PARCHÉ che arquanti scritori dela Bìblia i ga parlà le medèsime robe diverse volte? Varda tre robe che ne giuta a capir la risposta.

Quando l’è stà scrito. Nel passà, pròpio pochi israeliti i gavea le Scriture casa. Quei che no i gavea una còpia dele Scriture sol i ndaria scoltar la Lege quando i fusse davanti el tabernàcolo insieme ai altri israeliti. (Deu. 31:10-12) Lori ghe tochea star tanto tempo in pié e in meso a tanta gente. Par quela, l’era tanto fadiga star atenti a tuto quel l’era ledesto dela Lege. (Nee. 8:2, 3, 7) Alora, quando lori i scoltea la medèsima roba nantra volta, i era pi boni de ricordarse e meter in pràtica quel che l’era ledesto. Scoltar le medèsime parole de pi de una volta li giutea a gaver ben in mente quel che Geovà el volea che lori i fesse. — Lev. 18:4-22; Deu. 5:1.

Come l’è stà scrito. Nei Salmi, nel Càntico de Salomon, in Lamentassion e in altri libri dela Bìblia, ghen’è tanti càntichi. Nel refron de arquanti càntichi, se parla arquante volte le medèsime parole. Cossita, l’è pi fàcile ricordarse de quel che dise el càntico. Par esémpio, varda el Salmo 115:9-11: ‘Ò Israel, fìdate in Geovà. Lu el te giuta e el te protege. Ò fameia de Aron, fìdate in Geovà. Lu el te giuta e el te protege. Ò ti che te ghè grando rispeto par Geovà. Lu el te giuta e el te protege.’ Sicuro che parlar diverse volte queste robe ga giutà i cantori a meter queste parole nel so cuor.

Parché che l’è stà scrito. I scritori dela Bìblia i ga parlà robe che le era importante una volta drio man. Par esémpio, Geovà el ga dito che i israeliti no i podea mia magnar sangue, e el volea che lori i capisse che la vita la ze nel sangue. (Lev. 17:11, 14) Par quela, lu el ghe ga dito a Moisè de spiegar questa lege al pòpolo diverse volte. Tanti ani dopo, i apòstoli e i ansiani de Gerusalen i ga scrito cossa che i dissìpoli i gavea de far e cossa che no i gavea mia de far par contentar a Geovà. Nantra volta, lori i ga scrito che quei dissìpoli no i podea mia acetar el sangue. — Ati 15:20, 29.

Ancora che arquanti scritori i gàpia parlà la medèsima roba diverse volte, Geovà no’l vol che seitemo a dir sempre la stessa roba nele nostre orassion. Par esémpio, Gesù el ga dito: “Quando te fè orassion, no stà mia dir le medèsime parole una volta drio l’altra.” (Mat. 6:7) Lu anca el ga spiegà sora quel che podemo parlar quando preghemo a Geovà. (Mat. 6:9-13) Alora, ancora che no seitemo doperar le medèsime parole una volta drio man quando preghemo, podemo parlar sora una roba diverse volte a Geovà. — Mat. 7:7-11.

Ghemo visto parché ghen’è le medèsime robe de pi de una volta nela Bìblia. Questa l’è una dele bele maniere che Geovà, el Grandioso Istrutor, ne insegna quel che l’è meio par noantri. — Isa. 48:17, 18.