MÈRCORE 18 de genaro de 2023, nel site jw.org l’è vegnesto fora un anùnsio spessial. Questo anùnsio el disea che i fradei Gage Fleegle e Jeffrey Winder i ndaria far parte del Corpo Governante dele Testimònie de Geovà. Tuti due fradei i ze drio servir a Geovà fà tanti ani.

El fradel Fleegle l’è stà slevà nel oeste dela Pensilvània, nei Stati Unidi. I so genitori i era belche Testimònie de Geovà. Quando lu l’era gióveno, lu e la so fameia i se ga cambià par una pìcola cità in colònia par predicar ndove ghen’era de pi bisogno. Poco dopo, nel giorno 20 de novembre de 1988, el se ga batesà.

So pare e so mare del fradel Fleegle i lo ga sempre incoraià de far de pi par Geovà. Tante volte, lori i convidea superintendenti de sircuito e beteliti nela so casa. Par quela, el fradel Fleegle el ga podesto veder che questi fradei e sorele i era pròpio contenti de far de pi. Poco dopo del batésimo, nel giorno 1 de setembre de 1989, el ga scominsià a esser pioniero regolar. Una roba che el volea far de quando el gavea 12 ani l’era ndar laorar in Betel. Alora, dopo due ani del so batésimo, in otobre de 1991, lu el ga scominsià a laorar nel Betel de Brooklyn.

Nel Betel, el fradel Fleegle el ga laorà nela incadernassion par oto ani. Dopo, lu l’è stà mandà al Departamento de Servìssio. In questo tempo, lu el ga fato parte de una congregassion de léngua russa par arquanti ani. Nel ano 2006, el se ga maridà con Nadia, che la ze ndata anca ela a Betel. Lori i ga giutà nela predicassion in portoghese, e par de pi de diese ani, nela predicassion in spagnol. Dopo tanti ani nel Departamento de Servìssio, el fradel Fleegle l’è ndato servir nel Scritòrio dela Comission de Insegno, e dopo, nel Scritòrio dela Comission de Servìssio. In marso de 2022, lu el ga ricevesto el laoro de giutar la Comission de Servìssio del Corpo Governante.

 El fradel Winder l’è stà slevà in Murrieta, Califòrnia, nei Stati Unidi. So pare e so mare i era belche Testimònie de Geovà, e lu el se ga batesà nel giorno 29 de marso de 1986. Nel mese dopo, el ga dessidio esser pioniero aussiliar. Ghe ga piasesto tanto che el ga volesto seitar par altri mesi. Dopo, nel giorno 1 de otobre de 1986, lu el ga scominsià come pioniero regolar.

Quando l’era gióveno, el fradel Winder l’è ndato catar i so due fradei pi veci che i era drio laorar in Betel. Ndar là ghe ga fato vegner voia de far la petission par ndar in Betel quando el deventesse pi grando. Cossita, nel maio de 1990, lu l’è stà convidà par ndar laorar nel Betel de Wallkill.

In Betel, el fradel Winder el ga laorà in diversi departamenti. Par esémpio, nela netìssia, nela fasenda e nel Scritòrio de Betel. Nel 1997, lu el se ga maridà cola Angela, e lori due i laora insieme in Betel de quel ano. Nel 2014, lori i se ga cambià par Warwick. Lì, el fradel Winder el ga giutà nela costrussion dei predi dela sede mondial. Nel 2016, lori i se ga cambià par el Sentro de Istrussion dela Tore de Vigia de Patterson. Lì, el fradel Winder el ga laorà nei Servissi de Àudio e Vìdeo. Quatro ani dopo, i ze ritornadi a Warwick, e lu el ga ricevesto el laoro de giutar nel Scritòrio dela Comission del Personal. In marso de 2022, lu el ga ricevesto el laoro de giutar la Comission del Personal del Corpo Governante.

Sicuro che savemo che questi bravi fradei i ze “presenti” de Dio. (Efe. 4:8) Par quela, ndemo pregar che Geovà li benedissa tanto e li giute a seitar a far un bel laoro par el Regno.