1-2. Come che podemo far compagno al esémpio de Gesù? Daghe un esémpio.

IMAGINA che ti e i to amighi sì drio caminar in meso el mato, nte un posto tanto distante, pericoloso e con baro. Valtri gavé el aiuto de una persona che la cognosse tanto ben quel posto. Ma, dopo de un tempo, valtri no sì mia pi boni de veder quela persona. Ancora cossita, valtri no sì mia spaventadi parché vedé ndove che lu el ga pestà. Alora, se pesté ndove che lu el ga pestà, saré boni de caminar nela strada giusta.

² Anca el mondo rugno che semo drio viver l’è un posto tanto pericoloso. Ma Geovà el ne ga dato un aiuto, che l’è Gesù Cristo. Cossita, come quela persona che la pol giutar i amighi a caminar nela strada giusta, Gesù el ne ga assà el so esémpio par noantri far compagno a lu. (1 Pie. 2:21) Una peschisa dela Bìblia la dise che Piero l’era drio parlar che Gesù l’era come una persona che la mostra la strada giusta. In questo stùdio, ndaremo risponder ale domande: Cossa che vol dir far compagno al esémpio de Gesù? Parché che ghemo de far questo? E come che podemo farlo?

3. Cossa che vol dir far compagno al esémpio de qualchedun?

³ Cossa vol dir far compagno al esémpio de una persona? Dele volte la Bìblia la dopera le parole “caminar” e “pié” par parlar sora quel che una persona la fà nela so vita. (Gén. 6:9; Pro. 4:26) Alora, quel che una persona la fà pol esser come le so peche. Cossita, caminar ndove una persona la ga caminà, o  far compagno a ela vol dir far quel che ela la ga fato.

4. Cossa vol dir far compagno a Gesù?

⁴ Far compagno a Gesù vol dir far quel che lu el ga fato. Che esémpio Gesù el ne ga dato? Nel testo de questo stùdio, Piero l’era drio parlar che Gesù l’è stà un bel esémpio, parché el ga perseverà anca che el fusse drio sofrir. Ma ghen’è anca altre maniere de far compagno a Gesù. (1 Pie. 2:18-25) Noantri podemo dir che tuto quel che Gesù el ga fato e el ga parlà l’è un bel esémpio par noantri.

5. Sarà che persone imperfete le ze bone de far come Gesù? Spiega.

⁵ Sarà che noantri, che semo imperfeti, podemo far compagno el esémpio de Gesù? Si. Noantri savemo che no saremo boni de far dela medèsima maniera che Gesù. Ma se femo sforso e femo el nostro meio, saremo drio far come el apòstolo Gioani el ga dito: Gavé de ‘seitar a viver come lu el ga vivesto’. — 1 Gio. 2:6.

6-7. Parché che la nostra amicìssia con Geovà la resta pi forte quando femo compagno a Gesù?

⁶ Se femo compagno a Gesù saremo amighi de Geovà. Parché che podemo dir questo? Primo, parché Gesù el ne ga mostrà quel che ghemo de far par assar Geovà contento. (Gioani 8:29) Alora, se femo compagno a Gesù, ndaremo assar Geovà contento. E l’è sicuro che Geovà el sarà amigo de quei che i se sforsa tanto de esser so amighi. — Tiago 4:8.

⁷ Secondo, Gesù el ga fato compagno al so Pare, e par quela el podea dir: “Quel che el ga visto a mi el ga visto anca al Pare.” (Gioani 14:9) Alora, quando femo compagno a Gesù, semo drio far compagno anca a Geovà. E quanto de pi femo compagno le qualità de Geovà, pi forte sarà la nostra amicìssia con lu. Noantri podemo far compagno le qualità  de Gesù e tratar le persone come lu le tratea. Par esémpio, un leproso ghe ga fato pecà, lu el ga bio compassion de una dona che la era drio sofrir par causa de una malatia e anca de quei che i gavea perso qualchedun che i amea nela morte. — Mar. 1:40, 41; 5:25-34; Gioani 11:33-35.

8. Se femo compagno a Gesù, saremo boni de far le robe pi importante. Parché?

⁸ Se femo compagno a Gesù, saremo boni de seitar a far le robe pi importante. Poco vanti de morir, Gesù el ga dito: “Mi go vinsesto el mondo.” (Gioani 16:33) Parché? Gesù no’l ga mai assà che gnente che le persone le parlesse, le fesse o pensesse lo intrighesse de far quel che l’era pi importante. La roba pi importante par lu la era santificar el nome de Geovà. Cossa che imparemo? Ghen’è tante robe nel mondo che le pol intrigarne de far el nostro meio a Geovà. Par quela, ghemo de far compagno a Gesù e no assar che gnente ne intrighe de far la volontà de Geovà. Cossita, anca noantri podaremo dir che ghemo ‘vinsesto’ el mondo. — 1 Gio. 5:5.

9. Cossa che ghemo de far par seitar fedeli e viver par sempre?

⁹ Se noantri femo compagno a Gesù, riceveremo la vita eterna. Quando un gióveno che l’era sior el ga domandà a Gesù cossa che el gavea de far par viver par sempre el ghe ga rispondesto: “Vien e sìpia me dissìpolo.” (Mat. 19:16-21) Quando Gesù l’era drio parlar coi giudei che no i credea che lu l’era el Cristo, lu el ga dito: ‘Le me piégore le me vien drio. Mi ghe dao vita eterna.’ (Gioani 10:24-29) Gesù el ga parlà a Nicodemo, che l’era del Sinèdrio, che ‘tuti quei che i credesse in lu i gavaria vita eterna’. (Gioani 3:16) Ma, come che mostremo che credemo in Gesù? Noantri ghemo de meter in pràtica quel che lu el ne ga insegnà e far compagno a lu. Se femo queste robe, ndaremo seitar fedeli a Geovà e podaremo viver par sempre. — Mat. 7:14.

10. Cossa che ghemo de far par cognosser meio a Gesù?

¹⁰ Noantri sol saremo boni de far compagno a Gesù se lo cognossemo ben. (Ledi Gioani 17:3. *) Noantri ghemo de seitar a cognosser le so qualità, cossa che el pensa e i so prinsipi. Alora, anca se fà tanti ani che servimo a Geovà, ghemo de seitar a sforsarse par cognosser meio a Geovà e a Gesù.

11. Cossa che podemo imparar dei libri de Mateo, Marco, Luca e Gioani?

¹¹ Geovà el ne giuta a cognosser el so Fiol par meso dei Vangeli, o sìa, i libri de Mateo, Marco, Luca e Gioani. In questi quatro libri dela Bìblia ghen’è la stòria dela vita e del laoro che Gesù el ga fato. I Vangeli i parla de  quel che Gesù el ga parlà, quel che el ga fato e come el se ga sentio. Se studiemo questi libri, semo boni de capir quel che Gesù el ga fato. (Ebr. 12:3) Alora, se volemo cognosser ancora de pi a Gesù, ghemo de studiar i Vangeli. Cossita, saremo boni de far compagno a lu.

12. Cossa che ghemo de far par imparar tanto dei Vangeli?

¹² Se noantri volemo imparar tanto dei Vangeli, ghemo de léderli, ma anca torse tempo par studiarli ben e pensar sora quel che ledemo. (Varda anca Giosuè 1:8 nota.) Adesso, ndemo imparar due robe che ndarà giutarne a pensarghe sora i Vangeli e meter in pràtica quel che imparemo de lori.

13. Cossa pol giutarte a imaginar quel che te ledi?

¹³ Primo, imagina quel che te ledi. Proa veder, scoltar e sentir quel che te sì drio leder. Te pol anca far peschise in tante robe che la organisassion la ne dà. Proa leder quel che gavea sucedesto vanti e dopo de quel che te sì drio studiar. Proa cognosser de pi le persone e i posti dei versìcoli che te sì drio leder. Anca te pol veder la medèsima stòria in nantro Vangelo. Cossita te podarè imparar altre robe interessante.

14-15. Come che te pol meter in pràtica quel che te impari nei Vangeli?

¹⁴ Secondo, mete in pràtica quel che te sì drio leder nei Vangeli. (Gioani 13:17) Cossa che pol giutarte a far questo? Dopo che te ghè studià qualcossa nei Vangeli, proa domandarte: ‘Come che posso meter in pràtica quel che son drio imparar? Come che posso doperar quel che mi go imparà par giutar nantra persona?’ Alora, te pol pensar in una persona che te vol giutar. E nela ora giusta, te pol parlarghe quel che te ghè imparà con bontà e amor.

¹⁵ Adesso, ndaremo veder un esémpio de come podemo far queste due robe che ghemo pena imparà. Ndaremo far questo studiando la stòria dela védova poareta che Gesù el ga visto nel témpio.

16. Parla sora quel che sucede in Marco 12:41.

¹⁶ Imagina quel che te ledi. (Ledi Marco 12:41. *) Proa imaginar el giorno 11 de nisan del ano 33. Ghe manca pochi giorni par la morte de Gesù. Gesù el dopera tanto del so tempo par insegnar le persone nel témpio. Ai lìderi religiosi no ghe piase che lu el fae questo. Arquanti i ghe domanda con che autorità el fà quel laoro. Altri i ghe fà domande parché i pensa che no’l sa risponderghe. (Mar. 11:27-33; 12:13-34) Alora, Gesù el va par quel’altra parte del témpio e l’è bon de vardar le casse del tesoro. Fursi, l’è nel posto che el ga nome Pàtio dele Done. Lu el se senta lì e el scomìnsia a vardar le persone che le mete i soldi nele casse. Lu el vede tanti de quei che i ze siori meter le so monede lì. Fursi l’è pròpio darente, che l’è anca bon de scoltar le monede che casca rento dele casse.

17. Cossa che la védova poareta la ga fato?

¹⁷ Ledi Marco 12:42. * Poco tempo dopo, Gesù el vede una védova poareta. (Luc. 21:2) L’è sicuro che la so vita la ze tanto difìcile e fursi l’è fadiga gaver quel che ghe ocore par viver. Ancora cossita, la va darente dela cassa e la mete rento due pìcole monede. Le monede le ze tanto pìcole e no se scolta quando le casca rento la cassa. Gesù el sa che la védova la ga metesto rento la cassa due monede de lèpton, la moneda che gavea manco valor in quela època. Con quele pìcole monede no se podea gnanca comprar un pìcolo oseleto, che el valea pròpio poco.

18. De acordo con Marco 12:43, 44, cossa che Gesù el ga dito sora quel che la védova la ga fato?

¹⁸ Ledi Marco 12:43, 44. * Gesù l’è restà pròpio maraveià de veder quel che la védova la ga fato. Lu el ga ciamà i so dissìpoli e el ghe ga dito: “L’è sicuro che questa védova poareta la ga metesto nele casse del tesoro de pi che tuti i altri. Parché tuti i altri [i siori] i ga dato quel che ghe vansea, ma ela, ancora che la fusse poareta, la ga dato tuto quel che la gavea par viver.” Quando quela védova fedele la ga metesto due pìcole monede rento la cassa del témpio, la ga assà anca la so vita nele man de Geovà. — Sal. 26:3.

19. Cossa che imparemo de quel che Gesù el ga parlà sora la védova?

¹⁹ Mete in pràtica quel che te ghè imparà. Te pol domandarte: ‘Cossa che mi posso imparar de quel che Gesù el ga dito sora la védova?’ Proa pensarghe sora la védova. L’è sicuro che la volea dar de pi par Geovà, ma la ga dato el meio che la podea. E Gesù el savea che Geovà l’è restà tanto contento con quel che la ga dato. Alora, imparemo che Geovà el resta tanto contento quando ghe demo el nostro meio, o sia, quando servimo a lu de tuta la nostra forsa e cuor. (Mat. 22:37; Col. 3:23) Geovà el resta contento quando el vede che femo tuto quel che podemo! Par esémpio, quando doperemo la nostra forsa e el nostro tempo par predicar, ndar ale riunion e far altre robe par lu.

20. Come che te pol meter in pràtica quel che te ghè imparà sora la védova? Daghe un esémpio.

²⁰ Come che te pol meter in pràtica quel che te ghè imparà dela védova? Te pol pensar nei fradei che te cognossi. Fursi arquanti i ze desanimadi  parché i pensa che i ze drio far poco par Geovà. Par esémpio, fursi te cognossi una sorela pi vècia che no la ga mia una bona salute. Pol esser che la reste disgustada e la pense che quel che la fà no’l ga valor par Geovà parché no la ze pi bona de predicar tanto. O fursi te te ricordi de un fradel che el ga una bruta malatia e el resta desanimà parché no l’è pi bon de ndar a tute le riunion nel Salon del Regno. Alora, cossa che te pol far? Parla quel che ndarà incoraiarli. (Efe. 4:29) Par esémpio, te pol parlar a lori quel che te ghè imparà del esémpio dela védova. Cossita, te ndarè giutarli a esser sicuri che Geovà el resta contento quando demo el nostro meio, anca che sìpia poco. (Pro. 15:23; 1 Tes. 5:11) Quando te lodi i fradei che i ze drio far el meio a Geovà, te fè compagno a Gesù.

21. Cossa che te ndarè far?

²¹ Noantri restemo pròpio contenti de gaver i Vangeli parché i ne insegna sora la vita de Gesù. Cossita, semo boni de far compagno a lu. Alora, sfòrsate par studiar i Vangeli. Par esémpio, te pol doperar el to stùdio o la Adorassion in Fameia par studiarli. Ricòrdate che, par imparar de pi dei Vangeli, te ghè de imaginar quel che te sì drio leder e meter in pràtica quel che te ghè imparà. Te ghè de far quel che Gesù el ga fato, ma anca scoltar quel che lu el ga dito. Nel pròssimo stùdio, ndaremo imparar sora quel che Gesù el ga dito vanti de morir.