1. Parché che Abraon el podea esser sicuro che el gavaria un fiol?

 GEOVÀ el ga prometesto a Abraon che tute le nassion le saria benedide par meso del so fiol. (Gén. 15:5; 22:18) Come Abraon el gavea una forte fede, lu el credea che questa promessa la ndaria pròpio suceder. Alora, anca se Abraon e Sara i gavesse quasi 100 ani e no i gavesse fioi, lori i seitea a gaver una forte speransa. (Gén. 21:1-7) La Bìblia la dise: “Par via dela speransa, Abraon el ga bio fede che el ndaria deventar pare de tante nassion, de acordo con quel che l’è stà dito.” (Rom. 4:18) Tuti noantri savemo che la promessa de Dio la ga pròpio sucedesto parché Abraon l’è deventà pare de Isache. Parché che Abraon el gavea una fede forte cossita?

2. Parché che Abraon l’era sicuro che Geovà el ndaria far quel che ghe gavea prometesto?

² Abraon gavea una forte amicìssia con Geovà e l’era sicuro che “Dio el saria bon de far tuto quel che el ghe gavea prometesto”. (Rom. 4:21) Par quela, Abraon el ga assà Geovà tanto contento e l’è deventà una persona giusta par lu. (Tia. 2:23) Romani 4:18 mostra che Abraon el gavea fede e speransa. Adesso, ndemo veder cossa che Paolo el ga dito sora la speransa in Romani 5.

3. Cossa che Paolo el ga parlà sora la speransa che la Bìblia la ne dà?

³ Paolo el ga spiegà parché ne ocore esser sicuri che la nostra speransa la ndarà pròpio realisarse e come che podemo farla ancora pi forte. (Rom. 5:5) Questo stùdio el ndarà  giutarne a capir ancora meio Romani 5:1-5. Fursi te vederè che te sì drio restar cada volta pi sicuro che Geovà el farà tuto quel che el ga prometesto. Questi versìcoli anca i ndarà giutarte a far questa speransa ancora pi forte. Ma prima, ndemo studiar sora la bela speransa che Paolo el ga parlà.

4. Cossa che Paolo el ga dito in Romani 5:1, 2?

⁴ I fradei e sorele in Roma i gavea imparà sora Geovà e Gesù, i gavea mostrà fede e i era deventadi dissìpoli. Par quela, Paolo el ga dito che ‘lori i era giusti par causa dela so fede’ e che Dio li gavea untadi col spìrito santo. (Ledi Romani 5:1, 2. b) Eco, lori i gavea una bela speransa par el futuro.

5. Che speransa i untadi i ga?

⁵ Varda altre robe che Paolo el ga parlà sora la speransa che i untadi i ga. Lu el ga dito ai fradei efesi che lori i gavea ricevesto ‘una eransa par i santi’. (Efe. 1:18) E lu anca el ga dito ai colossensi che quei che i gavesse questa speransa i viveria “nel cielo”. (Col. 1:4, 5) Cossita, capimo che la speransa che i untadi i ga la ze ressussitar par viver nel cielo e governar insieme a Gesù. — 1 Tes. 4:13-17; Apo. 20:6.

6. Cossa che un fradel untà el ga dito sora la so speransa?

⁶ I untadi i ghe dà tanto valor ala so speransa. El fradel Frederick Franz, che l’era un dei untadi, el ga dito: “Podemo esser sicuri che la nostra speransa la ndarà realisarse con tuti i 144 mila e de una maniera tanto bela.” In 1991, dopo de servir a Geovà par tanti ani, lu el ga dito: “Noantri ancora semo tanto contenti de gaver  questa speransa e ghe demo cada volta de pi valor. Noantri seitaremo a spetar, anca se ghe vol milioni de ani. Mi ghe dao valor ala me speransa adesso de pi che mai.”

7-8. Che speransa quasi tuti noantri ghemo? (Romani 8:20, 21)

⁷ Quasi tuti quei che i adora a Geovà ancoi i ga la medèsima speransa de Abraon, che l’è viver par sempre nela Tera e esser governadi par el Regno de Dio. (Ebr. 11:8-10, 13) Paolo el ga parlà anca sora questa speransa. (Ledi Romani 8:20, 21. c) Quando te eri drio imparar sora la speransa che la Bìblia la dà, cossa che te ga piasesto de pi de saver? Fursi te sì restà contento de imparar che te pol esser perfeto e viver sensa pecato. O pol esser che te sì restà maraveià de saver che i to cari che i ze morti i ndarà ressussitar par viver qua nte un paradiso. Te pol esser sicuro che tuto quel che Geovà el ga prometesto l’è tanto bel!

⁸ Alora, tuti quei che i ndarà viver nel cielo e nela Tera i pol restar tanto contenti cola speransa che i ga. E la nostra speransa la pol restar cada volta pi forte. Paolo el ga spiegà come che podemo esser ancora pi sicuri che quel che Dio el promete ndarà pròpio suceder. Alora, studiar sora quel che lu el ga dito ndarà giutarne a gaver una forte speransa.

9-10. De acordo con Romani 5:3, 4, cossa che tuti i dissìpoli de Gesù i ndarà infrontar? (Varda anca la ilustrassion.)

⁹ Tuti i dissìpoli de Gesù i sa che una ora o l’altra i ndarà tribolar. Come cossita? Varda el esémpio del apòstolo Paolo. Lu el ga dito ai tessalonissensi: “Quando che noantri èrino con valtri, ve ghemo dito che gavarìssino de sofrir tribolassion e, come che valtri savé, questo l’è quel che l’è drio suceder.” (1 Tes. 3:4) E lu el ga dito ai fradei  corinti: ‘Parché no volemo, fradei, che valtri resté sensa saver dela tribolassion che gavemo passà. Semo restadi tanto preocupadi fin cola nostra vita.’ (2 Cor. 1:8; 11:23-27) L’è vera che ndaremo tribolar, ma queste dificoltà le pol far la nostra speransa ancora pi forte. — Ledi Romani 5:3. d

¹⁰ Tuti noantri savemo che ndaremo tribolar. (2 Tim. 3:12) E ti, gheto belche infrontà dificoltà parché te servi a Geovà? Pol esser che i to amighi o quei dela to fameia i te ride drio o i te dise su. Fursi te sì drio infrontar dificoltà nel laoro parché te vol far tuto polito e mai ciavar i altri. (Ebr. 13:18) O pol esser che te sì drio infrontar perseghission del governo parché te fè el laoro de predicassion. Ma Paolo el ga dito che tuti noantri podemo esser felici, no vol mia dir le dificoltà. Parché?

11. Parché che ghemo de perseverar?

¹¹ Parché che podemo restar contenti se infrontemo dificoltà? Parché Romani 5:3 dise che el “sofrimento el ne fà gaver perseveransa”. Come tuti noantri ndaremo tribolar, ne ocore gaver perseveransa. Noantri ghemo de esser dessididi de perseverar, anca quando infrontemo brute dificoltà. Cossita, saremo boni de seitar leai a Geovà e vederemo quel che lu el promete suceder nel futuro. Noantri no volemo mia esser compagno quele semense che Gesù el ga dito che le ze cascade in meso i sassi. Le persone che le ze come queste semense le resta desanimade e le abandona a Geovà quando vien fora problemi. (Mat. 13:5, 6, 20, 21) L’è vera che nissuni ghe piase tribolar. Ma perseverar pol giutarne de diverse maniere. Come?

12. Come che la perseveransa la ne giuta?

¹² El dissìpolo Tiago el ga spiegà come che la perseveransa la pol giutarne. Lu el ga dito: “Ma, gavé de assar che la perseveransa la ve insegne del tuto. Cossita valtri saré completi, giusti in tute le robe e sensa sbàlio.” (Tia. 1:2-4) In questo testo, Tiago el ga dito che la perseveransa la ne insegnaria. Come cossita? Par causa dela perseveransa, imparemo a fidarse ancora de pi in Geovà e a gaver qualità come passiensa e fede. Ma ghen’è anca nantra roba che la perseveransa la ne giuta a gaver.

13-14. (a) De acordo con Romani 5:4, cossa che sucede quando perseveremo? (b) Parché che l’è bel saver che Geovà el resta tanto contento con quel che femo?

¹³ Ledi Romani 5:4. e Paolo el ga dito che quando perseveremo, ghemo una “condission aprovada”. Alora, quando seitemo a perseverar assemo Geovà contento. Ma ne ocore capir che Geovà no’l resta contento de vederne tribolar. Invesse, lu el resta contento de veder che noantri seitemo leai a lu. L’è tanto bel saver che Geovà el ghe dà valor ala nostra perseveransa! — Sal. 5:12.

¹⁴ Geovà el restea tanto contento de veder che Abraon el seitea a perseverar. Par quela, lu lo vedea come un amigo e un omo giusto. (Gén. 15:6; Rom. 4:13, 22) Geovà el pol veder anca noantri come so amighi e persone giuste. Lu el resta tanto contento quando el vede che semo drio perseverar con fede. Alora, no stà pensar che Geovà sol el restarà contento con ti se te fè tante robe o se te ghè laori importanti nela organisassion. No importa se semo  gióveni o veci, quel che ghemo nela vita o le nostre abilità, tuti noantri semo boni de perseverar. Sito drio perseverar par causa de qualche dificoltà? Alora, ricòrdate che Geovà l’è tanto contento con ti. Quando se ricordemo che Geovà el ghe dà tanto valor ala nostra perseveransa, la nostra speransa la resta pi forte.

15. (a) Cossa che Paolo el ga dito in Romani 5:4, 5? (b) Cossa che fursi se domandemo?

¹⁵ Alora, quel che Paolo el ga dito mostra che se semo leai anca cole dificoltà, assemo Geovà contento. Dopo, Paolo el ga dito: “La condission aprovada la ne fà gaver speransa. E la speransa no la ne assa disgustadi.” (Rom. 5:4, 5) Ma come cossita? In Romani 5:2, Paolo el ga dito che i fradei in Roma belche i gavea una speransa, che la era la speransa dela “glòria de Dio”. Alora, fursi se domandemo: ‘Se quei fradei belche i gavea la speransa de viver nel cielo, parché che Paolo el ga parlà nantra volta de una speransa?’

16. Come che la nostra speransa la ze restada pi forte? (Varda anca la ilustrassion.)

¹⁶ Noantri semo boni de capir quel che Paolo el ga dito quando se ricordemo che la nostra speransa la pol restar cada volta pi forte. Proa ricordarte de quando te ghè scoltà le promesse dela Bìblia par la prima volta nela vita. Pol esser che te ghè pensà che saria tanto bon viver par sempre in Paradiso, ma che mai ndaria suceder. Ma, dopo che te ghè cognossesto meio a Geovà e ala Bìblia, la to speransa la ga scominsià a restar cada volta pi forte, mia vera?

17. Parché che la to speransa la ze restada ancora pi forte dopo del batésimo?

¹⁷ La to speransa la ze restada pi forte anca dopo del batésimo parché te ghè seità a imparar sora Geovà e a amarlo cada volta de pi. (Ebr. 5:13–6:1) Fursi te ghè belche sentio quel che dise Romani 5:2-4. Come cossita? Ti te ghè seità a perseverar anca cole dificoltà e te ghè capio che  Geovà l’è tanto contento con ti. Par quela, la to speransa la ze pi forte che mai e te sì ancora pi sicuro che Geovà el ndarà far tuto quel che el ga prometesto. Cossita, la to speransa la ze importante par ti e la te giuta a esser una persona meio. Par esémpio, la te giuta a tratar ben la to fameia, a far bone dessision e a doperar ben el to tempo.

18. Come che Geovà el ne assa sicuri che el ndarà far quel che el ga prometesto?

¹⁸ Paolo el ga parlà anca nantra bela roba sora la nostra speransa. Lu el ga dito: “E la speransa no la ne assa disgustadi. Parché el amor de Dio l’è deventà ancora pi grando nel nostro cuor par meso del spìrito santo, che l’è stà dato a noantri.” (Rom. 5:5) Alora, Paolo el ne ga assà sicuri che Geovà el ndarà far tuto quel che el ga prometesto. Par quela, fìdate nela speransa che Geovà el te ga dato.

19. De cossa che podemo esser sicuri?

¹⁹ Sfòrsate de torte el tempo par studiar de pi sora la promessa che Geovà el ga fato a Abraon. Intanto che te la studi, proa pensar come che Abraon el ga assà Geovà contento e l’è deventà amigo suo. E ricòrdate che Abraon no’l ga mia spetà par gnente gnanca l’è restà disgustà. La Bìblia la dise: “Dopo che Abraon el ga dimostrà che el gavea passiensa, Dio el ghe ga fato questa promessa.” (Ebr. 6:15; 11:9, 18; Rom. 4:20-22) Se te seiti leal, anca ti te pol esser sicuro che te podarè veder la to speransa realisarse nel futuro. Alora, resta contento cola speransa che te ghè. (Rom. 12:12) Paolo el ga dito: “Che el Dio che el dà speransa el ve fae gaver tuta la alegria e la pace par via dela vostra confiansa in lu. Cossita, valtri podaré gaver tanta speransa gràssie al poder del spìrito santo.” — Rom. 15:13.