1. Quando che tuti i untadi i sarà in cielo?

 TANTI ani indrio, i servi de Geovà i se domandea: ‘Quando che i untadi che i ze ancora nela Tera i ndarà al cielo?’ Lori i pensea che i untadi i seitaria a viver qua nela Tera in Paradiso par un tempo dopo el Armagedon. Ma la Sentinela de 15 de lùlio de 2003 la ga dito che tuti i untadi i sarà nel cielo vanti che el Armagedon el scomìnsie. — Mat. 24:31.

2. (a) Che domanda fursi se femo? (b) Cossa che ndaremo imparar in questo stùdio?

² Ma fursi noantri se domandemo: ‘Cossa che ndarà suceder coi servi de Dio che i seitarà a viver nela Tera nela “granda tribolassion”?’ (Gio. 10:16; Mat. 24:21) Fursi arquanti i se domanda chi che ndarà tenderne e giutarne a saver cossa far dopo che i untadi i va al cielo. Pol esser che i pense cossita par causa de due esempi che ghen’è nela Bìblia. Adesso, ndaremo imparar sora queste due stòrie e veder parché che no ne ocore preocuparse.

COSSA CHE NO NDARÀ MIA SUCEDER COI SERVI DE GEOVÀ?

3-4. Cossa che fursi arquanti i se domanda, e parché?

³ Come ghemo visto, arquanti i se domanda se i servi de Geovà nela Tera i sarà boni de seitar leai dopo che quei  del Corpo Governante i va al cielo. Parché? Pol esser che ghe vien in mente due stòrie che ghen’è nela Bìblia. La prima stòria la ze del prinsipal sasserdote Geoiada, che l’era un omo leal a Geovà. Lu e la so dona, Geosabeate, i ga protegesto un bambin de nome Geoàs e lo ga giutà a deventar un bravo rè. Intanto che Geoiada l’era vivo, Geoàs el ga fato polito. Ma dopo la so morte, Geoàs el ga scominsià a far tante robe sbaliade, come ndar drio a prinsipi che i fea robe brute, e el se ga fermà de adorar a Geovà. — 2 Cró. 24:2, 15-19.

⁴ Quel’altra stòria la ze dei dissìpoli de Gesù del secondo sècolo. In quela època, Gioani l’era lu lu sol parché tuti i altri apòstoli i era belche morti. El apòstolo Gioani el ga giutà tanto i dissìpoli de Gesù a seitar leai. (3 Gio. 4) Cossita come i altri apòstoli i gavea fato, lu el se ga sforsà tanto par proteger i fradei dele busie dei apòstati. (1 Gio. 2:18; varda anca la nota de stùdio in 2 Tes. 2:7.) Ma dopo che Gioani l’è morto, tanti i ze ndati drio ale busie de quei apòstati. Par quela, un per de ani dopo, ghen’era belche persone che insegnea robe sbaliade rento le congregassion.

5. Cossa che no ghemo mia de pensar?

⁵ No ghemo mai de pensar che i servi de Geovà i farà compagno de Geoàs e dei dissìpoli de Gesù dopo la morte dei apòstoli. Invesse, ghemo de esser sicuri che i servi de Geovà i seitarà a adorarlo dela maniera giusta e che lu sempre li tenderà quando tuti i untadi i ndarà al cielo. Parché che podemo esser sicuri de questo?

I SERVI DE GEOVÀ I SEITARÀ A ADORARLO DELA MANIERA GIUSTA

6. Sora che tre èpoche ndaremo studiar adesso?

⁶ Parché che podemo esser sicuri che seitaremo a adorar a Geovà dela maniera giusta, anca cole dificoltà che infrontaremo? Parché la Bìblia la mostra che vivemo nte una època tanto difarente de Geoàs e dei dissìpoli del secondo sècolo. Adesso, ndaremo imparar de pi sora: (1) La època dei israeliti, (2) la època dopo la morte dei apòstoli, e (3) ‘el tempo de meter aposto tute le robe’, o sia, i nostri giorni. — Ati 3:21.

7. Cossa che ga dato coraio a arquanti israeliti?

⁷ La època dei israeliti. Moisè el ga dito ai israeliti un tempo vanti dela so morte: ‘Parché mi sò tanto ben che, dopo dela me morte, sicuro che valtri ndaré far quel che l’è rugno e no ndaré pi par la strada che mi ve go mandà.’ (Deu. 31:29) Moisè anca ghe ga dito che lori i saria castigadi e menadi fin una nassion nemiga se i dessidisse desobedir a Geovà. (Deu. 28:35, 36) Sarà che ga sucedesto quel che Moisè el gavea dito? Si, parché par tanti ani, arquanti rè i ga desobedio a Geovà e i ga fin adorà falsi dèi. Par quela, Geovà el ga castigà el so pòpolo e no’l ga assà che gnanca un rè el governesse la nassion. (Eze. 21:25-27) Ma veder che quel che Geovà el gavea dito l’era drio suceder ga dato coraio a arquanti israeliti par seitar a adorarlo. — Isa. 55:10, 11.

8. Parché che belche se spetea che ghen saria falsi dissìpoli nele congregassion nel secondo sècolo? Spiega.

⁸ La època dopo la morte dei apòstoli.  Nel primo sècolo, i apòstoli Paolo, Piero e Gioani i ga dito che arquanti falsi dissìpoli i era drio insegnar robe sbaliade nele congregassion. (2 Tes. 2:3, 7; 2 Pie. 2:1; 1 Gio. 2:18) Nel secondo sècolo, ghen’era belche tanti falsi dissìpoli nele congregassion che i ga scominsià a ndar drio le religion false. Ma belche se spetea che questo ndaria suceder. Parché? Parché Gesù el gavea dito che ghen saria tanti falsi dissìpoli che i scominsiaria a insegnarghe busie ai altri. — Mat. 7:21-23; 13:24-30, 36-43.

9. In che èpoche semo drio viver, e cossa che sucede?

⁹ “La època de meter a posto tute le robe.” La nostra època la ze tanto difarente dela època dei israeliti e dei dissìpoli del secondo sècolo. La època che vivemo la ga nome “ùltimi giorni” e ‘època de meter a posto tute le robe’. (Ati 3:21; 2 Tim. 3:1) Queste due èpoche le ga scominsià in 1914. Cossa che sucede nela ‘època de meter a posto tute le robe’? Geovà el ga ‘metesto a posto le robe’ nel cielo quando el ga scoliesto Gesù, un dissendente de Davi, par esser Rè del so Regno. Geovà anca el ga giutà i so servi a tornar a adorarlo dela maniera giusta. (Isa. 2:2-4; Eze. 11:17-20) La ‘època de meter aposto tute le robe’ la seitarà fin che Gesù el giutarà le persone a deventar perfete e a far dela Tera un paradiso. Ma sarà che i servi de Geovà i sarà boni de seitar a adorarlo dela maniera giusta?

10. (a) De cossa che la Bìblia la ne assa sicuri? (Isaia 54:17) (b) Parché che l’è bon pensar sora queste professie?

¹⁰ Varda queste professie. Isaia 54:17 a (Ledi.) dise: “Gnanca una arma fata contra ti la ndarà ben.” Isaia 54:13, 14 dise: ‘Geovà el insegnarà tuti i to fioi, e lori i gavarà tanta pace. Ti te sarè pròpio firme parché te fè quel che l’è giusto. Ti no te gavarè gnanca una paura.’ Semo belche drio veder queste professie realisarse, mia vera? Podemo esser sicuri che gnanca Sàtana, che l’è el “dio de questo mondo”, el pol intrigarne de insegnar le persone sora Geovà. (2 Cor.  4:4) Noantri semo drio adorar a Geovà dela maniera giusta ancoi e seitaremo a adorarlo cossita par sempre. Gnanca una roba la podarà finir coi servi de Geovà!

COSSA CHE NDARÀ SUCEDER?

11. Cossa che ne assa sicuri che no saremo mia abandonadi dopo che i untadi i va al cielo?

¹¹ Cossa che ndarà suceder con noantri dopo che i untadi i va al cielo? Ghemo de ricordarse che Gesù l’è el nostro Pastor e la autorità dela congregassion. Lu el ga dito: “El vostro Lìder l’è un sol, el Cristo.” (Mat. 23:10) El nostro Rè, Gesù, l’è belche drio governar e sempre el farà tuto dela meio maniera. Par quela, no ne ocore gaver paura de gnente qua nela Tera. L’è vera che no savemo mia come che Gesù el ndarà dirne cossa gavaremo de far. Alora, ndemo veder un per de esempi dela Bìblia che i pol giutarne a restar pi tranquili.

12. (a) Come che Geovà el ga tendesto dei so servi dopo che Moisè l’è morto? (b) Come che Geovà el ga tendesto dei so servi dopo che Elia l’è ndato a Giudà? (Varda anca la ilustrassion.)

¹² Moisè l’è morto prima che i israeliti i ndesse rento la Tera Prometesta. Alora sarà che lori i ze restadi persi e sensa saver cossa far? Nò. Se lori i seitesse leai, Geovà el ndaria tenderli. Come? Tanto tempo prima, Moisè el gavea belche insegnà e parecià Giosuè par tender del pòpolo. (Éso. 33:11; Deu. 34:9) Ghen’era anca bravi òmini che i tendea de grupi pi pìcoli e pi grandi. (Deu. 1:15) Alora, podemo esser sicuri che Geovà l’era drio tender tanto ben del so pòpolo. Noantri anca podemo imparar de quel che ga sucedesto con Elia. Par tanti ani, lu el ga giutà i israeliti a adorar a Geovà dela maniera giusta. Ma ghe ga tocà ndar via quando Geovà el ghe ga dato un laoro in Giudà. (2 Rè 2:1; 2 Cró. 21:12) Ma lu el gavea belche parecià Eliseo par tender dei israeliti. Ghen’era anca i fioi dei profeti, che i gavea imparà a tender del pòpolo. (2 Rè 2:7) Cossita, vedemo che Geovà el ga doperà tanti òmini fedeli par far quel che el volea e par proteger i so servi.

13. De acordo con Ebrei 13:5b, de cossa che podemo esser sicuri? (Varda anca la ilustrassion.)

¹³ Alora, cossa pénsito che sucederà quando i untadi i ndarà al cielo? La Bìblia  la dise che Geovà mai el va assarne e mai el va abandonarne. (Ledi Ebrei 13:5b. b) Cossita come Moisè e Elia i ga fato, el Corpo Governante l’è drio insegnar altre persone a tender dei servi de Dio. Par esémpio, fà belche ani che el Corpo Governante l’è drio far scole par insegnar ansiani, superintendenti de sircuito, fradei de Comission de Filiai, de Betel e altri. El Corpo Governante anca l’è drio pareciar i assistenti dele comission. Questi bravi fradei belche i ga tanto laoro de far e i ze pareciadi par tender dei servi de Dio nel futuro.

14. Cossa che ghemo imparà fin adesso?

¹⁴ Cossa che ghemo imparà fin adesso? I untadi che ghen’è nela Tera i ndarà al cielo vanti de finir la granda tribolassion. Ma no saremo mia abandonadi parché Gesù l’è drio tender de noantri. Alora, podemo esser sicuri che seitaremo a adorar a Geovà dela maniera giusta. In quela època, un grupo de nassion che ga nome Goghe de Magoghe vegnarà contra i servi de Geovà. (Eze. 38:18-20) Ma lori no i sarà mia boni finir con noantri, parché Geovà el ndarà sarlvarne. El apòstolo Gioani el ga visto nte una vision che “una mùcia de gente”, o sia, i servi de Dio qua nela Tera, i ‘vegnaria fora la granda tribolassion’. (Apo. 7:9, 14) Alora, podemo esser sicuri che Geovà el ndarà salvarne.

15-16. (a) De acordo con Apocalisse 17:14, cossa che i untadi i ndarà far nela guera del Armagedon? (b) De cossa che semo sicuri?

¹⁵ Ma pol esser che arquanti i se domande: ‘Cossa che i untadi i ndarà far in cielo?’ La Bìblia la mostra che quando i governi de questo mondo i farà guera “contra el Piegoreto”, i “scoliesti” e “fedeli”, o sia, i untadi, i ndarà giutarlo a vinser questi nemighi. (Ledi Apocalisse 17:14. c) Alora, un dei primi  laori che el ùltimo untà che el ndarà al cielo el gavarà de far sarà lotar. Prima de deventar servi de Geovà, tanti i ze ndati al esèrsito e a guere. Dopo che i ga imparà dela Bìblia, lori i ga assà indrio tute queste robe. (Gàl. 5:22; 2 Tes. 3:16) Ma dopo che i va al cielo, lori i ndarà lotar insieme de Gesù e dei àngeli par finir fora coi nemighi de Dio. Sicuro che sarà un laoro tanto importante!

¹⁶ Proa pensar: Ancoi i untadi i ga belche una bela età e no i ga pi tanta forsa. Ma dopo che i sarà ressussitadi par viver in cielo, lori i sarà pròpio poderosi come i àngeli e mai pi i ndarà morir. Alora, lori i ndarà lotar insieme col nostro Rè, Gesù Cristo. Dopo el Armagedon, lori i ndarà laorar insieme de Gesù par giutar le persone a deventar perfete in Paradiso. Semo sicuri che i untadi i sarà boni de giutarne de pi nel cielo de che quando i era qua nela Tera.

17. Cossa che ne assa sicuri che Geovà el ndarà salvar i so servi nel Armagedon?

¹⁷ Gheto speransa de viver in Paradiso qua nela Tera? Alora, cossa che te toca far quando scominsiarà el Armagedon? Fìdate in Geovà e fà quel che el te dise! Par esémpio, Isaia 26:20 dise: “Ndé rento ai vostri quarti, me pòpolo, e seré le vostre porte de drio de valtri. Resté sconti una scianta, fin che quela ràbia la va via.” Cossita, capimo che tuti i servi de Geovà i gavarà la so protession nel Armagedon. Par quela, compagno al apòstolo Paolo, noantri semo sicuri che ‘gnanca governi, gnanca robe adesso, gnanca robe par vegner i sarà boni de spartirne del amor de Dio’. (Rom. 8:38, 39) Alora, ricòrdate sempre che Geovà el te vol tanto ben e che mai el ndarà abandonarte!