1. Qual che l’era el magnar pi importante par le persone nel passà? Spiega.

 NELA ÈPOCA che la Bìblia la ze stata scrita, el pan l’era el magnar pi importante par le persone. (Gén. 14:18; Luc. 4:4) Par quela che tante volte la Bìblia la dopera la parola “pan” par parlar del magnar. (Mat. 6:11) Gesù el ga doperà el pan par far due miràcoli. (Mat. 16:9, 10) Ndemo studiar de pi sora un de questi miràcoli che catemo in Gioani 6 e veder arquante robe che podemo imparar.

2. Cossa ga sucedesto quando Gesù e i so apòstoli i se ga fermà par riposar?

² Dopo de far un viaio par predicar, i apòstoli de Gesù i era pròpio strachi. Alora, lori i ga dessidio ndar fin un posto pi tranquilo par riposar un pochetin. Gesù l’è ndato insieme de lori fin quel’altra banda del Mar dela Galilea, darente de Betsaida. (Mar. 6:7, 30-32; Luc. 9:10) Ma le persone le gavea savesto che Gesù l’era là e suito le ze ndate catarlo. Alora, cossa Gesù el ga fato? Lu el se ga tolto tempo par insegnarghe sora el Regno de Dio e par curar arquante. Ma l’era drio vegner note, e i apòstoli i era preocupadi con quel che le persone le ndaria magnar. Anca se qualche persone le gavesse portà insieme qualcossa, quasi tute le gavaria de ndar in serca de magnar. (Mat. 14:15; Gio. 6:4, 5) Adesso, ndemo veder cossa che Gesù el ga fato.

EL MIRÀCOLO DEL PAN

3. Cossa che Gesù el ga dito che i so apòstoli i gavea de far? (Varda anca la ilustrassion.)

³ Gesù el ga dito ai so apòstoli: ‘No ghe toca mia ndar via. Invesse, deghe qualcossa de magnar.’ (Mat. 14:16) Ma proa pensar. Ghen’era intorno de sinque mila òmini e fursi altre diese mila done e tosatei. (Mat. 14:21) Alora, Andrè el ga dito: ‘Ghen’è un tosatel qua che el ga sinque pan de sevada e due pìcoli pessi. Ma l’è massa poco par tuta questa gente.’ (Gio. 6:9) Le persone in quela època le magnea tanto el pan de sevada, e  pol esser che quei pìcoli pessi i era de quei che i metea secar col sal nel sol. Alora, sarà che quel pan e quei pessi ghe bastea par dar de magnar a tuta quela gente?

4. Cossa che imparemo de Gioani 6:11-13? (Varda anca la ilustrassion.)

⁴ Gesù el volea mostrar bontà a tute quele persone. Alora, lu el ga domandà che tuti i se sentesse par tera in grupi. (Mar. 6:39, 40; ledi Gioani 6:11-13. a) Dopo lu el ga ringrassià so Pare par el pan e quei pessi. Cossita, lu el ga mostrà che el ghe dea tanto valor a quel che el gavea e che el savea che l’è Geovà che el ne dà tuto quel che ne ocore. El esémpio de Gesù el ne insegna a sempre pregar par ringrassiar par el magnar che ghemo, no vol dir se semo in meso tante persone o noantri soli. Dopo, Gesù el ga dato el pan e i pessi a tuti, fin che ghe bastesse. Quando tuti i gavea magnà, Gesù el ga visto che ga vansà pan e pessi e el ga mandà che i so apòstoli metesse via tuto. El esémpio de Gesù el ne insegna a esser sempre generosi e a doperar con sabedoria quel che ghemo. Se te ghè fioi, cossa pénsito de contarghe questa stòria par insegnarghe come l’è importante pregar vanti de magnar e mostrar bontà ai altri?

5. (a) Cossa che le persone le ga volesto far dopo de veder quel Gesù el ga fato? (b) Cossa che Gesù el ga fato?

⁵ Quele persone le ze restade pròpio maraveiade de veder i miràcoli che Gesù el ga fato e  come el insegnea. Come lori i savea che Moisè el gavea dito che Dio el mandaria un profeta, pol esser che arquanti i ga pensà: ‘Sarà che Gesù l’è questo profeta?’ (Deu. 18:15-18) Fursi lori i ga pensà che Gesù el saria un governante tanto bravo, parché l’era stà bon de dar magnar a tuta quela gente. Par quela, lori i volea farlo rè. (Gio. 6:14, 15) Se Gesù el gavesse acetà quel che i era drio far, lu el ndaria meterse nela polìtica dei giudei che i era soto el governo romano. Ma, come Gesù no’l volea mia una roba cossita, lu el ga scampà via su nel monte lu lu sol. Cossita, anca se tanti i volesse che lu el se metesse nela polìtica, lu no lo ga fato. Sicuro che el esémpio de Gesù pol insegnarne tanto.

6. Come che podemo mostrar che volemo far compagno a Gesù? (Varda anca la ilustrassion.)

⁶ L’è vera che ancoi nissuni spetarà che femo miràcoli, che curemo maladi o volerà che deventemo rè. Ma, pol esser che le persone le spetarà che scoliemo un governante o che disemo che semo de acordo con quel che ghe par bon. Ma el esémpio de Gesù ne insegna che no ghemo mai de meterse nela polìtica. Lu el ga dito: “El me Regno no’l fà parte de questo mondo.” (Gio. 17:14; 18:36) Alora, noantri se sforsemo de pensar compagno a Gesù e ndarghe drio el so esémpio. Tuti ghemo scoliesto esser leai al Regno de Dio, predicar sora questo Regno e pregar par domandar che el vegne. (Mat. 6:10) Adesso, ndemo veder altre robe  che podemo imparar del miràcolo che Gesù el ga fato del pan.

‘LORI NO I ZE STATI BONI DE CAPIR QUEL CHE EL MIRÀCOLO DEI PAN EL MOSTREA’

7. De acordo con Gioani 6:16-20, cossa che Gesù el ga fato, e cossa che i apòstoli i ga dito dopo de quel che i ga visto?

⁷ Dopo che Gesù el ga dato el pan e i pessi a tuti, lu el ga mandà che i so apòstoli i tornesse a Cafarnaun de barco intanto che lu el ndesse lu lu sol ale montagne. Cossita, lu l’è stà bon de scampar via dele persone che le volea farlo rè. (Ledi Gioani 6:16-20. b) Ma intanto che i apòstoli i era rento el barco, ga scominsià una bruta tempesta nel mar. Alora, Gesù el ga scominsià a caminar fin lori sora le àque e el ga convidà che Piero el caminesse fin lu. (Mat. 14:22-31) Quando Gesù l’è ndato rento el barco, la tempesta la se ga fermà. I dissìpoli i ze restadi tanto maraveiadi che i ga dito a Gesù: ‘Ti te sì pròpio el Fiol de Dio.’ c (Mat. 14:33) Ma parché che i apòstoli i ga dito che Gesù l’era el Fiol de Dio sol dopo de questo miràcolo nel mar, e nò dopo el miràcolo del pan e dei pessi? Marco el ga dito che i apòstoli ‘i ze restadi tanto maraveiadi parché no i gavea gnancora capio quel che el miràcolo dei pan el mostrea e che lori i fea fadiga capir’. (Mar. 6:50-52) Cossita, imparemo che i dissìpoli no i gavea gnancora capio tuto el poder che Geovà el gavea dato a Gesù. Poco tempo dopo, Gesù el ga parlà una roba tanto importante sora el miràcolo dei pan e dei pessi ai so dissìpoli che la pol insegnarne tanto ancoi.

8-9. Parché che quele persone le volea catar Gesù? (Gioani 6:26, 27)

⁸ Nel giorno dopo, tute quele persone le ze ndate nantra volta fin el posto ndove Gesù el gavea fato el miràcolo dei pan. Ma Gesù e i apòstoli no i era pi là. Alora, tute quele persone le ze ndate de barco de Tiberiadi fin Cafarnaun par proar catar Gesù. (Gio. 6:22-24) Sarà che lore le volea imparar de pi sora el Regno de Dio? Nò. Lore le era drio ndar in serca de Gesù parché le volea pan. Come che lo savemo?

⁹ Varda quel che Gesù el ga dito sora quel che ga sucedesto dopo che quele persone lo ga catà darente de Cafarnaun. Lu el ga dito che lori i gavea ‘magnà dei pan fin che bastea’ e che i gavea magnà el “magnar che el se smarsisse”. Par quela, Gesù li ga incoraiadi a sforsarse de gaver el magnar che li ‘faria viver par sempre’. (Ledi Gioani 6:26, 27. d) L’è sicuro che i dissìpoli i ze restadi maraveiadi de saver che i podaria magnar qualcossa che ghe daria vita eterna. Ma che magnar l’era questo e come che i podaria gaverlo?

10. Cossa che le persone le gavea de bisogno par ‘gaver la vita eterna’?

¹⁰ Quei giudei i volea saver quel che ghe ocorea par gaver questo magnar che ghe daria vita eterna. Pol esser che lori i era drio pensar nele robe che la Lege de Moisè la ghe disea de far. Ma Gesù el ghe ga dito: ‘Questo l’è el laoro de Dio: valtri gavé de dimostrar fede in quel che el ga mandà.’ (Gio. 6:28, 29) Gesù el gavea belche dito che ghe ocorea mostrar fede in quel che Dio el ga mandà ‘par gaver la vita eterna’ e  lo ga dito anca altre volte dopo de questo. — Gio. 3:16-18, 36; 17:3.

11. Come che savemo che i giudei sol i era preocupadi col magnar? (Salmo 78:24, 25)

¹¹ Quei giudei no i credea mia che i gavea de mostrar fede in Gesù par gaver la vita eterna. Lori i ga dito a Gesù: ‘Che miràcolo veto far par provarne che te sì Fiol de Dio?’ (Gio. 6:30) Dopo, lori i ga dito che nei giorni de Moisè i israeliti i gavea ricevesto el manà, o sia, el magnar che ghe ocorea. (Nee. 9:15; ledi Salmo 78:24, 25. e) Cossita capimo che quei giudei sol i pensea in gaver quel che ghe ocorea par magnar. Alora, Gesù el ghe ga dito che el vero ‘pan del cielo’ l’era difarente del manà, parché el podaria darghe vita eterna. (Gio. 6:32) Ma lori gnanca no ghe ga mia badà quel che Gesù l’era drio dirghe. Come lori i era massa preocupadi col magnar, no i era mia drio scoltar a Gesù gnanca no i era drio capir quel che i gavea de far par gaver vita eterna. Cossa che podemo imparar de questa stòria?

COSSA CHE GA DE ESSER LA ROBA PI IMPORTANTE PAR NOANTRI?

12. Come che Gesù el ga mostrà quel che l’è pi importante?

¹² Quel che ga sucedesto in Gioani capìtolo 6 ne insegna che la roba pi importante dela nostra vita ga de esser la nostra amicìssia con Geovà e obedirghe. Gesù el ne ga insegnà pròpio questo quando el ga dito a Sàtana: “El omo el ga de viver nò sol del pan, ma de tute le parole che le vien dela boca de Geovà.” (Mat. 4:3, 4) E nel discorso che el ga fato nela montagna, lu el ga dito che gaver una forte amicìssia con Geovà l’è tanto importante. (Mat. 5:3) Cossita, podemo domandarse: ‘Sarà che le dessision dela me vita le mostra che la roba pi importante la ze la me amicìssia con Geovà invesse de quel che mi vui?’

13. (a) Parché che no l’è mia sbalià goder le robe? (b) Con cossa ghemo de star atenti? (1 Corinti 10:6, 7, 11)

¹³ No l’è mia sbalià goder dele robe che ghemo gnanca pregar a Geovà par domandarghe che el ne dae quel che ne ocore par viver. (Luc. 11:3) La Bìblia la dise che l’è bel ‘magnar, bever e goder de tuto quel che vien del nostro laoro’. (Ecl. 2:24; 8:15; Tia. 1:17) Ma ghemo de star atenti de mai assar che i soldi e le robe che ghemo devente la roba pi importante nela nostra vita. Quel che el apòstolo Paolo el ga dito ai fradei in Corinto el ne insegna pròpio quel lì. Lu el ga parlà del bruto esémpio dei israeliti quando i era nel deserto e anca de quel che i ga fato quando i era darente el Monte Sinai. Geovà el gavea fato un miràcolo par darghe de magnar ai israeliti. Ma come lori sol i se preocupea col magnar, quel lì l’è deventà come una roba rugna par lori. (Nùm. 11:4-6, 31-34) Par quela che Paolo el ga dito che “no volemo mia le robe rugne che lori i volea”. (Ledi 1 Corinti 10:6, 7, f 11. g) E quando i israeliti i ga adorà el vedel de oro, lori i ga mostrà che i se preocupea de pi con magnar, bever e divertirse, che con obedir a Geovà. (Éso. 32:4-6) Par quela, Paolo el ga parlà del bruto esémpio dei israeliti par quei fradei che suito i vederia Gerusalen e el témpio esser finidi fora. Anca noantri semo drio viver darente del fin de questo mondo bruto. Cossita, l’è tanto importante star atenti de mai far compagno ai israeliti.

14. Cossa che la Bìblia la dise sora el magnar che gavaremo nel Paradiso?

 ¹⁴ Quando Gesù el ne ga insegnà a domandar che Geovà el ne desse el pan ‘par el nostro giorno’, lu anca el ne ga insegnà a domandar che Geovà el fesse la so volontà nel cielo e nela Tera. (Mat. 6:9-11) Proa pensar come che sarà la to vita quando questo sucederà. Par esémpio, la Bìblia la dise che Geovà el vol darne tante bele robe de magnar. Isaia 25:6-8 mostra che le persone le gavarà robe tanto bone de magnar. E el Salmo 72:16 dise: “Ghen sarà tanti grani nela Tera. Anca su i monti se ndarà tor su tanto de magnar.” Sito premoso de doperar questi grani par far pan, o altre robe bone de magnar che no te ghè mai fato? E ricòrdate che te podarè anca piantar i to vignai e magnar la to ua. (Isa. 65:21, 22) E tute le persone nela Tera le podarà goderse con queste robe.

15. Cossa che quei che i ndarà ressussitar nel Paradiso i gavarà de imparar? (Gioani 6:35)

¹⁵ Ledi Gioani 6:35. h E cossa sucederà con quele persone che le ga magnà del pan e dei pessi e che no le ga mia mostrà fede in Gesù? Pol esser che lore le sarà ressussitade in Paradiso e podaremo cognosserle. (Gio. 5:28, 29) Tuti lori i gavarà de imparar quel che Gesù el ga dito: “Mi son el pan dela vita. Tuti quei che i vien a mi mai i gavarà fame.” Tuti quei che i ndarà nasser e tute le persone che le ndarà ressussitar in Paradiso le gavarà de imparar la verità sora Geovà, la so volontà e creder nel sacrifìssio de Gesù. Noantri restaremo tanto contenti de insegnarghe queste bele robe. Sicuro che giutar le persone a gaver una amicìssia con Geovà ne assarà tanto pi contenti che magnar tute le robe bone che ghen sarà in Paradiso. Adorar a Geovà sarà la roba pi importante par tuti!

16. Cossa che ndaremo imparar nel pròssimo stùdio?

¹⁶ In questo stùdio, noantri ghemo imparà sora un per de versìcoli del capìtolo 6 de Gioani. Ma in questo capìtolo, Gesù el ga insegnà anca altre bele robe sora la vita eterna a quei giudei. Anca noantri ghemo de star atenti a quel che el ga parlà. Par quela, nel pròssimo stùdio, ndaremo imparar de pi sora el capìtolo 6 de Gioani.