1. Cossa che ne giuta a capir che ghemo bisogno de Geovà par tenderne?

 METEMO dir che te sì in meso el mato. Intorno a ti, ghen’è piante con velen, tanti busi, bisseti che i porta malatie e bèstie cative. Sicuro che se ghen fusse qualchedun che cognossesse ben el posto, te ndarissi sentirte pi calmo. El mondo de ancoi l’è bruto cossita, parché intorno a noantri ghen’è tante robe che pol rovinar la nostra amicìssia con Dio. Ma ghemo Geovà che el ne protege de tuto quel che l’è bruto e che el ne giutarà a esser nel novo mondo.

2. Come che Geovà el ne insegna e el ne tende?

² Come che Geovà el ne insegna e el ne tende ancoi? Lu el dopera la so Parola, la Bìblia, e persone che el ga scoliesto. Par esémpio, lu el dopera el “schiavo fedele e prudente” par giutarne a capir la Bìblia e a far bone dessision. (Mat. 24:45) Geovà anca el dopera altri bravi òmini, come ansiani e superintendenti de sircuito. Lori i ne incoraia e i ne dà bei consili che i ne giuta a dàrghene fora cole dificoltà. Sicuro che ghe demo tanto valor a tuto quel che Geovà l’è drio far par giutarne in questi ùltimi giorni. Tuto quel che lu el fà ne giuta a esser so amighi e a esser felici adesso e par sempre.

3. Cossa che ndaremo imparar in questo stùdio?

³ Ma, dele volte, pol esser fadiga ndar drio ale orientassion de Geovà. Parché? Parché le ricevemo de òmini imperfeti, e fursi quel che i ne dise de far no l’è quel che ne piaseria. Pol esser che anca ne par che i so consili no i ze tanto boni. Ma se ne vien fora sentimenti cossita, ghemo de esser ancora pi sicuri che l’è Geovà che l’è drio tender de noantri e che l’è pròpio importante obedirghe. Par giutarne a fidarse del tuto, in questo stùdio ndaremo imparar (1) come che  Geovà el ga tendesto del so pòpolo nel passà, (2) come che lu l’è drio tenderne ancoi, e (3) parché che l’è importante ndarghe drio ale so orientassion.

COME CHE GEOVÀ EL GA TENDESTO DEI ISRAELITI?

4-5. Come che Geovà el ga mostrà che l’era drio doperar Moisè par tender dei israeliti? (Varda la ilustrassion dela prima pàgina.)

⁴ Geovà el ga scoliesto Moisè par liberar i israeliti del Egito. E tuti i podea veder che l’era Geovà che l’era drio tenderli parché lu el doperea una colona de nùvola de giorno e una colona de fogo de note. (Éso. 13:21) Moisè el ndea drio quela colona. E una volta, la colona li ga menadi nel Mar Rosso. El pòpolo l’è restà spaurà quando el esèrsito dei egipsi l’era drio vegnerghe contra e no ghen’era come scampar via. Lori i ga pensà che Moisè el gavea fato un bruto sbàlio. Ma l’era stà Geovà che li gavea menadi fin quel posto parché el volea mostrarghe el so grando poder. — Éso. 14:2, 26-28.

⁵ Moisè el ga seità a fidarse nele orientassion de Geovà par giutar i israeliti nei 40 ani che i ze restadi in meso el deserto. a Par un tempo, Geovà el ga assà la colona de nùvola par sora dela tenda de Moisè, ndove tuti i israeliti i podea vederla. (Éso. 33:7, 9, 10) Cossita, tuti i podea esser sicuri che Geovà l’era drio doperar Moisè par tenderli. Geovà el parlea con Moisè par meso de quela colona, e dopo, Moisè el ghe insegnea al pòpolo. — Sal. 99:7.

6. Sarà che i israeliti i ga acetà le orientassion de Moisè? (Nùmeri 14:2, 10, 11)

⁶ Ancora cossita, tanti israeliti no i ga acetà che Geovà l’era drio parlar par meso de Moisè. (Ledi Nùmeri 14:2, b 10, 11. c) Alora, una volta drio man, lori i ze ndati contra Moisè. Par quela, Geovà no li ga assadi ndar rento la Tera Prometesta. — Nùm. 14:30.

7. Parla de esempi de israeliti che i ga acetà le orientassion de Geovà. (Nùmeri 14:24) (Varda anca la ilustrassion.)

⁷ Ma arquanti israeliti i ga acetà le orientassion de Geovà. Par esémpio, Geovà el ga visto che Calebe l’era leal a lu ‘de tuto el cuor’. (Ledi Nùmeri 14:24. d) Par quela, Geovà lo ga benedio e ghe ga dato un bel posto de star in Canaan. (Gios. 14:12-14) Anca i fioi de quei israeliti i ga obedio a Geovà. Dopo dela morte de Moisè, Giosuè l’è stà scoliesto par tender del pòpolo e quei israeliti ‘i lo ga rispetà par tuta la so vita’. (Gios. 4:14) Alora, Geovà li ga benedidi e li ga menadi fin la tera che lu el ghe gavea prometesto. — Gios. 21:43, 44.

8. Come che Geovà el ga giutà el so pòpolo nela època dei rè? (Varda anca la ilustrassion.)

⁸ Un tempo dopo, Geovà el ga doperà giuisi par giutar el so pòpolo. Nela època dei rè, lu el ga doperà profeti. I rè che i era fedeli i ndea drio ai consili dei profeti de Dio. Par esémpio, dopo che Davi el ga fato un bruto pecato, lu el ga acetà el forte consìlio del profeta Natan. (2 Sam.  12:7, 13; 1 Cró. 17:3, 4) El rè Geosafà el se ga fidà in quel che el profeta Giaaziel el ghe ga dito e el ga incoraià i giudei a acetar le orientassion dei profeti de Dio. (2 Cró. 20:14, 15, 20) E quando el rè Ezechia l’era drio infrontar bruti colpi, lu l’è ndato drio el aiuto del profeta Isaia. (Isa. 37:1-6) Sempre che i rè i ndea drio ale orientassion de Geovà, lori i era benedidi e i gavea protession. (2 Cró. 20:29, 30; 32:22) Lori i podea esser sicuri che Geovà el doperea i profeti par giutarli. Ancora cossita, tanti dei rè e tanti israeliti no li ga mia scoltadi. — Ger. 35:12-15.

COME CHE GEOVÀ EL GA TENDESTO DEI PRIMI DISSÌPOLI DE GESÙ?

9. Come che Geovà el ga tendesto dei primi dissìpoli de Gesù? (Varda anca la ilustrassion.)

⁹ Come che Geovà el ga tendesto dei primi dissìpoli de Gesù? Lu el ga scoliesto Gesù come la ‘autorità dele congregassion’. (Efe. 5:23) Ma Gesù no’l parlea con cada un dei so dissìpoli par dirghe cossa far. Invesse, lu el ga doperà i so apòstoli e i ansiani in Gerusalen par giutarli. (Ati 15:1, 2) E i so apòstoli i ga scoliesto arquanti òmini par laorar come ansiani nele congregassion. — 1 Tes. 5:12; Tito 1:5.

10. (a) Sarà che i primi dissìpoli i ga acetà la orientassion dei apòstoli? (Ati 15:30, 31) (b) Parché che arquante persone del passà no le ga acetà quei che Geovà el gavea scoliesto par tenderle? (Varda el quadro “ Parché che arquanti no i aceta quei che Geovà el ga scoliesto par tender dei so servi?”)

¹⁰ Sarà che i primi dissìpoli i ga acetà la orientassion dei apòstoli? Quasi tuti i ga acetà e i ga obedio. Par quela che la Bìblia la dise che lori i ze ‘restadi contenti e incoraiadi’. (Ledi Ati 15:30, 31. e) Ma come che Geovà l’è drio tender dei so servi nei nostri giorni?

COME CHE GEOVÀ EL TENDE DEI SO SERVI ANCOI?

11. Parla de un esémpio che mostra come Geovà l’è drio tender dei so servi ancoi.

¹¹ Geovà el seita a tender dei so servi. Ancoi, lu el dopera la so Parola, la Bìblia, e el so Fiol, che l’è la ‘autorità dele congregassion’.  Sarà che podemo esser sicuri che lu el dopera òmini par tender dele congregassion ancoi? Sicuro che si. Varda par esémpio, quel che ga sucedesto con Charles Russell e altri òmini che i studiea la Bìblia insieme. Dopo del ano 1870, lori i ga capio che el ano de 1914 el saria tanto importante par el Regno de Dio. (Dan. 4:25, 26) E podemo esser sicuri che Geovà li ga giutadi a capir le professie dela Bìblia. Parché? Parché nel ano de 1914, el Regno de Dio el ga scominsià a governar. In quel ano, ga sucedesto la Prima Guera Mondial, e de lì avanti, ghen’è cada volta de pi malatie, teremoti e fame. (Luc. 21:10, 11) Semo sicuri che Geovà el ga doperà bravi òmini par giutar el so pòpolo.

12-13. Cossa la organisassion la ga fato nela època dela Seconda Guera Mondial?

¹² Varda anca quel che ga sucedesto nela època dela Seconda Guera Mondial. I fradei dela sede mondial i ga studià el testo de Apocalisse 17:8, e i ga capio che el Armagedon no’l vegnaria in quela època. Invesse, ghen saria un poco de pace e lori i podaria predicar ancora de pi. Cossa gali fato? La organisassion la ga fato la Scola Bìblica de Gileade par pareciar missionari par predicar ancora meio. Alora, tanti missionari i ze ndati predicar in diversi posti in tuto el mondo ancora in meso la guera. Nantra roba che el schiavo fedele e prudente el ga fato l’è el Curso do Ministério Teocrático f par giutar tuti nela congregassion a esser pi boni de parlar ai altri sora la Bìblia. Cossita, i fradei i ze restadi ancora pi pareciadi par far el laoro che ghen saria pi avanti.

¹³ Quando pensemo in tuto quel che l’è stà fato in quela època, capimo che Geovà l’era drio giutar el so pòpolo. Dela Seconda Guera Mondial avanti, i servi de Geovà i ze stati boni de predicar in tanti paesi, e persone de tuto el mondo le ga cognossesto la verità.

14. De acordo con Apocalisse 2:1, parché che podemo fidarse nele orientassion dela organisassion de Geovà? (Varda anca la ilustrassion.)

 ¹⁴ Ancoi, i fradei del Corpo Governante i va drio ale orientassion de Gesù. La Bìblia la dise che questi ansiani untadi i ze “nela man drita” de Cristo. (Ledi Apocalisse 2:1. g) Lori sempre i proa saver se quel che i fà l’è pròpio quel che Gesù el vol. E i superintendenti de sircuito e i ansiani i dopera quel che i fradei untadi i dise par tender dele congregassion. h Savemo che tuti i ansiani i ze imperfeti e i pol far sbali. Ma Moisè, Giosuè e anca i apòstoli i ga fato sbali. (Nùm. 20:12; Gios. 9:14, 15; Rom. 3:23) Ancora cossita, podemo esser sicuri che Geovà el ga scoliesto questi òmini, e che lu el seitarà a doperarli fin che se finisse questo mondo. (Mat. 28:20) Alora, podemo fidarse nele orientassion che Gesù el ne dà par meso de questi bravi òmini.

OBEDIR A QUEI CHE GEOVÀ EL DOPERA L’È BON PAR NOANTRI

15-16. Cossa che te ghè imparà coi fradei che i ga scoltà i consili de Geovà?

¹⁵ Quando ndemo drio ale orientassion de Geovà, ghemo tante benedission. Par esémpio, Andy, e la so dona, Robyn, i ga acetà el consìlio del schiavo fedele de viver con manco robe e manco soldi. (Varda la nota de stùdio in Mateo 6:22.) Par quela, lori i ze stati boni de giutar in arquanti progeti de costrussion. Robyn la ga dito: “Semo ndati de star in posti pròpio pìcoli. Dele volte, no ghen’era gnanca cosina. Me piasea tanto far foto, ma me ga tocà vender tute le robe che mi gavea. Go fin piandesto. Ma compagno a Sara, la so dona de Abraon, no go seità a pensar in quel che gavea assà indrio.” (Ebr. 11:15) Cossa che Andy e Robyn i pensa de quel che i ga fato? Robyn la ga dito: “Ghemo tanta alegria, parché savemo che semo drio dar a Geovà tuto quel che ghemo. Quando laoremo cola organisassion de Geovà, podemo sentir come sarà la vita nel novo mondo.” Andy, el so omo, el ga dito: “Semo tanto contenti, parché semo drio dar a Geovà tuto el nostro tempo e la nostra forsa.”

¹⁶ Varda nantro esémpio che mostra che obedir ai consili dela organisassion l’è bon par noantri. Dopo che Marsia la gavea finio la scola, ela la ga scominsià esser pioniera. (Mat. 6:33; Rom. 12:11) Ela la ga dito: “Mi podea studiar nte una università par quatro ani sensa pagar gnente. Ma mi volea far de pi par Geovà. Alora, invesse de  ndar ala università, go fato un curso par esser bona gaver un laoro e esser pioniera. Questa la ze stata la meio dessision che go fato. Ancoi son tanto felice parché son una pioniera! Come son bona dessider quanto vao laorar, posso giutar in Betel come commuter e far altre bele robe par Geovà.”

17. Parché che l’è bon scoltar i consili de Geovà? (Isaia 48:17, 18)

¹⁷ I consili che ricevemo dela organisassion de Geovà i pol anca protegerne. Par esémpio, dele volte, el schiavo fedele el ne ricorda che ghemo de star atenti de no amar i soldi gnanca far robe che ndarà disgustar a Geovà. Quando scoltemo i so consili, restemo tranquili de saver che femo quel che l’è giusto e no ghemo massa pensieri. (1 Tim. 6:9, 10) Alora, podemo adorar a Geovà de tuto el nostro cuor. No ghen’è gnente che pol darne vera alegria e pace cossita. — Ledi Isaia 48:17, 18. i

18. Parché che te vol seitar a meter in pràtica tuti i consili de Geovà?

¹⁸ Semo sicuri che Geovà seitarà a doperar òmini fedeli par tender dei so servi nela granda tribolassion e nel Governo de Mila Ani de Cristo. (Sal. 45:16) Sarà che seitaremo a ndar drio a queste orientassion, anca se ne par che no le ze mia bone? Sarà pi fàcile meter in pràtica i consili de Geovà nel futuro se belche adesso imparemo a obedirghe del tuto. Alora, femo el nostro meio par meter in pràtica tuti i boni consili che ricevemo par meso dei òmini che Geovà el ga scoliesto. (Isa. 32:1, 2; Ebr. 13:17) Quando scoltemo a Geovà, podemo fidarse che lu el ndarà protegerne de tute le brute robe che pol suceder e seitaremo a esser so amighi par sempre.