Geovà el gavea dito che i òmini i impienisse la Tera e la tendesse. (Gén. 1:28) Cossita, capimo che Dio el vol che tuta la Tera la sìpia un Paradiso. Alora, anca quei che i ndarà viver in Paradiso i gavarà de far questo. Ma come no ghen’è pi el giardin del Èden, ghen sarà pròpio tanto laoro par netar i posti che ancoi i ze rovinadi fin che la Tera la devente un Paradiso.

Fursi, noantri se ricordemo del laoro che i israeliti i ga bio dopo che i ze tornadi de Babilònia. Par 70 ani, no ghen’è stà nissuni de star in Gerusalen. Ma Isaia el ga dito che Geovà el ndaria giutarli e che lori i saria boni de rangiarla su. Isaia el ga dito che fin ‘el deserto el deventaria compagno el Èden, el giardin de Geovà’. (Isa. 51:3) E Geovà li ga pròpio giutadi a far de quela tera un bel posto. Alora, Geovà el giutarà  anca noantri a far che la Tera la devente un bel paradiso. Come che noantri podemo mostrar ancora adesso che volemo far parte de questo laoro?

Una dele maniere la ze netar la to casa e mantegnerla ben postada. Te pol far questo anca se i to visigni i ze sporcacioni. Nantra maniera la ze giutar a netar el Salon del Regno e el Salon de Assemblee. E se ti te pol, fà una petission par giutar quando sucede desgràssie. Cossita, te impari a esser sempre pronto par giutar i to fradei e sorele quando ghe ocore. Proa anca domandarte: ‘Ghen’elo qualche laoro che posso imparar a far che fursi podarò farlo in Paradiso?’

Pena dopo che Gesù el ga ressussità la fiola de Giairo, lu el ga domandà che i ghe desse de magnar ala toseta. (Mar. 5:42, 43) L’è vera che l’è stà fàcile darghe de magnar a una toseta de 12 ani. Ma proa pensar nel laoro che gavaremo quando Gesù el ressussitarà tuti quei che i ze morti! (Gioani 5:28, 29) Ancora che la Bìblia no la dise tuto quel che ndarà suceder, pol esser che questi ressussitadi i gavarà bisogno de aiuto par gaver de magnar, un posto de star e robe de meter su. Come che te pol pareciarte adesso par giutarli? Vedemo arquante robe che te pol far.

Se te sè che el superintendente el ndarà visitar la to congregassion, sarà che te podarissi convidarlo par magnar nela to casa? Fursi, un fradel che laorea in Betel el sìpia stà mandà ala to congregassion par giutar nela predicassion o un fradel ghe ga tocà assar el so laoro come superintendente. Sarà che te podarissi giutarli a catar un posto de star? O metemo dir che ghen sarà un congresso darente de ndove te sì de star. Alora, sarà che te podarissi giutar a pareciar el posto del  congresso o a ricever i fradei che i vien de fora?

De acordo con Ati 24:15, savemo che bilioni de persone le sarà ressussitade. Tanti de questi no i ga mia imparà sora Geovà, ma i podarà cognosserlo dopo de esser ressussitadi. a I servi fedeli de Geovà i ndarà giutar a insegnar queste persone. (Isa. 11:9) Una sorela de nome Charlotte, che la ga predicà nela Europa, nela Amèrica del Sud e nela Àfrica la resta contenta quando la pensa nel laoro che sarà fato nel futuro. Ela la ga dito: “Son pròpio premosa par insegnar ai ressussitadi. Sempre che ledo sora qualchedun che ga vivesto nel passà, mi penso: ‘La vita de questa persona la podaria esser stata tanto meio se la gavesse cognossesto a Geovà.’ No vedo la ora de insegnarghe ai ressussitadi sora Lu.”

Ma anca i servi de Dio che i ga vivesto vanti che Gesù el vegnesse ala Tera i gavarà tanto de imparar. Par esémpio, restaremo contenti de spiegarghe a Daniel come ga sucedesto le professie che lu el ga scrito. (Dan. 12:8) Anca sarà tanto bel spiegar a Rute e Noemi che el Messia l’è vegnesto dela so fameia. Sarà una alegria insegnar a tute le persone in Paradiso parché no ghen sarà pi le dificoltà del mondo de ancoi!

Come che te pol mostrar adesso che te vol pròpio insegnar ai ressussitadi? Una dele maniere la ze sempre ndar ala predicassion e sforsarse par insegnar cada volta meio. (Mat. 24:14) Pol esser che, par causa dela to età o de altri problemi, ti no te sìpie pi bon de far quel che te volarissi nela predicassion. Ma te pol mostrar che te sì premoso de insegnar i ressussitadi, se te proi far el to meio adesso.

Saria bon domandarte: ‘Sonti pròpio premoso par viver par sempre nela Tera? Gonti pròpio voia de giutar a far dela Tera un paradiso, insegnar i ressussitadi e darghe quel che ghe ocore?’ Se te te pareci adesso par far questi laori, te mostri che te vol pròpio viver par sempre in Paradiso!