1. Cossa che Gesù el ga dito a un dei bandidi prima de morir? (Luca 23:39-43)

 GESÙ l’era picà su nte un pal e due bandidi i era picadi su dela so banda. Lori i ga sofrio tanto vanti de morir. (Luc. 23:32, 33) Savemo che quei bandidi no i era dissìpoli de Gesù parché i ghe gavea ridesto drio. (Mat. 27:44; Mar. 15:32) Ma dopo, un de lori el ga dito: “Gesù, ricòrdate de mi quando te vè rento el to Regno.” Gesù el ghe ga rispondesto: “In verità mi te digo ancoi, te sarè con mi in Paradiso.” (Ledi Luca 23:39-43. b) La Bìblia no la dise se quel bandido el credea che ‘el Regno del cielo l’era darente’. (Mat. 4:17) E Gesù no’l ga mai dito che quel omo el ndaria rento questo Regno. Par quela, Gesù l’era drio parlar del paradiso che gavaremo qua nela Tera nel futuro. Parché che podemo dirlo?

2. Parché che noantri credemo che quel bandido l’era un giudeo?

² Noantri credemo che el bandido che el se ga ciamà gramo l’era un giudeo. Come cossita? Vedemo arquante robe che le ne giuta a capir questo. Prima, quel omo el ga dito a quelaltro bandido che l’era dela so banda: “Adesso che te ghè ricevesto el medèsimo castigo gheto mia gnancora rispeto par Dio?” (Luc. 23:40) Lu el ga parlà sol de un Dio  e nò de tanti dèi. Alora, pol esser che lu el fusse un giudeo parché i giudei i adorea sol un Dio. (Éso. 20:2, 3; 1 Cor. 8:5, 6) Se lori no i fusse giudei, fursi quel omo el gavaria domandà: “Gheto mia rispeto par i dèi?”. Seconda, Gesù no’l predichea a quei che no i fusse giudei, parché lu l’era stà mandà ale “piégore perse de Israel”, e nò ale persone dele nassion. (Mat. 15:24) Tersa, Geovà el gavea prometesto ai israeliti che el ndaria ressussitar i morti. Quel che el bandido el ga parlà mostra che lu el credea che Geovà el ndaria ressussitar Gesù par esser Rè del so Regno, e che fursi el podaria ressussitar anca lu.

3. Cossa che el bandido fursi l’era drio pensar quando Gesù el ga parlà del Paradiso? Spiega. (Génesi 2:15)

³ Se el bandido el fusse pròpio un giudeo, lu el savea che Geovà el gavea creà Adon e Eva par viver nte un paradiso qua nela Tera. Alora, quando el ga scoltà Gesù, fursi quel omo el ga pensà nte un bel paradiso qua nela Tera. — Ledi Génesi 2:15. c

4. Cossa che quel che Gesù el ga dito al bandido ne incoraia a far?

⁴ Quel che Gesù el ga dito al bandido ne incoraia a pensar come sarà viver in Paradiso. E podemo saver come la vita la sarà bela quando studiemo sora el regno de Salomon. In quela època, le persone le gavea tuto quel ghe ocorea e le vivea in pace. Ma, la Bìblia la dise che Gesù el sarà un Rè ancora meio che Salomon. Gesù e i 144 mila i farà che la Tera la devente un paradiso. (Mat. 12:42) E sicuro che le “altre piégore” le vol saver cossa le ga de far par viver par sempre in Paradiso. — Gioani 10:16.

5. Come che te pensi che sarà la vita in Paradiso?

⁵ Gheto belche pensà in come che sarà la vita in Paradiso? Pol esser che te vien in mente un posto tanto bel, compagno l’era el giardin del Èden. (Gén. 2:7-9) Fursi te te ricordi dela professia de Michea che dise che ‘cada un el se sentarà soto la so vigna e soto el so figher’. (Mic. 4:3, 4) Pol esser che te pensi anca in arquanti testi dela Bìblia che dise che ghen sarà tanto magnar par tuti. (Sal. 72:16; Isa. 65:21, 22) Alora, proa pensar che te sì nte un bel giardin, con una tola piena de magnar, e che te sì drio sentir el bon profumo dei fiori e dele piante. Insieme a ti, ghen’è la to fameia, amighi e fin arquanti ressussitadi. E seto cossa che l’è ancora pi bel? Questo l’è pròpio una  verità che ndarà suceder qua nela Tera! Fin el laoro che te gavarè de far in Paradiso el sarà bon.

6. Cossa che ndaremo far in Paradiso? (Vedi la ilustrassion.)

⁶ Geovà el ne ga fato par goderse col laoro. (Ecl. 2:24) Noantri gavaremo tanto de far nel Governo de Mila Ani de Cristo. Par esémpio, quei che i vegnarà fora dela granda tribolassion e i milioni che ndarà ressussitar i gavarà bisogno de robe de meter su, magnar e un posto de star. Compagno Adon e Eva, anca noantri gavaremo el laoro de far che la Tera la devente un paradiso. Pensa che bel che sarà insegnarghe ai ressussitadi che i savea poco gnente sora Geovà. Gavaremo anca de insegnarghe ai servi de Dio, che i ga vivesto vanti de Gesù, cossa che ga sucedesto dopo che i ze morti. Sicuro che restaremo tanto contenti de far tuti questi laori!

7. De cossa che podemo esser sicuri, e parché?

⁷ Podemo esser sicuri che, in Paradiso, tuto sarà fato dela meio maniera, ghen sarà tanta pace e tuto quel che ne ocore. Parché? Parché Geovà el ga doperà el regno de Salomon par mostrar come sarà la vita quando el so Fiol el governarà la Tera.

8. Come quel che dise Salmo 37:10, 11 e 29 ga sucedesto nel passà? (Vedi “Domande dei Letori” in questa revista.)

⁸ Noantri sempre doperemo el Salmo 37:11 nela predicassion par mostrar ale persone come sarà la vita in Paradiso. El rè Davi el ga scrito queste parole par parlar de un rè tanto bravo e fedele che el ndaria governar nel futuro. (Ledi Salmo 37:10, 11, d 29. e) Ma quel che lu el ga dito anca ga sucedesto nel regno de Salomon. Quando Salomon el ga governà Israel, i  servi de Dio i vivea in pace. Lori i gavea tuto quel che ghe ocorea parché i vivea nte una tera de ndove vegnea fora “late e miel”. Dio el gavea dito: “Se valtri seité a obedir ale me lege e ai me comandamenti, e a meterli in pràtica, mi vao far che ghen sìpia pace nela tera, e valtri ndaré butarve do e no gavaré paura de nissuni.” (Lev. 20:24; 26:3, 6) E l’è stà pròpio cossita che le persone le ga vivesto nel regno de Salomon. (1 Cró. 22:9; 29:26-28) Anca Gesù el ga doperà questo testo par parlar de come sarà la vita nel futuro. (Mat. 5:5) E Geovà el ga prometesto che quei che no i lo adora “no i ghen sarà pi”. (Sal. 37:10) Par quela, podemo dir che le parole de Salmo 37:10, 11 e 29 le ga sucedesto nel passà e le sucederà anca nel futuro.

9. Cossa che la regina de Sabà la ga dito sora el regno de Salomon?

⁹ El governo de Salomon l’era tanto bon che fin la regina de Sabà lo ga savesto. Par quela, ela la ga fato un grando viaio fin Gerusalen par veder se l’era vera quel che la gavea scoltà. (1 Rè 10:1) Dopo che la ga visto come l’era el regno de Salomon, ela la ga dito: ‘No i me ga contà gnanca la metà. Felici i ze i to òmini, e felici i ze i to servi che i ze sempre davanti de ti par scoltar la to sabedoria!’ (1 Rè 10:6-8) Alora, l’è sicuro che l’era tanto bel viver intanto che Salomon l’era rè. Ma, podemo esser sicuri che el governo de Gesù el sarà ancora meio.

10. Parché che Gesù l’è un rè meio che Salomon?

¹⁰ Varda parché el governo de Gesù el sarà tanto meio de quel de Salomon. El rè Salomon l’era imperfeto e el pòpolo el ga sofrio tanto par causa dei so sbali. Ma Gesù l’è un governante perfeto e no’l sbàlia mai. (Luc. 1:32; Ebr. 4:14, 15) Parché che podemo dir che Gesù no’l ndarà mai sbaliar o far qualcossa che ne fae tribolar? Parché Sàtana lo ga fato tribolar pròpio tanto, ma Gesù el ga seità a esser leal a Dio. Restemo pròpio contenti de saver che gavaremo el meio Rè che ghen’è.

11. Chi che ndarà giutar a Gesù?

¹¹ Gesù el gavarà el aiuto dei 144 mila par tender dele persone e par far quel che Geovà el vol qua nela Tera. (Apo. 14:1-3) I 144 mila i sarà boni de capir le persone che le viverà nela Tera, parché lori i ga belche infrontà tante dificoltà vanti de ndar al cielo. Ma, che laoro lori i gavarà de far?

12. Che laoro Geovà el ga dato ai 144 mila?

¹² El laoro che Gesù e i 144 mila i gavarà sarà tanto pi grando de quel de Salomon. El rè Salomon el gavea de tender de milioni de persone che le vivea in Israel. Ma, Gesù e i 144 mila i gavarà de tender de bilioni de persone che le viverà in tuta la Tera. Geovà el ghe ga dato ai 144 mila un laoro pròpio bel!

13. Che laoro importante i 144 mila i gavarà?

¹³ I 144 mila i sarà rè e sasserdoti compagno a Gesù. (Apo. 5:10) La Lege de Moisè la disea che i sasserdoti i gavea de giutar le persone a gaver una bona salute e una bela amicìssia con Geovà. Ma, la Lege la era sol un esémpio de quel che ndaria suceder pi avanti. (Ebr. 10:1) Alora, podemo creder che anca i 144 mila i giutarà le persone a gaver una bona salute e una forte amicìssia con Geovà. No savemo ancora come che i 144 mila i  ndarà parlar con noantri in Paradiso, ma podemo esser sicuri che savaremo cossa gavaremo de far. — Apo. 21:3, 4.

14. Che union ghen’è intrà quei che i ndarà viver nel cielo e quei che i ndarà viver nela Tera?

¹⁴ Gesù el ga dito che quei che i ndarà governar insieme a lu nel cielo i ze come un ‘pìcolo grupo de piégore’. (Luc. 12:32) Ma, Gesù anca el ga parlà sora le “altre piégore”, che i ze quei che i podarà viver par sempre qua nela Tera. Questi due grupi i laora insieme belche adesso e i seitarà a laorar insieme anca in Paradiso. (Gioani 10:16) Alora, cossa che quei che i vol viver par sempre nela Tera i ga de far adesso?

15. (a) Come che podemo giutar i fradei de Cristo? (b) Come che te pol far compagno al fradel che l’è ndato comprar rimedi? (Vedi el ritrato.)

¹⁵ Quel bandido che l’era picà su l’è morto vanti de mostrar che el ghe dea valor al sacrifìssio de Gesù. Magari, noantri podemo mostrar che ghe demo valor a quel che Gesù el ga fato par noantri. Par esémpio, ghemo de tratar i fradei untadi de Cristo dela maniera giusta. E ghemo de ricordarse che Gesù el ndarà giulgarne de acordo cola maniera che tratemo i so fradei. (Mat. 25:31-40) Mostremo che volemo giutar ai fradei de Cristo quando predichemo e insegnemo. (Mat. 28:18-20) Par quela, volemo doperar ben tute le publicassion che le ne giuta a capir la Bìblia, come el libro Te pol viver felice par sempre!. Se no te ghè gnancora un stùdio dela Bìblia, sfòrsate par convidar tute le persone che te pol par studiar la Bìblia.

16. Cossa che ghemo de far adesso par viver in Paradiso?

¹⁶ Ancora adesso podemo deventar le persone che Geovà el vol che viva in Paradiso. Par esémpio, ghemo de sforsarse par far le robe polito, parlar sol quel che l’è bon e viver de una maniera che ghe piase a Geovà. Anca ghemo de esser leai a Geovà, ai fradei e al nostro omo o la nostra dona. Se se sforsemo de contentar a Dio in questo mondo rugno, sarà pi fàcile  obedirlo in Paradiso. Noantri podemo anca sforsarse par gaver le abilità e le qualità che ne giutarà nel futuro. — Vedi el artìcolo “Sito parecià par viver par sempre nela Tera?” in questa revista.

17. Parché che no ghemo de sentirse in colpa par causa de un pecato che ghemo fato nel passà? Spiega.

¹⁷ Ma, metemo dir che te ghè fato un bruto sbàlio nel passà. Alora, no stà seitar a sentirte in colpa. Se te te ghè ciamà gramo, te ghè domandà aiuto a Geovà e ai ansiani e te ghè cambià, Geovà el te ga perdonà del tuto. (Isa. 55:7; Ati 3:19) Ricòrdate de quel che Gesù el ga dito: “Parché no son vegnesto par ciamar i giusti, ma par ciamar i pecadori.” (Mat. 9:13) L’è vera che el sacrifìssio de Gesù no’l ga mai de esser una scusa par noantri seitar a far quel che l’è sbalià. (Ebr. 10:26-31) Ma, par causa de questo sacrifìssio, podemo esser perdonadi de tuti i nostri pecati.

18. Cossa che te podarè domandar a quel bandido che l’è morto dela banda de Gesù?

¹⁸ Sito bon de imaginarte in Paradiso parlando con quel bandido che l’è morto dela banda de Gesù? Fursi te vè domandarghe cossa ga sucedesto nele ùltime ore de Gesù qua nela Tera, e come che el se ga sentio con quel che Gesù el ghe ga dito. Valtri anca podaré parlar come l’è stà bel e importante quel che Gesù el ga fato. E pol esser che lu el te domande come che l’è stà viver in questi ùltimi giorni. Sicuro che sarà tanto bel insegnarghe sora Geovà a persone come lu! — Efe. 4:22-24.

19. Parché che no ndaremo restar sgionfi de viver in Paradiso? (Vedi la ilustrassion nela prima pàgina.)

¹⁹ Noantri no restaremo mai sgionfi de viver in Paradiso. Ndaremo laorar tanto, cognosser tante persone e goderse con quel che Geovà el ga creà. Tuti giorni, ndaremo cognosser meio el nostro Pare e tuto quel che lu el ga fato. Par quela, ndaremo amarlo cada volta de pi. Sicuro che ghe demo tanto valor ala speransa che Geovà e Gesù i ne ga dato de viver par sempre in Paradiso!