1-2. Cossa che i genitori i ga de far quando i fioi i ghe fà domande sora Geovà o sora la Bìblia?

 TANTE persone le dise che slevar un fiol no l’è mia fàcile. Semo sicuri che se te sì pare o mare, te sì drio sforsarte tanto par giutar el to fiol a gaver una forte fede. E te lodemo tanto par tuto quel che te sì drio far! (Deu. 6:6, 7) Ma pol esser che una ora o nantra, el to fiol el gavarà dubi sora quel che credemo e sora quel che la Bìblia la dise che l’è giusto o sbalià.

² Pol esser che quando el to fiol el te fà domande, suito te pensi che lu no’l ga pi fede in Geovà e nela Bìblia. Ma te ocore capir che el to fiol el ga de farse queste domande par gaver una forte fede. (1 Cor. 13:11) Alora, no stà mia restar preocupà. Invesse, dopera queste domande par giutarlo a imparar a pensarghe sora e a far pi forte la so fede in Geovà e nela Bìblia.

3. Cossa che ndaremo veder in questo stùdio?

³ In questo stùdio, vederemo come che te pol (1) giutar el to fiol a gaver una forte fede in Geovà e nela Bìblia, (2) giutar el to fiol a capir parché che l’è bon obedir a quel che Geovà el dise, e (3) giutar el to fiol a spiegarghe ai altri quel che el crede. Noantri anca ndaremo veder parché che l’è bon che el to fiol el te fae domande e cossa che te pol far insieme de lu par esser bon de discorer sora Geovà e sora la Bìblia.

GIUTA EL TO FIOL A FAR PI FORTE LA SO FEDE IN GEOVÀ E NELA BÌBLIA

4. Cossa che fursi el to fiol el scomìnsia a domandarse, e parché?

⁴ Pol esser che el to fiol el scomìnsia a domandarse: ‘Come che posso esser sicuro che ghen’è pròpio un Dio? Sarà che posso  pròpio creder in quel che la Bìblia la dise?’ Parché? Parché nissun l’è nassesto con fede in Geovà, e el to fiol no’l ga mia fede sol parché ti te la ghè. La Bìblia la dise che noantri ghemo de imparar a pensarghe sora e a esser sicuri de tuto quel che credemo. (Rom. 12:1; 1 Tes. 5:21) Alora, come che te pol giutar el to fiol a far pi forte la so fede in Geovà e nela Bìblia?

5. Come che i genitori i pol giutar i so fioi a far pi forte la so fede nela Bìblia? (Romani 12:2)

⁵ Incoraia el to fiol a ndar in serca dele prove che quel che la Bìblia la dise l’è vero. (Ledi Romani 12:2. a) Quando el to fiol el se fà domande, insegnaghe come catar le risposte nele nostre publicassion. Lu el pol doperar el Índice das Publicações da Torre de Vigia e el Guia de Pesquisa para Testemunhas de Jeová. Lu el pol ndar in “A Bíblia” e “Inspirada por Deus”. Lì el catarà arquante dele prove che la Bìblia la ze la “Parola de Dio” e nò sol un bel libro che òmini i ga scrito. (1 Tes. 2:13) Par esémpio, una dele robe che el to fiol el pol peschisar ze sora la cità de Nìnive, nela Assìria. Nel passà, arquanti studiosi i disea che no ghen’è mai stà una cità de nome Nìnive e che la Bìblia la era sbaliada. Ma intorno del ano 1850, arquanti studiosi i ga catà robe pròpio antighe nel posto ndove l’era la cità de Nìnive. Cossita i ga capio che la Bìblia la era giusta. (Sof. 2:13-15) Se el to fiol el cata fora La Sentinela de novembre de 2021, el artìcolo “Seto questo?”, lu el ndarà veder come che arquante professie le se ga realisà quando Nìnive la ze stata destruta. Alora, incoraia el to fiol a veder quel che le nostre publicassion le dise e anca quel che ghen’è in arquanti libri che se pol fidarse. Cossita, el to fiol el sarà ancora pi sicuro che quel che la Bìblia la dise l’è vero.

6. Come che te pol giutar el to fiol a pensarghe sora? Parla de un esémpio. (Varda anca el ritrato.)

⁶ Insegna al to fiol a pensarghe sora. Sfòrsate de far bele ciàcole col to fiol sora la Bìblia o sora la so fede in Geovà. Par esémpio, valtri podé ndar nte un museo, nte un giardin o nte un Betel dele Testimònie de Geovà. Te pol cognosser un museo par vìdeo o par meso de ritrati, e giutar el to fiol a veder come quel che ga sucedesto nel passà, o arquante robe antighe, prova che quel che la Bìblia la dise l’è vero. Par esémpio, te pol parlarghe sora la Pedra Moabita, che l’è un toco de sasso che el ga de pi de 3 mila ani. In questo sasso ghen’è el nome de Dio. La Pedra Moabita la ze nte un museo nela Fransa e anca ghen’è una còpia nela esposission “A Bíblia e o nome de Deus” che ghen’è nela sede mondial dele Testimònie de Geovà in  Warwick, Nova York. In questo sasso anca l’è scrito che el rè de Moabe, de nome Mesa, l’è ndato contra Israel, compagno la Bìblia la dise. (2 Rè 3:4, 5) Se el to fiol el vede le prove che mostra che quel che la Bìblia la dise l’è giusto, lu el gavarà una fede ancora pi forte. — Varda anca 2 Cróniche 9:6.

7-8. (a) Cossa che podemo imparar dele bele robe che Geovà el ga creà? Parla de un esémpio. (Varda anca la ilustrassion.) (b) Che domande pol giutar el to fiol a far pi forte la so fede che Geovà l’è el Creador de tute le robe?

⁷ Incoraia el to fiol a pensarghe sora quel che ghen’è nela naturesa. Quando sì drio caminar nte un bel posto o nte un giardin, giuta el to fiol a star atento ale robe nela naturesa che le ga la medèsima forma. Parché? Lu el ndarà capir che ghe ocorea qualchedun pròpio bravo e con tanta sabedoria par crear tute le robe che ghen’è. Par esémpio, arquante robe nela naturesa le ga la forma de un spiral, e tanti sientisti i ga belche studià questi spirai. El sientista de nome Nicola Fameli el ga spiegà che nela naturesa ghen’è tante de queste spirai pròpio compagne. Par esémpio, in portoghese questa forma de spiral la ga nome sequência de Fibonacci, e podemo catarla in tante robe nela creassion, come in arquante galàssie, nei scios, nele foie dele piante e fiori. b

⁸ Pol esser che nela scola, el to fiol el ndarà imparar anca altre forme che ghen’è nela naturesa. Par esémpio, quasi tute le piante le ga la medèsima forma. Le ga un tronco che el se spartisse in rami pi grossi e dopo in rami pi fini. Questa forma la ga nome “fractal”. To fiol el pol domandarse: ‘Chi che ga creà queste bele robe?’ Domande come questa podarà giutarlo a gaver una forte fede in Geovà, che l’è el Creador de tute le robe. (Ebr. 3:4) Te pol anca domandarghe: ‘Se Dio el ga creà tute le robe, sarà che no’l sa mia dirne come che podemo esser felici?’ Dopo te pol mostrarghe che i bei consili che Dio el ne dà par esser felici i ze nela Bìblia.

GIUTA EL TO FIOL A CAPIR CHE OBEDIR ALE LEGE DE GEOVÀ L’È SEMPRE LA MEIO ROBA DE FAR

9. Cossa che te ghè de capir se to fiol no l’è mia sicuro che obedir a quel che Geovà el dise l’è la meio roba de far?

⁹ Pol esser che el to fiol no l’è mia ben sicuro che obedir a quel che Geovà el dise l’è la meio roba de far. Alora, se el to fiol el ga questi dubi, te ghè de capir se lu no l’è de acordo con quel che la Bìblia la dise, o sol no l’è bon de spiegar quel che el crede. Alora, te pol doperar el libro Te pol viver felice par sempre! par giutarlo a capir parché obedir a Geovà l’è tanto bon. c

10. Come che te pol giutar el to fiol a darghe valor ala so amicìssia con Geovà?

 ¹⁰ Giuta el to fiol a darghe valor ala so amicìssia con Geovà. Intanto che valtri studié el libro Te pol viver felice par sempre!, dopera le domande e le ilustrassion del libro par capir quel che el to fiol el pensa. (Pro. 20:5) Par esémpio, la lession 8 la dise che Geovà l’è un bon amigo che el ne dà bei consili e che el ne protege. Dopo de leder el testo de 1 Gioani 5:3 che ghen’è nela lession, te pol domandarghe: ‘Se Geovà l’è un amigo bon cossita, cossa che ghemo de pensar sora le robe che el ne domanda de far?’ L’è vera che ne par una domanda pròpio sémplisse, ma la ndarà giutar el to fiol a veder che quel che Geovà el ne domanda de far mostra che el ne ama. — Isa. 48:17, 18.

11. Cossa che te pol far par giutar el to fiol a darghe valor ai prinsipi dela Bìblia? (Proverbi 2:10, 11)

¹¹ Discori col to fiol sora parché che l’è bon obedir a quel che la Bìblia la dise. Quando valtri sì drio leder la Bìblia o el testo del giorno, parlé come che i prinsipi dela Bìblia i ga belche giutà la vostra fameia. Par esémpio, te pol giutar el to fiol a capir parché che l’è bon esser bravi laoradori e parlar sempre la verità. (Ebr. 13:18) Te pol anca mostrarghe come che meter in pràtica quel che la Bìblia la dise ne giuta a gaver una salute meio e a esser felici. (Pro. 14:29, 30) Se el to fiol el vede come che l’è bon meter in pràtica i prinsipi dela Bìblia, anca lu el volarà meterli in pràtica nela so vita. — Ledi Proverbi 2:10, 11. d

12. Come che Steve e la so dona i giuta el so fiol a capir parché che l’è bon obedir ai prinsipi dela Bìblia?

¹² Adesso vedemo el esémpio de un fradel dela Fransa de nome Steve e dela so dona. Par giutar el so fiol Etan a capir che Geovà el ne dà le so lege parché el ne ama, lori i ghe domanda: ‘Parché che Geovà el ne domanda de meter in pràtica questo consìlio? Come che questo mostra che el ne ama? Cossa che sucede se no ghe obedimo?’ Cossita, Etan l’è restà ancora pi sicuro che quel che Geovà el ne domanda de far l’è la meio roba. Steve anca el ga dito: “Noantri volemo giutar Etan a capir che la sabedoria dela Bìblia la ze tanto pi granda dela sabedoria dei òmini.”

13. Come che i genitori i pol giutar el so fiol a meter in pràtica i prinsipi dela Bìblia? Parla de un esémpio.

¹³ Giuta el to fiol a meter in pràtica i prinsipi dela Bìblia. Par esémpio, te pol giutar el to fiol a pensarghe sora i prinsipi dela Bìblia quando i maestri nela scola i ghe domanda de leder un libro. Pol esser che quel libro el parla de persone che le fà robe sbaliade, come imoralità sessual o violensa. E pol esser che el libro el sìpia scrito de una maniera che ghe par bon far quele robe. Alora, te pol domandarghe a to fiol come che Geovà el se sente quando el vede che le persone le fà robe sbaliade cossita. (Pro. 22:24, 25; 1 Cor. 15:33; Fil. 4:8) Cossita, lu el ndarà veder parché che l’è bon obedir a Geovà. E se un maestro o un colega el ghe domanda quel che el pensa sora el libro, lu el sarà parecià par spiegarghe quel che lu el crede.

INSEGNA AL TO FIOL A SPIEGAR AI ALTRI QUEL CHE EL CREDE

14. Cossa che fursi i gióveni i ga paura de spiegar ai altri, e parché?

¹⁴ Dele volte, i gióveni i ga paura de spiegar ai altri quel che i crede. Fursi lori i ga paura de dir ai altri che no i crede mia nela teoria dela evolussion, parché tanti maestri i insegna che questo ga pròpio sucedesto. Alora, se te sì pare o mare, come che te pol giutar el to fiol a esser sicuro che quel che lu el crede l’è la verità?

15. Cossa che pol giutar el to fiol a esser ancora pi sicuro de quel che el crede?

¹⁵ Giuta el to fiol a esser ancora pi sicuro de  quel che el crede. El to fiol no ghe ocore mia gaver vergogna de creder che Dio el ga creà tute le robe. (2 Tim. 1:8) Parché che nò? Fin tanti studiosi i crede che qualchedun con tanta sabedoria ga creà tute le robe bele che ghen’è e che no le ze mia vegneste fora del gnente. Par quela che lori no i crede mia nela teoria dela evolussion che la ze insegnada in tante scole. Nantra roba che pol giutar el to fiol la ze saver quel che ga giutà altri fradei e sorele a creder in questa verità. e

16. Come che i genitori i pol giutar el so fiol a spiegarghe ai altri che Dio el ga creà tute le robe? (1 Piero 3:15) (Varda anca el ritrato.)

¹⁶ Insegna el to fiol a spiegar ai altri che lu el crede in Dio. (Ledi 1 Piero 3:15. f) Te pol doperar i artìcoli che ghen’è nel jw.org che i parla sora la evolussion e la creassion. Dopo, giuta el to fiol a scòlier quel che lu el ndarà doperar par spiegar ai altri che una persona la ga creà tute le robe. Te ghè de giutarlo a capir che no ghe ocore mia barufar coi so coleghi. Invesse, giuta el to fiol a ricordarse che el pol doperar domande e robe sémplisse de capir par spiegar ai altri quel che el crede. Par esémpio, metemo dir che un colega dela scola el ghe dise: “Mi sol credo in quel che mi vedo, e mi no go mai visto a Dio.” Alora, lu el pol risponderghe: “Proa imaginar che te cati una bela casa intanto che te sì drio caminar in meso el mato nte un posto pròpio distante de tute le cità. Sarà che te ndarissi pensar che questa casa la se ga fato su ela sola, o che qualchedun la ga fato su? Noantri podemo dir che questa casa la ze come la tera, le bèstie e tute le robe che ghen’è. Alora, podemo esser sicuri che qualchedun el ga creà tute queste robe.”

17. Come che i genitori i pol giutar el so fiol a parlar dela Bìblia ai altri? Parla de un esémpio.

¹⁷ Incoraia el to fiol a parlar sora la Bìblia sempre che el pol. (Rom. 10:10) Noantri podemo dir che parlar sora la Bìblia ai altri l’è compagno imparar a sonar una mùsica. Pol esser che de scomìnsio, la persona sol la ze bona de sonar una mùsica pi fàcile. Ma col tempo, se la seita a sonar, ela la sarà bona de sonar anca altre mùsiche. La medèsima roba la sucede quando el to fiol el scomìnsia a parlar dela Bìblia ai altri. Par esémpio, par scominsiar a far  questo, lu el pol domandar a un colega dela scola: “Seto che dele volte i studiosi fà màchine o altre robe che le ze compagne a qualcossa che ghen’è nela naturesa? Speta che te fao veder un vìdeo.” Dopo, el to fiol el pol mostrarghe un dei vìdei dela session Qualchedun lo ga fato? e dirghe: “Se le persone le loda un studioso che el ga fato una roba compagna a nantra che el ga visto nela naturesa, no gavarìssino anca de lodar quel che el ga creà la naturesa?” Cossita, pol esser che questo colega dela scola el volarà imparar de pi sora Geovà.

SEITA A GIUTAR TO FIOL A FAR PI FORTE LA SO FEDE

18. Come che i genitori i pol giutar i so fioi a seitar a far pi forte la so fede in Geovà?

¹⁸ Noantri vivemo nte un mondo che poche persone le ga fede in Geovà. (2 Pie. 3:3) Alora, se te sì pare o mare, dopera el to stùdio dela Bìblia col to fiol par incoraiarlo a imparar de pi sora quel che ndarà far pi forte el so rispeto par la Bìblia e par le lege de Geovà. Parla col to fiol sora quel che Geovà el ga creà par giutarlo a far pi forte la so fede e par giutarlo a imparar a pensarghe sora. Giutalo anca a capir sora le professie che le se ga belche realisà. E no stà desmentegarte de pregar a Geovà, che la ze una roba tanto importante de far. Te pol domandarghe che Geovà el giute el to fiol e anca pregar insieme de lu. Cossita, te pol esser sicuro che Geovà el ndarà benedir el to sforso de giutar el to fiol a gaver una forte fede. — 2 Cró. 15:7.