1-2. Quando che fursi piandemo?

 TUTI noantri ghemo belche piandesto. Pol esser che te ghè belche piandesto de contento. Par esémpio, pol esser che te ghè piandesto quando l’è nassesto to fiol, quando te te ricordi de bele robe che ga sucedesto sti ani o quando te te ghè catà con un caro amigo che no te vedei fea tanto tempo.

² Ma tante volte, noantri piandemo parché semo drio sofrir. Par esémpio, quando una persona la fà qualcossa che ne disgusta tanto, se fà tempo che semo drio patir par causa de una malatia o se una persona cara par noantri la ze morta. In situassion come queste, fursi se sentimo compagno a Geremia quando i babiloni i ga finio fora con Gerusalen. Lu el ga dito: ‘Tanta àqua vien fora dei me oci. Mi son drio piander sensa fermarme.’ — Lam. 3:48, 49.

3. Come che Geovà el se sente quando el vede el sofrimento dei so servi? (Isaia 63:9)

³ Geovà el sa de tute le volte che ghemo piandesto par causa de una dificoltà. La Bìblia la dise che lu el sa de tute le dificoltà che i so servi i infronta e che sempre el scolta quando lori i domanda el so aiuto. (Sal. 34:15) Ma Geovà el fà de pi che sol veder el nostro sofrimento e scoltarne quando domandemo so aiuto. Lu l’è compagno un caro pare che l’è  premoso de giutar i so fioi quando lori i ze drio piander. — Ledi Isaia 63:9. a

4. Cossa che ndaremo imparar in questo stùdio?

⁴ Nela Bìblia, podemo imparar come che Geovà el giuta i so servi che i ze drio sofrir. In questo stùdio, ndaremo veder parché Ana, Davi e Ezechia i ga piandesto, come che Geovà li ga giutadi e come Geovà el consola anca noantri in situassion compagne.

QUANDO TE PIANDI DE DESANIMÀ

5. Come che Ana la se ga sentio?

⁵ Ana la ga bio tante dificoltà che la ga fato piander. Par esémpio, so omo el gavea anca nantra dona, Penina. Penina la gavea tanti fioi intanto che Ana no la gavea gnanca un fiol. (1 Sam. 1:1, 2) Penina la gavea òdio de Ana, la seitea a dirghe su e a riderghe drio. Proa pensar come che Ana la se ga sentio cola situassion. La Bìblia la dise che Ana “la piandea e no la era bona de magnar” e la era deventada pròpio triste. — 1 Sam. 1:6, 7, 10.

6. Cossa che Ana la ga fato?

⁶ Cossa che Ana la ga fato? Prima, ela la ze ndata adorar a Geovà nel tabernàcolo. Dopo, ela la ga parlà a Geovà tuto quel che la sentia e la pensea. La Bìblia la dise che Ana “la ga scominsià pregar a Geovà e no la se fermea mia de piander”. Ela la ga domandà a Geovà: ‘Varda la aflission dela to serva e ricòrdate de mi.’ (1 Sam. 1:10b, 11) Sicuro che ela la era una cara fiola par Geovà, e che lu el ga volesto consolarla.

7. Come che Ana la se ga sentio dopo che la ga pregà a Geovà sora i so problemi?

⁷ Dopo che Ana la ga pregà, el sasserdote prinsipal, Eli, el ghe ga dito che Geovà el ndaria risponder la so orassion. Come che ela la se ga sentio? La Bìblia la dise che “ela la ze ndata via e la ga magnà, e no la gavea pi una bruta siera”. (1 Sam. 1:17, 18) L’è vera che el so problema no se gavea finio, ma de lì avanti, Ana la ze restada pi calma. Ela la se fidea che Geovà el capia i so sentimenti, quel che la era drio infrontar e che el ndaria giutarla. E l’è pròpio questo che Geovà el ga fato. Lu el ga scoltà la so orassion e dopo el ghe ga dato un fiol. — 1 Sam. 1:19, 20; 2:21.

8-9. De acordo con Ebrei 10:24, 25, parché che tuti noantri ghemo de sforsarse de ndar ale nostre riunion? (Varda anca el ritrato.)

⁸ Cossa che imparemo? Pol esser che te sì drio infrontar una bruta situassion che te assa tanto triste. Fursi l’è morto un caro amigo o qualchedun dela to fameia. In brute situassion come queste, pol esser che te pensi de restar ti ti sol. Ma ricòrdate che  Ana la ga bio consolo dopo de ndar al tabernàcolo. Dela stessa maniera, te gavarè consolo se te vè ale riunion, anca se te sì desanimà e straco. (Ledi Ebrei 10:24, 25. b) Nele riunion, te ndarè scoltar tanti bei testi dela Bìblia. Cossita, Geovà el pol giutarte a cambiar bruti pensamenti che fursi te ghè, e te restarè pi calmo, anca se el problema el seita.

⁹ Nele nostre riunion, Geovà anca el dopera i nostri fradei e sorele par giutarne. Lori i pol consolarte e mostrar che i te ama. (1 Tes. 5:11, 14) Varda quel che ga sucedesto con un pioniero spessial dopo che la so dona la ze morta. Lu el ga dito: “Ancora me vien de piander. Dele volte, me toca restar mi mi sol parché no son mia bon de fermarme de piander. Ma ndar ale riunion me dà tanta forsa. Scoltar quel che i me cari fradei e sorele i me dise me consola tanto. Par quela, no importa se mi son massa preocupà o ansioso, me sinto tanto meio quando son nele riunion.”

10. Come che podemo far compagno a Ana quando semo tanto tristi?

¹⁰ Nantra roba che la ga giutà Ana l’è stà pregar a Geovà e parlar sora i problemi che la era drio infrontar. Dela stessa maniera, anca ti te pol ‘butar sora Geovà tute le to preocupassion’ e esser sicuro che lu ndarà scoltarte. (1 Pie. 5:7) Varda quel che la ga dito una sorela che el so omo l’è morto nte un assalto: “Mi sentia che el me cuor l’era pròpio spacà e che mai gavaria alegria nantra volta. Quel che me dea consolo l’era pregar al me caro Pare, Geovà. Dele volte, no ero mia bona de parlar quel che sentia, ma ero sicura che lu el capia el me sofrimento. Quando ero massa ansiosa, domandea pace, e cossita, ero bona de ndar avanti.” Quando te parli a Geovà sora i to pensieri, anca lu el resta triste, e te pol esser sicuro che lu el capisse quel che te sì drio infrontar e che el ndarà giutarte. Anca se el to problema el seita, Geovà el ndarà consolarte e darte la pace che te ocore. (Sal. 94:19; Fil. 4:6, 7) E Geovà el ndarà benedirte tanto parché te sì bon de seitar fedele. — Ebr. 11:6.

QUANDO QUALCHEDUN CHE AMEMO NO L’È LEAL

11. Come che Davi el se sentia quando le persone lo tratea mal?

¹¹ Davi el ga bio tanti problemi che lo ga fato piander. Tanti i lo odiea e fin amighi e persone dela so fameia no i ze stati leai a lu e i ga proà farghe mal. (1 Sam. 19:10, 11; 2 Sam. 15:10-14, 30) Par quela, lu el ga scrito: ‘Son straco e el me leto l’è moio parché go piandesto tuta la note. L’è come se mi fusse in meso un rio de làgrime.’ Parché che Davi el se sentia cossita? Par causa de quei che i lo fea sofrir. (Sal. 6:6, 7) Quando le persone lo tratea pròpio mal, Davi el sofria e el piandea tanto.

12. De acordo col Salmo 56:8, cossa che Davi el sentia?

¹² Anca se el gavesse tante dificoltà, Davi l’era sicuro che Geovà lo amea. Lu el ga dito che Geovà el scoltea quando lu el piandea. (Sal. 6:8) E quel che lu el ga scrito in Salmo 56:8 ne giuta capir come che Geovà el ne ama e el se preocupa con cada un de noantri. (Ledi. c) Davi el sentia come se Geovà el metesse via nel so odre tute le so làgrime e le scrivesse do nte un libro. Davi l’era sicuro  che Geovà el vedea el so sofrimento e che el ndaria ricordarse de quel che l’era drio infrontar. Lu el savea che el so caro Pare l’era atento a quel che l’era drio suceder e anca ai so sentimenti.

13. Cossa che pol darte consolo se qualchedun te ga disgustà o te ga tradio? (Varda anca la ilustrassion.)

¹³ Cossa che imparemo? Sito drio sofrir parché una persona che te te fidei la te ga disgustà o la te ga tradio? Fursi un caro amigo el se ga fermà de servir a Geovà. O pol esser che te eri drio pareciarte par maridarte con una persona che la te ga abandonà o che el to omo o to dona ga finio col vostro matrimònio. Varda quel che un fradel el ga dito dopo che la so dona lo ga tradio e lo ga abandonà: “Mi no son stà gnanca bon de creder che l’era drio sucederme un bruto colpo cossita. Me sentia sensa valor, disgustà e cativo.” Se te sì drio infrontar una roba cossita, ricòrdate che Geovà mai el ndarà abandonarte. Quel fradel el ga dito: “Son nicorto che le persone fursi le ndarà tradirne, ma che Geovà l’è la nostra Ròcia. No importa quel che suceda, lu l’è sempre dela me banda e mai el abandona quei che i ze leai.” (Sal. 37:28) Nissun te ama de pi che Geovà. E anca se te sì drio sofrir parché qualchedun te ga tradio, questo no’l càmbia quel che Geovà el sente par ti. (Rom. 8:38, 39) Alora, ricòrdate sempre che el to caro Pare el te ama tanto, no importa quel che i altri i fà par ti.

14. Cossa che Salmo 34:18 ne insegna?

¹⁴ Se te sì disgustà o se qualchedun te ga tradio, quel che Davi el ga scrito nel Salmo 34:18 pol consolarte tanto. (Ledi. d) Un libro ga spiegà che quei che i ga “el cuor pien de tristessa” i ze ‘persone che no le speta che suceda gnente de bon’. Alora, se te sì drio sentirte cossita, come che Geovà el pol giutarte? Lu l’è come un caro pare che tien in brasso e consola so caro fiol che piande. Geovà l’è darente de noantri, el mostra so amor e el proa giutarne se qualchedun ne ga tradio o ne ga abandonà. Lu el vol tanto giutar quei che i ga el cuor spacà o i ze desanimadi, e le so bele promesse le ne giuta a dàrghene fora cole nostre dificoltà. — Isa. 65:17.

QUANDO GHEMO UNA BRUTA MALATIA

15. Parché che el rè Ezechia el ga piandesto tanto?

¹⁵ Quando Ezechia, el rè de Giudà, el gavea  39 ani, lu el ga bio una bruta malatia. Par meso del profeta Isaia, Geovà el ghe ga dito che lu el ndaria morir. (2 Rè 20:1) Dopo che el ga scoltà la notìssia de Isaia, Ezechia el ga sofrio e el ga piandesto tanto. Par quela, el ga pregà e domandà el aiuto de Geovà. — 2 Rè 20:2, 3.

16. Come che Geovà el ga rispondesto la orassion de Ezechia?

¹⁶ Geovà el ga visto che Ezechia el piandea tanto intanto che l’era drio pregar a lu e ghe ga fato pecà. Alora, Geovà el ghe ga dito: ‘Go scoltà la to orassion e go visto le to làgrime. Par quela, vao curarte.’ Par meso del profeta Isaia, Geovà el ga dito che el ndaria salvar Gerusalen dei assiri e che Ezechia el seitaria vivo. — 2 Rè 20:4-6.

17. De acordo con Salmo 41:3, come che Geovà el ne giuta quando semo drio infrontar una bruta malatia? (Varda anca la ilustrassion.)

¹⁷ Cossa che imparemo? Gheto una bruta malatia e te par che no ghen’è pi gnente che te pol far? Alora, anca se te sì drio piander, parla a Geovà quel che te sì drio sentir. Te pol esser sicuro che lu el ndarà scoltarte, parché Geovà l’è “el Pare dele grande compassion e el Dio de tuto el consolo” che sempre ne giuta quando ghemo dificoltà. (2 Cor. 1:3, 4) L’è vera che no podemo mia spetar che Geovà el fà un miràcolo par finir fora con una malatia ancoi. Ancora cossita, lu sempre el ndarà giutarne. (Ledi Salmo 41:3. e) Come? Par meso del so spìrito santo Geovà el ne dà la forsa, la sabedoria e la pace che ne ocore par ndar avanti. (Pro. 18:14; Fil. 4:13) E lu ne dà consolo par meso dela speransa che ndaremo viver sensa malatie nel futuro. — Isa. 33:24.

18. Che testo dela Bìblia te ga consolà quando te eri drio infrontar una bruta situassion? (Varda anca el quadro “ Testi che ne consola quando semo drio piander”.)

¹⁸ Ezechia el ga bio consolo par meso de quel che Geovà el ghe ga dito. E anca noantri podemo gaver consolo par meso dela Bìblia. Geovà el ga volesto che arquante robe fusse scrite nela Bìblia par giutarne a dàrghene fora con brute situassion. (Rom. 15:4) Varda el esémpio de una sorela dela Àfrica che la piandea tanto dopo che la ga savesto che la gavea càncaro. Ela la ga dito: “Un testo che me ga consolà tanto l’è stà Isaia 26:3. Quando no posso far gnente par cambiar la situassion, questo testo me giuta a ricordar che Geovà el pol darme pace e giutarme a dàrghene fora.” Ghen’è qualche testo dela Bìblia che te ga giutà quando te eri drio infrontar una bruta situassion cossita?

19. Cossa che Geovà el ndarà far par noantri nel futuro?

 ¹⁹ Noantri semo darente del fin de questo bruto mondo, e pol esser che ancora ndaremo piander. Ma, come ghemo imparà con Ana, Davi e el rè Ezechia, Geovà el vede quando piandemo e ghe fà pecà veder el nostro sofrimento. Lu el resta tanto contento de veder che seitemo fedeli anca cole dificoltà e el ndarà ricordarse de tute le volte che ghemo piandesto. Alora, se infrontemo una bruta dificoltà, ghemo de sforsarse de star insieme dei nostri cari fradei e sorele. Ghemo anca de pregar a Geovà e parlarghe tuto quel che semo drio sentir e leder la Bìblia par ricever el consolo che vien de lu. Se seitemo fedeli, Geovà el ndarà benedirne tanto, e nel futuro, ‘lu el sugarà tute le làgrime dei nostri oci’ e el ndarà finir fora con tuto quel che ne fà sofrir. (Apo. 21:4) In Paradiso, sol ndaremo piander de contenti!