STÙDIO 17
CÀNTICO 111 I motivi dela nostra alegria
Seita a adorar a Geovà nel paradiso spiritual
“Resté felici e contenti par sempre par via de quel che son drio crear.” — ISA. 65:18.
COSSA CHE NDAREMO IMPARAR?
Vederemo parché esser rento el paradiso spiritual l’è bon par noantri e come che podemo giutar anca altri a vegner rento.
1. (a) Cossa che l’è el paradiso spiritual? (b) Cossa che noantri volemo?
ANCOI, noantri vivemo insieme a milioni de persone nte un paradiso spiritual! a Come cossita? Noantri vivemo in pace e union. Volemo viver cossita par sempre e se sforsemo de giutar anca altre persone a viver in questo paradiso.
2. Che bela roba Geovà l’è drio far par i so servi ancoi?
2 Nel mondo ancoi, sucede tante brute robe e le persone le ze violente e le se òdia. (1 Gio. 5:19; Apo. 12:12) Ancora cossita, Geovà el ne giuta a viver in pace e union. Ma lu el sa che no l’è mia fàcile viver in questo mondo. Par quela, Geovà el ne giuta a servirlo con alegria e a far pi forte la nostra amicìssia con lu. La Bìblia la dise che podemo gaver protession e pace, come se fùssino nte un bel giardin. (Isa. 4:6; 58:11) Alora, col aiuto de Geovà, podemo esser felici e viver sensa paura, anca se vivemo nei ùltimi giorni. — Isa. 54:14; 2 Tim. 3:1.
3. Come quel che l’è scrito in Isaia 65 ga sucedesto nel passà?
3 Geovà el ga doperà el profeta Isaia par mostrarne come saria la vita nel paradiso spiritual. In Isaia capìtolo 65, podemo leder quel che ga sucedesto nel ano 537 vanti de Cristo. In quel tempo, i giudei i ze stati moladi de Babilònia e i ze tornadi ala so cità. Geovà el ga benedio tanto queste persone e le ga giutade a far su nantra volta la cità de Gerusalen. Quei giudei anca i ga podesto rangiar su el témpio ndove i ndaria adorar a Geovà nantra volta. — Isa. 51:11; Zac. 8:3.
4. Come quel che l’è scrito in Isaia 65 l’è drio suceder nei nostri giorni?
4 Quel che Isaia el ga dito nela so professia ga sucedesto anca nel scomìnsio del ano 1919. Nei nostri giorni, i servi de Geovà i ze stati lìberi de Babilònia, la Granda, e i ga scominsià a adorar a Geovà in pace e union. I servi de Dio i ga scominsià tante congregassion e i ga cambià tanto la so vita. Par esémpio, tanti òmini e done che una volta i era violenti e i fea brute robe i ga ‘metesto su la nova personalità, che la ze stata creada de acordo cola volontà de Dio’. (Efe. 4:24) La professia de Isaia la parla de bele robe che vederemo nel novo mondo. Ma belche ancoi ghemo tante benedission. Adesso, ndaremo veder che benedission le ze queste e parché che ghemo de seitar a sforsarse de adorar a Geovà in pace e union.
COME CHE L’È VIVER NEL PARADISO SPIRITUAL?
5. De acordo con Isaia 65:13, cossa che i servi a Geovà i ga?
5 Semo ben tendesti e ghemo salute. La professia de Isaia la parla dela difarensa intrà quei che i serve a Geovà e quei che no i lo serve mia. (Ledi Isaia 65:13. b) Geovà el dà ai so servi tuto quel che lori i ga de bisogno par esser so amighi. Par esémpio, noantri ghemo el so spìrito santo, la so Parola e tante robe che Geovà el dopera par insegnarne. Par quela, podemo dir che ghemo de ‘magnar, de bever e che semo contenti’. (Varda anca Apocalisse 22:17.) Invesse, quei che no i adora a Geovà e no i ze so amighi ‘i ga fame, sen e i ze invergognadi’. — Amòs 8:11.
6. De acordo con Gioel 2:21-24, cossa che Geovà el ne dà, e cossa che sucede quando doperemo quel che el ne dà?
6 Nela so professia, Gioel el ga parlà sora grani, vin e oio de oliva par mostrar le robe che Geovà el ne dà par far pi forte la nostra fede. (Gioel 2:21-24) Par esémpio, Geovà el ne dà la Bìblia, le publicassion, el nostro site, le riunion, le assemblee e i congressi. Se doperemo ben tuto quel che el ne dà, saremo ben tendesti e gavaremo salute.
7. De acordo con Isaia 65:14, cossa che ne fà ‘sentirse ben nel cuor’?
7 Ghemo alegria. I servi de Geovà i pol “osar de alegria” parché i dà tanto valor a tuto quel che Geovà el ghe dà. (Ledi Isaia 65:14. c) Noantri ghemo le verità che fà pi forte la nostra fede, le promesse dela Bìblia che ne consola tanto e una bela speransa par el futuro par via del sacrifìssio de Gesù. Par quela, noantri se ‘sentimo ben nel cuor’ e restemo tanto contenti quando parlemo de queste bele robe coi nostri fradei e sorele. — Sal. 34:8; 133:1-3.
8. Che due robe importante ghen’è intrà i servi de Geovà?
8 Intrà quei che i serve a Geovà, ghen’è due robe importante: amor e union. Queste due bele robe ne giuta a capir come sarà la vita in Paradiso, quando ghen sarà ancora de pi amor e union intrà de noantri. (Col. 3:14) Varda quel che una sorela la ga dito: “Mi no savea cossa volea dir gaver alegria nela vita gnanca nela me fameia. La prima volta che go visto persone che le se mostrea amor una al’altra l’è stà quando go cognossesto le Testimònie de Geovà.” Alora, se una persona la vol gaver la vera alegria, la ga de servir a Geovà. Semo sicuri che Geovà e tuti i fradei e sorele i ne dà tanto valor, anca se i altri i pensa mal de noantri. — Isa. 65:15.
9. De acordo con Isaia 65:16, 17, cossa che Geovà el farà con tute le robe che ne fà sofrir?
9 Semo tranquili. Isaia 65:14 dise che quei che no i serve a Geovà ‘i piande par via dela tristessa che i ga nel cuor’ e ‘i osa parché i ze drio sofrir’. L’è vera che i servi de Geovà i sofre in questo mondo. Ma la Bìblia la dise che ‘no se ricordaremo dele robe che ghen’era vanti gnanca le tornarà al cuor’. (Ledi Isaia 65:16, 17. d) Geovà el ndarà cavar via i nostri problemi e gnanca no’l assarà che se ricordemo de tute le dificoltà che ghemo passà.
10. Parché che semo contenti de star insieme ai nostri fradei e sorele? (Varda anca el ritrato.)
10 Noantri restemo calmi quando ndemo ale nostre riunion parché assemo de banda tuto quel che ne fà restar preocupadi in questo bruto mondo. Podemo anca giutar i nostri fradei e sorele a restar calmi quando mostremo le qualità che fà parte del fruto del spìrito santo de Dio, come amor, alegria, pace, bontà e brandura. (Gàl. 5:22, 23) Sicuro che restemo tanto contenti de restar insieme ai nostri fradei e sorele. Tuti quei che i seita a servir a Geovà i vederà el giorno che ghen sarà “un novo cielo e una nova tera”.
L’è tanto bel adorar a Geovà insieme dei nostri fradei e sorele (Varda el paràgrafo 10. ) h
11. De acordo con Isaia 65:18, 19, come se sentimo de poder adorar a Geovà ancoi, e parché?
11 Semo tanto contenti. Noantri semo tanto contenti parché Geovà el ne giuta a adorarlo in pace e union insieme ai nostri fradei e sorele. (Ledi Isaia 65:18, 19. e) E l’è par quela che Geovà el ne domanda de insegnar la verità sora lu ai altri e de giutarli a adorarlo insieme a noantri. Par causa dele bele verità che ghemo imparà sorà Geovà, semo tanto contenti e volemo giutar anca i altri a cognosserle. — Ger. 31:12.
12. Come che se sentimo dopo de leder le promesse de Isaia 65:20-24, e parché?
12 Semo contenti de adorar a Geovà anca parché ghemo speransa. Proa pensar in tuto quel che ndaremo veder e far nel novo mondo de Dio. La Bìblia la promete: “No ghen sarà mia pi lì un bambin che el viva sol par pochi giorni, gnanca un vècio che no’l viva tuti i so giorni.” Noantri ‘ndaremo far su case par ndar de star’ e ndaremo ‘piantar vignai e magnar i so fruti’. No ndaremo ‘laorar tanto par gnente parché Geovà el ndarà bendirne’. La Bìblia anca dise che ancora vanti domandarghe qualcossa, Geovà el ‘savarà quel che ghemo de bisogno’ e el ne darà ‘tuto quel che volemo de pi’. (Isa. 65:20-24; Sal. 145:16.) Geovà el ne promete un futuro tanto bel!
13. Cossa che Isaia 65:25 el dise sora i cambiamenti che tante persone le fà par servir a Geovà?
13 Semo in pace e sensa paura. Col aiuto del spìrito de Dio, arquanti che una volta i era violenti e i fea brute robe, i ga fato tanti cambiamenti nela so vita. (Ledi Isaia 65:25. f) Lori i se ga sforsà tanto par cavar via le so brute qualità. (Rom. 12:2; Efe. 4:22-24) L’è vera che i servi de Geovà no i ze gnancora perfeti, i seita a far sbali e i ze tanto difarenti un delaltro. (Tito 2:11) Ma come lori i ama tanto a Geovà e un al altro, lori i ga pace e union. Questo l’è un miràcolo che sol el nostro poderoso Dio el pol far!
14. Come che quel che dise Isaia 65:25 ga sucedesto nela vita de un fradel?
14 Sarà che una persona la pol pròpio cambiar la so vita? Varda cossa ga sucedesto con un fradel prima de deventar un servo de Geovà. De quando el gavea 20 ani, lu el fea tante robe sporche e violente e l’è ndato in preson tante volte. Lu el fea tante altre robe brute, come ciavar auti e case. Lu l’era sempre pronto a darghe a qualchedun. Ma quando el ga imparà le verità dela Bìblia e el ga scominsià ndar ale riunion dele Testimònie de Geovà, lu el ga visto che el volea doperar la so vita par adorar a Dio. Dopo che el se ga batesà, lu el vol pace e no l’è pi una persona violenta. Cossita, lu el ga visto che quel che l’è scrito in Isaia 65:25 ga pròpio sucedesto a lu.
15. Parché che volemo giutar altri a adorar a Geovà, e come che podemo farlo?
15 Isaia 65:13 el scomìnsia con queste parole: “Cossita el dise el Sovrano Signor Geovà.” E el versìcolo 25 el finisse cole parole: “El dise Geovà.” Questo vol dir che le promesse de Geovà sempre le se realisa. (Isa. 55:10, 11) Noantri adoraremo a Geovà in pace e union belche adesso parché l’è stà lu che el ne ga giutà a deventar una fameia. Intrà i nostri fradei, noantri podemo gaver pace e viver sensa paura in questo bruto mondo. (Sal. 72:7) L’è par quela che volemo giutar tute le persone a adorar a Geovà insieme a noantri. Cossita, ghemo de sforsarse par insegnarghe la verità ale persone sempre che podemo. — Mat. 28:19, 20.
COME GIUTEMO I ALTRI A ADORAR A GEOVÀ
16. Come che podemo giutar le persone a adorar a Geovà?
16 Tuti noantri podemo far qualcossa par giutar le persone a vegner adorar a Geovà. Ma come che podemo farlo? Ghemo de far compagno a Geovà. Lu no’l obriga le persone a vegner rento la so organisassion. Invesse, lu el vol che le vegna de volentiera. (Gio. 6:44; Ger. 31:3) Cossita, le persone sinsiere che le impara sora el amor de Geovà e sora le so altre qualità le ga voia de adorarlo. E noantri? Come che podemo giutar le persone a adorar a Geovà par meso dele nostre qualità e dele robe bone che femo?
17. Come che podemo giutar le persone a vegner adorar a Geovà con noantri?
17 Quando le persone le vien ale riunion, le ga de sentir la medèsima roba che quei che i ze ndati a una riunion in Corinto i ga sentio nel passà. Lori i ga dito: “Dio l’è pròpio intrà de valtri.” (1 Cor. 14:24, 25; Zac. 8:23) L’è par quela che ghemo de tratar i nostri fradei con amor e bontà e seitar a “gaver pace un colaltro”. — 1 Tes. 5:13.
18. Cossa che ghemo de far par giutar le persone a vegner ala organisassion?
18 Noantri volemo sempre veder i nostri fradei e sorele come Geovà li vede. Par quela, ghemo de vardar le so bele qualità invesse de ndar in serca dei so sbali. Se se ghemo disgustà un colaltro, ghemo de meter a posto le robe con amor. Ne ocore esser ‘bondosi un coi altri, mostrar afeto e compassion e perdonarse un al altro del tuto’. g (Efe. 4:32) Alora, quei che i vol esser tratadi cossita i volerà adorar a Geovà insieme a noantri.
SEITA A ADORAR A GEOVÀ DELA MANIERA GIUSTA
19. (a) De acordo col quadro “ Lori i ga abandonà a Geovà, ma i ze tornadi”, cossa che arquanti i ga dito dopo che i ze tornadi a adorar a Geovà? (b) Cossa semo dessididi de far? (Varda anca la ilustrassion.)
19 L’è cada volta pi bel adorar a Geovà in pace e union. E ghen’è cada volta de pi persone che le desside farlo. Noantri volemo seitar a adorar a Dio come lu el vol. Tuti quei che i vol esser ben tendesti, contenti, calmi e viver sensa paura i ga de adorar a Geovà e seitar a farlo. Ma ghemo de star atenti parché Sàtana el fà de tuto par fermarne. (1 Pie. 5:8; Apo. 12:9) Noantri no volemo assar che Sàtana el sìpia bon. Invesse, volemo seitar a adorar a Geovà in pace, union e dela maniera giusta!
Quei che i seita a servir a Geovà ancoi i viverà nel Paradiso che lu el promete (Varda el paràgrafo 19.)
COSSA CHE TE GHÈ IMPARÀ?
-
Cossa che l’è el paradiso spiritual?
-
Che benefission ghemo de adorar a Geovà in union?
-
Come che podemo giutar i altri a adorar a Geovà?
CÀNTICO 144 Proa imaginar quel che Dio el farà
a PAR CAPIR MEIO: Le parole “paradiso spiritual” le vol dir le benedission che i servi de Geovà i ga de poder adorarlo. In questo paradiso, noantri ghemo una amicìssia forte con Geovà e un colaltro.
b (Isaia 65:13) Par quela, cossita el dise el Sovrano Signor Geovà: “Vardé! I me servi i ndarà magnar, ma valtri ndaré patir la fame. I me servi i ndarà bever, ma valtri gavaré sen. I me servi i gavarà alegria, ma valtri saré invergognadi.
c (Isaia 65:14) I me servi i ndarà osar de alegria parché i se sente ben nel cuor. Ma valtri ndaré piander par via dela tristessa che gavé nel cuor e ndaré osar parché sì drio sofrir.
d (Isaia 65:16, 17) El Dio dela verità el ndarà benedir a tuti quei nela tera che i se sforsa par ricever una benedission. Tuti quei nela tera che i fà una promessa i ndarà farla in nome del Dio dela verità. I problemi del passà i sarà desmentegadi e i sarà sconti dei me oci. 17 Parché vardé! Mi son drio crear un novo cielo e una nova tera, e le robe che ghen’era vanti no le sarà ricordade gnanca le tornarà al cuor.
e (Isaia 65:18, 19) Alora, resté felici e contenti par sempre par via de quel che son drio crear. Vardé! Mi son drio crear Gerusalen par esser un posto de alegria e quei che i ze de star lì i sarà felici. 19 Mi sarò contento con Gerusalen e restarò felice col me pòpolo. Lori no i scoltarà pi nissuni che piande o che osa de sofrimento.”
f (Isaia 65:25) El lobo e el piegoreto i ndarà magnar insieme, el leon magnarà paia compagno el toro, e la serpente la magnarà polver. No i farà mal gnanca i farà dano in tuto el me santo monte”, el dise Geovà.
g Varda el vìdeo Eli ndove adesso? Alena Žitníková: El me sogno el se ga realisà!, par imparar le benedission che una sorela la ga ricevesto de servir a Geovà.
h ILUSTRASSION: Intanto che i fradei i ze contenti insieme nela riunion, un fradel el se tira distante de tuti.
