STÙDIO 16
CÀNTICO 67 Vao predicar
Come gaver ancora de pi alegria nela predicassion?
“Gavé de servir a Geovà con alegria.” — SAL. 100:2.
COSSA CHE NDAREMO IMPARAR?
In questo stùdio, ndaremo veder come podemo gaver ancora de pi alegria nela predicassion.
1. Cossa che arquanti i sente de ndar predicar? (Varda anca el ritrato.)
NOANTRI predichemo parché amemo tanto el nostro caro Dio, Geovà, e volemo giutar tute le persone a cognosserlo. A arquanti fradei ghe piase tanto ndar ala predicassion, ma altri i fà fadiga. Parché? Pol esser che i pensa che no i ze mia boni de insegnar ale persone o no ghe piase ndar ale case dei altri sensa esser convidadi. Arquanti fursi i ga paura che i altri i reste cativi o disgustadi. Par questi fradei, no l’è mia fàcile ndar predicar, ma lori i ama tanto a Geovà e i se sforsa par parlar ai altri sora lu. Sicuro che Geovà el resta tanto contento!
Rèstito contento de ndar predicar? (Varda el paràgrafo 1.)
2. Parché che no te toca restar desanimà se no te sì tanto contento de ndar predicar?
2 E ti, rèstito contento de ndar predicar? Se dele volte te fà fadiga, no stà restar desanimà. Pol esser che te sì ùmile e che te ghè paura de farte veder o de esser in meso a barufe. E nissuni ghe piase disgustar qualchedun, ancora de pi quando i proa far una roba bona. Ma sìpia sicuro che Geovà el sa che ndar predicar no l’è mia fàcile par ti e lu el vol giutarte. (Isa. 41:13) In questo stùdio, ndaremo veder sinque robe che te pol far par gaver alegria nela predicassion.
LA PAROLA DE DIO LA POL DARTE FORSA
3. Cossa che ga gitutà Geremia a far el so laoro?
3 Geovà sempre el ga doperà la so Parola par giutar e darghe forsa ai so servi. Varda par esémpio el profeta Geremia. Quando Geovà ghe ga dito de ndar predicar, Geremia el ga bio paura. Lu el ga dito: “No sò gnanca parlar, son sol un tosato.” (Ger. 1:6) Alora, cossa che lo ga giutà a gaver coraio? Lu el ga bio forsa par meso de quel che Geovà el ghe ga dito. Dopo, Geremia el ga dito: “La so parola la ze deventada come un fogo che brusea rento el me cuor e sarà nei me ossi. Son restà tanto canso de tégnerla.” (Ger. 20:8, 9) Cossita, ancora che Geremia el gavesse dificoltà, quel che el predichea ghe ga dato la forsa par seitar a far el so laoro.
4. Cossa che sucede quando ledemo la Bìblia e ghe pensemo sora? (Colossenssi 1:9, 10)
4 Anca ancoi noantri podemo gaver forsa par meso dela Bìblia. Quando el apòstolo Paolo el ga scrito ai colossensi, lu el ga dito che se lori i imparesse de pi dela Bìblia, i saria boni de ‘viver come Geovà el vol e de seitar a dar fruto con tuti i boni laori’. (Ledi Colossenssi 1:9, 10. a) La predicassion la ze un de questi boni laori. Alora, quando ledemo la Bìblia e pensemo sora quel che ledemo, la nostra fede in Geovà la resta ancora pi forte e semo boni de capir parché l’è pròpio importante parlar sora el Regno ai altri.
5. Cossa che te ghè de far par capir tuto quel che te pol dela Bìblia?
5 Par esser bon de capir tuto quel che te pol dela Bìblia, te ghè de torte el tempo par leder, studiar e pensarghe sora. Alora, no stà mai studiar svelto. E se te cati un versìcolo che no l’è mia fàcile de capir, proa ndar in serca de capirlo, invesse de ndar avanti. Te pol doperar el Índice das Publicações da Torre de Vigia o el Guia de Pesquisa para Testemunhas de Jeová par studiar de pi sora quel versìcolo. Se te te sforsi de torte el tempo par studiar, la to fede la restarà pi forte. (1 Tes. 5:21) E quanto de pi fede te ghè nela Bìblia, pi contento te sarè de parlar ai altri quel che te sè.
PARECIATE PAR LA PREDICASSION
6. Parché che ghemo de pareciarse vanti de ndar predicar?
6 Se te te pareci vanti de ndar predicar, sarà pi fàcile parlar cole persone. Gesù el ga parecià i so dissìpoli vanti de mandarli predicar. (Luc. 10:1-11) Alora, quei dissìpoli i ga fato pròpio compagno Gesù ghe gavea insegnà. Cossita, lori i ze restadi tanto contenti con tuto quel che i ze stati boni de far. — Luc. 10:17.
7. Come che te pol pareciarte par la predicassion? (Varda anca el ritrato.)
7 Come che te pol pareciarte par la predicassion? Te pol pensar in quel che te vol parlar e proar spiegar cole to parole. Te pol anca ricordarte de due o tre robe che le persone sempre le parla e pensar come che ti te podarissi risponderghe. Cossita, quando te parli con qualchedun, te sarè bon de restar calmo e discorer contento.
Sfòrsate par esser ben parecià par la predicassion (Varda el paràgrafo 7.)
8. Come che noantri semo compagni ai vasi de baro che Paolo el ga parlà?
8 El apòstolo Paolo el ga dito: “Ghemo questo tesoro rento vasi de baro.” (2 Cor. 4:7) Questo tesoro l’è el laoro de predicassion sora el Regno de Dio che pol salvar la vita dele persone. (2 Cor. 4:1) E i vasi de baro i ze i servi de Geovà che i porta le bone notìssie ai altri. Nela època de Paolo, tante persone le doperea vasi de baro par portar magnar, vin e soldi. Dela stessa maniera, Geovà el ne dopera par portar le bone notìssie ai altri. Sicuro che, col aiuto de Geovà, gavaremo la forsa che ne ocore par seitar a predicar.
PREGA A GEOVÀ PAR DOMANDARGHE CORAIO
9. Cossa che ghemo de far se ghemo paura de ndar predicar? (Varda anca el ritrato.)
9 Pol esser che dele volte ghemo paura che le persone le ne vegna contra o che no le acete scoltarne. Alora, cossa che te pol far? Ricòrdate dela orassion che i apòstoli i ga fato quando i ghe ga dito che i se fermesse de predicar. Geovà ghe ga rispondesto suito! Cossita, invesse de fermarse de predicar par causa dela paura, lori i ze ‘stati boni de seitar a parlar dela Parola de Geovà con tanto coraio’. (Ati 4:18, 29, 31) Alora, se te vien paura de ndar predicar, prega a Geovà e domandaghe el so aiuto. Domanda che lu el te giute a gaver un amor tanto grando par le persone. Cossita, el to amor el sarà pi grando che la to paura.
Prega a Geovà par domandarghe coraio (Varda el paràgrafo 9.)
10. Come che Geovà el ne giuta a esser so Testimònie? (Isaia 43:10-12)
10 Geovà el ne ga scoliesto par esser so Testimònie e el ga dito che el ndaria darne coraio. (Ledi Isaia 43:10-12. b) Vedemo quatro robe che Geovà el fà par giutarne. Prima, sempre che ndemo predicar, Gesù l’è con noantri. (Mat. 28:18-20) Seconda, Geovà el dopera i so àngeli par giutarne a far questo laoro. (Apo. 14:6) Tersa, Geovà el ne dà el so spìrito santo par giutarne a ricordarse quel che ghemo imparà. (Gio. 14:25, 26) Quarta, sempre ghemo i nostri fradei e sorele insieme a noantri. Sicuro che col aiuto de Geovà e dei nostri cari fradei e sorele, saremo boni de seitar a predicar con coraio.
SFÒRSATE PAR CATAR LE PERSONE E PAR PARLAR QUEL CHE GHE PIASE
11. Cossa che te pol far par catar de pi persone nela predicassion? (Varda anca el ritrato.)
11 Pol esser che te resti disgustà se no te sì bon de catar le persone casa. Alora, te pol domandarte: ‘Ndove che posso catarle?’ (Ati 16:13) ‘Sarà che lore le ze drio laorar o le ze ndate a spasso?’ Dopo, proa pensar ndove che te podarissi catarle. Varda quel che un fradel de nome Joshua el ga dito: “Son stà bon de catar tante persone nei shopping e nele piasse.” Bridget, la so dona de Joshua, la ze stata bona de catar tante persone casa ala sera o doménega dopo mesdi. — Efe. 5:15, 16.
Proa cambiar la ora e el posto ndove te predichi (Varda el paràgrafo 11.)
12. Come che podemo capir cossa che le persone le crede o quel che ghe interessa?
12 Se le persone le mostra che le vol scoltarte, proa capir quel che le crede e quel che ghe interessa a lore. Joshua e Bridget i dopera le domande che ghen’è nela prima pàgina dei foieti. Par esémpio, quando i dopera el foieto Cossa che te cati dela Bìblia?, lori i dise: “Arquante persone le crede che la Bìblia la vien de Dio, ma altre nò. E ti, cossa che te cati?” Cossita, tante volte, lori i ze boni de scominsiar una ciàcola.
13. Parché che podemo gaver alegria nela predicassion anca se le persone no le vol mia scoltarne? (Proverbi 27:11)
13 Anca se le persone no le scolta quel che parlemo, saremo boni de far el nostro laoro de predicassion. Come cossita? Noantri saremo drio far quel che Geovà e Gesù i ne ga domandà e saremo boni de contentar el nostro grando Dio. (Ledi Proverbi 27:11; c Ati 10:42) Alora, anca se no catemo le persone casa o se no le aceta quel che parlemo, podemo gaver alegria de ndar predicar.
14. Parché che tuti noantri restemo pròpio contenti quando un fradel el cata una persona che la vol studiar la Bìblia?
14 Tuti noantri restemo tanto contenti quando un fradel el cata una persona che la vol studiar la Bìblia. Una Sentinela la ga dito che el laoro de predicassion l’è compagno al sforso che se fà par catar un toseto che l’è perso. Tante persone le va in serca in posti difarenti. Alora, quando qualchedun lo cata, tuti i resta contenti, invesse de sol quel che lo ga catà. Dela stessa maniera, tuti nela congregassion i se sforsa de predicar. Par quela, tuti i resta pròpio contenti quando una persona la scomìnsia a ndar ale riunion.
SEITA A PREDICAR PARCHÉ TE AMI A GEOVÀ E ALE PERSONE
15. Come che far quel che dise Mateo 22:37-39 pol giutarne a gaver ancora pi voia de ndar predicar? (Varda anca el ritrato.)
15 Se pensemo sora el nostro amor par Geovà e par le persone, gavaremo ancora pi voia de ndar predicar. (Ledi Mateo 22:37-39. d) Alora, pensa come che Geovà el resta contento quando el ne vede ndar predicar e quando el vede la alegria che le persone le ga quando le scomìnsia a studiar la Bìblia. E ricòrdate che tuti quei che i scolta quel che parlemo e i desside servir a Geovà i ndarà viver par sempre. — Gio. 6:40; 1 Tim. 4:16.
Gavaremo ancora de pi alegria nela predicassion se ghe pensemo sora el nostro amor par Geovà e par i altri (Varda el paràgrafo 15.)
16. Come che te pol gaver alegria nela predicassion, anca se no te pol mia ndar via de casa? Parla de esempi.
16 E se vien fora qualcossa e no te pol mia pi ndar via de casa par predicar? Te pol sforsarte de far altre robe che te sì bon. Cossita, te ndarè mostrar el to amor par Geovà e par i altri. Varda quel che ga sucedesto con Samuel e Dania nela pandemia dela COVID-19. Come lori no i podea ndar via de casa, lori i ga proà predicar ale persone par telèfono, carte e insegnar ai altri par meso del Zoom. Samuel l’era drio far un tratamento par causa de un càncaro. Alora, quando lu l’era nel ospedal, lu el parlea sora la Bìblia a tuti quei che el catea. Lu el ga dito: “Quando vien fora dificoltà, podemo restar strachi e desanimadi e la nostra fede la pol restar pi fiaca. Par quela, l’è pròpio importante sforsarse de gaver alegria de adorar a Geovà.” Anca Dania la ga infrontà dificoltà. Ela la ze cascada e ghe ga tocà restar in leto par tre mese. Dopo, ela la ga bio de doperar una carega de rode par sei mesi. Ela la ga dito: “Me go sforsà de far el me meio. Mi parlea sora la Bìblia ale enfermere che vegnea tenderme e ai altri che i vegnea portarme qualcossa. Anca son stata bona de parlar tanto sora la Bìblia con una dona che la vendea robe par persone che le ze malade.” L’è vera che Samuel e Dania no i ze mia stati boni de seitar a far tuto quel che i fea una volta. Ma, ancora cossita, lori i ga fato quel che i era boni e i ga bio tanta alegria.
17. Cossa che te ghè de far par gaver alegria nela predicassion?
17 In questo stùdio, ghemo visto sinque robe che pol giutarne a gaver alegria nela predicassion. Cada una de queste robe le ze compagne ai mestieri che ciapemo par far un magnar. Noantri ghemo de cosinarli tuti insieme par gaver un magnar tanto bon. Dela stessa maniera, se te meti in pràtica tute le robe che ghemo imparà in questo stùdio, te sarè bon de dàrghene fora cola paura e de gaver tanta alegria nela predicassion!
COME CHE QUESTE ROBE POL GIUTARNE A GAVER ANCORA PI ALEGRIA NELA PREDICASSION?
-
Torse el tempo par pareciarse vanti de ndar predicar
-
Pregar e domandar coraio
-
Pensarghe sora el nostro amor par Geovà e par le persone
CÀNTICO 76 Un sentimento spessial
a (Colossenssi 1:9, 10) Alora, del giorno che ghemo scoltà queste robe, no se ghemo mai fermà de pregar par valtri e de domandar che gàpie tanta cognossensa giusta dela so volontà, insieme a sabedoria e comprension del spìrito de Dio, 10 Cossita valtri podaré viver come che Geovà el vol, par far tuto quel che ghe piase a lu, intanto che valtri seité a dar fruto in tuti i boni laori e a gaver cada volta de pi la cognossensa giusta de Dio.
b (Isaìa 43:10-12) Geovà el dise: “Valtri sì le me testimònie, si, valtri sì el servo che mi go scoliesto. Cossita, valtri ndaré cognosserme e gaver fede in mi, e ndaré capir che son el medèsimo. Vanti de mi no ghen’era gnanca un Dio e dopo de mi no ghen’è stà nantro Dio. 11 Mi son Geovà, e no ghen’è nissun altro nantro che el pol salvarve.” 12 “E mi stesso lo go comunicà, e salvà, e fato che fusse scoltà, quando tra de valtri no ghen’era nissun dio strànio. Partanto, valtri se le me testimònie”, ze la parola de Geovà, “e mi son Dio.
c (Proverbi 27:11) Sìpia sàbio, me fiol, e fà contento el me cuor. Cossita, risponderò a quel che me sfida.
d (Mateo 22:37-39) El ghe ga dito: “‘Te ghè de amar a Geovà el to Dio con tuto el to cuor, con tuta la to ànima e con tuta la to mente.’ 38 Questo l’è el primo comandamento e el pi importante. 39 El secondo l’è compagno e l’è: ‘Te ghè de amar el to pròssimo come a ti stesso.’
