Timòteo l’era un ansiano quando el apòstolo Paolo ghe ga scrito: ‘Mi te comando davanti de Dio, de Cristo Gesù e dei àngeli scoliesti de obedir a queste orientassion sensa far difarensa intrà le persone.’ — 1 Tim. 5:21.

Prima, ndemo veder chi che questi ‘àngeli scoliesti’ no i ze mia. L’è sicuro che lori no i ze mia i 144 mila. Parché che podemo dirlo? Parché quando Paolo el ga scrito a Timòteo, i untadi no i era gnancora stati ressussitadi. Alora, i apòstoli e i altri untadi no i era gnancora drio viver nel cielo. Par quela, podemo dir che lori no i ze i ‘àngeli scoliesti.’ — 1 Cor. 15:50-54; 1 Tes. 4:13-17; 1 Gio. 3:2.

Anca podemo dir che i ‘àngeli scoliesti’ no i pol esser i àngeli che i ze stati desobedienti nel tempo del Dilùvio. Quei àngeli i se ga metesti dela banda del Diaol, contra Gesù, e i ze deventadi demoni. (Gén. 6:2; Luc. 8:30, 31; 2 Pie. 2:4) Nel futuro, questi àngeli i sarà butadi nel abismo par mila ani e dopo i sarà finidi fora insieme a Sàtana. — Giuda 6; Apo. 20:1-3, 10.

Alora, podemo capir che i ‘àngeli scoliesti’ che Paolo el ga parlà i ga de esser àngeli nel cielo che i laora insieme con ‘Dio e Cristo Gesù’.

Ghen’è miliari de àngeli fedeli. (Ebr. 12:22, 23) E podemo dir che Geovà no’l ga mia dato a tuti el medèsimo laoro de far. (Apo. 14:17, 18) Par esémpio, Geovà el ga domandà che sol un àngelo copesse 185 mila soldadi dela Assìria. (2 Rè 19:35) Altri àngeli i ga ricevesto el laoro de ‘meter insieme fora del Regno de Gesù, tute le robe che mena al pecato e le persone che fà le robe contra la lege.’ (Mat. 13:39-41) Altri àngeli i ga ricevesto el laoro de ‘meter insieme quei che Dio el ga scoliesto’ par viver nel cielo. (Mat. 24:31) E ghen’è altri che i ga ricevesto el laoro de protegerne. — Sal. 91:11; Mat. 18:10; varda anca Mateo 4:11; Luc. 22:43.

Pol esser che i ‘àngeli scoliesti’ che se parla in 1 Timòteo 5:21 i sìpia i àngeli che i ga el laoro de tender dele congregassion. Paolo el ga dato consili sora come che i ansiani i gavaria de tender dei fradei dela congregassion, e come questi fradei i gavaria de rispetarli. Lu el ga dito che i ansiani no i gavaria de ‘far difarensa intrà le persone’ e che quando i gavesse de far una dessision i gavaria de pensarghe ben sora. Paolo el ga dito che questa la era una roba tanto importante de far parché el ghe ga ricordà che i ansiani i laora ‘davanti de Dio, de Cristo Gesù e dei àngeli scoliesti’. Questo vol dir che Geovà, Gesù e questi àngeli i ze drio vardar come che i ansiani i ze drio tender dela congregassion. Cossita, capimo che intrà le robe che i àngeli i fà lori i tende dela congregassion, i ne protege, i tende del laoro de predicassion e i ghe dise a Geovà le robe che i vede. — Mat. 18:10; Apo. 14:6.