1. Cossa che Geovà el pol far quando i so servi i ghe domanda aiuto?

 QUANDO un servo de Geovà el ghe domanda aiuto, Dio el pol doperar i ansiani e altri servi fedeli come “una fonte de grando consolo”. (Col. 4:11) Alora, no vol mia dir se te sì ansiano, servo ministerial, pioniero o predicador, Geovà el pol doperarte par giutar i fradei. Cossita, tuti fradei, sorele, gióveni e veci i pol giutar i altri quando vien fora una bruta malatia, una desgràssia o perseghission. Restemo pròpio contenti de saver che Geovà el ne dopera par giutar i nostri fradei!

2. Parché che fursi l’è fadiga giutar i altri quando ghen’è una bruta malatia?

² Se ghen’è una bruta malatia, pol esser che ne fà fadiga giutar i nostri fradei. Par esémpio, fursi no podemo visitar i nostri amighi gnanca convidar quei che i ga pochi soldi par vegner magnar nela nostra casa. O pol esser che no semo mia boni de giutar i altri parché qualchedun dela nostra fameia l’è malà o parché ghemo pochi soldi. Anca cossita, Geovà el resta contento quando femo quel che podemo par giutar i nostri fradei. (Pro. 3:27; 19:17) Alora, come che podemo giutarli?

3. Cossa che podemo imparar dei ansiani dela congregassion dela sorela Desi? (Geremia 23:4)

³ Cossa che i ansiani i pol far? Se ti te sì un ansiano, proa cognosser ben i fradei dela to congregassion. (Ledi Geremia 23:4. b) Desi, c una sorela che ghemo parlà nel stùdio indrio, la ga dito: “I ansiani del me grupo de predicassion i  predichea sempre con mi e con altri fradei, e i fea altre robe insieme de noantri.” Par quela, lori i ga savesto come giutar Desi nela pandemia dela COVID-19 e quando persone dela so fameia le ze morte.

4. Parché che i ansiani i ze stati boni de giutar Desi, e cossa che lori i pol imparar?

⁴ I ansiani i ze stati boni de giutar Desi parché lori i era belche amighi. Cossita, ela la ga parlà a lori come la se sentia e i so pensieri. Cossa che i ansiani i pol imparar? Lori i ga de tender dei fradei e esser so amighi ancora prima che vegna fora una dificoltà. E se vien fora una malatia che no i pol mia visitar i fradei casa, i ga de parlar con lori de altre maniere. Desi la ga dito: “Dele volte, nel medèsimo giorno, arquanti ansiani i me scrivea qualcossa o i me ciamea nel telèfono. I testi che i me ga ledesto i me ga giutà tanto, anca se belche li cognossea.”

5. (a) Come che i ansiani i pol saver cossa che i fradei i ga de bisogno? (b) Come che i ansiani i pol giutarli?

⁵ Come che te pol saver cossa che i to fradei i ga de bisogno? Par meso de domande che no le ndarà assarli in vergogna. (Pro. 20:5) Par esémpio, fursi lori i ga bisogno de robe de magnar o rimedi. Pol esser che i gàpie perso el laoro o che no i gàpia soldi che ghe basta par pagar el posto ndove i ze de star. O fursi, lori ghe ocore che li giutemo a domandar el aiuto del governo. Ma l’è tanto importante che i ansiani li incoraie e li giute a gaver una forte fede. L’è stà questo che giutà Desi a dàrghene fora cole so dificoltà. Ela la ga dito: “I ansiani i ga pregà con mi. No me ricordo ben cossa che i ga dito, ma me ricordo che me go sentia tanto meio. L’è stà come se Geovà el me gavesse dito: ‘No te sì mia ti sola.’” — Isa. 41:10, 13.

6. Cossa che tuti noantri podemo far par giutar i fradei dela congregassion? (Vedi el ritrato.)

⁶ Cossa che tuti noantri podemo far? Noantri savemo che ze i ansiani che i ga de tender dei fradei nela congregassion. Ma Geovà el vol che tuti noantri se incoraiemo un al altro. (Gàl. 6:10) Quando femo qualcossa par giutar un fradel o una sorela che l’è malà, sicuro che ndemo incoraiarlo tanto. Par esémpio, un tosatel el pol mandarghe un carton o far un desegno par lori e un gióveno el pol ndar comprar quel che lori ghe ocore. Altri nela congregassion i pol far qualcossa de magnar e portarghe. E  noantri volemo sforsarse par star un pochetin de pi dopo dela riunion par parlar coi nostri fradei che i ze nel Salon e anca con quei che i ze par vìdeo. Volemo anca sforsarse par sempre incoraiar i nostri cari ansiani, che i laora ancora de pi se ghen’è una bruta malatia. Una roba che podemo far la ze scriverghe qualcossa par ringrassiarli. Sicuro che tuti noantri ghemo bisogno de aiuto quando ghen’è una bruta malatia. L’è tanto bel quando tuti i seita a sforsarse par incoraiarse un al altro. — 1 Tes. 5:11.

7. Cossa che pol suceder par causa de una desgràssia?

⁷ Una desgràssia la pol suceder de colpo e cambiar la vita de una persona. Par esémpio, pol esser che la perde la so casa, quel che la ga, o che more qualchedun che la ama. Questo pol suceder anca con noantri e coi nostri fradei. Alora, cossa che podemo far par giutar quei che infronta una roba cossita?

8. Cossa che i ansiani e i paroni de fameia i ga de far vanti che suceda una desgràssia?

⁸ Cossa che i ansiani i pol far? I ansiani i ga de giutar i fradei a pareciarse vanti che suceda una desgràssia. Lori i ga de esser sicuri che i fradei i sarà boni de parlar con lori se ghe ocore e che i saverà cossa che i ga de far. Anca el paron de fameia el ga de giutar la so dona e i so fioi a esser pareciadi. Lu el pol doperar la adorassion in fameia par ricordar a tuti cossa che i ga de far. Cossita, tuta la fameia la sarà bona de star pi tranquila se sucede una desgràssia. La sorela Margaret, che ghemo parlà nel stùdio indrio, la ga dito: “I ansiani i ga fato una parte con orientassion par la congregassion e i ga dito che ancora podaria suceder nantra desgràssia par causa del fogo. Lori anca i ga dito che, se ghen fusse qualche perìcolo o se le autorità ne mandesse ndar via de casa, gaveino de farlo suito.” Queste orientassion le ze state pròpio importante parché sol sinque stimane dopo ga scominsià un fogo che ga brusà fora tuto.

9. Cossa che i ansiani i ga de far vanti e dopo che suceda una desgràssia?

⁹ Se te sì un ansiano che tende de un grupo de predicassion, no stà spetar che suceda una desgràssia par tender dei fradei. Cossa che te pol far vanti? Scrivi do el nùmero de telèfono e el indirisso de tuti i fradei del to grupo e sìpia sempre sicuro che i ze giusti. Cossita, se sucede una desgràssia, te sarè bon de parlar con lori e giutarli. Dopo, te ndarè parlar al cordinador del corpo de ansiani tuto quel che l’è drio suceder, e lu el ndarà parlar col superintendente de sircuito. Lori i sarà boni de giutar tanti fradei se i laora insieme. Par esémpio, quando ga sucedesto quela desgràssia ndove la sorela Margaret la era de star, el superintendente del so sircuito l’è restà desmissià 36 ore par giutar i ansiani a tender de 450 fradei che ghe gavea tocà ndar via dele so case. (2 Cor. 11:27) Par quela, lori i ze stati boni de giutar tuti i fradei a catar un posto de star.

10. Parché che i ansiani i sa che tender dei fradei l’è una roba tanto importante? (Gioani 21:15)

¹⁰ I ansiani i ga el laoro de incoraiar i fradei par meso dela Bìblia e giutar quei che i ze desanimadi. (1 Pie. 5:2) Se sucede una desgràssia, i ansiani i ga de esser sicuri che tuti fradei i ga de magnar, robe de meter su e un posto de star. Anca dopo de arquanti mesi, fursi i ansiani i gavarà de seitar a incoraiarli par meso dela Bìblia. (Ledi Gioani 21:15.) Varda el esémpio del fradel Harold.  Lu el laora nte una Comission de Filial e el ga cognossesto tanti fradei e sorele che i ga passà par una desgràssia. Lu el ga dito: “Ghe vol tempo fin che i fradei che i ga passà par una desgràssia i reste meio. Pol esser che tante robe nela so vita le ze drio tornar a esser come prima, ma lori i seita a sofrir par causa de quei che i ze morti, de quel che i ga perso o dei perìcoli che i ga infrontà. E quando i se ricorda de queste robe, pol esser che i torne a sofrir come in quela època. Tuti quei che i ga infrontà una bruta desgràssia nela vita i se sente cossita. Ma questo no vol mia dir che ghe manca fede.” d

11. Cossa che fursi i ansiani i ga de seitar a far?

¹¹ I ansiani i mete in pràtica el consìlio de Romani 12:15 de “piander con quei che i piande”. Alora, lori i giuta i fradei che i ga infrontà una bruta desgràssia a ricordarse che Geovà, i fradei e le sorele ancora li ama. I ansiani anca i ga de giutar le fameie a seitar a pregar a Geovà, studiar la Bìblia, ndar ale riunion e ala predicassion. Lori i pol incoraiar un pare e una mare a giutar i so fioi a darghe de pi valor ale robe che una desgràssia no la pol finir fora. Par esémpio, la so amicìssia con Geovà e la granda fameia de fradei e sorele nel mondo che ghe vol tanto ben. — 1 Pie. 2:17.

12. Come che noantri podemo giutar quando sucede una desgràssia? (Vedi el ritrato.)

¹² Cossa che tuti noantri podemo far? Se ga sucedesto una desgràssia darente de ndove te sì de star, domanda ai ansiani come che te pol giutar. Fursi, te pol convidar quei fradei che ghe ga tocà ndar via dele so case o quei che i ze vegnesti giutar par restar nela to casa. Pol esser che te sìpia bon de portarghe de magnar o altre robe che ghe ocore. Ma cossa che te pol far se ga sucedesto una desgràssia distante de ndove te sì de star? Te pol pregar par i fradei. (2 Cor. 1:8-11) Nantra roba che te pol far la ze mandarghe soldi ala òpera mondial. (2 Cor. 8:2-5) Se te sì bon de viaiar fin el posto ndove ga sucedesto la desgràssia, te pol domandar ai ansiani cossa te ghè de far par giutar. E se i te convida par ndar giutar, i fradei i ndarà insegnarte cossa far.

13. Che dificoltà i fradei i infronta ndove ghen’è perseghission?

¹³ I nostri fradei che i ze de star ndove ghen’è perseghission i tribola tanto. Dele volte, lori no i ga i soldi che ghe ocore, i resta maladi e i sofre quando more qualchedun che i ama. Ma par causa dela perseghission, pol esser che i ansiani no i ze boni de ndar catar o incoraiar i fradei che i gavaria bisogno de aiuto. El fradel Andrei, che ghemo parlà nel stùdio indrio, el ga infrontà una roba cossita. Una sorela del so grupo de predicassion la era drio tribolar parché ghe manchea soldi. Dopo, par causa de un assidente de auto, ghe ga tocà far diverse operassion. Par quela, no la podea mia laorar. Ma Geovà l’era drio veder quel che la era drio infrontar e el ga doperà tanti fradei par giutarla.

14. Che bel esémpio i ansiani i pol dar ai altri?

¹⁴ Cossa che i ansiani i pol far? Andrei el ga pregà a Geovà e el ga fato tuto quel che el podea. E Geovà el ghe ga rispondesto parché el ga doperà altri fradei par giutar quela sorela. Arquanti i la ga menada nel dotor e altri i la ga giutada con soldi. Geovà el ga benedio el sforso che i ga fato par giutar quela sorela. Cossita, ela la ga bio tuto quel che ghe ocorea. (Ebr. 13:16) I ansiani che i ze de star nei posti ndove ghen’è perseghission i ga de domandar el aiuto dei altri. (Ger. 36:5, 6) E la roba pi importante che i ga de far l’è fidarse in Geovà parché lu li giutarà a tender ben dei fradei.

15. Come che podemo seitar unidi coi nostri fradei quando ghen’è perseghission?

¹⁵ Cossa che tuti noantri podemo far? Se ghen’è perseghission, fursi ghemo de riunirse in pìcoli grupi. Par quela, l’è tanto importante esser in pace con tuti. Ghemo de ricordarse che el nostro nemigo l’è Sàtana, nò i nostri fradei. Alora, no ghemo de vardar i so sbali. E se ga sucedesto un problema con qualchedun, ghemo de suito far la pace e meterse intesi. (Pro. 19:11; Efe. 4:26) Ne ocore anca sforsarse par sempre giutar i nostri fradei. (Tito 3:14) El aiuto che i fradei i ga dato a quela sorela l’è stà pròpio importante par la union de so grupo de predicassion. Lori i ze deventadi come una fameia. — Sal. 133:1.

16. De acordo con Colossensi 4:3, 18, come che podemo giutar i fradei che i infronta perseghission?

 ¹⁶ Tanti dei nostri fradei i serve a Geovà anca che i sìpia de star in paesi ndove ghen’è perseghission. Arquanti i ze fin metesti in preson. Ma noantri podemo pregar che Geovà el giute a lori e anca ale so fameie. Ghemo de pregar anca par quei fradei coraiosi che i rìscia la so libertà par giutar i fradei che i ze in preson. e (Ledi Colossensi 4:3, f 18. g) Noantri ghemo de ricordarse che le nostre orassion le pol giutar tanto questi fradei! — 2 Tes. 3:1, 2; 1 Tim. 2:1, 2.

17. Come che podé pareciarve par la perseghission?

¹⁷ Ti e la to fameia gavé de pareciarve adesso par infrontar la perseghission. (Ati 14:22) Come? Invesse de pensar nele brute robe che le pol suceder, fé pi forte la vostra amicìssia con Geovà. E se te sì ansioso, conta a Geovà tuto quel che te sì drio sentir. (Sal. 62:7, 8) Discoré sempre in fameia parché che podé fidarve in Geovà. h Cossita come l’è importante pareciarse par una desgràssia, l’è anca tanto importante pareciarse par la perseghission. Se ve parecié vanti e ve fidé in Geovà, anca i vostri fioi i gavarà coraio e pace.

18. Come che sarà la nostra vita nel futuro?

¹⁸ Quando Geovà el ne dà la so pace, noantri sentimo che ghemo protession. (Fil. 4:6, 7) Cossita, se sentimo tranquili anca se infrontemo brute malatie, desgràssie o perseghission. Geovà anca el dopera i ansiani par tender de tuti noantri, e el vol che se giutemo intrà de noantri. La pace che sentimo adesso la ze drio pareciarne par le dificoltà ancora pi brute che gavaremo nel futuro e nela “granda tribolassion”. (Mat. 24:21) Alora, ghemo de sforsarse par gaver la pace de Dio e giutar anca i altri a gaverla. Dopo dela granda tribolassion, no ghen sarà pi bruti colpi che ne assa ansiosi, parché viveremo come Geovà sempre el ga volesto. Noantri viveremo cola vera pace par sempre! — Isa. 26:3, 4.