Mi son nassesto in 1927 nte una pìcola cità darente de Chicago, nei Stati Unidi. Me pare e me mare i ga bio sinque fioi. La prima la ze stata Jetha, dopo Don, mi, Karl e Joy. Tuti noantri voleino far el nostro meio a Geovà. Alora, la Jetha la ga fato la turma due dela Scola de Gileade in 1943. Don l’è ndato al Betel de Brooklyn in 1944, Karl in 1947 e Joy in 1951. El bel esémpio dela me fameia me ga incoraià de far el me meio a Geovà.

Me pare e me mare sempre i ledea la Bìblia e i amea a Dio. Lori i ne ga insegnà a amar a Dio anca noantri. Ma me pare el ga perso el rispeto par le religion dopo che l’è ndato servir come soldà nela Prima Guera Mondial. Quando l’è tornà casa, me mare la volea tanto ringrassiar a Dio che lu l’era vivo. Alora la ghe ga dito: “Scominsiemo ndar ala ciesa come una volta.” Ma me pare el ghe ga dito: “Mi vao insieme de ti fin la ciesa, ma no vao mia rento.” Ela la ghe ga domandà: “Parché che nò?” E lu el ghe ga dito: “Nela guera, ghen’era preti dela medèsima religion che i benedia soldadi che i era drio lotar un contra el altro. Ma chi che Dio el ndaria benedir?”

Un giorno, quando me mare la era ndata ala ciesa, due Testimònie de Geovà le ze vegneste ala nostra casa. Lore le ga volesto darghe a me pare due libri che i parlea sora el libro de Apocalisse. a Come me pare el volea lederli, lu el ga acetà, e quando me mare la ga visto quei libri, la ga suito scominsià a lederli. Alora, un tempo dopo, ela la ga visto nte un giornal un convite par un stùdio dela Bìblia e la ga volesto ndar. Quando la ze rivada nel posto giusto, una dona pi vècia la ga verto la porta. Me mare la ghe ga domandà con un libro in man: “Valtri sì drio studiar questo libro qua?” La dona la ghe ga rispondesto: “Si cara, vien rento!” Nela stimana dopo, me mare la ga portà insieme mi e i me fradei, e dopo ghemo scominsià a ndar tute le stimane.

Nte una riunion che son ndato, el fradel el me ga domandà de leder el Salmo 144:15 che dise che quei che i serve a Geovà i ze felici. Anca me ga piasesto 1 Timòteo 1:11 che dise che Geovà l’è el  “Dio felice” e Efesi 5:1 che spiega che ghemo de far “compagno a Dio”. Me ga piasesto pròpio tanto questi versìcoli. Mi go visto che gavea de esser contento de adorar a Geovà e che gavea de ringrassiarlo tanto de poder servirlo. Mi me go sforsà de far queste due robe par tuta la me vita.

La congregassion pi darente la era in Chicago, 32 chilòmetri distante dela nostra casa. Anca cossita, noantri sempre ndeino, e le riunion le me ga giutà a imparar cada volta de pi dela Bìblia. Me ricordo che, nte una riunion, Jetha la ga alsà su la man par comentar. Intanto che ero drio scoltarla, mi ero drio pensar: ‘Mi savea quela risposta. Podaria gaver comentà mi!’ Alora, mi go scominsià a pareciarme e a far i me comentari. Cossita, la me amicìssia con Geovà la era drio restar cada volta pi forte, compagno ai me fradei e sorele. Alora, me go batesà in 1941.

Me ricordo tanto ben de un congresso in 1942, in Cleveland, Ohio. Ghen’era fradei in de pi de 50 posti dei Stati Unidi che scoltea el congresso par telèfono. La nostra fameia la ze restada in tende nte un acampamento insieme a altri fradei. In quela època, l’era drio suceder la Seconda Guera Mondial, e tante persone le era drio vegner contra le Testimònie de Geovà. Alora, me ricordo che, de sera, i fradei i metea i so auti intorno el acampamento. In cada auto, ghen’era un fradel che el restea rento e, se rivesse persone che volea farne mal, lori i ndaria sonar la busina e impissar tute le luce del auto. Cossita, cola luce nei oci, le persone rugne che fursi volea farne mal faria fadiga veder, e altri fradei i gavaria tempo de rivar par giutar. Alora, mi go pensà: ‘I servi de Geovà i ze pròpio pareciadi par tute le situassion.’ Come èrino drio sentirse tranquili, semo stati boni de dormir, e gnente de bruto ga sucedesto.

Quando go pensà sora quel congresso ani dopo, me son nicorto che me mare no la gavea bio gnanca un poco de ansietà o paura. Ela la se ga fidà del tuto in Geovà e nela so organisassion. Mi no vao mai desmentegarme del so bel esémpio.

In quel congresso, me mare la ze stata pròpio atenta ai discorsi che i parlea sora far de pi par Geovà parché la era pena deventada pioniera regolar. Ma quando èrino drio ndar casa, ela la ga dito: “Me piaseria tanto seitar a esser pioniera. Ma no son bona de far questo e de dàrghene fora coi afari casa mi sola.” Alora, ela la ne ga domandà se podarìssino giutarla, e noantri ghe ghemo dito de si. Ela la ne ga dito che cada un el podaria netar un o due posti rento casa, prima dela colassion. Dopo che ndeino ala scola, la vedea se l’era tuto a posto rento casa e la ndea ala predicassion. Me mare la gavea tante robe de far, ma la ne ga sempre tendesto tanto ben. Quando riveino casa par magnar dopo la scola, ela la era sempre lì. Dele volte, dopo dela scola, noantri ndeino predicar insieme cola nostra mare. Cossita, ghemo capio come che l’è la vita de un pioniero.

Mi go scominsià a laorar come pioniero quando gavea 16 ani. Anca se el me pare no l’era gnancora una Testimònia de Geovà, lu el volea saver se l’era drio ndar tuto ben. Alora, nte una sera mi ghe  go contà che ero drio sforsarme tanto, ma che no ero bon de catar un stùdio dela Bìblia. Me go fermà un pochetin e ghe go domandà: “Vuto mia studiar la Bìblia con mi?” Lu el ghe ga pensà sora un poco e el me ga rispondesto: “Mi no son bon de catar un motivo par dirte de nò.” Alora, el me primo studiante dela Bìblia l’è stà el me pare. Studiar la Bìblia con lu l’è stà una roba tanto importante par mi!

Noantri ghemo studià el libro “A Verdade vos Tornarà Livres”. Intanto che mi fea el stùdio al me pare, mi go visto che ero drio imparar tanto dela Bìblia anca mi e ero drio deventar ancora pi bravo de insegnar i altri. Par esémpio, una volta, dopo de leder un paràgrafo, lu el me ga dito: “Mi son drio veder quel che el libro el dise. Ma come che te pol esser sicuro che quel che el libro el dise l’è giusto?” Mi no savea mia cossa risponderghe, alora ghe go dito: “Mi no son bon de spiegarte adesso. Ma nel pròssimo stùdio, sarò bon de risponderte.” E go fato pròpio questo, parché go catà versìcoli dela Bìblia che i mostrea che quel che el libro el disea l’era giusto. Dopo, mi go scominsià a pareciarme ancora meio par i studi e go imparà a far peschise. Questo me ga giutà a deventar un meio studiante dela Bìblia, e ga giutà anca me pare. Lu el ga scominsià a meter in pràtica quel che l’era drio imparar e el se ga batesà in 1952.

Jetha la ze ndata servir come una missionària, b e Don l’è ndato a Betel. Me ga incoraià tanto veder come lori i amea far de pi par Geovà. Alora, son ndato via de casa quando gavea 17 ani. Tempo dopo, go fato le petission par ndar a Betel e par far la scola de Gileade, e go assà che Geovà el dessidisse ndove mi gavea de ndar. Alora, in 1946, mi son stà convidà par ndar servir in Betel.

Nei 75 ani che go laorà in Betel, mi go bio tanti laori difarenti e go imparà far arquante robe nove. Par esémpio, go imparà a far le conte e scriver do come i soldi i ze doperadi nel Betel e a stampar libri. Mi go anca imparà a comprar robe che ghe ocore nte un Betel e anca a come mandar robe par altri paesi. Ma le adorassion matinai e i discorsi che ghemo in Betel l’è quel che me piase de pi.

Mi go anca imparà tanto col me fradel pi gióveno, Karl. Lu l’è vegnesto servir in Betel in 1947. Lu l’era pròpio bravo de studiar la Bìblia e de insegnarghe ai altri. Una volta, mi ghe go domandà aiuto par pareciar un discorso. Mi gavea fato una mùcia de peschise, ma ancora no savea mia cossa parlar nel discorso. Alora la domanda che lu el me ga fato dopo me ga giutà tanto. Lu el ga dito:  “Joel, qual che l’è el tema del to discorso?” Mi go suito capio quel che el volea dir. Me tochea doperar le peschise che le parlea sora quel tema e assar de banda quele che no me ocorea mia. No me go mai desmentegà de quel che el me ga insegnà.

Noantri sol saremo felici col nostro laoro in Betel se ndemo sempre ala predicassion. Quando semo drio predicar vedemo tante bele robe suceder. Par esémpio, mi resto tanto contento de ricordarme de quel che ga sucedesto nte una sera quando èrino drio predicar nel Bronx, nela cità de Nova York. Mi e un fradel ghemo visità una dona che la gavea acetà la Sentinela e la Sté Atenti!. Noantri ghe ghemo dito: “Questa sera noantri semo drio giutar le persone a imparar bele robe dela Bìblia.” Alora ela la ga dito: “Se sì drio parlar dela Bìblia, vegné rento.” Noantri ghe ghemo ledesto e ghe ghemo spiegà tanti versìcoli dela Bìblia che i parla sora el Regno de Dio e sora el Paradiso. Come ela la ze restada pròpio maraveiada, la ga convidà arquanti amighi par vegner scoltarne nela pròssima stimana. Dopo de un tempo, ela e el so omo i ze deventadi servi de Geovà.

Fea belche diese ani che volea catar una tosa par maridarme. Quel che me ga giutà a catar una brava dona l’è stà pregar a Geovà e pensarghe sora quel che mi volea far dopo che me maridesse.

Poco tempo dopo del congresso de 1953, nel Stàdio Yankee, mi go cognossesto una sorela de nome Mary Aniol. Ela e me sorela Jheta le era nela medèsima turma dela Scola de Gileade e le era drio servir come missionàrie insieme. Mary sempre la me contea pròpio contenta dele bele robe che ghe gavea sucedesto quando la era drio servir nel Caribe, e dei bei studi che la gavea. Dopo che se ghemo cognossesto un poco meio, ghemo visto che voleino far le medèsime robe a Geovà. Mi e Mary se voleino tanto ben, e se ghemo maridà in april de 1955. Dopo, noantri ghemo servio par tre ani nel sircuito. Mi son sicuro che Mary la ze stata un bel presente che Geovà el me ga dato e un bel esémpio de ndarghe drio. Ela la era contenta de far el so meio a Geovà, no importa ndove. Ela la era pròpio sforsada, la se preocupea sempre coi altri e la metea el Regno in primo posto. (Mat. 6:33) Alora, in 1958, noantri semo stati convidadi par ndar laorar in Betel.

Mi go imparà tante bele robe con Mary. Quando noantri se ghemo maridà gaveino dessidio de leder sempre la Bìblia insieme. Ledeino intorno de 15 versìcoli par giorno, e dopo de leder cada toco noantri sempre discoreino insieme sora i versìcoli e sora come podeino meterli in pràtica. Mary sempre la me contea dele bele robe che la gavea imparà nela scola de Gileade e intanto che la era missionària. Quel che mi go imparà me ga giutà a far discorsi ancora meio e a esser pi bon de incoraiar le sorele. — Pro. 25:11.

La me cara Mary la ze morta in 2013. Mi son tanto premoso de catarla in Paradiso. Ma intanto che son drio spetar, mi vui seitar a imparar sora Geovà e a fidarme del tuto in lu. (Pro. 3:5, 6) Pensarghe sora quel che el promete par el futuro me assa tanto contento e tranquilo. Sarà tanto bel imparar robe nove col nostro Pare Geovà. Mi vui ringrassiarlo par tuto quel che el me ga insegnà e par la bontà che el me ga mostrà.