Gheto ledesto le reviste La Sentinela de questo ano? Alora, proa risponder a queste domande:

Come che Geovà el trata le done?

Geovà no’l trata i òmini meio che le done. Lu le scolta e el se preocupa con quel che lore le pensa e le sente. Geovà anca el se fida dele done par far tanti laori nela so organisassion. — Sentinela 01/24 pàg. 15-16.

Come che podemo meter in pràtica quel che dise Efesi 5:7 e ‘no far gnente insieme de lori’?

El apòstolo Paolo el ga dito che no ghemo de star insieme con quei che i pol influensarne par far robe sbaliade. Ancoi, noantri ghemo de star ancora pi atenti parché, par meso dele rede sossiai, podarìssino star insieme de persone che no le adora a Geovà, anca se le ze de star distante de noantri. — Sentinela 03/24 pàg. 22-23.

Cossa che ghemo de far se scoltemo busie sora la organisassion?

Mai ghemo de darghe atension a stòrie che i ne manda e che no savemo se le ze vere. Anca ghemo de star atenti a e-mail de persone che no cognossemo mia e con apòstati che i fà finta de voler imparar de pi. — Sentinela 04/24 pàg. 12.

Cossa che noantri savemo e cossa che no savemo sora come Geovà el ndarà giulgar le persone che le ze morte nel Dilùvio, le persone de Sodoma e Gomora e el rè Salomon?

Noantri no savemo se lori i sarà ressussitadi o nò. Ma, semo sicuri che Geovà el sa tuto e che el ga tanta misericòrdia. — Sentinela 05/24 pàg. 3-4.

Come che se sentimo de saver che Geovà l’è come una “Ròcia”? (Deu. 32:4)

Geovà el pol esser el nostro refùgio. Lu l’è leal e mai el ne abandonarà parché sempre el fà quel che el promete. Anca podemo esser sicuri che Geovà no’l càmbia mia la so personalità gnanca quel che lu el vol far. — Sentinela 06/24 pàg. 26-28.

Cossa che te pol far se te vè nte una nova congregassion?

Fìdate in Geovà e sìpia sicuro che lu el ndarà giutarte compagno el ga belche giutà tanti dei so servi nel passà. No stà far comparassion intrà la vècia e la nova congregassion. Sfòrsate de far le robe con quei dela to nova congregassion e de far novi amighi. — Sentinela 07/24 pàg. 26-28.

Cossa che imparemo dele tre stòrie che Gesù el ga contà in Mateo capìtolo 25?

La stòria dele piégore e dele cavre ne mostra che ghemo de esser fedeli e leai. La stòria dele vèrgine stùpide e de quele che le gavea sabedoria ne giuta a capir che l’è importante esser pareciadi e seitar atenti. E nela stòria dei talenti, imparemo che ne ocore sforsarse de esser bravi laoradori. — Sentinela 09/24 pàg. 20-24.

Quanto alto l’era el pòrtico del témpio de Salomon?

Arquante tradussion de 2 Cróniche 3:4 le dise che el pòrtico l’era alto ‘120 cóvadi’, o sia, 53 metri. Ma, arquanti testi antighi i dise che el pòrtico l’era alto 20 cóvadi, o sia, 9 metri. Questa informassion la ze pi giusta parché le parede del témpio no le saria bone de tegner un pòrtico pi alto de 9 metri. — Sentinela 10/24 pàg. 31.

Cossa che vol dir par un servo ministerial “esser maridà con una sol dona”? (1 Tim. 3:12)

Questo vol dir che lu el pol esser maridà con sol una dona, che lu no pol mia far imoralità sessual gnanca tratar altre done come se el volesse smorosarle. — Sentinela 11/24, pàg. 19.

Parché che podemo dir che quel che Gesù el ga dito in Gioani 6:53 no l’è mia quel che le persone le gavaria de far nela Sena del Signor?

In Gioani 6:53, Gesù el ga parlà che ghemo de magnar la so carne e bever el so sangue. Ma lu l’era drio parlar con giudei dela Galilea che no i gavea mia fede in lu, nel ano 32. Nel ano dopo, quando Gesù el ga fato par la prima volta la Sena del Signor, el ga parlà a quei che i saria nel cielo insieme a lu. — Sentinela 12/24 pàg. 10-11.