STÙDIO 8
Sté sempre atenti!
“Mantegneve atenti, sté vigilanti!” — 1 PIE. 5:8.
CÀNTICO 144 Proa imaginar quel che Dio el farà
COSSA CHE NDAREMO IMPARAR? a
1. (a) Cossa che Gesù el ga dito ai so dissìpoli sora el fin? (b) Cossa Gesù el ga dito che i gavea de far?
POCHI giorni vanti dela morte de Gesù, quatro dei so dissìpoli i ghe ga domandà qual che saria el segnal del fin de questo mondo. (Mat. 24:3) Pol esser che quei dissìpoli i volea saver quando che Gerusalen e el témpio i saria finidi fora. Gesù el ghe ga parlà sora el fin de Gerusalen, del témpio e anca de questo mondo de Sàtana. Gesù el ga dito: “Nissuni i sa, gnanca i àngeli nel cielo, gnanca el Fiol, ma sol el Pare el sa.” Par quela, lu el ga dito che i dissìpoli i gavea de star atenti e seitar desmissiadi. — Mar. 13:32-37.
2. Parché che l’era importante che i dissìpoli de Gesù del primo sècolo i seitesse atenti?
2 I dissìpoli de Gesù del primo sècolo i gavaria de seitar atenti, parché sol cossita, lori i seitaria vivi. Gesù el ga dito: “Quando valtri vederé i esèrsiti acampadi intorno de Gerusalen, savaré che suito la sarà destruta.” Alora, quando questo sucedesse, lori i gavaria de “scampar via par i monti”. (Luc. 21:20, 21) Lu el ga dito ai so dissìpoli cossa che ndaria suceder vanti che Gerusalen la fusse finida fora. Alora, quando i romani i ga fato fora Gerusalen, quei che i ga obedio a Gesù e i ze restadi atenti no i ze mia stati copadi.
3. Cossa che ndaremo imparar in questo stùdio?
3 Ancoi, semo drio viver nei ùltimi giorni del mondo de Sàtana. Par quela, ghemo de star atenti e seitar desmissiadi. Alora, in questo stùdio, ndaremo imparar a veder dela maniera giusta le robe che sucede nel mondo, a star atenti a cossa semo drio far e a come doperar ben el nostro tempo.
VEDI DELA MANIERA GIUSTA QUEL CHE L’È DRIO SUCEDER NEL MONDO
4. Parché che l’è importante star atenti a quel che sucede nel mondo?
4 Noantri stemo atenti a quel che l’è drio suceder nel mondo parché arquante professie dela Bìblia le ze drio realisarse ancoi. L’è tanto importante star atenti cossita! Parché? (1) Gesù el ne ga dito le robe che le ga de suceder vanti che el mondo de Sàtana el sìpia finio fora. (Mat. 24:3-14) (2) El apòstolo Piero el ga dito che ghemo de veder le professie dela Bìblia realisarse parché cossita, la nostra fede la resta pi forte. (2 Pie. 1:19-21) (3) Apocalisse, che l’è el ùltimo libro dela Bìblia, el scomìnsia cole parole: “Rivelassion che Dio el ga dato a Gesù Cristo par mostrar ai so schiavi le robe che le ga de suceder.” (Apo. 1:1) Semo premosi de veder quel che l’è scrito nela Bìblia realisarse e ne piase parlar sora le professie coi altri.
Quando semo drio discorer sora le professie dela Bìblia, cossa che no ghemo mia de far e cossa che podemo far? (Varda el paràgrafo 5.) f
5. (a) Cossa che no ghemo mia de proar far? (b) Cossa ghemo de far? (Varda anca la ilustrassion.)
5 Ma quando semo drio discorer sora le professie dela Bìblia, no ghemo mia de proar indovinar se qualche professia la ze drio suceder. Parché? Parché se femo cossita, podemo rovinar la union che ghen’è nela congregassion. Par esémpio, ancora che scoltemo i governanti parlar che i ndarà finir cole guere e far le persone viver in pace e sensa paura, questo no vol mia dir che la professia de 1 Tessalonissensi 5:3 la ze belche drio suceder. Par quela, quando parlemo dele professie, ghemo de star atenti a quel che l’è belche scrito nele publicassion dela organisassion de Geovà. Cossita, ndaremo giutar la congregassion a seitar “in union nel medèsimo pensamento”. — 1 Cor. 1:10; 4:6.
6. Cossa che imparemo de 2 Piero 3:11-13?
6 L’è importante star atenti ale professie dela Bìblia che le ze drio realisarse ancoi. Ma quel che el apòstolo Piero el ga scrito ne giuta a farlo dela maniera giusta. (Ledi 2 Piero 3:11-13. b) Lu el ga dito che ne ocore gaver ben in mente “la presensa del giorno de Geovà”. Questo no vol mia dir che sol pensemo ‘nel giorno e nela ora’ che vegnarà el Armagedon. Invesse, vol dir che volemo viver de ‘una maniera santa e far robe che mostra che semo fedeli a Dio’. (Mat. 24:36; Luc. 12:40) Alora, volemo viver de una maniera giusta e far tuto quel che podemo par mostrar el nostro grando amor a Geovà. Par quela, ghemo de star atenti a quel che semo drio far.
COSSA CHE VOL DIR STAR ATENTI A QUEL CHE SEMO DRIO FAR?
7. Cossa che vol dir star atenti a quel che semo drio far? (Luca 21:34)
7 Come ghemo visto, Gesù el ga dito che ghemo de star atenti a quel che sucede nel mondo. Ma lu anca el ga dito che ghemo de ‘star atenti’ a quel che noantri semo drio far. (Ledi Luca 21:34. c) Cossa che questo vol dir? Ghemo de star atenti a tuto quel che pol rovinar la nostra amicìssia con Geovà e sforsarse par no assar che questo suceda. Se femo cossita, seitaremo nel amor de Dio. — Pro. 22:3; Giuda 20, 21.
8. Cossa che el apòstolo Paolo el ga dito ai fradei?
8 El apòstolo Paolo el ga dito ai fradei de Èfeso che lori i gavea de star atenti a cossa che i era drio far. Lu el ga dito: “Sté ben atenti par no far come i stùpidi, ma come quei che i ga sabedoria.” (Efe. 5:15, 16) Noantri podemo meter in pràtica questo consìlio se proemo “capir quala che la ze la volontà de Geovà”. (Efe. 5:17) Cossita, anca se Sàtana el proa rovinar la nostra amicìssia con Geovà, noantri saremo boni protegerla.
9. Cossa che ghemo de far par capir quala che la ze “la volontà de Geovà”?
9 La Bìblia no la parla de tuto quel che pol rovinar la nostra amicìssia con Geovà. Par quela, sempre che ndemo far una dessision ghemo de proar capir quala che la ze “la volontà de Geovà”. Se noantri se sforsemo par capir e ‘pensar compagno a Cristo’, saremo boni de far la meio dessision anca se no ghen’è una lege che ne dise cossa far. Ma come che podemo capir cossa che Geovà el vol? Studiar la Bìblia e pensarghe sora. (1 Cor. 2:14-16) Arquante robe che le pol rovinar la nostra amicìssia con Geovà le ze fàcile de veder e altre nò. Vedemo un per de esempi.
10. Che robe le pol rovinar la nostra amicìssia con Geovà?
10 El Diaol l’è el nostro nemigo e lu el seita a doperar arquante robe par rovinar la nostra amicìssia con Geovà. (1 Pie. 5:8) Par esémpio, Sàtana el vol che restemo disgustadi coi altri, che volemo sempre de pi e che deventemo invidiosi, disonesti, orgoliosi e rabiosi. (Gàl. 5:19-21) Altri perìcoli che anca ne ocore star atenti i ze robe come far la ciuca, magnar massa, dirghe su ai altri, vardar violensa o pornografia o far finta de voler smorosar qualchedun anca se no ndaremo mia farlo. (Sal. 101:3) De scomìnsio, fursi questi pensamenti o sentimenti no i ze tanto forte. Ma, ne ocore far qualcossa presto par cavarli via parché i ze come una peste che copa tuto quel che ghen’è de bon intorno. — Tia. 1:14, 15.
11. A che perìcolo ghemo de star atenti, e parché?
11 Nantro perìcolo che ghen’è l’è star massa tempo insieme de persone che no le serve mia a Geovà. (2 Cor. 6:15) Parché? Parché se no stemo atenti ndaremo pensar e far le robe compagno a lore. Varda un esémpio. Metemo dir che te laori insieme a qualchedun che no serve mia a Geovà. Come te vol che lu el pense robe bone dele Testimònie de Geovà, te ghe mostri bontà e te ghe giuti. Dele volte, te vè anca magnar con lu de mesdì. Dopo de un tempo, te sì drio farlo tuti i giorni. Una volta, quando lu el parlea robe sbaliade, te fei finta de gnanca scoltar. De scomìnsio, te fea fastìdio, ma adesso, no te fà pi gnente. Un giorno, lu el te convida par ndar bever qualcossa dopo del laoro, e te vè. Quando te te nicordi, te sì drio pensar compagno a lu. Alora, suito te ndarè far le medèsime robe che lu el fà. Sicuro che volemo tratar a tute le persone con bontà. Magari, ghemo de ricordarse che ndemo drio ale persone che stemo insieme. (1 Cor. 15:33) Cossa che imparemo? Compagno Gesù el ga dito, ghemo de star atenti a quel che semo drio far. Alora, se vedemo che qualcossa pol rovinar la nostra amicìssia con Geovà, ne toca suito scampar via.
DOPERA EL TO TEMPO DELA MEIO MANIERA
12. Cossa che i primi dissìpoli de Gesù i ga fato fin che Gerusalen e el témpio i fusse finidi fora?
12 I primi dissìpoli de Gesù no i ze restadi sensa far gnente fin che Gerusalen e el témpio i fusse finidi fora. Parché? Parché Gesù el ghe ga dato un laoro de far. Alora, i dissìpoli de Gesù i ga predicà le bone notìssie “in Gerusalen, in tuta la Giudea e Samaria e fin la parte pi distante dela tera”. (Ati 1:6-8) Questo l’era un laoro pròpio grando! Sicuro che lori i ga doperà el so tempo dela meio maniera, parché i ze stati boni de finirlo.
13. Parché che ghemo de pensar ben come semo drio doperar el nostro tempo ancoi? (Colossensi 4:5)
13 Ledi Colossensi 4:5. d Noantri ghemo de pensar ben come semo drio doperar el nostro tempo ancoi. Parché? Parché arquante robe le pol suceder de colpo e podemo fin morir. — Ecl. 9:11.
Come che podemo doperar el tempo dela meio maniera? (Varda i paràgrafi 14 e 15.)
14-15. Come che podemo doperar el nostro tempo dela meio maniera? (Ebrei 6:11, 12) (Varda anca el ritrato.)
14 La meio maniera de doperar el nostro tempo la ze far quel che Geovà el vol e far pi forte la nostra amicìssia con lu. (Gioani 14:21) Par quela, ghemo de esser ‘forti, firmi e gaver sempre tanto da far nel laoro del Signor’. (1 Cor. 15:58) Cossita, anca se morimo o se riva el fin, saremo sicuri che ghemo fato el nostro meio a Geovà. — Mat. 24:13; Rom. 14:8.
15 Gesù el fà pròpio quel che el ga prometesto, parché l’è drio giutar i so dissìpoli a predicar le bone notìssie sora el Regno in tuta la Tera. Par esémpio, par meso dela organisassion de Geovà, lu l’è drio insegnarne a predicar e el ne dà tute le robe che ne ocore par farlo, come le publicassion e i vìdei. (Mat. 28:18-20) Ma anca noantri ghemo de far qualcossa. Ghemo de far el nostro meio par predicar e insegnar ai altri e star sempre atenti. Cossita, la nostra speransa la ndarà giutarne a seitar fedeli “fin el fin”. — Ledi Ebrei 6:11, 12. e
16. Cossa ghemo de far?
16 Pol esser che pensemo che el fin l’è drio meterghe massa par rivar. Ma ne ocore ricordarse che Geovà el finirà col mondo de Sàtana nela ora giusta. (Aba. 2:3) Parché? Parché Geovà el ga belche scoliesto el giorno e la ora par finir fora col mondo de Sàtana. In quel giorno, vedaremo suceder tante professie che le ze nela Bìblia. Alora, ghemo de ‘spetar con passiensa el Dio dela nostra salvassion’. — Mic. 7:7.
CÀNTICO 139 Imagìnate nel Paradiso
a In questo stùdio, ndaremo imparar a seitar atenti e a veder le robe che le ze drio suceder nel mondo dela maniera giusta. Vederemo anca come che podemo star atenti a quel che semo drio far e come doperar el nostro tempo dela meio maniera.
b (2 Piero 3:11-13) Come tute queste robe le sarà disfate de questa maniera, penséghe sora che tipo de persone valtri gavé de esser. Gavé de comportarve de una maniera santa e far robe che dimostre che sì fedeli a Dio, 12 intanto che valtri speté e gavé ben in mente la presensa del giorno de Geovà. Par causa de questo giorno, i cieli i sarà finidi fora con fogo, e i elementi i deventarà tanto caldi che i sarà disfati. 13 Ma de acordo cola so promessa, noantri spetemo novi cieli e una nova tera, e in questi ghen sarà la giustìssia.
c (Luca 21:34) Ma sté atenti e no sté assar el vostro cuor con ancora de pi peso par causa de magnar massa, de bever massa e dele ansietà dela vita. Cossita, quel giorno no’l ve ciaparà de colpo
d (Colossensi 4:5) Seité a far tuto con sabedoria con quei che no i fà parte dela congregassion e gavé de doperar el vostro tempo dela meio maniera.
e (Ebrei 6:11, 12) Ma volemo che tuti valtri seité a sforsarve del bon par esser pròpio sicuri dela vostra speransa fin el fin. 12 Cossita, no sìpie pegri, ma fé compagno de quei che con fede e passiensa i riceve le promesse.
f ILUSTRASSION: (De sora) Un casal l’è drio vardar le notìssie nela television. Lori i ga le so idee sora cossa vol dir le robe che ze drio suceder nel mondo. Pi tardi, dopo dela riunion, lori i ghe conta ai altri quel che i pensa. (De soto) Un casal l’è drio vardar un relatòrio del Corpo Governante par saver la maniera giusta de capir le professie dela Bìblia. Nela predicassion, lori i dopera le publicassion dela Bìblia che el schiavo fedele el ne dà.
