1. Cossa che fursi se domandemo quando pensemo sora la fede de Abraon?

 TANTI i ga belche sentio dir sora Abraon, ma pochi i cognosse la stòria dela so vita. Invesse noantri la cognossemo ben. Savemo che lu l’è stà ciamà de ‘pare de quei che i ga fede’. (Rom. 4:11) Alora, fursi te te domandi: ‘Sarà che mi posso gaver una fede forte cossita?’ Sicuro che si!

2. Parché che l’è importante imparar sora la vita de Abraon? (Tiago 2:22, 23)

² Par causa dela so fede e de quel che el ga fato, Abraon el ga contentà a Geovà e l’è deventà so amigo. (Ledi Tiago 2:22, 23. b) Alora, ti te pol gaver una forte fede cossita se te studi sora la vita de Abraon. Par esémpio, Dio el ghe ga dito de ndar de star nte un posto tanto distante par viver in tende, e Abraon lo ga obedio. Lu anca el ga mostrà che el gavea una forte fede in Geovà quando el ga acetà dar so fiol come sacrifìssio. Geovà el vol che anca ti te sìpia so amigo. Par quela, el ga volesto che Paolo e Tiago i metesse par scrito nela Bìblia el esémpio de Abraon. In questo stùdio, ndaremo veder Romani 4 e Tiago 2 par imparar bele robe sora Abraon.

3. Sora che testo dela Bìblia Paolo e Tiago i ga parlà?

 ³ Paolo e Tiago i ga parlà sora quel che l’è scrito in Génesi 15:6: “Abron el ga bio fede in Geovà e l’è stà considerà giusto.” Quando la Bìblia la parla che una persona la ze giusta, la vol dir che Geovà la vede come una persona sensa difeto. Sicuro che restemo maraveiadi de saver che podemo esser giusti, ancora che sbaliemo. Adesso, ndemo veder parché Geovà el ga dito che Abraon l’era giusto e cossa ghemo de far par ndar drio el so esémpio.

4. Parché che mai podarìssino esser giusti?

⁴ Nela so carta ai romani, Paolo el ga dito che tuti noantri sbaliemo. (Rom. 3:23) Alora, par giutarne a capir come che podemo esser giusti ndemo veder quel che Paolo el ga parlà sora Abraon.

5. De acordo con Romani 4:2, 4, parché che Geovà el ga dito che Abraon l’era giusto?

⁵ Quando Abraon l’era de star nela tera de Canaan, Geovà el ga dito che lu l’era un omo giusto. Ma sarà che Geovà el ga dito cossita parché Abraon el obedia ala Lege de Moisè de maniera perfeta? Nò. (Rom. 4:13) Questa lege sol la ze stata data ai israeliti de pi de 400 ani dopo che Geovà el gavea dito che Abraon l’era giusto. Invesse, Geovà el mostrà bontà a Abraon e el ga dito che lu l’era giusto par causa dela fede che el gavea. — Ledi Romani 4:2-4. c

6. Parché che Geovà el pol dir che una persona la ze giusta?

⁶ Paolo el ga dito che un omo el pol esser giusto par via dela so fede in Dio. (Rom. 4:5) Lu anca el ga dito: “Cossita anca Davi el parla dela felicità del omo che Dio el considera giusto, no importa quale che sìpia le so òpere: ‘Felici i ze quei che i ze stati perdonadi dele so òpere rugne e che i ghe ga perdonà i so pecati; Felice l’è el omo che Geovà no’l ghe bada i so pecati.’” (Rom. 4:6-8; Sal. 32:1, 2) Geovà el perdona e no’l pensa pi nei pecati de quei che i ga fede in lu. Cossita, lu li vede come giusti e sensa colpa.

7. Parché che podemo dir che quei che i adorea a Geovà nel passà i era giusti?

⁷ Ancora che Geovà el vedesse Abraon, Davi e altri servi come persone giuste, lori i era imperfeti e i sbaliea. Ma, par causa dela so fede, Geovà li vedea de una maniera difarente de quei che no i lo adorea. Par Geovà, l’era come se lori no i gavesse fato gnanca un sbàlio. (Efe. 2:12) Paolo el ga dito che ne ocore gaver fede se volemo esser amighi de Dio. Alora, compagno a Davi e a Abraon, anca noantri podemo esser amighi de Dio par via dela nostra fede.

8-9. (a) Cossa che arquanti religiosi i dise sora quel che Paolo e Tiago i ga scrito? (b) Cossa che questi religiosi i pensa?

⁸ Fà ani che i lìderi religiosi i parla robe difarente un del altro sora la fede e se l’è importante far quel che l’è giusto. Par esémpio, arquanti i dise che, par esser salvi, ne basta sol creder in Gesù Cristo. Fursi te ghè belche sentio dir: “Credi in Gesù e sìpia salvo!” Questi lìderi fin i dopera quel che Paolo el ga scrito: ‘Dio el  considera giusto el omo, no importa quale che le sìpia le so òpere.’ (Rom. 4:6) Magari, ghen’è de quei che i dise che, par esser salvi, ne toca far robe bone e ndar visitar posti che la ciesa la dise che i ze santi. Pol esser che lori i dopera quel che Tiago el ga scrito in Tiago 2:24: “Una persona la ze giusta par via dele so òpere e nò par via sol dela so fede.”

⁹ Par quela, questi religiosi i pensa che Paolo e Tiago no i era mia intesi sora quel che una persona la ga de far par contentar a Dio. Arquanti i dise che Paolo el credea che ne basta sol gaver fede par contentar a Geovà, intanto che Tiago el pensea che ne ocore far arquante robe. Un studioso el ga dito che ‘Tiago no’l capia parché che Paolo el ga scrito che ne ocore sol fede par contentar a Dio e che lu no l’era mia de acordo con quel che Paolo gavea scrito’. Magari, Paolo e Tiago i ga scrito quel che Geovà el volea. (2 Tim. 3:16) Alora, par capir del bon quel che lori i volea dir, ghemo de studiar quel che lori i ga scrito prima.

10. Parché che Paolo el ga dito che una persona no la ghe ocore mia obedir ala Lege par esser giusta? (Romani 3:21, 28) (Varda anca la ilustrassion.)

¹⁰ In Romani 3 e 4, Paolo el ga dito che una persona no la ghe ocore ‘far quel che la Lege la dise’ par esser giusta. Parché? Paolo l’era drio parlar sora la Lege de Moisè. (Ledi Romani 3:21, d 28. e) In quela època, arquanti dissìpoli de Gesù che i era giudei i pensea che ancora ghe ocorea  obedir ala Lege de Moisè. Par quela, Paolo el ga doperà el esémpio de Abraon par spiegarghe che una persona la pol esser giusta par via dela so fede e nò parché la obedisse ala Lege de Moisè. L’è pròpio bel capir ben quel che Paolo el ga dito parché podemo esser giusti anca noantri se ghemo fede!

11. Sora cossa che Tiago l’era drio parlar?

¹¹ Ma, quando Tiago l’era drio scriver la so carta, lu no l’era drio parlar sora obedir ala Lege de Moisè. Invesse, Tiago el ga spiegà sora quel che i dissìpoli de Gesù i ga de far par mostrar se i ga fede in Geovà o nò. Varda due esempi de quel che Tiago el ga dito.

12. Come che Tiago el ga spiegà che ghemo de mostrar fede par meso de quel che femo? (Varda anca la ilustrassion.)

¹² El primo esémpio el mostra che ghemo de tratar a tuti dela medèsima maniera. Tiago el ga parlà de un omo che el mostra bontà a qualchedun che l’è sior, ma no’l ghe bada mia un poareto. Cossita, lu l’era drio spiegar che questo omo el disea che el gavea fede, ma no la mostrea mia. (Tia. 2:1-5, 9) Nel secondo esémpio, Tiago el ga parlà de una persona che la vede che ghe manca robe de vestir e de magnar a so fradel, ma no la fà gnente par giutarlo. Alora, anca se questa persona la dise che la ga fede, quel che la fà mostra che no la ga. Par quela che Tiago el ga dito che ‘se no mostremo fede par meso de quel che femo, la ze morta’. — Tia. 2:14-17.

13. De acordo con Tiago 2:25, 26, che esémpio mostra che femo quel che l’è giusto se ghemo fede?

¹³ Tiago anca el ga parlà sora Raabe. Par meso de quel che la ga fato, ela la ga  mostrà che la gavea fede. (Ledi Tiago 2:25, 26. f) Raabe la gavea sentio dir sora Geovà e la savea che lu l’era drio tender dei israeliti. (Gios. 2:9-11) Alora, ela la ga fato quel che l’era giusto quando la ga sconto due spioni israeliti che i podaria esser copadi. Cossita, anca se quela dona no la fusse israelita e la fesse robe sbaliade, ela la ze stata giusta par Geovà compagno a Abraon. El esémpio de Raabe el ne mostra che, se ghemo fede, femo quel che l’è giusto.

14. Parché che quel che Paolo e Tiago i ga scrito l’è difarente?

¹⁴ Cossita, vedemo che Paolo e Tiago i ga scrito robe difarente un del altro parché i era drio parlar de robe difarente. Paolo el ga scrito ai dissìpoli de Gesù che no ghe bastea sol obedir ala Lege de Moisè par esser giusti. E Tiago el ga spiegà che se ghemo fede, ndaremo far robe bone ai altri.

15. Cossa che podemo far par mostrar la nostra fede? (Varda anca la ilustrassion.)

¹⁵ Alora, sarà che ne ocore far tuto quel che Abraon el ga fato par esser giusti par Geovà? Nò. Ma ghen’è tante robe che podemo far par mostrar la nostra fede. Par esémpio, tratar con bontà quei che i vien ala nostra congregassion, giutar i nostri fradei quando i ga de bisogno e tender dela nostra fameia. Cossita, ndaremo contentar a Geovà e lu el ndarà benedirne. (Rom. 15:7; 1 Tim. 5:4, 8; 1 Gio. 3:18) Noantri anca podemo mostrar la nostra  fede quando se sforsemo de ndar predicar e parlar cole persone. (1 Tim. 4:16) Par meso de quel che femo, podemo mostrar che ghemo fede nele promesse de Geovà e che savemo che quel che lu el fà l’è sempre el meio par noantri. Cossita, podemo esser sicuri che saremo amighi de Geovà e persone giuste par lu.

16. Come che la speransa la ga fato pi forte la fede de Abraon?

¹⁶ Nel capìtolo 4 de Romani, anca imparemo che l’è tanto importante gaver speransa. Geovà el gavea prometesto a Abraon che el ndaria benedir tante nassion par via de lu. Alora, proa pensa come Abraon l’è restà contento! (Gén. 12:3; 15:5; 17:4; Rom. 4:17) Ma, dopo un tempo, Abraon deromai l’era un vècio de 100 ani e so dona Sara la gavea 90 ani, e lori gnancora i gavea un fiol. Arquanti fursi i ga pensà che lori mai i gavaria un fiol. Ma Abraon el se ga fidà in Geovà. La Bìblia la dise che, par via dela speransa, “Abraon el ga bio fede che el ndaria deventar pare de tante nassion”. (Rom. 4:18, 19) E l’è stà pròpio questo che ga sucedesto quando Abraon l’è deventà pare de Isache. — Rom. 4:20-22.

17. Come che savemo che podemo esser giusti?

¹⁷ Come ghemo visto, podemo contentar a Geovà e esser giusti compagno a Abraon. Paolo el ga dito che Dio el vedea Abraon come giusto e che anca noantri podemo esser giusti se ghemo fede in Quel che el ga ressussità Gesù. (Rom. 4:23, 24) Compagno a Abraon, ne ocore gaver fede, far quel che l’è giusto e gaver speransa. Paolo el ga parlà de pi sora la speransa nel capìtolo 5 de Romani. Nel pròssimo stùdio, ndaremo imparar de pi sora la bela speransa che ghemo.