una roba de questa dopo de tuto quel che Geovà e Gesù i ga fato par mi?’ Anca, podemo domandar a Geovà: ‘No me assa cascar in tentassion.’ — Mat. 6:13.

12. Come che podemo meter in pràtica el testo de 1 Gioani 3:16-18?

¹² Ghemo de amar i nostri fradei. Noantri mostremo che ghe demo valor al sacrifìssio de Gesù quando mostremo amor ai nostri fradei. Come cossita? Gesù el ga dato la so vita  par ti e anca par i to fradei. Se lu l’è morto par lori, anca lori i ze pressiosi. (Ledi 1 Gioani 3:16-18. *) Come che podemo mostrar che amemo i nostri fradei? Par esémpio, quando li tratemo con bontà. (Efe. 4:29, 31–5:2) Noantri podemo giutar i nostri fradei quando lori i ze maladi o quando i ze drio infrontar una dificoltà come qualche desgràssia. Ma cossa che podemo far quando restemo disgustadi par causa de qualcossa che un fradel el ga fato o el ga dito par noantri?

13. Parché che ghemo de perdonar i nostri fradei?

¹³ Te pensi che no te si mia bon de perdonar un fradel? (Lev. 19:18) Se questo te ga belche sucedesto, mete in pràtica el consìlio: “Seité soportarve un al altro e a perdonarve del tuto un al altro, anca se qualchedun el ga rason par brontolar contra nantra persona. Cossita come Geovà el ve ga perdonà del tuto, valtri gavé de far compagno.” (Col. 3:13) Quando te perdoni el fradel, te mostri a Geovà che te dè valor al sacrifìssio del so Fiol. Cossa che te pol far par mostrar che te dè ancora de pi valor al sacrifìssio de Gesù?

14. Come che podemo dar ancora de pi valor al sacrifìssio de Gesù?

¹⁴ Ringràssia a Geovà par el sacrifìssio. Quando te preghi a Geovà, parla dei sbali che te ghè fato in quel giorno e domanda che el te perdone. Varda quel che Joanna, una sorela de 83 ani che la ze de star nela Ìndia, la ga dito: “Mi penso che l’è tanto importante parlar del sacrifìssio de Gesù tuti i giorni e ringrassiar a Geovà nele orassion.” Se te ghè fato un bruto pecato, te ghè de domandar aiuto anca ai ansiani. Lori i ndarà scoltarte e darte boni consili dela Parola de Dio. Lori i ndarà pregar con ti e domandar che Geovà el te perdone par meso del sacrifìssio de Gesù. Cossita, te podarè esser amigo de Geovà nantra volta. — Tiago 5:14-16.

15. Parché che ghemo de torse tempo par studiar e pensar sora el sacrifìssio de Gesù?

¹⁵ Pensa sora el sacrifìssio. Rajamani, una sorela che la ga 73 ani la ga dito: “Quando mi  penso in tuto quel che Gesù el ga sofrio, me vien fin voia de piander.” Fursi anca ti te sofri quando te pensi che el Fiol de Dio el ga sofrio tanto. Ma se te seiti a pensar nel sacrifìssio, te ndarè amar cada volta de pi a Gesù e a Geovà. Cossa te pensi de studiar de pi sora el sacrifìssio de Gesù?

16. Parché che l’è bon par noantri insegnar ai altri sora Gesù? (Vedi la ilustrassion dela prima pàgina.)

¹⁶ Insegna ai altri sora el sacrifìssio de Gesù. Quando parlemo ai altri sora el sacrifìssio de Gesù, demo ancora de pi valor a questo sacrifìssio. Noantri ghemo bele robe par giutarne a far questo. Par esémpio, podemo doperar la lession 4 dela revista Bone Notìssie de Dio par Ti! che dise: “Chi che l’è Gesù Cristo?” Podemo anca doperar el capìtolo 5 del libro Cossa la Bìblia la Pol Insegnarne? che el parla: “El Risgate — El Pi Grando Regalo de Dio.” Noantri demo ancora de pi valor al sacrifìssio de Gesù quando noantri ndemo ala Selebrassion dela morte de Cristo tuti ani. Mostremo che demo valor al Sacrifìssio anca quando convidemo tute le persone che semo boni par ndar ala Selebrassion. Noantri restemo tanto contenti de insegnar ai altri sora Gesù!

17. Parché el sacrifìssio l’è el meio presente de Dio par i umani?

¹⁷ L’è sicuro che volemo mostrar che demo cada volta de pi valor al sacrifìssio de Gesù. Par causa del sacrifìssio de Gesù podemo esser amighi de Geovà, anca che sbaliemo. Par causa del so sacrifìssio tute le robe che el Diaol el ga fato le ndarà finirse. (1 Gio. 3:8) Par causa del sacrifìssio, quel che Geovà el vol far par la Tera ndarà suceder. Par esémpio, tuta la Tera la sarà un paradiso e tute le persone le ndarà amar e servir a Geovà. Par quela che noantri volemo far el nostro meio par ringrassiar e mostrar che ghe demo valor al meio presente che Geovà el ne ga dato, el sacrifìssio del so Fiol!