1-2. (a) Parché che tanti no i se fida in quei che i ga autorità? (b) Cossa ndaremo imparar in questo stùdio?

 ANCOI, tante persone no le se fida in quei che i ga autorità. Par esémpio, lore le vede che quei che i ga autorità i giuta i siori e i poderosi, ma no i fà gnente a quei che i ze poareti. La Bìblia la dise pròpio questo in Eclesiasti 8:9: “Le persone le sofre par causa del governo de altre persone.” Le persone anca le vede che arquanti lìderi religiosi i fà tante robe brute. Par quela, lore no le se fida gnanca pi in Dio. Alora, quando studiemo la Bìblia con una persona, ghemo de sforsarse par giutarla a fidarse in Geovà e in quei che lu el scòlie par tender dela so organisassion.

² L’è tanto importante che i nostri studianti i se fide in Geovà e nela so organisassion. Ma anca se noantri semo batesadi fà tanto tempo, ghemo de fidarse cada volta de pi che Geovà el fà le robe dela maniera giusta. Ghemo de farlo parché ne tocarà gaver una forte fede: (1) quando no capimo ben qualcossa che ledemo nela Bìblia, (2) quando la organisassion de Geovà la ne dise de far qualcossa, e (3) quando ndaremo infrontar le dificoltà nel futuro.

3. Cossa pol suceder quando semo drio leder la Bìblia?

³ Quando semo drio leder la Bìblia, fursi no capimo mia ben qualcossa che Geovà el ga fato. Par esémpio, nel libro  de Nùmeri, Geovà el ga mandà copar un omo parché lu l’era drio tor su legna nel sabo. Ma sentene de ani dopo, Davi el ga fato pecato con Bate-Seba e el ga mandà copar so omo, e Geovà lo ga perdonà. (Nùm. 15:32, 35; 2 Sam. 12:9, 13) Fursi se domandemo: ‘Parché che Geovà el ga perdonà a Davi, anca che el gàpia fato bruti pecati, ma no’l ga perdonà a un omo che l’era drio tor su legna nel sabo?’ Par capir meio, ndemo veder tre robe che ghemo de ricordarse quando ledemo la Bìblia.

4. Come Génesi 18:20, 21 e Deuteronómio 10:17 ne assa sicuri che Geovà el fà tuto con giustìssia?

⁴ Tante volte la Bìblia no la spiega tuto quel che ga sucedesto. Par esémpio, savemo che Davi el se ga ciamà gramo de quel che lu el ga fato. (Sal. 51:2-4) Ma la Bìblia no la dise se quel omo che l’era drio tor su legna nel sabo el se ga ciamà gramo. Fursi lu el gavea belche desobedio a questa lege arquante volte. O pol esser che qualchedun ghe gavea belche dito par obedir ala Lege, ma lu no’l ga volesto scoltarlo. Anca che la Bìblia no la parle quel che ga sucedesto, podemo esser sicuri che Geovà ‘mai l’è ingiusto’. (Deu. 32:4) Quando Geovà el giulga a qualchedun, lu sempre el vede tuto quel che l’è drio suceder e no’l va drio a quel che i altri i parla o i pensa. (Ledi Génesi 18:20, 21; * Deuteronómio 10:17. *) Se seitemo a imparar sora Geovà e sora la so maniera de far le robe, ndaremo fidarse cada volta de pi in lu. Alora, anca che no semo boni de capir qualcossa che ledemo nela Bìblia, saremo sicuri che tuto quel che Geovà el fà l’è giusto. — Sal. 145:17.

5. Cossa sucede quando giulghemo i altri? (Vedi anca el quadro “ Come semo imperfeti, no semo boni de giulgar con giustìssia.”)

⁵ Come semo imperfeti, no semo boni de giulgar dela maniera giusta. L’è vera che semo stati fati cole medèsime qualità de Geovà e che volemo che tute le persone  le sìpia tratade con giustìssia. (Gén. 1:26) Ma noantri semo imperfeti, alora, anca se pensemo che savemo tute le robe, no saremo boni de giulgar dela maniera giusta. L’è stà pròpio questo che ga sucedesto con Giona. Lu l’è restà tanto disgustà quando Geovà el ga mostrà misericòrdia ale persone de Nìnive. (Giona 3:10–4:1) E cossa ga sucedesto cole persone de Nìnive? De pi de 120 mila le ze state salve. Alora, chi che ga giulgà quele persone dela maniera giusta? Sarà che l’è stà Giona, o Geovà?

6. Parché che Geovà no’l ga mia de spiegarne le so dessision?

⁶ Geovà no’l ga mia de spiegarne parché el ga dessidio far una roba. L’è vera che Geovà el ga belche scoltà quel che i so servi i gavea de dir sora le so dessision. (Gén. 18:25; Giona 4:2, 3) E arquante volte el ga spiegà parché che el ga fato quela dessision. (Giona 4:10, 11) Ma ghemo de ricordarse che Geovà no’l ga de spiegarne quel che el ndarà far o quel che el ga belche fato. Parché? Parché lu el ne ga creà. Alora, lu no’l ghe ocore saver quel che pensemo dele so dessision. — Isa. 40:13, 14; 55:9.

7. Cossa che pol esser fadiga par noantri, e parché?

⁷ Semo sicuri che Geovà sempre el fà quel che l’è giusto e che podemo fidarse in lu. Ma pol esser che ne fae fadiga fidarse in quei che el ga scoliesto par tender dela organisassion. Pol esser che se domandemo se le dessision che lori i fà le ze de acordo cola orientassion de Geovà. Proemo pensar nei esempi che ghemo visto nel paràgrafo 3. Fursi qualchedun dela fameia de quel omo che l’era drio tor su legna nel sabo el se gàpia domandà: ‘Sarà che Moisè el ga domandà a Geovà se lu el gavea de morir?’ O proa pensar anca in quel che ga sucedesto con Uria, so omo de Bate-Seba. Pol esser che un amigo suo el gàpia pensà: ‘Sicuro che Davi no l’è mia morto parché lu l’è el rè.’ Ma no ghemo de pensar cossita. Ghemo de ricordarse che Geovà el se fida in quei che el ga scoliesto par tender dela so organisassion. Se noantri no se fidemo in lori, no podemo dir che se fidemo in Geovà.

8. Come che la organisassion de Geovà ancoi la fà quel che dise in Ati 16:4, 5?

⁸ Ancoi, Geovà el dopera el schiavo fedele e prudente par tender dela so organisassion qua nela Tera. (Mat. 24:45) Questo schiavo el fà pròpio compagno al Corpo Governante del primo sècolo. Lu el tende de quei che i serve a Dio e el dise ai ansiani cossa che lori i ga de far. (Ledi Ati 16:4, 5. *) I ansiani i mete in pràtica nele congregassion quel che el Corpo Governante el ghe ga dito. Quando femo el nostro meio par esser obedienti, mostremo che se fidemo nela maniera de Geovà far le robe.

9. Quando che pol esser fadiga far quel che i ansiani i dise, e parché?

⁹ Dele volte, no l’è fàcile far quel che i ansiani i dise. Par esémpio, arquanti fradei i ga bio de cambiar de congregassion, e arquante congregassion le ga bio de cambiar de sircuito. Pol esser che anca noantri ghemo bio de cambiar de congregassion par doperar meio i Saloni del Regno. Sicuro che no l’è stà mia fàcile cambiar se ne ga tocà restar distante dei nostri amighi e parenti.  Pol esser ancora pi fadiga farlo parché Geovà no’l parla ai ansiani ndove cada fradel el ga de ndar. Ma ghemo de ricordarse che Geovà el se fida in questi òmini e anca noantri ghemo de farlo. *

10. De acordo con Ebrei 13:17, parché ghemo de obedir ai ansiani?

¹⁰ Parché che ghemo de obedir ai ansiani anca quando no semo de acordo cole so dessision? Parché quando lo femo, tuti i fradei i resta pi unidi. (Efe. 4:2, 3) Quando semo ùmili e obedimo ai ansiani, giutemo tuta la congregassion. Quando obedimo a quei che Geovà el ga scoliesto, mostremo che se fidemo in Geovà. L’è pròpio importante far cossita! — Ati 20:28; ledi Ebrei 13:17. *

11. Cossa pol giutarne a fidarse de pi nele dessision che i ansiani i fà?

¹¹ Cossa pol giutarne a fidarse de pi nele dessision dei ansiani? Ricordarse che lori i domanda el spìrito santo de Geovà e i va drio a quel che la Bìblia e la organisassion de Geovà le dise. Ghemo anca de ricordarse che lori i vol assar Geovà contento e tender tanto ben del so pòpolo. I ansiani i ze òmini fedeli e i sa che i ga de renderghe conto a Dio par la maniera che i tende dei so servi. (1 Pie. 5:2, 3) Ghemo anca de ricordarse che le persone del mondo no le ze intese par causa dele so rasse, religion e dela polìtica. Ma el pòpolo de Geovà el vive in union parché el adora el vero Dio. Sicuro che questo ne assa sicuri che Geovà l’è drio benedir la so organisassion!

12. Cossa che i ansiani i ga de far par saver se un fradel el se ga pròpio ciamà gramo?

¹² Geovà el ga dato el laoro ai ansiani de mantegner la congregassion pura. Par quela, se un fradel el fà un bruto pecato, Geovà el speta che i ansiani i dessida se lu el pol seitar a esser una Testimònia de Geovà. Par far questa dessision, i ansiani ga de saver se questo fradel el se ga pròpio ciamà gramo. Lori i pol domandarse: ‘Anca che el gàpia dito che el se ga ciamà gramo, sarà che el òdia quel che el ga fato? Lu el ndarà sforsarse tanto par no far pi quel bruto pecato? Se lu el ga sbalià parché el gavea brute amicìssie, lu el va fermarse de esser so amigo?’ I ansiani anca i se sforsa de saver tuto quel che ga sucedesto e come che questo fradel el se sente sora quel che el ga fato. Lori anca i prega a Geovà e i vede cossa che la Bìblia la dise sora questo. Sol dopo de far tute queste robe, i ansiani i va dessider se lu el pol seitar a esser una Testimònia de Geovà, o nò. — 1 Cor. 5:11-13.

13. Cossa fursi se domandemo quando i ansiani i desside che qualchedun che amemo tanto no’l pol pi esser Testimònia de Geovà?

¹³ Metemo dir che i ansiani i ga dessidio che un fradel no’l pol pi esser una Testimònia de Geovà. Sarà pi fàcile fidarse nela so dessision se no cognossemo tanto questo fradel. Ma fursi sarà pi fadiga se lu l’è dela nostra fameia o un dei nostri amighi. Par esémpio, pol esser che scominsiemo a domandarse se i ansiani i savea tuto quel che gavea sucedesto e se i ga giulgà dela maniera che Geovà el vol. Se questo l’è drio suceder con noantri, cossa pol giutarne a acetar la dessision dei ansiani?

14. Se i ansiani i desside che qualchedun che amemo no’l pol pi esser una Testimònia de Geovà, cossa che ndarà giutarne?

¹⁴ Ghemo de ricordarse che quando i  ansiani desside che una persona no la pol pi esser una Testimònia de Geovà, lori i ze drio mantegner la congregassion pura. Questo giuta anca la persona che la fato el pecato e i fradei. Se la persona che la ga fato el pecato e no la se ga ciamà grama la seitesse a esser una Testimònia de Geovà, la saria un bruto esémpio par i fradei. (Gàl. 5:9) Ela podaria anca pensar che el so pecato no l’è stà tanto bruto cossita e che no la gavaria de cambiar la so maniera de pensar e de far le robe. Alora, saria pi fadiga che la tornesse a esser amiga de Geovà. (Ecl. 8:11) Semo sicuri che i ansiani i sa che dessider se una persona la pol seitar a esser Testimònia de Geovà la ze una dessision tanto importante. Lori anca i sa che i ze come i giusi in Israel, parché l’è stà Geovà che el ghe ga domandà de far questo laoro. — 2 Cró. 19:6, 7.

15. Parché che ghemo de imparar a fidarse nela maniera de Geovà far le robe belche adesso?

¹⁵ Come suito Geovà el ndarà finir fora con questo mondo rugno, ghemo de imparar a fidarse nela so maniera de far le robe belche adesso. Parché? Nela granda tribolassion, quei che Geovà el ga scoliesto par tender dela so organisassion fursi i ndarà domandarne de far qualcossa che no ndaremo capir o che no sarà fàcile obedir. Alora, Geovà el ndarà doperar questi òmini par dirne quel che gavaremo de far, e no’l ndarà parlar con cada un de noantri. Cossita, ghemo de star atenti par mai pensar: ‘Sarà che questi òmini i ze drio far quel che Geovà el vol o quel che lori i vol?’ Nela granda tribolassion, gavaremo de fidarse tanto in Geovà e nei òmini che lu el ga scoliesto par tender del so pòpolo. Ma sol saremo boni de fidarse in lori nel futuro se lo femo belche adesso. Alora, fìdate in questi òmini e obedissi suito quando i te domanda de far qualcossa. — Luc. 16:10.

16. Parché che ne tocarà fidarse del tuto in Geovà nel futuro?

¹⁶ Ghemo anca de domandarse: ‘Cossa mi ndarò pensar sora i giulgamenti de Geovà nel Armagedon?’ Savemo che no saremo noantri che ndaremo dessider chi che ndarà salvarse. (Mat. 25:34, 41, 46) Geovà el ndarà doperar Gesù par dessider cossa che ndarà suceder con cada persona. (Mat. 25:31-33; 2 Tes. 1:7-9) Par esémpio, volemo che tante persone, come arquante dela nostra fameia, le dessida servir a Geovà vanti del fin. Ma sarà che ndaremo fidarse nei giulgamenti de Geovà, o ndaremo fermarse de servirlo parché no saremo de acordo cole so dessision?  Alora, ghemo de fidarse ancora de pi in lu adesso par esser boni de farlo anca nel futuro.

17. Cossa che ndarà suceder dopo dei giulgamenti de Geovà nel Armagedon?

¹⁷ Proa pensar in tuto quel che ndarà suceder dopo dei giulgamenti de Geovà nel Armagedon. Par esémpio, no ghen sarà pi le religion false, i governi e gnanca le persone che le vol sol guadagnar cada volta de pi soldi. Nissun pi ndarà restar malà, vècio o morir. Sàtana e i demoni anca i sarà metesti in preson par mila ani. Alora, no ghen sarà pi tute le robe rugne che sucede ancoi par causa de lori. (Apo. 20:2, 3) Sicuro che fidarse nela maniera de Geovà far le robe la ze la meio dessision!

18. Cossa che imparemo dei Israeliti? (Nùmeri 11:4-6 e 21:5)

¹⁸ Ghemo de ricordarse che dopo del Armagedon ancora ndaremo infrontar dificoltà, e gavaremo de seitar a fidarse in Geovà. Par esémpio, no savaremo quanto laoro gavaremo e quanto tempo ghe meterà par far dela Tera un paradiso. No sarà tuto perfeto nel scomìnsio e pol esser che gavaremo de laorar tanto. Sarà che ndaremo sbrontolar anca dopo de veder tuto quel che Geovà el ga fato par noantri? No volemo mai far quel che i israeliti i ga fato. Lori i era schiavi nel Egito, e Geovà li ga liberà. Ma lori i ga scominsià a sbrontolar del manà che Geovà el ghe dea e a dir che ghe manchea el magnar che ghen’era nel Egito. (Ledi Nùmeri 11:4-6; * 21:5. *) Cossa pol giutarne a mai far quel che i israeliti i ga fato? Ghemo de dar tanto valor adesso a quel che Geovà el fà par noantri. Cossita, sarà pi fàcile farlo anca nel futuro.

19. Cossa che te ghè imparà in questo stùdio?

¹⁹ In questo stùdio, ghemo visto che Geovà sempre el fà tuto dela maniera giusta e che ghemo de esser sicuri de questo. Ghemo anca visto che ne ocore fidarse nei òmini che Geovà el ga scoliesto par tender del so pòpolo. Alora, volemo sempre ricordarse dele parole che el profeta Isaia el ga scrito: “Valtri gavaré forsa se resté tranquili e se valtri ve fidé in mi.” — Isa. 30:15.