1. Parché Gesù el ga dito che i so dissìpoli i ze come piégore?

GESÙ el ghe vol ben i so dissìpoli cossita come un pastor el ghe vol tanto ben ale so piégore. (Gioani 10:14) E le piégore le cognosse la voce del so pastor e le ghe va drio. Anca i dissìpoli i cognosse la voce de Gesù e i ghe va drio. Un omo el ga visto questo suceder cole piégore. Lu el ga dito: “Noantri voleino che le piégore le vegnesse pi darente de noantri par farghe ritrati. Ma lore no le vegnea parché no le cognossea la nostra voce. Alora l’è rivà un toseto che l’era el so pastor, e quando lu le ga ciamà, lore le ze ndate drio a lu.”

2-3. (a) Come che mostremo che scoltemo la voce de Gesù? (b) Cossa che ndaremo veder in questo stùdio e nel pròssimo?

² Gesù el ga dito che i so dissìpoli i ndaria scoltar la so voce. (Gioani 10:16) Ma come podemo scoltar la so voce se lu l’è nel cielo? Noantri scoltemo el nostro pastor, Gesù, quando femo quel che lu el ne ga insegnà. — Mat. 7:24, 25.

³ In questo stùdio e nel pròssimo, ndaremo veder arquante robe che Gesù el ne ga insegnà. Adesso, ndaremo imparar due robe che Gesù el ga dito che ghemo de fermarse de far. E nel pròssimo stùdio, ndaremo veder quel che ghemo de sforsarse par far.

4. De acordo con Luca 12:29, cossa che pol farne restar massa preocupadi?

⁴ Ledi Luca 12:29. * Gesù el ga dito ai so dissìpoli che i se fermesse de restar massa preocupadi con quel che i gavesse  de bisogno par viver. Sicuro che questo l’è un bel consìlio e volemo meterlo in pràtica. Ma dele volte l’è fadiga farlo. Parché?

5. Parché che tanti i resta massa preocupadi cole robe che i ga de bisogno par viver?

 ⁵ Tanti i resta massa preocupadi con quel che i ndarà magnar, ndove i ndarà de star, e se i gavarà tuto quel che la so fameia la ga de bisogno. Parché? Tanti i ze de star in posti che ghen’è tanti poareti e l’è fadiga catar un laoro. Altri parché la persona che la laorea la ze morta, o parché i ga perso el so laoro nela pandemia dela COVID-19. (Ecl. 9:11) Se una de queste robe la ze drio suceder con ti, come te pol fermarte de restar massa preocupà?

6. Cossa ga sucedesto col apòstolo Piero?

⁶ Varda quel che ga sucedesto quando Piero e i altri apòstoli i era in meso a una tempesta nel mar dela Galilea. Lori i ga visto che Gesù l’era drio caminar par sora del’àqua. Piero el ga dito: ‘Signor, se te sì ti, màndame che mi vegna fin ti sora la àqua. Gesù el ga dito: “Vien!” Alora, Piero l’è ndato fora del barco e l’era drio caminar sora la àqua fin Gesù. Ma, quando Piero el ga vardà par el forte vento, el ga bio paura. Quando el ga scominsià a sfondarse, el ga osà: “Signor, sàlvame!”’ Alora Gesù lo ga ciapà e no’l ga assà che el sfondesse. Piero l’è stà bon de caminar sora la àqua intanto che el vardea a Gesù. Ma quando el ga vardà la tempesta, l’è restà spaurà e ga scominsià sfondarse. — Mat. 14:24-31.

7. Cossa che ghemo imparà de quel che ga sucedesto con Piero?

⁷ Come ghemo visto, Piero l’è ndato  fora del barco parché el volea caminar sora la àqua par rivar fin Gesù. Sicuro che Piero no’l ga pensà che el podaria sfondarse, ma quando el ga vardà la tempesta, el ga scominsià sfondarse. Cossa che imparemo de questo? Imparemo che ghemo bisogno de fede par infrontar i problemi, come Piero el ga bio bisogno de fede par caminar sora la àqua. Imparemo anca che ghemo de seitar a fidarse in Geovà e nele so promesse. Cossita, no ndaremo sfondarse come Piero, o sia, no ndaremo perder la amicìssia con Geovà. Alora, ghemo de seitar a fidarse che Geovà ndarà giutarne a infrontar i nostri problemi. Ma come podemo farlo?

8. Parché no ghemo de restar ansiosi con quel che ghemo de bisogno par viver?

⁸ Se noantri metemo in primo posto el Regno, podemo esser sicuri che Geovà el ndarà darne quel che ghemo de bisogno par viver. Alora no ghemo de restar ansiosi par causa dei nostri problemi, ma ghemo de fidarse che lu ndarà giutarne. Podemo fidarse in Geovà parché lu sempre el fà quel che el promete. (Mat. 6:32, 33; Deu. 8:4, 15, 16; Sal. 37:25) Cossa che ne assa sicuri che Geovà ndarà tenderne? Par esémpio, lu el tende dei osei e dei fiori. Alora no ghemo de restar ansiosi con cossa ndaremo magnar o che robe ndaremo meter su parché Geovà le ne darà! (Mat. 6:26-30; Fil. 4:6, 7) Podemo anca esser sicuri de questo parché Geovà l’è un pare. Noantri savemo che i genitori i tende tanto ben dei so fioi parché li ama. Anca Geovà el ne ama tanto, par quela che podemo esser sicuri che lu ndarà tender de quel che ghemo de bisogno!

9. Cossa te ghè imparà de quel che ga sucedesto con un fradel e la so dona?

⁹ Varda come Geovà el ga tendesto de un fradel e dela so dona che i era pionieri. Nte un giorno, lori i ga viaià de pi de una ora fin un posto che stea persone che le ze scampade via del so paese. Lori i ze ndati fin lì par tor arquante sorele par ndar ala riunion. El fradel el ga dito: “Dopo dela riunion, ghemo dito ale sorele che le vegnesse là casa par magnar qualcossa insieme, ma no gaveino gnente casa par magnar. Ma quando semo rivadi casa, ghen’era due sporte piene de magnar davanti la porta. Noantri no saveino chi che gavea assà quele robe lì, ma èrino sicuri che Geovà l’era drio tender de noantri.” Un tempo dopo, lori i gavea de rangiar el so auto che l’era vècio. Lori i gavea tanto de bisogno de quel auto par predicar, sol che no i gavea soldi par rangiarlo. Quando i era nel posto par rangiar el aiuto, l’è rivà un omo e el ghe ga domandà: “Elo de chi questo auto?” El fradel el ga dito che l’era suo, ma che ghe tochea rangiarlo. Alora, el omo el ghe ga dito: “Vuto venderme quel auto lì? L’è pròpio un cossita che la me dona la vol. Ghen vuto quanti soldi?” Con questi soldi el fradel l’è stà bon de comprar nantro auto. Lu el ga dito: “Semo restadi tanto contenti. Sicuro che l’è stà Geovà far quel lì par noantri.”

10. De acordo col Salmo 37:5, de cossa podemo esser sicuri?

¹⁰ Gesù el ga dito che no ghemo de preocuparse tanto cole robe che ghemo de bisogno par viver. Se femo cossita, sicuro che Geovà el ndarà giutarne a gaver  tuto quel che ne ocore. (Ledi Salmo 37:5; * 1 Pie. 5:7) Fin adesso, Geovà l’è drio darne quel che ghemo de bisogno par meso del paron dela nostra fameia o del nostro laoro. Ma metemo dir che infrontemo quel che ghemo visto nel  paràgrafo 5. Anca se questa persona dela nostra fameia no la possa pi giutarne, o se no ghemo pi laoro, podemo esser sicuri che Geovà el seitarà a tenderne. Adesso, vedemo nantra roba che Gesù el ga dito che ghemo de fermarse de far.

11. De acordo con Mateo 7:1, 2, cossa Gesù el ga dito che ne toca fermarse de far e parché ne fà fadiga farlo?

¹¹ Ledi Mateo 7:1, 2. * Gesù el savea che ndarìssino vardar massa i sbali dei altri. Par quela che lu el ga dito: “Ferméve de giulgar.” Noantri femo sforso par no giulgar i altri, ma dele volte, no semo boni de farlo parché semo imperfeti. Cossa ghemo de far se seitemo a vardar sol i sbali dei altri? Ghemo de scoltar a Gesù, e sforsarse par fermarse de giulgar.

12-13. Come el esémpio de Geovà ne giuta a fermarse de giulgar i altri?

¹² Noantri podemo imparar tanto con Geovà parché lu sempre el vede le bele qualità dele persone. La maniera che Geovà el ga tratà Davi quando el ga fato bruti sbali la mostra questo. Par esémpio, Davi el ga bio relassion sessual con Bate-Seba e el ga mandà copar el so omo. (2 Sam. 11:2-4, 14, 15, 24) Par causa de quel che Davi el ga fato, lu, le so altre done e tuta la so fameia i ga sofrio. (2 Sam. 12:10, 11) In nantro colpo, Davi anca el ga desobedio a Geovà quando el ga contà quanti òmini ghen’era nel so esèrsito. Davi el ga fato questo fursi parché el gavea tanto orgòlio de gaver un grando esèrsito e parché el se fidea che questo esèrsito el ghe daria protession. Davi el ga mostrà che no’l se fidea tanto in Geovà. Par causa de questo, Geovà el ga fato che 70.000 israeliti i fusse morti! — 2 Sam. 24:1-4, 10-15.

¹³ Se te fussi in Israel in quel tempo, cossa te gavarissi pensà de Davi? Te gavarissi pensà che Geovà no’l gavaria de perdonarlo? Ma lu el ga volesto perdonar a Davi, anca che el gavesse fato bruti sbali. Parché? Parché Geovà el ga visto che Davi el gavea belche fato tante robe giuste, che lo amea, che el se gavea ciamà gramo e che el volea far quel che l’è giusto. Restemo tanto contenti de saver che Geovà el varda quel che femo de bon. — 1 Rè 9:4; 1 Cró. 29:10, 17.

14. Cossa ndarà giutarne a fermarse de giulgar i altri?

¹⁴ Noantri savemo che l’è tanto fàcile veder sol i sbali dei altri, ma volemo sforsarse de far compagno a Geovà. No ghemo de spetar che i altri i sìpia perfeti e ghemo de sforsarse par esser amighi de tuti. Alora, ghemo de veder le bele qualità dei altri e nò i so sbali, come Geovà e Gesù i fà. Podemo dir che tuti noantri semo come sassi pressiosi. Arquanti sassi pressiosi no i ze ancora tanto bei par fora, ma anca cossita, i ga tanto valor.

15. Parché che capir quel che l’è drio suceder nela vita de una persona ne giutarà a no giulgarla?

 ¹⁵ Cossa ancora pol giutarne a fermarse de giulgar i altri? Capir quel che l’è drio suceder nela vita dela persona. Par esémpio, Gesù el ga visto una védova poareta meter rento la cassa del témpio due monede che le valea poco o gnente. Ma lu no’l ga mia pensà: “Parché che la ga metesto rento la cassa poco cossita?” Invesse de far questo, Gesù el ga visto quel che la gavea nel cuor e quel che la era drio infrontar nela so vita. Par causa de questo, Gesù el ga lodà quela védova. — Luc. 21:1-4.

16. Cossa podemo imparar de quel che ga sucedesto con Veronica?

¹⁶ Varda quel che ga sucedesto cola sorela Veronica. Nela so congregassion ghen’era una sorela che la slevea el so fiol ela sola. Veronica la ga dito: “Mi pensea che lori no i era un bel esémpio parché no i ndea sempre ala predicassion e ale riunion. Ma un giorno nela predicassion, ela la me ga dito che ghe fea tanto fadiga slevar el so fiol parché el gavea un problema nte a mente. Go visto che ela la se sforsea tanto par gaver quel che ghe ocorea par viver e par seitar a adorar a Geovà. E dele volte quando no i podea ndar nele nostre riunion par causa del fiol, lori ndea in nantra congregassion. Mi no gavea mai pensà che la tribolesse cossita. Adesso mi amo ancora de pi questa sorela e dao de pi valor a quel che  la fà par servir a Geovà.” Alora imparemo che ghemo de pensar in quel che la persona la ze drio infrontar nela so vita par esser boni de fermarse de giulgarla.

17. (a) De acordo con Tiago 2:8 cossa che ghemo de far? (b)  Come podemo farlo?

¹⁷ Cossa podemo far se vedemo che semo drio giulgar qualchedun? Ghemo de ricordarse che ne ocore amar i nostri fradei. (Ledi Tiago 2:8. *) Podemo anca pregar a Geovà de tuto el cuor e domandar el so aiuto par fermarse de giulgar. Ghemo anca de tor del nostro tempo par cognosser meio la persona e quel che la infronta nela so vita. Par esémpio, podemo convidarla par laorar nela predicassion o par magnar qualcossa insieme. Cossita, saremo boni de veder le so bele qualità, come Geovà e Gesù i fà. Alora ndaremo scoltar la voce de Gesù, che el ga dito che ghemo de fermarse de giulgar.

18. Come mostremo che semo drio scoltar la voce de Gesù, el nostro pastor?

¹⁸ Come le piégore le scolta la voce del so pastor, noantri scoltemo la voce de Gesù. Sicuro che Geovà e Gesù i ndarà benedirne se femo sforso par no giulgar i altri e par no restar massa preocupadi con quel che ghemo de bisogno par viver. Tuti quei che i ndarà viver nel cielo e nela Tera i ga de seitar a scoltar a Gesù e far quel che lu el dise. (Luc. 12:32; Gioani 10:11, 14, 16) Nel pròssimo stùdio, ndaremo veder due robe che Gesù el ga dito che ghemo de far.