RINGRASSIEMO tanto a Geovà par tuti i bei presenti che lu el ne dà, come la libertà de far le nostre dessision nela vita. La Bìblia la mostra che anca el vin l’è un presente de Dio. Eclesiasti 10:19 mostra che el pan e el vin i fà la nostra vita ancora meio. (Sal. 104:15) Ma arquante persone le ga belche bio problemi par causa dele bebide alcòliche, e nel mondo, le persone le pensa difarente una del’altra sora questo. Alora, come che un servo de Geovà el podaria far una bona dessision sora le bebide?

Quando un servo de Dio el va far le so dessision, lu el ga de fidarse in quel che Geovà el dise e nò in quel che le persone intorno le pensa. Cossita, lu el gavarà una vita ancora pi felice.

Fursi te ghè belche visto che tante persone nel mondo le ze sempre drio bever e far la ciuca. Arquanti i beve parché i pensa che el spìrito li fà restar pi calmi e altri parché i vol desmentegarse dei problemi. In arquanti posti, le persone le beve tanto parché le vol sprosiarse o mostrar ai altri che le ze siore.

Ma i servi de Dio i pol far bone dessision coi consili che lu el ghe dà. Nela Bìblia, Dio el mostra le brute robe che pol suceder a quei che i beve massa. a (Pro. 23:29-35) Un ansiano nela Europa de nome Daniel el ga dito che el bevea massa vanti de cognosser a Geovà. Lu el ga contà: “Mi go fato brute dessision e go sofrio tanto par causa dele bebide. Quando me ricordo de quela època, resto pròpio disgustà.”

Come che podemo far bone dessision sora le bebide e star distante dei problemi che quei che i fà la ciuca i ga? Ne ocore far dessision de acordo con quel che Dio el pensa.

Adesso, ndemo veder cossa che la Bìblia la dise sora bebide e parché che le persone le beve.

Nel testo de Eclesiasti 9:7, la Bìblia la dise che ghemo de magnar con alegria e bever vin contenti. Alora, la Bìblia la mostra che bever bebide de àlcol l’è una roba bona, nò sbaliada. Anca Gesù e altri servi fedeli de Geovà i bevea dele volte. — Mat. 26:27-29; Luc. 7:34; 1 Tim. 5:23.

L’è vera che la Bìblia no la dise che l’è sbalià bever un poco. Ma la mostra che l’è sbalià bever massa e far la ciuca. Efesi 5:18 dise: “No sté far la ciuca con vin.” E 1 Corinti 6:10 dise che “quei che i beve massa no i guadagnarà el Regno de Dio”. Geovà el dise che l’è un pecato bever massa e far la ciuca. Par quela, quando ndemo dessider cossa far, volemo contentar a Dio invesse de ndar drio le persone.

Arquanti i pensa che i pol bever tanto sensa restar ciuchi. Ma far cossita l’è un perìcolo, parché la Bìblia la dise che quei che i ze schiavi del vin i pol far brute dessision e rovinar la so amicìssia con Geovà. (Tito 2:3; Pro. 20:1) E Gesù el ga fin avisà che quei che i beve massa no i sarà mia nel Regno de Dio. (Luc. 21:34-36) Alora, cossa pol giutar un servo de Dio a mai bever massa?

Se femo le nostre dessision de acordo con quel che le persone intorno de noantri le pensa, gavaremo tanti problemi. Par quela, l’è sempre meio far quel che ghe piase a Geovà. La Bìblia la dise: “Se magné, se bevé o se fé qualche altra roba, gavé de far tute le robe par la glòria de Dio.” (1 Cor. 10:31) Ndemo veder arquanti prinsipi dela Bìblia che i ne giutarà a far una bona dessision.

Sarà che mi bevo sol par causa dei altri? Geovà el ga avisà i israeliti che lori no i gavea de ndarghe drio le persone che no lo servia. Lu el ga dito: “No sté ndarghe drio ala pi granda parte dele persone.” (Éso. 23:2) Questo consìlio l’è bon anca par noantri ancoi. Se noantri bevemo sol par far compagno ai altri, podaremo desobedir a Geovà e rovinar la nostra amicìssia con lu. — Rom. 12:2.

Sarà che mi bevo par mostrar ai altri che son una persona forte? In arquante culture, le persone le pensa che l’è bon seitar a bever e far la ciuca. (1 Pie. 4:3) Ma nel testo de 1 Corinti 16:13, la Bìblia la dise che ghemo de ‘star atenti, firmi nela fede, esser coraiosi e forti’. Quei che i beve massa no i ze mia boni de pensar polito gnanca de far bone dessision. Par quela, pitosto de restar pi forti, i resta pi fiachi. La Bìblia anca la dise che quei che no i ze mia boni de controlarse cola bebida, i seita a strabucarse e i ndarà sofrir tanto. (Isa. 28:7) Alora, quei che i fà la ciuca i mostra che i ze stùpidi.

L’è Geovà che el ne dà la forsa che ghemo de bisogno par far quel che l’è giusto. (Sal. 18:32) E quei che i vol gaver questa forsa i ga de star atenti e firmi nela fede. Cossa che questo vol dir? Vol dir che ghemo de star su cole récie e far dessision che no le ndarà rovinar la nostra amicìssia con Geovà. Come Gesù el gavea una forte amicìssia col so Pare, lu l’era coraioso e el volea far quel che l’era giusto. Par quela, le persone lo rispetea.

Sarà che me toca bever par desmentegarme dei problemi? Se te bevi par  dàrghene fora cole dificoltà, no te gavarè forsa par far quel che l’è giusto. (Ose. 4:11) Par quela, se te ghè pensieri, fìdate in Geovà e nò nele bebide. Fà compagno el salmista, che el ga dito: “Quando i me pensieri i ze stati massa rento de mi, ti te me ghè consolà e te me ghè cocolà.” (Sal. 94:19) Alora, prega de pi a Geovà e lu el te giutarà a restar pi calmo. Anca te pol ndar in serca del aiuto de un bravo fradel o sorela nela congregassion. El fradel Daniel, che ghemo parlà prima, el ga dito: “Mi bevea parché me sentia ansioso e in colpa. Ma i me problemi i restea cada volta pi grandi. Par quela, go perso amighi e me sentia sensa valor. Ma mi son nicorto che gavea de fidarme in Geovà. Quando go domandà el so aiuto, son stà bon de dàrghene fora coi me problemi.” Anca se te par che no ghen’è pi cossa far, va in serca del aiuto de Geovà e ricòrdate che lu l’è sempre pronto par giutarte. — Fil. 4:6, 7; 1 Pie. 5:7.

Se dele volte te bevi, proa domandarte: ‘Ghen’elo stà qualchedun dela me fameia o un amigo che el me ga dito che son drio bever massa?’ Fursi no te sì nicorto che te ghè problema cole bebide o che te sì belche invissià. ‘Sonti drio bever de pi che una volta?’ Pol esser che no te ghè gnancora el vìssio, ma se te seiti cossita, suito te lo gavarè. ‘Sarà che me manca le bebide de àlcol se stao un per de giorni sensa bever?’ Alora, fursi te sì belche invissià e saria bon che te ndessi in serca del aiuto dei dotori.

Come le bebide le pol far vegner fora tanti problemi, arquanti servi de Dio i ga dessidio no bever mia. E ghen’è altri che no i beve parché no ghe piase. Alora, se ghen’è un fradel o una sorela che ga dessidio far cossita, te ghè de tratarlo con bontà, rispetar quel che el ga dessidio e no parlarghe contra.

Fursi te ghè visto che saria bon dessider quanto che te ndarè bever. Anca te pol  dessider quante volte te ndarè bever, come una volta ala stimana o intanto che te magni. O pol esser che te vederè che l’è bon scòlier el tipo de bebida che te vè acetar. Arquanti fradei i ga dessidio bever un poco de vin o bira, ma nò altre bebide pi forte come caciassa o graspa. Dopo che te ghè scoliesto ben quanto che te ndarè bever, quando e che tipo de bebida, sarà pi fàcile far quel che te ghè dessidio. E no stà gaver paura de quel che i altri fradei i ndarà dir de ti.

Quando te vè far qualche dessision sora le bebide de àlcol, te ghè de pensar in come che i altri i ndarà sentirse. Romani 14:21 el dise: ‘L’è meio no magnar carne, gnanca bever vin gnanca far qualche altra roba che la pol far mal ala fede del to fradel.’ Come che te pol meter in pràtica questo testo? Se te vedi che te ndarè ofender a qualchedun, mostra amor e fà de manco bever. Cossita, te mostri che te ami, che te rispeti e che te te preocupi de pi coi fradei che con ti stesso. — 1 Cor. 10:24.

Vanti de bever qualcossa, i servi de Dio anca i ga de pensarghe sora le lege del governo. Par esémpio, arquante lege le dise che una persona sol la pol bever dopo de una età e che no la pol mia ciapar el auto o laorar con arquante màchine se la ga bevesto. — Rom. 13:1-5.

Geovà el ne ga dato tanti bei presenti. Un de questi l’è la libertà de scòlier quel che ndaremo magnar e quel che ndaremo bever. Sicuro che volemo che tute le nostre dessision le asse contento el nostro caro Pare.