STÙDIO 17
Geovà el te ama tanto!
“Geovà el resta contento col so pòpolo.” — SAL. 149:4.
CÀNTICO 107 Geovà el ne insegna a amar
COSSA CHE NDAREMO IMPARAR? *
Nostro Pare el resta contento con cada un de noantri (Vedi el paràgrafo 1.)
1. Cossa che Geovà el vede in tuti noantri?
GEOVÀ DIO “el resta contento col so pòpolo”. (Sal. 149:4) Noantri restemo contenti de saver che Geovà el vede le nostre qualità, quel che ancora saremo boni de far e el ne giuta a esser so amighi. Se seitemo fedeli a lu, el ndarà esser nostro amigo par sempre! — Gioani 6:44.
2. Parché che arquanti no i ze mia boni de creder che Geovà li ama?
2 Pol esser che arquanti fursi i parle: ‘Mi sò che Geovà el ama el so pòpolo, ma sarà che lu el me ama?’ Parché che arquanti i pensa cossita? Oksana, * che la ga sofrio tanto quando la era picinina, la ga dito: “Quando me go batesà, son restada tanto contenta e go scominsià a laorar come pioniera. Ma 15 ani dopo, go scominsià a sofrir tanto par causa de quel che gavea sucedesto quando mi era picinina. Mi pensea che Geovà no l’era contento con mi e che mi no meritea el so amor.” Yua, nantra pioniera che la ga sofrio quando la era picinina, la ga dito: “Mi me go batesà parché volea contentar a Geovà, ma mi era sicura che Geovà mai el ndaria amarme.”
3. Cossa che ndaremo imparar in questo stùdio?
3 Come quel che le ga dito queste due sorele, fursi te ami a Geovà ma no te sì bon de creder che Geovà el te ama. Alora, in questo stùdio, gavaremo le risposte ale domande: Parché che te ghè de esser sicuro che Geovà el te ama? Cossa che pol giutarte a dàrghene fora con questi sentimenti?
SÌPIA SICURO CHE GEOVÀ EL TE AMA
4. Cossa che pol suceder quando no credemo che Geovà el ne ama?
4 El amor l’è una forsa tanto poderosa che la ne giuta a far quel che ghemo de bisogno. Par esémpio, quando semo sicuri che Geovà el ne ama e el ne giuta, ghemo pi forsa de seitar servir a lu de tuto el cuor, anca cole dificoltà. Ma se no semo sicuri de questo, ‘la nostra forsa la se finirà’. (Pro. 24:10) E se restemo desanimadi e no credemo pi che Geovà el ne ama, no saremo boni de infrontar le robe che Sàtana el fà contra noantri. — Efe. 6:16.
5. Cossa che ga sucedesto con arquanti fradei che no i era sicuri che Geovà li amea?
5 La fede de arquanti fradei la ze restada pi fiaca parché lori no i era sicuri che Geovà li amea. Par esémpio, un ansiano, che el ga nome James, el ga dito: “Mi era drio laorar in Betel e drio giutar una congregassion de nantra léngua. Ma go scominsià a pensar che Geovà no l’era mia contento col me laoro. Mi me go domandà: ‘Sarà che Geovà el scolta le me orassion?’” Eva, che la laora in Betel, la ga dito: “Te resti cada volta pi desanimà se no te sì sicuro che Geovà el te ama. Parché la persona che la pensa cossita no la ga pi voia de far le robe par Geovà e no la ze pi contenta de farle.” Michael, che l’è pioniero regolar e ansiano, el ga dito: “Se no te sì mia sicuro che Geovà el se preocupa con ti, la to amicìssia con lu la restarà cada volta pi fiaca.”
6. Cossa che ghemo de far se no semo mia sicuri che Geovà el ne ama?
6 Quel che ga sucedesto con questi fradei ne mostra che la nostra fede la restarà pi fiaca se pensemo che Geovà no’l ne ama. Alora, cossa che ghemo de far? Ghemo de suito fermarse de pensar cossita. Ghemo anca de domandar che Geovà el ne giute a cambiar i pensieri che ghemo e che el ne dae la so pace. Questa ‘pace la ndarà proteger el nostro cuor e la nostra mente’. (Sal. 139:23, nota; Fil. 4:6, 7) Ghemo anca de ricordarse che no semo sol noantri che pensemo cossita. Anca arquanti fradei e sorele i ze drio infrontar questa dificoltà. I servi de Geovà del passà anca i ga bio de dàrghene fora con questa dificoltà. Vedemo cossa podemo imparar col esémpio del apòstolo Paolo.
COSSA CHE IMPAREMO COL ESÉMPIO DE PAOLO?
7. Cossa che Paolo el infrontea?
7 Fursi te pensi che te ghè massa robe de far e che no te sarè mai bon de far tute? Te ghè bruti problemi de salute che i te assa pròpio disgustà? Te resti desanimà par causa dei to sbali? Alora, te ndarè capir ben quel che Paolo el ga infrontà. Par esémpio, lu l’è restà ansioso par causa de “tute le congregassion”. (2 Cor. 11:23-28) Paolo anca el gavea un spin nela carne, che fursi l’era una malatia che lo fea sofrir tanto. L’è sicuro che el volea restar meio de quela malatia. (2 Cor. 12:7-10) E Paolo el ga dito che l’era un poro omo che ghe tochea sforsarse tanto par far quel che l’era giusto. — Rom. 7:21-24.
8. Cossa che ga giutà Paolo a infrontar le so dificoltà?
8 Paolo el ga infrontà tante robe che lo ga proà e i lo ga assà desanimà, ma el ga seità a servir a Geovà. Come che lu l’è stà bon de far questo? Paolo el savea che el sbaliea, ma el credea tanto nel sacrifìssio de Gesù. Lu anca el credea nela promessa de Gesù che ‘tuti quei che i credesse in lu i gavaria vita eterna’. (Gioani 3:16; Rom. 6:23) Paolo l’era sicuro che Geovà el vol perdonar a tuti che i se ciama grami, anca quei che i gàpia fato bruti pecati. — Sal. 86:5.
9. Cossa che imparemo de quel che Paolo el ga dito nel testo de Gàlati 2:20?
9 Paolo l’era sicuro che Geovà lo amea, parché el savea che Geovà el gavea dato Gesù par morir anca par lu. Parché che savemo che Paolo el pensea cossita? (Ledi Gàlati 2:20. *) Par esémpio, nel fin de questo versìcolo lu el ga dito: ‘El Fiol de Dio el me ga amà e el ga dato la so vita par mi.’ Alora, Paolo no’l pensea che Geovà el amea sol ai altri fradei e a lu nò. Paolo anca el ga dito ai romani: ‘Cristo l’è morto par noantri intanto che èrino pecadori.’ (Rom. 5:8) Alora, podemo esser sicuri che Geovà el ama a tuti i so servi!
10. Cossa che imparemo de Romani 8:38, 39?
10 Ledi Romani 8:38, 39. * De acordo con quel che Paolo el ga dito, gnente pol spartirne del amor de Dio. Alora, lu l’era sicuro che Geovà lo amea tanto. Paolo el savea che Geovà el gavea mostrà passiensa coi israeliti e che la gavea mostrà anca a lu. Alora podarìano dir le parole de Paolo cossita:‘Se Geovà el ga mandà so Fiol par morir par mi, posso esser sicuro che el me ama’. — Rom. 8:32.
Geovà el vede quel che femo adesso e quel che ndaremo far de qua avanti e nò i sbali che ghemo fato nel passà (Vedi el paràgrafo 11.) *
11. Anca dopo de far quel che l’è scrito in 1 Timòteo 1:12-15, parché che Paolo l’era sicuro che Geovà lo amea?
11 Ledi 1 Timòteo 1:12-15. * Vanti de imparar la verità, Paolo el ndea drio i seghidori de Cristo par coparli o meterli in preson. Par quela, Paolo el se ciamea gramo par le robe che el gavea fato. Lu el ga anca dito che l’era el pedo dei pecadori. (Ati 26:10, 11) Lu el sofria tanto par causa de questo. Par esémpio, l’è sicuro che Paolo el ndaria restar pròpio disgustà se el catesse un gióveno che l’è restà òrfano par causa de lu. Ma Paolo el savea che no’l podea cambiar quel che gavea belche sucedesto. Alora, lu el ga dessidio acetar che Gesù l’era morto anca par lu. Lu el ga dito: “Mi son quel che mi son par causa dela bontà imèrita de Dio.” (1 Cor. 15:3, 10) Cossa che te pol imparar de questo? Te ghè de acetar che Gesù l’è morto anca par ti e cossita te pol esser amigo de Geovà. (Ati 3:19) Fursi te resti disgustà par causa de una roba che te ghè fato vanti o dopo de esser Testimònie de Geovà. Ma no stà sofrir par causa dele robe che le ga belche sucedesto. Pitosto, ricòrdate che Geovà el vede quel che te sì drio far e quel che te ndarè far de qua avanti, e nò i sbali che te ghè belche fato. — Isa. 1:18.
12. Fursi noantri pensemo che no ghemo valor o no meritemo el amor dei altri. Come 1 Gioani 3:19, 20 pol giutarne?
12 Quando te pensi che Gesù l’è morto par i to pecati, fursi te disi: ‘Mi no mèrito questo.’ Ma cossa che pol farne pensar cossita? El nostro cuor. Lu el pol farne pensar che no ghemo mia valor e che no meritemo ricever el amor dei altri. (Ledi 1 Gioani 3:19, 20. *) Cossa che podemo far quando scominsiemo a pensar cossita? Ghemo de ricordarse che Geovà el ne ama tanto e el vol perdonarne. El amor e el perdon de Geovà i ze tanto pi forte che qualche bruto sentimento che ghemo. Ghemo de imparar a acetar che Geovà el ne ama. Noantri sol saremo sicuri de questo se studiemo sempre la so Parola, preghemo sempre a lu e acetemo el aiuto dei nostri fradei. Parché che ghemo de far queste robe?
COME CHE LA BÌBLIA, PREGAR E I FRADEI I POL GIUTARNE?
13. Parché che ghemo de studiar la Bìblia? (Vedi anca el quadro “ La Parola de Dio li ga giutà”.)
13 Stùdia tuti i giorni la Parola de Dio. Se te fè questo, te vè imparar sora le bele qualità de Geovà e esser sicuro che lu el te ama tanto. Studiar la Bìblia tuti i giorni ndarà giutarte a cambiar quel che ocore in quel che te pensi e quel che te senti. (2 Tim. 3:16) Kevin, un ansiano che el pensea che no’l meritea esser amà, el ga dito: “Studiar el Salmo 103 me giuta a fermarme de pensar che no go valor e a capir quel che Geovà el pensa de mi.” Eva, che ghemo parlà prima, la ga dito: “Tuti i giorni ala sera, mi me fermo par pensar in quel che l’è importante par Geovà. Questo me dà pace e fà pi forte la me fede.”
14. Parché che ghemo de pregar?
14 Prega sempre. (1 Tes. 5:17) Se volemo esser amighi de qualchedun, ghemo de parlarse sempre de quel che sentimo. L’è cossita anca con Geovà. Quando preghemo a lu e parlemo de quel che pensemo, sentimo e i nostri pensieri, mostremo che se fidemo in lu e nel so amor. (Sal. 94:17-19; 1 Gio. 5:14, 15) Yua, che ghemo parlà prima, la ga dito: “Quando mi prego a Geovà, no parlo sol de quel che ga sucedesto nel giorno ma parlo anca de quel che son pròpio drio sentir. Pin pian, son drio veder a Geovà come un Pare che el ama i so fioi, e nò come un paron de laoro.” — Vedi el quadro “ Te ghè belche ledesto questo libro?”.
15. Come Geovà el mostra che se preocupa con cada un de noantri?
15 Aceta el aiuto dei fradei. I fradei i ze un presente de Geovà. (Tiago 1:17) Nostro Pare el mostra che el se preocupa con noantri parché el ne ga dato fradei e sorele che i ne ama. Questi fradei i ne “ama tuto el tempo”. (Pro. 17:17) Quando Paolo el ga scrito la so carta ai colossensi, lu el ga parlà de arquanti fradei che i lo gavea giutà e consolà tanto. (Col. 4:10, 11) Anca Gesù el ga bio de bisogno del aiuto de àngeli e de persone. L’è sicuro che lu l’è restà tanto contento col aiuto dei so amighi. — Luc. 22:28, 43.
16. Come i fradei i ne giuta a gaver una forte amicìssia con Geovà?
16 Sito drio doperar questo presente de Geovà? No stà mai pensar che te ghè una fede fiaca se te parli sora le to preocupassion ai fradei. Far questo sarà una protession par ti. Varda quel che James el ga dito: “Gaver amighi che i ga una bona amicìssia con Geovà me giuta tanto! Quando mi scomìnsio a pensar che no mèrito esser amà, questi amighi i me scolta con atension e i me assa sicuri che i me ama. Cossita, son bon de capir che anca Geovà el me ama.” Alora, l’è tanto importante gaver una forte amicìssia coi nostri fradei!
GEOVÀ EL NDARÀ AMARTE PAR SEMPRE
17-18. Ghemo de scoltar a chi, e parché?
17 Sàtana el vol che te fermi de sforsarte par far quel che l’è giusto. Lu el vol che te credi che Geovà no’l te ama e che no te mèriti la so aprovassion. Ma come ghemo imparà, tuto questo l’è una granda busia.
18 Geovà el te ama tanto. Se te lo obedissi, lu el ndarà amarte par sempre cossita come Gesù. (Gioani 15:10) Alora, no stà mia creder in Sàtana, gnanca nel to cuor quando te pensi che Geovà no’l te ama mia. Invesse, scolta a Geovà, che el cognosse le to qualità. Sìpia anca sicuro che Geovà el resta contento col so pòpolo, alora el resta contento anca con ti!
CÀNTICO 141 La vita, un presente de Geovà
^ paràgrafo 5 Arquanti fradei e sorele no i ze mia boni de creder che Geovà li ama. In questo stùdio, ndaremo imparar parché che podemo esser sicuri che Geovà el ne ama e cossa che podemo far se no semo sicuri de questo.
^ paràgrafo 2 Arquanti nomi i ze stati cambiadi.
^ paràgrafo 9 (Gàlati 2:20) Mi son stà inciodà su nel pal insieme a Cristo. No son pi mi a viver, ma l’è Cristo che el vive insieme a mi. La vita che adesso vivo, la vivo de acordo cola fede che go nel Fiol de Dio, che el me ga amà e che el ga dato la so vita par mi.
^ paràgrafo 10 (Romani 8:38, 39) Parché mi son sicuro de che gnanca la morte, gnanca la vita, gnanca àngeli, gnanca governi, gnanca cose adesso, gnanca cose par vegner, gnanca poderi, 39 gnanca altessa, gnanca profondità, gnanca qualche altre creassion le sarà bone de spartirne del amor de Dio che l’è in Cristo Gesù, nostro Signor.
^ paràgrafo 11 (1 Timòteo 1:12-15) Mi ringràssio a Gesù Cristo, nostro Signor, che el me ga dato poder. Mi lo ringràssio parché el se ga fidà in mi e el me ga dato un laoro par far, 13 ancora che mi bestemesse contra Dio, perseghisse el so pòpolo e no lo rispetesse. Ma lu el me ga mostrà misericòrdia parché mi no savea quel che mi era drio far e no gavea fede. 14 El nostro Signor el me ga mostrà tanta bontà imèrita e el me ga anca dato fede e el amor che el vien de Gesù Cristo. 15 Tuti i pol creder e esser sicuri che Cristo Gesù l’è vegnesto al mondo par salvar pecadori. Dei pecadori, mi son el pedo.
^ paràgrafo 12 (1 Gioani 3:19, 20) Cossita, noantri ndaremo saver che ghemo la verità e ndaremo esser sicuri che Dio el ne ama 20 sempre che el nostro cuor el ne condana, parché Dio l’è pi grando che el nostro cuor e el sà tute le robe.
^ paràgrafo 71 ILUSTRASSION: Paolo el ndea drio i cristiani e el ga mandà tanti de lori in preson. Lu el ga cambià quando el ga acetà el sacrifìssio che Gesù el ga fato par lu. Lu el ga scominsià a incoraiar i so fradei, fursi anca quei che i era parenti de quei che lu el gavea perseghio.
