Mi son nassesto in 1955, e son el pi gióveno de tre fradei. Son cressesto nela cità de Vantaa, nela praia al sud dela Finlàndia.

La me mare la se ga batesà prima che mi nassesse, ma me pare no ghe piasea mia che la fusse una Testimònia de Geovà. Par quela, lu no’l assea mia che la ne insegnesse la Bìblia e la ne menesse ale riunion. Alora, la me mare la ne insegnea sora Geovà quando el nostro pare no l’era mia lì darente.

Mi ero ancora picinin quando go dessidio sempre obedir a Geovà. Par esémpio, quando mi gavea sete ani, me ga tocà dàrghene fora con una dificoltà nela scola. Mi no volea magnar una pancheca che ghen’è nela Finlàndia e che la ze fata de sangue. Par quela, la me maestra la ze restada tanto cativa con mi. Con una man, ela la me ga strucà la massela e con quel’altra la ga proà meterme in boca un toco de quel mestier. Ma son stà bon de trar el piron in tera.

Quando mi gavea 12 ani, me pare l’è morto. Alora, go podesto ndar ale riunion. I fradei dela congregassion sempre i me ga tratà tanto ben. E questo me ga motivà a far de pi par Geovà. Go scominsià a leder la Bìblia tuti i giorni e a studiar le publicassion. Quel che go imparà me ga giutà a dessider batesarme. Alora, me  go batesà in 8 de agosto de 1969, quando gavea 14 ani.

Pena dopo che go finio la scola, mi son deventà pioneiro regolar. Un per de stimane dopo, mi me son cambià par una cità che gavea bisogno de aiuto nela predicassion de nome Pielavesi, in meso la Finlàndia.

Quando ero in Pielavesi, mi go cognossesto Sirkka. Me ga piasesto tanto quela sorela parché la era ùmile e la amea tanto a Geovà. Ela mai la se fea veder e la era contenta cole robe che la gavea. Tuti i due voléino far el nostro meio a Geovà e far qualche roba che la so organisassion la ne domandesse. Noantri se ghemo maridà in 23 de marso de 1974. Ma, invesse de ndar far un viaio dopo el matrimònio, semo ndati servir in Karttula, un posto ndove ghen’era bisogno de aiuto nela predicassion.

Geovà el ga sempre mostrà che el ndaria darne tuto quel che gaveino de bisogno se metessino el Regno in primo posto nela nostra vita. (Mat. 6:33) Par esémpio, quando semo rivadi in Karttula, no gaveino mia un auto. Alora, ndeino in volta de bissicleta. Ma, nel inverno, fà tanto fredo e ghen’è neve de par tuto. Par quela che ne tochea gaver un auto par ndar predicar nei posti pi distanti. Ma no gaveino mia soldi par comprarghene un.

De colpo, l’è capità el me fradel pi vècio là casa. Lu el ne ga dato el so auto de presente. Lu el gavea fin pagà el seguro del auto e ne tochea sol meterghe gasolina. Alora, ghemo guadagnà el auto che gaveino de bisogno.

Geovà el ne ga mostrà che l’era lu che el ne daria tuto quel che gaveino de bisogno. Noantri ne tochea sol meter el Regno in primo posto nela nostra vita.

In 1978, quando èrino drio far la scola de pionieri, el fradel Raimo Kuokkanen, a che l’era un dei nostri maestri, el ne ga incoraià de far la petission par Gileade. Alora, ghemo scominsià a studiar inglese par esser boni de far la scola. Ma in 1980, semo stati convidadi par giutar nel Betel dela Finlàndia. In quela època, i beteliti no i podea mia far la petission par Gileade. Ma, come voléino ndar servir ndove Geovà el volesse,  ghemo acetà ndar. Ancora cossita, ghemo seità a studiar inglese parché un giorno fursi podarìssino ndar a Gileade.

Un per de ani dopo, el Corpo Governante el ga assà che i beteliti i fesse la petission par ndar a Gileade. Ne piasea tanto el laoro in Betel, ma voleino servir ndove ghen’era de pi bisogno. Alora, ghemo fato la petission par Gileade. Noantri semo stati ciamadi par la turma 79 in setembre de 1985. Dopo de finir la scola, semo stati mandadi servir nela Colómbia.

Quando semo rivadi nela Colómbia, semo stati convidadi par servir nel Betel. Mi go proà far el me meio nel me laoro, ma dopo de un ano, go capio che me tochea cambiar. L’è stà la prima volta nela me vita che go domandà de cambiar de laoro nela organisassion de Geovà. Alora, semo stati mandadi servir come missionari nela cità de Neiva, nel stato de Huila.

Mi me ga sempre piasesto tanto dela predicassion. Vanti de maridarme, quando ero pioniero nela Finlàndia, dele volte scominsiea de matina bonora e predichea fin la sera. E quando mi e Sirkka se ghemo maridà, sempre predicheino tuto el giorno. Quando ndéino predicar in posti pròpio distanti, dele volte, ndeino dormir rento el auto. Cossita, èrino boni de scominsiar a predicar ben bonora nel giorno parché no ne tochea mia far el viaio.

Come èrino missionari, ndeino sempre ala predicassion. Cossita, ghemo scominsià a sentir la medèsima alegria che gaveino ani indrio. Nela nostra congregassion, ghen’era cada volta de pi persone che le volea servir a Geovà. Quei fradei i gavea tanto amor e rispeto intrà de lori e i se volea tanto ben.

Ghen’era arquante cità darente de Neiva che no le gavea gnanca una Testimònia de Geovà. E mi volea tanto che quele persone le podesse imparar sora Geovà. Ma par causa dela violensa e dei criminosi che ghen’era in queste cità, l’era pericoloso par quei che no i era mia nassesti là. Alora, mi go pregà che qualchedun che fusse de quei posti el deventesse una Testimònia de Geovà. Mi gavea pensà che una persona cossita che la vivesse in Neiva la gavaria de imparar la verità, batesarse, deventar un bravo servo de Geovà e dopo tornar ala cità che la era nassesta. Invesse, Geovà el ndaria far una roba ancora meio de quela che gavea pensà mi.

Poco tempo, dopo go scominsià a studiar la Bìblia con un gióveno de nome Fernando González. Lu el vive in Algeciras, una de quele cità che no ghen’era mia Testimònie de Geovà. Fernando el gavea de viaiar de pi de 50 chilòmetri par vegner laorar in Neiva. Lu el se pareciea tanto ben par i nostri studi, e suito el ga scominsià a ndar ale riunion. Ancora nela prima stimana del nostro stùdio, lu el ga scominsià a parlar cole persone dela so cità sora quel che l’era drio imparar dela Bìblia.

Fernando el se ga batesà in genaro de 1990, sol sei mesi dopo che ghemo scominsià a studiar. Dopo, lu l’è deventà pioniero regolar. Cossita, belche ghen’era una Testimònia de Geovà in Algeciras e Betel ga mandà due pionieri spessiai  par giutarghe nela predicassion. Alora, in febraro de 1992, ghen’era belche una congregassion lì.

Ma Fernando l’è ndato predicar anca in altre cità. Lu el se ga maridà con una sorela de nome Olga e lori i ze ndati de star nela cità de San Vicente del Caguán, una cità ndove no ghen’era mia Testimònie de Geovà. Lori i ga giutà a scominsiar una congregassion lì. Nel ano de 2002, Fernando l’è stà convidà par servir come superintendente de sircuito e lori i seita a far questo laoro fin ancoi.

Par causa de quel che ga sucedesto, go imparà che quando preghemo a Geovà, ghemo de parlarghe pròpio quel che ghemo de bisogno par far el nostro laoro a lu. Geovà l’è bon de far tuto quel che no semo mia boni. Ghemo de ricordarse che la racolta la ze soa, e nò nostra. — Mat. 9:38.

Nel ano de 1990, noantri semo stati convidadi par servir nel sircuito in Bogotà, che l’è la cità pi granda dela Colómbia. Semo restadi un poco spauradi, parché mi e me dona no gaveino mia tante bele abilità e no gaveino mai vivesto nte una cità granda cossita. Ma Geovà el ga fato pròpio quel che dise in Filipensi 2:13: “Dio l’è drio darve la forsa par far quel che lu el vol. Cossita, lu el ve dà la voia e anca el poder de farlo.”

Un tempo dopo, semo ndati servir nel sircuito dela cità de Medellín. Ghen’era tanta violensa là che le persone gnanca no ghe badea pi. Un giorno, quando èrino drio studiar la Bìblia con un omo, ghemo scominsià a scoltar tiri fora dela casa. Mi ero pronto par butarme in tera, ma el studiante el ga seità a leder el paràgrafo tranquilo. Quando el ga finio de leder, lu el ne ga domandà de spetar un pochetin parché el gavea de ndar fora. Quando lu l’è tornà, el gavea so due fioi insieme e el ne ga dito: “Scuseme, ma me ga tocà ndar tor i toseti.”

Noantri anca ghemo passà dei bruti colpi. Un giorno, quando èrino nela predicassion, la me dona la ze vegnesta de carera caterme e la era tanto spaurada. Ela la ga dito che qualchedun gavea proà darghe un tiro. Son restà tanto spaurà. Ma, dopo ghemo savesto che quel omo el volea copar nantra persona che la era darente de Sirkka, nò ela.

Dopo de un tempo, no restéino pi tanto spaurà par causa dela violensa che ghen’era in Medellín. Noantri anca ghemo imparà tanto coi nostri bravi fradei. Anca se lori i infrontesse brute dificoltà, lori i seitea a predicar. Noantri ghemo capio che se Geovà l’era drio giutarli, lu el ndaria giutar anca noantri. Mi e Sirkka se ghemo sempre sforsà de scoltar quel che i ansiani i ne disea, de star atenti e de fidarse che Geovà el ndaria tenderne.

Ma dele volte ne sucedea robe che ne imbroiea del bon! Par esémpio, una volta che èrino rento la casa de un omo nela predicassion, ghemo scominsià a scoltar gente che osea là fora. Me parea che le era due done che le barufea par strada. Anca se mi no volesse ndar veder cossa che l’era drio suceder, lu el me ga fato ndar là fora. Quel che mi pensea che l’era due done che le barufea, l’era due papagai che i era drio parlar compagno i visini.

Nel ano de 1997, mi son stà convidà par esser maestro dela Scola de Trenamento Ministerial. b Me ga sempre piasesto tanto far le scole dela organisassion, ma no me gavea mai imaginà che saria el maestro de una.

Dopo de un tempo, mi go scominsià a servir come superintendente de distrito. Ma, quando la organisassion la ga dessidio che no ghen saria pi questo laoro, mi son tornà a esser superintendente de sircuito. L’è belche de pi 30 ani che son drio laorar come maestro de scole e come superintendente de sircuito. Anca se go ricevesto tante benedission, no l’è stà mia tanto fàcile. Speta che te spiego.

Mi son una persona forte e sicura de quel che go de far. Esser cossita me ga giutà a dàrghene fora con tante dificoltà nela me vita. Ma dele volte, mi volea tanto cambiar le robe nele congregassion che no parlea mia dela maniera giusta. Par esémpio, una volta mi go parlà ai fradei che lori i gavea de mostrar de pi amor e sforsarse de capir meio i sentimenti dei altri. Ma no go mia mostrà queste qualità quando ghe go dato questo consìlio. — Rom. 7:21-23.

Mi resto desanimà par causa dei me sbali. (Rom. 7:24) Una volta, mi go pregà a Geovà par dirghe che l’era meio assar de esser missionàrio e tornar ala Finlàndia. Ma la riunion de quela sera me ga mostrà che mi gavea de seitar a far i me laori nela organisassion e a sforsarme de dàrghene fora coi me sbali. Mi son restà tanto contento de veder che Geovà el ga scoltà la me orassion. Sempre ringràssio a Geovà parché el mostra tanta passiensa con mi e el me giuta a dàrghene fora coi me sbali.

Mi e Sirkka ringrassiemo tanto a Geovà parché lu el ne ga assà doperar la nostra vita par servirlo. Mi anca ringràssio a lu parché el me ga dato una dona brava e fedele che la me ga giutà tanto in tuti questi ani.

De qua un poco, mi vao far 70 ani e me tocarà assar de esser maestro de scole e superintendente de sircuito. Ma mi no resto mia desanimà parché sò che la roba pi importante la ze servir a Geovà con umiltà, amor e darghe valor a tuto quel che lu el fà par noantri. (Mic. 6:8; Mar. 12:32-34) Mi sò che no ne ocore mia gaver laori spessiai par assar Geovà contento.

Quando penso sora tuti i laori che go bio nela organisassion, mi son sicuro che no li go mia ricevesto parché ero meio che i altri o parché gavea qualche abilità. Invesse, Geovà el me ga assà farli par causa dela so granda bontà. Lu el me ga assà far el me meio a lu, anca coi me sbali. Alora, mi son sicuro che son stà bon de far tuti questi laori sol parché Geovà el me ga giutà. Par quela che posso dir che i me sbali i ga mostrà el poder de Geovà. — 2 Cor. 12:9.