1. Cossa zela “la pace de Dio”, e come che la ne giuta? (Filipensi 4:6, 7)

 GHEN’È una pace che le persone del mondo no le cognosse, che la ze “la pace de Dio”. Ma cossa zela questa pace? La ze la calma che sentimo quando ghemo una forte amicìssia con Geovà, el “Dio de pace”. (1 Tes. 5:23) Quando ghemo la pace de Dio, se sentimo tranquili parché ghemo la so protession. (Ledi Filipensi 4:6, 7. b) Alora se cognossemo a Geovà, lo obedimo e se fidemo in lu, noantri se sentimo tranquili anca con brute dificoltà. Questa pace la ne giuta a seitar a esser amighi de Geovà e de quei che i lo ama.

2. Sarà che podemo pròpio gaver la pace de Dio?

² Ma sarà che podemo pròpio gaver la pace de Dio quando infrontemo brute malatie, desgràssie, una guera rento el nostro paese o perseghission? Queste dificoltà le pol farne gaver paura. Ma ne ocore ricordarse de quel che Gesù el ga dito: “No sté preocuparve, gnanca resté spauradi.” (Gioani 14:27) Tanti fradei e sorele i ga fato quel che Gesù el ga dito e i ze stati boni de sentir pace intanto che i era drio tribolar. Alora, anca noantri podemo gaver la pace de Dio.

3. Cossa che pol suceder quando vien fora una bruta malatia?

³ Una bruta malatia la pol cambiar tanto la vita dele persone. Par esémpio, varda quel che arquanti i ga infrontà par causa del COVID-19. Studiosi i ga dito che de pi dela metà  dele persone no le era bone de dormir polito de note. Tanti anca i ga bio la depression, i ga scominsià a sentirse massa ansiosi, a doperar droghe, a far la ciuca, a esser violenti e tanti i ga fin proà coparse. Se vien fora una malatia ndove te sì de star, come che te pol dàrghene fora cola ansietà e gaver la pace de Dio?

4. Parché che saver dela professia de Gesù sora i ùltimi giorni ne dà pace?

⁴ Quando l’era nela Tera, Gesù el ga dito che ghen saria “brute malatie nte un posto dopo l’altro” nei ùltimi giorni. (Luc. 21:11) Parché che saver de quel che Gesù el ga dito ne dà pace? Parché semo belche pareciadi par infrontar quel che l’è drio suceder. Par quela, ghemo de far quel che Gesù el ga dito: “Sté atenti par no restar spauradi.” — Mat. 24:6.

5. (a) De acordo con Filipensi 4:8, 9, cossa che ghemo de domandar a Geovà? (b) Come che scoltar le gravassion dela Bìblia pol giutarte?

⁵ Se ghen’è una bruta malatia, fursi restemo tanto preocupadi e con paura. L’è stà questo che ga sucedesto con una sorela de nome Desi. c Dopo che so zio, so primo cusin e so dotor i ze morti de COVID-19, ela la gavea paura de ciapar questa malatia e passarla a so mare che la era belche vècia. Desi anca la gavea paura de restar sensa laoro, sensa un posto de star e de no esser pi bona de comprar de magnar. Ela la gavea tanti pensieri che no la era gnanca bona dormir de note. Ma ela la ga bio pace nantra volta dopo che la ga domandà a Geovà che la ghe desse calma e che la giutesse a pensar in quel che l’era bon. (Ledi Filipensi 4:8, 9.) Nantra roba che la ga giutada la ze stata scoltar le gravassion dela Bìblia. Desi la ga dito: “La voce dei fradei che i era drio leder la Bìblia me ga giutà a restar pi tranquila e a ricordarme che Geovà el se preocupa con mi.” — Sal. 94:19. d

6. Come che le riunion e el stùdio dela Bìblia i pol giutarne?

⁶ La nostra vita la pol cambiar tanto se vien fora una bruta malatia. Ma no ghemo mai de assar de studiar la Bìblia e de ndar ale riunion. Le stòrie de fradei e sorele che ghen’è nele publicassion e nei vìdei ne giuta a ricordarse che lori i ze drio servir a Geovà anca cole dificoltà. (1 Pie. 5:9) Le riunion le ne giuta a pensar in testi dela Bìblia che ne incoraia. Nele riunion, podemo anca darse forsa un colaltro. (Rom. 1:11, 12) Quando vedemo come Geovà el ga giutà  fradei che i era maladi, che i gavea paura o che se sentia lori soli, la nostra fede in lu la resta pi forte e semo ancora pi sicuri che lu el ndarà giutar anca a noantri.

7. Cossa che imparemo col esémpio del apòstolo Gioani?

⁷ Sfòrsate par seitar a discorer coi fradei e sorele. Fursi femo fadiga catarse coi nostri fradei quando ghen’è una bruta malatia. Alora, varda quel che podemo imparar col apòstolo Gioani. Lu el volea tanto catarse col so caro amigo Gaio. (3 Gio. 13, 14) Come in quela ora no i podea mia catarse, Gioani ghe ga scrito una carta. Cossa che imparemo col so esémpio? Se no semo boni de ndar catar i nostri fradei e sorele, ghemo de proar parlar con lori par meso del telèfono, de ciamada par vìdeo o de altre maniere. Quando discoremo coi nostri fradei, ghemo pace e no se sentimo pi noantri soli. E se noantri se sentimo ansiosi, ne ocore domandar el aiuto dei ansiani e assar che lori i ne giute. — Isa. 32:1, 2.

8. Come che fursi te te senti se vien fora una desgràssia?

⁸ Tante persone le ga infrontà brute desgràssie par via de un teremoto, del fogo o dela àqua. Se una roba cossita la ga sucedesto anca con ti, pol esser che te sì restà tanto ansioso. Ma l’è ancora pedo se te ghè perso tuto quel che te gavei o se l’è morto qualchedun che te ami. Fursi te sì restà desanimà, sensa forsa par ndar avanti o fin cativo. Se te te senti cossita, no stà pensar che no te ghè mia fede o che te ghe dè massa valor al to capital. Te ghè passà par un bruto colpo e tanti i se sente come ti. (Giò 1:11) Magari, te pol gaver pace. Vedemo come.

9. Parché che savemo che fursi ndaremo infrontar desgràssie?

⁹ Arquante persone ancoi le pensa che no ndarà mai sucederghe una desgràssia. Ma savemo che ghen sarà cada volta de pi desgràssie e che anca noantri podemo tribolar. Parché? Parché Gesù el ga dito che sucederia grandi teremoti e altre desgràssie vanti del fin. (Luc. 21:11) Lu anca el ga dito che le persone le ndaria far robe cada volta pi brute. (Mat. 24:12) E Gesù no’l ga mai dito che le desgràssie sol le ndaria suceder a quei che Dio el ga abandonà. Tanti servi de Geovà ancoi i sofre par causa dele desgràssie. (Isa. 57:1; 2 Cor. 11:25) Anca cossita, Geovà li giuta a restar tranquili e a gaver pace.

10. Parché che mostremo fede quando se pareciemo par una desgràssia? (Proverbi 22:3)

¹⁰ Sarà pi fàcile restar calmi quando sucede una desgràssia se se pareciemo prima. Ma sarà che far questo mostra che no ghemo fede in Geovà? Sicuro che nò! Se se pareciemo par una desgràssia, mostremo che se fidemo pròpio che Dio el pol tender de noantri. Parché? Parché la Bìblia la dise che ghemo de pareciarse. (Ledi Proverbi 22:3. e) E la organisassion de Geovà la dopera le reviste, le riunion e i anunsi par ricordarne che ne ocore pareciarse par le desgràssie. f Alora, se noantri se fidemo in Geovà, ndaremo far tuto quel che lu el ne dise adesso, prima che suceda una desgràssia.

11. Cossa che te ghè imparà col esémpio de Margaret?

¹¹ Varda quel che ga sucedesto cola sorela Margaret. El governo el ghe ga dito  che la gavea de ndar via dela so casa parché gavea scominsià un fogo in meso el mato che podea brusar fora tuto. Ma ghen’era tanti auti par le strade che nissuni i era pi boni ndar avanti. Par causa del fogo, ghen’era tanta fumassa par area e Margaret no la era gnanca bona de ndar fora del auto. Manco mal che la era pareciada. Ela la gavea un mapa che el ghe mostrea come che la podaria scampar via de lì. Un tempo vanti, ela la era belche ndata par quela strada par cognosser e saver cossa far se sucedesse una desgràssia. Margaret la ze restada viva parché la era pareciada.

12. Parché che ghemo de obedir al governo e ala organisassion quando sucede una desgràssia?

¹² Pol esser che, quando sucede una desgràssia, el governo el ne dae arquante istrussion de seguransa, come restar casa o ndar via. Arquante persone no le obedisse suito parché no le vol assar indrio quel che le ga. Magari, noantri ndemo drio a quel che la Bìblia la dise e obedimo ale autorità. (1 Pie. 2:13, 14) La organisassion de Geovà la ne giuta a saver cossa far par protegerse. Par esémpio, ghemo de mandar el nostro nùmero de telèfono e el nostro indirisso ai ansiani. Ti te ghè belche fato questo? Se sucede una desgràssia, la organisassion anca la ndarà giutarne a saver come gaver de magnar, ndove ndar de star, come scampar via e come giutar i altri. Se no obedimo mia, podemo risciar la nostra vita e la vita dei ansiani. Noantri ghemo de ricordarse che Geovà el ga dato ai ansiani el laoro de tender dei so servi. (Ebr. 13:17) La sorela Margaret la ga dito: “Mi son sicura che el aiuto dei ansiani e dela organisassion el me ga salvà.”

13. Come che arquanti i ze boni de seitar contenti e gaver pace?

¹³ Tanti fradei e sorele ghe ga tocà assar indrio la so casa par causa de una desgràssia o de una guera. Ma lori i proa restar contenti cola so vita adesso e i seita a far el so meio a Geovà. Lori i fà compagno i primi dissìpoli de Gesù, che i ga seità a predicar le bone notìssie anca cola perseghission. (Ati 8:4) Cossita, lori i seita a pensar in quel che el Regno de Geovà el farà invesse de pensar nele dificoltà che i ze drio infrontar. Par quela, lori i ze contenti e i ga pace.

14. Cossa che pol suceder quando semo perseghidi?

¹⁴ Quando semo perseghidi, fursi no ghemo pi la libertà de far arquante robe che le ne dà pace, come adorar a Geovà e predicar. Pol esser che restemo ansiosi e che ghemo paura de esser metesti in preson o de altre brute robe. Ancora che no sìpia sbalià sentirse cossita, ghemo de star tanto atenti. Gesù el ga dito che arquanti dei so dissìpoli i podaria fin abandonar a Geovà par causa dela perseghission. (Gioani 16:1, 2) Alora, come che podemo esser boni de gaver pace intanto che semo perseghidi?

15. Parché che no ne ocore gaver paura dela perseghission? (Gioani 15:20; 16:33)

¹⁵ Ledi Gioani 15:20; g 16:33. h La Bìblia la dise: “Tuti quei che i vol viver una vita de devossion a Dio, come dissìpoli de Cristo, anca i sarà perseghidi.” (2 Tim. 3:12) Varda el esémpio de un fradel de nome Andrei. Quando el governo el ga proibio el laoro dele Testimònie de Geovà nel so paese, lu no l’era bon de creder che tuti i servi de Geovà lì i saria perseghidi. Lu el ga dito: “Qua, ghen’è tante Testimònie de Geovà. Le autorità no le saria mai bone de meter tuti noantri in preson.” Andrei el spetea che pensar cossita lo assaria pi calmo. Invesse, lu l’era drio restar cada volta pi ansioso. Ma Andrei el ga visto che altri fradei no i era mia ansiosi parché i gavea dessidio fidarse in Geovà e acetar che anca lori i podaria esser metesti in preson. Par quela, lu el ga cambià la so maniera de pensar e el se ga fidà in Geovà. Cossita, lu el ga pace e l’è contento anca se ghen’è tanti problemi. La medèsima roba la pol suceder con noantri. Gesù el ga dito che saremo perseghidi, ma lu anca el ga dito che podemo seitar leai.

16. A chi che ghemo de obedir quando semo drio infrontar perseghission?

¹⁶ Se le autorità le ne proibe de predicar e de adorar a Geovà, podemo esser sicuri  che Betel e i ansiani i ndarà dirne quel che ghemo de far. Queste orientassion le ndarà protegerne e giutarne a seitar a predicar e a ricever le publicassion. Alora, noantri ghemo de obedir a quel che i ne dise anca che no lo capimo tanto ben. (Tia. 3:17) Ne ocore anca ricordarse che no ghemo mai de parlar gnente sora i nostri fradei e sorele o sora la congregassion a quei che no i ga de saverlo. — Ecl. 3:7.

17. Compagno ai apòstoli, cossa che volemo far?

¹⁷ Sàtana no’l vol che predichemo sora Gesù. (Apo. 12:17) Par quela, lu el ne fà tribolar. Ma no stà assar che Sàtana e el so mondo i te fae restar spaurà. Ricòrdate che, se te seiti a predicar e a insegnar, te ndarè gaver pace e alegria. Varda quel che te pol imparar coi apòstoli. Lori i ga seità a predicar e a obedir a Dio, anca se i giudei i ghe gavesse dito de fermarse de farlo. Par quela, i apòstoli i ze restadi contenti. (Ati 5:27-29, 41, 42) L’è vera che, se el governo el ne ga proibio de predicar, no ndaremo farghe veder a tuti che semo drio farlo. (Mat. 10:16) Ma se seitemo a predicar, gavaremo la pace de saver che semo drio assar Geovà contento e giutar a salvar la vita dele persone.

18. Chi che pol darne la vera pace?

¹⁸ Ghemo de esser sicuri che anca quando infrontemo dificoltà podemo gaver pace. Quando semo drio tribolar, ghemo de ricordarse che la pace che ghemo de bisogno la ze quela che sol Geovà el pol darne, la pace de Dio. Alora, ghemo de fidarse in lu quando ghen’è una bruta malatia, una desgràssia, o la perseghission. Ne ocore anca restar insieme dei fradei, sempre obedir ale orientassion dela organisassion e seitar a pensar in tuto quel che Geovà el ne promete par el futuro. Se femo cossita, ‘el Dio de pace el sarà con noantri’. (Fil. 4:9) Nel pròssimo stùdio, ndaremo veder come giutar i fradei che i ze drio tribolar a gaver la pace de Dio.