1. Parché che tante persone le pensa che no se pol viver par sempre?

 TANTE persone le se sforsa de far esersissi e magnar robe bone par gaver salute e viver de pi tempo. Ancora cossita, lore no le pensa che se pol viver par sempre parché tuti vegnemo veci. Ma, in Gioani 3:16 e 5:24, Gesù el ga dito che se pol viver par sempre.

2. Cossa che Gioani 6:39, 40 dise sora viver par sempre?

² Gesù el ga dato pan e pessi a miliari de persone in Cafarnaun. a Ma quel che lu el ga dito dopo l’è ancora pi bel. Gesù el ga dito ale persone che el ndaria ressussitar quei che i ze morti e che le podaria viver par sempre. (Ledi Gioani 6:39, 40. b) Pensa che bel che sarà par ti veder i to amighi e quei dela to fameia che i ze morti. Gesù el ne assa sicuri che el ndarà ressussitarli e che i podarà viver par sempre. Ma quel che Gesù el ga parlà dopo, in Gioani capìtolo 6, l’è stà fadiga de capir par arquante persone nel passà. Cossa che Gesù el ga dito?

3. Cossa che Gesù el ga dito sora lu stesso in Gioani 6:51?

 ³ Dopo che Gesù el ga fato el miràcolo dei pan, le persone le ga pensà nel manà che Geovà el gavea dato ai israeliti, che le Scriture le ciama de ‘el pan del cielo’. (Sal. 105:40; Gio. 6:31) Alora, Gesù el ga parlà del manà par insegnarghe una roba tanto importante. Lu el ga dito che lu l’era el ‘vero pan del cielo’, ‘el pan de Dio’ e “el pan dela vita” e che ‘se qualchedun el magnesse de questo pan el viveria par sempre’. (Gio. 6:32, 33, 35; ledi Gioani 6:51. c) Alora ghen’era una difarensa intrà el manà e Gesù, parché anca se el manà l’era un miràcolo de Dio, le persone che lo ga magnà no le ga vivesto par sempre. (Gio. 6:49) I giudei no i ga mia capio come che Gesù el podea dir che lu l’era el pan che l’era vegnesto do del cielo, e che questo pan l’era meio del manà che Dio el gavea dato ai israeliti nel deserto. Gesù el ghe ga dito: “El pan che mi darò l’è la me carne.” L’è importante capir quel che lu el volea dir, parché ne insegna come che noantri e quei che amemo i pol gaver vita eterna. Ndemo veder cossa che Gesù el volea dir.

PARCHÉ CHE GESÙ EL GA DITO CHE L’ERA EL “PAN VIVO” E CHE I GAVARIA DE ‘MAGNAR LA SO CARNE’?

4. Parché che arquanti i ze restadi spauradi con quel che Gesù el ga dito?

⁴ Arquanti che i era drio scoltar a Gesù i ze restadi spauradi quando lu el ga dito che la so carne la daria vita al mondo. Fursi lori i era drio pensar che i gavea de magnar pròpio la so carne. (Gio. 6:52) Dopo Gesù el ga dito una roba che li ga spauradi ancora de pi: ‘Se no magné la carne del Fiol del omo e no bevé el so sangue, valtri no gavé vita in valtri.’ — Gio. 6:53.

5. Parché che podemo esser sicuri che Gesù no’l volea mia dir che le persone le gavaria de bever el so sangue?

⁵ Parché che podemo esser sicuri che Gesù no’l volea mia dir che le persone le gavaria de bever el so sangue? Parché Dio el gavea dito nei giorni de Noè che le persone no le podea magnar sangue e el gavea dito ai israeliti che se lori i magnesse sangue i saria copadi. (Gén. 9:3, 4; Lev. 7:27) E Gesù el ga insegnà ai giudei che lori i gavea de obedir a tuta la Lege. (Mat. 5:17-19) Alora podemo capir che Gesù no’l volea mia dir che i giudei i gavea de magnar la so carne e bever el so sangue. Invesse, Gesù l’era drio insegnar ale persone come che le podea gaver la “vita eterna”. — Gio. 6:54.

6. Cossa che ne giuta a capir che Gesù no l’era mia drio dir che i giudei i gavea de magnar la carne e bever el so sangue?

⁶ Cossa che Gesù el volea dir? Podemo capir quel che lu el volea dir, se se ricordemo de quel che el ga dito a una dona samaritana: ‘Chi che beve la àqua che mi ghe darò no’l gavarà pi sen. Ma la àqua che mi ghe darò la deventarà una fonte de àqua che vien fora, che dà la vita eterna.’ (Gio. 4:7, 14) d Gesù no l’era mia drio dir che se la samaritana la bevesse àqua la gavaria vita eterna. Dela medèsima maniera, lu no l’era drio dir che i giudei i gavaria de magnar la so carne e bever el so sangue par gaver vita eterna.

 ALTRE DIFARENSE

7. Cossa che arquanti i dise sora quel che Gesù el ga dito in Gioani 6:53?

⁷ Arquante persone religiose le dise che in Gioani 6:53 Gesù el ga spiegà quel che le persone le ga de far nela Sena del Signor. (Mat. 26:26-28) Lore le dise che tuti quei che i va ala Sena del Signor i ga de magnar el pan e bever el vin che l’è passà intrà le persone. Sarà che questo l’è giusto? L’è tanto importante saver se questo l’è giusto o sbalià. Parché? Parché milioni de persone in tuto el mondo, tuti i ani, le va ala Sena del Signor. Adesso, ndemo veder parché che quel che Gesù el ga dito in Gioani 6:53 l’è difarente de quel che lu el ga dito nela Sena del Signor.

8. Parché quel che Gesù el ga dito ai giudei nela Galilea l’è difarente de quel che el ga dito nela Sena del Signor? (Varda anca la ilustrassion.)

⁸ Ndemo veder parché quel che Gesù el ga dito ai giudei nela Galilea l’è difarente de quel che el ga dito nela Sena del Signor. Primo, Gesù el ga parlà quel che l’è scrito in Gioani 6:53-56 ai giudei nela Galilea nel ano 32. Ma lu el ga fato par la prima volta la Sena del Signor sol un ano dopo in Gerusalen. Secondo, Gesù el ga parlà quel che l’è scrito in Gioani 6:53-56 a persone che le era interessade de pi in magnar, invesse che in quel che Gesù  el volea insegnar. (Gio. 6:26) Quando Gesù el ga tacà dir robe difìcile de capir, lore suito no le ga pi credesto in lu e fin arquante le se ga fermà de ndar drio a Gesù. (Gio. 6:14, 36, 42, 60, 64, 66) E nel ano 33, Gesù el ga parlà a 11 fedeli apòstoli quando el ga fato par la prima volta la Sena del Signor. Anca se lori no i capia tuto, i seitea a ndarghe drio e i credea che lu l’era el Fiol de Dio. (Mat. 16:16) Par quela lu el ga dito: “Sì stati valtri che sì restadi dela me banda nele me provassion.” (Luc. 22:28) Cossita, capimo che quel che Gesù el ga dito in Gioani 6:53 no l’è mia quel che le persone le ga de far nela Sena del Signor. Ma ghen’è ancora altre robe che ne giuta a capir questo.

COSSA CHE LE PAROLE DE GESÙ LE VOL DIR PAR TI?

9. Sora chi che Gesù l’era drio parlar quando el ga fato la Sena del Signor?

⁹ Nela Sena del Signor, Gesù el ga passà el pan ai apòstoli e el ghe ga dito che quel pan el rapresentea el so corpo. Dopo, lu el ga passà el càlisse de vin e el ga dito che el rapresentea el “sangue del acordo”. (Mar. 14:22-25; Luc. 22:20; 1 Cor. 11:24) Quel che lu el ga dito sora el acordo l’è tanto importante, parché questo novo acordo l’è stà fato intrà quei che i ga la speransa de governar con Gesù nel cielo, e nò par tute le persone. (Ebr. 8:6, 10; 9:15) I apòstoli no i gavea capio ben quel che el volea dir. Ma presto, i ndaria esser untadi con spìrito santo e i ndaria far parte de questo acordo con Gesù in cielo. — Gio. 14:2, 3.

10. Parché che podemo capir che quel che Gesù el ga dito nela Sena del Signor l’era difarente de quel che el ga dito ale persone nela Galilea? (Varda anca la ilustrassion.)

¹⁰ Nela Sena del Signor, Gesù el ga parlà a un pìcolo grupo de persone. Quei fedeli apòstoli che i era con lu quela sera i ze stati i primi che i ga podesto far parte de questo grupo. (Luc. 12:32) Par quela Gesù el ghe ga domandà de magnar del pan e bever del vin. Ma ghen’era anca altre persone che le faria parte de questo grupo e anca lore le magnaria pan e le beveria vin nela Sena del Signor. Tuti lori i era quei che i riceveria un posto nel cielo con Gesù. Alora capimo che quel che Gesù el ga dito nela Sena del Signor ai so apòstoli l’era tanto difarente de quel che el ga dito nela Galilea. Nela Sena del Signor, l’era drio parlar con un pìcolo grupo de persone, e nela Galilea l’era drio parlar con tante persone.

11. Cossa che Gesù el ga dito nela Galilea che ne mostra che lu no l’era drio parlar a un pìcolo grupo?

¹¹ Quando Gesù l’era nela Galilea nel ano 32, lu l’era drio parlar ai giudei che i era interessadi sol col magnar. Ma lu el ga proà giutarli a capir che ghen’era qualcossa tanto pi importante che el magnar. Lori i podea gaver la vita eterna. Dopo, Gesù el ga dito che quei che i more i pol esser ressussitadi nel ùltimo giorno e gaver la vita eterna. Nela Sena del Signor, lu l’era drio parlar a un pìcolo grupo de persone, invesse qua l’era drio parlar una roba tanto bela che tute persone le podea gaver. Parché che podemo dirlo? Gesù el ga dito: “Se qualchedun el magna de questo pan el viverà par sempre. El pan che darò l’è la me carne. Cossita, el mondo el poderà gaver vita.” — Gio. 6:51. e

12. Cossa che ghe vol par gaver la vita eterna?

¹² Gesù no l’era mia drio dir ai giudei in  Galilea che tute le persone le gavaria la vita eterna. Ma sol quele che le magnesse el so pan, o sia, sol quele che dimostresse fede in Gesù le gavaria la vita eterna. Tanti i dise che par gaver la vita eterna basta sol creder in Gesù e vederlo come quel che el salva. (Gio. 6:29) Ma ghe vol far de pi de questo. Arquanti nela Galilea i disea che i credea in Gesù, ma dopo i se ga fermà de ndarghe drio. Parché che ga sucedesto quel lì?

13. Cossa che ghe vol par esser veri dissìpoli de Gesù?

¹³ Quasi tute quele persone nela Galilea le era drio ndar drio a Gesù sol parché le volea guadagnar quel che lu el podea darghe. Lore le volea veder miràcoli, magnar sensa pagar gnente e che lu el ghe insegnesse quel che lore le volea. Ma Gesù no l’è vegnesto ala Tera par darghe quel che le persone le volea. Invesse, lu l’è vegnesto par dirghe quel che le gavea de far par esser veri dissìpoli. Lore le gavea de ‘vegner a lu’, o sia, acetar e obedir a tuto quel che lu el insegnea. — Gio. 5:40; 6:44.

14. Cossa ghemo de far par gaver la vita eterna?

¹⁴ Gesù el ga insegnà ale persone nela Galilea che, par meso dela so carne e del so sangue, o sia, del so sacrifìssio, lore le podea gaver la vita eterna. Gaver fede in questo l’era una roba importante par quei giudei e l’è ancora tanto importante par noantri ancoi. (Gio. 6:40) Alora, quel che Gesù el ga dito in Gioani 6:53 el mostra che ne ocore gaver fede nel sacrifìssio de Gesù par gaver  la vita eterna. E la ze una speransa che tute le persone le ga. — Efe. 1:7.

15-16. Che robe importante imparemo del capìtolo 6 de Gioani?

¹⁵ In Gioani capìtolo 6, ghemo imparà tante robe che le ze tanto importante e che le ne dà tanto consolo. Noantri ghemo imparà che Gesù el ne vol tanto ben. Quando l’era nela Galilea, lu el ga curà maladi, el ga insegnà sora el Regno e el se preocupea che le persone le gavesse de magnar. (Luc. 9:11; Gio. 6:2, 11, 12) Ma la roba pi importante che el ga fato la ze stata insegnar ale persone che lu l’è “el pan dela vita”. — Gio. 6:35, 48.

¹⁶ L’è vera che quei che Gesù el ga ciamà de “altre piégore” no i ga de magnar el pan e bever el vin nela Sena del Signor. (Gio. 10:16) Ma, ancora cossita, lori i pol gaver le benedission del sacrifìssio de Gesù. Lori i ga de dimostrar fede in questo sacrifìssio. (Gio. 6:53) Invesse, le persone che le magna el pan e le beve el vin le mostra che le fà parte del novo acordo e le podarà governar con Gesù nel cielo. Alora, no importa se semo untadi o dele altre piégore. Quel che Gioani capìtolo 6 ne insegna l’è tanto importante par noantri. Questo capìtolo ne insegna che ne ocore gaver una forte fede nel sacrifìssio de Gesù par gaver la vita eterna.