STÙDIO 8
CÀNTICO 130 El amor de Geovà ne motiva a perdonar
Come che podemo perdonar compagno a Geovà?
“Cossita come Geovà el ve ga perdonà del tuto, valtri gavé de far compagno.” — COL. 3:13.
COSSA CHE NDAREMO IMPARAR?
In questo stùdio, ndaremo imparar sora un per de robe che ndarà giutarne a perdonar i altri.
1-2. (a) Parché che par arquanti l’è fadiga perdonar i altri? (b) Come che Denise la ga dato un bel esémpio de perdon?
PAR TI, l’è fadiga perdonar i altri? Tanti i pensa che l’è fadiga, ancora de pi quando qualchedun ghe dise o ghe fà qualcossa tanto bruta. Ma podemo dàrghene fora con questi sentimenti e perdonar. Vedemo quel che ga sucedesto con Denise, a una sorela che la ne dà un bel esémpio de perdon. In 2017, ela, el so omo, Bryan, e i so fioi i ze ndati ala sede mondial dele Testimònie de Geovà. Intanto che i era drio tornar casa, un omo el ga perso el controlo del auto e l’è ndato dosso el auto de quela fameia. Denise la ga desmaià. Quando la se ga desmissiada, la ga savesto che i so fioi i se gavea fato tanto mal e so omo l’era morto. Denise la ga dito: “Mi gavea el cuor spacà e no savea cossa far.” Dopo ela la ga savesto che el omo no’l gavea fato gnente de sbalià e l’era stà pròpio un assidente. Alora, ela la ga domandà a Geovà che ghe desse pace.
2 El omo che el ga fato el assidente l’è stà menà ala polìssia e l’è stà acusà de gaver copà el omo dela sorela. Ma, el tribunal el ga dito a Denise che quel che ela la parlaria faria el giuis condanar o nò el omo. Denise la ga dito: “Quando go savesto che gavaria de parlar sora el momento pi bruto dela me vita, l’è stà come se qualchedun gavesse cavà via i punti del me taio e metesto una mùcia de sal rento.” Dopo poche stimane, Denise la ga bio de ndar e parlar davanti el omo che el gavea fato tanto mal ala so fameia. Cossa che ela la ga dito? Denise la ga domandà che el giuis el gavesse misericòrdia de quel omo. b Quando ela la ga finio de parlar, el giuis el ga tacà a piander. Lu el ga dito: “Mi son giuis fà 25 ani, ma no gavea mai visto una roba cossita. No gavea mai visto una persona domandarme che mostresse misericòrdia ala persona che la era stata acusada. No gavea mai sentio parole de amor e perdon.”
3. Cossa che ga giutà Denise a perdonar?
3 Cossa che ga giutà Denise a perdonar? Ela la ga pensà sora el perdon de Geovà. (Mic. 7:18) Pensarghe sora el perdon che Geovà el ne dà ne giutarà a voler perdonar i altri.
4. De acordo con Efesi 4:32, cossa che Geovà el vol che femo?
4 Geovà el vol che noantri perdonemo i altri del tuto, come lu el fà. (Ledi Efesi 4:32. c) Lu el vol che semo sempre pronti a perdonar quei che ne disgusta. (Sal. 86:5; Luc. 17:4) In questo stùdio, ndaremo veder tre robe che ne giuta a perdonar.
NO STÀ FAR FINTA CHE NO TE SÌ DISGUSTÀ
5. De acordo con Proverbi 12:18, come che fursi se sentimo quando qualchedun ne disgusta?
5 Pol esser che restemo tanto disgustadi par causa de quel che una persona la ga fato o la ga dito. E restemo ancora pi disgustadi se l’è stà un amigo o qualchedun dela fameia. (Sal. 55:12-14) Dele volte, sofrimo tanto che l’è come se gavessino ciapà un ‘colpo de una spada’. (Ledi Proverbi 12:18. d) E fursi proemo far finta che no semo disgustadi. Ma far cossita saria come ciapar un colpo de una spada e assarla lì rento. Alora, anca se femo finta che no semo disgustadi, questo no vol dir che restaremo meio.
6. Cossa che fursi sentimo quando qualchedun ne ofende?
6 Quando qualchedun ne ofende, pol esser che ne vien su la ràbia. La Bìblia la dise che dele volte fursi restemo cativi. Ma anca la dise che no podemo seitar a restar inrabiadi. (Sal. 4:4; Efe. 4:26) Parché? Parché se semo inrabiadi, ndaremo far brute dessision. (Tia. 1:20) Alora, ghemo de ricordarse che, anca se ne vien su la ràbia, semo noantri che dessidimo se seitaremo inrabiadi o nò.
Pol esser che de colpo ne vien su la ràbia, ma semo noantri che dessidimo se seitaremo inrabiadi o nò
7. Che altri bruti sentimenti arquanti i ga bio?
7 Quando qualchedun ne disgusta tanto, pol esser che ghemo altri bruti sentimenti. Varda quel che queste sorele le ga sentio. Una sorela de nome Ana la ga dito: “Quando mi ero sol una toseta, me pare el ga abandonà me mare e el se ga maridà cola dona che la tendea de mi. L’era come se el me gavesse abandonà. E quando lori i ga bio fioi, mi pensea che i ndaria desmentegarse de mi. Anca dopo granda, mi pensea che nissun me volesse ben.” Una sorela de nome Giorgete la ga dito dopo che el so omo la ga tradia: “Noantri èrino amighi ancora de giovenoti. E sempre ghemo servio come pionieri insieme. Alora, el me cuor l’è restà pròpio spacà.” Una sorela de nome Naomi la ga dito: “No go mai pensà che el me omo el me faria sofrir. Alora, quando el me ga dito che l’era drio vardar pornografia fea un tempo, go sentio come se el fusse drio tradirme e imbroiarme.”
8. (a) Parché che ghemo de perdonar i altri? (b) Parché che l’è bon perdonar i altri? (Varda anca el quadro “ Cossa ghemo de far se qualchedun ne ga disgustà pròpio tanto?”.)
8 Anca se no semo boni de controlar quel che i altri i fà o i dise, semo boni de controlar quel che noantri femo e sentimo. E la meio roba che podemo far la ze perdonar. Parché? Parché noantri amemo a Geovà, e lu el vol che perdonemo i altri. E se seitemo cativi e no perdonemo, l’è tanto fàcile far brute dessision e fin rovinar la nostra salute. (Pro. 14:17, 29, 30) Una sorela de nome Cristina la ga dito: “Quando me sento disgustada o cativa, fao fadiga rider, e magno tanti poci. Mi gnanca no son bona de dormir e de controlar quel che sento. Resto tanto mal che, dele volte, no son bona de tratar con bontà el me omo e gnanca i me amighi.”
9. Parché che ghemo de sforsarse de perdonar?
9 Anca se la persona che la ne ga disgustà no la ne ga domandà scusa, noantri podemo fermarse de sofrir. Giorgete, che ghemo parlà prima, la ga dito: “Anca se ghe ga volesto tempo, mi son stata bona de assar de restar cativa e disgustada col omo che ero maridada. Cossita, mi go sentio tanta pace.” Alora, quando dessidimo assar de restar disgustadi o cativi, no deventaremo tristi gnanca ndaremo tratar mal quei che i ze intorno a noantri. E anca femo una roba tanto bona par noantri stessi parché se fermemo de pensar nel problema e tornemo a goder la vita. (Pro. 11:17) Ma cossa che ghemo de far se gnancora no semo stati boni de perdonar qualchedun?
COSSA POL GIUTARNE A DÀRGHENE FORA COLA RÀBIA?
10. De cossa che ne ocore ricordarse? (Varda anca la ilustrassion.)
10 Cossa pol giutarte a assar de restar inrabià o disgustà? Te ocore ricordarte che dele volte ghe vol tempo. Una persona che la se ga fato mal la ga bisogno de aiuto e de tempo fin che la reste meio. Dela medèsima maniera, dele volte, ne ocore tempo fin esser boni de perdonar qualchedun che ne ga ofendesto. — Ecl. 3:3; 1 Pie. 1:22.
Qualchedun che se ga fato mal ghe ocore tempo fin restar meio. La medèsima roba la sucede quando una persona la ne ga disgustà (Varda el paràgrafo 10.)
11. (a) Come che pregar a Geovà ndarà giutarne a perdonar?
11 Noantri anca ghemo de pregar a Geovà par domandarghe che el ne giute a perdonar. e Ana, che ghemo belche parlà, la ga contà come pregar la ga giutada. Ela la ga dito: “Mi go domandà che Geovà el perdonesse a mi e a quei dela me fameia par le robe rugne che ghemo parlà o che ghemo fato. Dopo, mi go scrito una carta par me pare e so dona par contarghe che mi li gavea perdonadi.” Ana la ga contà che no l’è stà mia fàcile perdonarli. Ma la ga dito: “Mi penso che far compagno a Geovà e perdonar me pare e so dona fursi ndarà giutarli a voler imparar sora Geovà nel futuro.”
12. Parché che ghemo de fidarse in Geovà e nò nei nostri sentimenti? (Proverbi 3:5, 6)
12 Geovà sempre el sa quel che l’è meio par noantri. (Isa. 55:8, 9) Alora, fìdate in Geovà e nò in quel che te sì drio sentir. (Ledi Proverbi 3:5, 6. f) Geovà mai el ndaria domandarne de far una roba che la ne faria sofrir. Par quela, quando lu el dise che ghemo de perdonar, podemo esser sicuri che l’è la meio roba de far. (Sal. 40:4; Isa. 48:17, 18) Ma quando ndemo drio i nostri sentimenti, fursi no saremo mai boni de perdonar quei che i ne ga disgustà. (Pro. 14:12; Ger. 17:9) Naomi, che ghemo parlà prima, la ga dito: “Par un tempo, mi pensea che no gavea mia de perdonar el me omo dopo che el gavea vardà pornografia. Mi gavea paura che el me fesse sofrir ancora o che el se desmenteghesse de tuto quel che el me gavea fato sofrir. Mi pensea che Geovà el capia i me sentimenti. Ma dopo me son nicorta che, anca se Geovà el me capia, lu no l’era de acordo con quel che ero drio sentir. Go capio che Geovà el cognosse i me sentimenti e el sa che ghe vol tempo fin esser bona de perdonar me omo. Ma lu el speta che lo perdono.” g
PROA PENSAR NELE QUALITÀ CHE LA PERSONA LA GA
13. De acordo con Romani 12:18-21, cossa che ghemo de far?
13 Quando qualchedun ne assa disgustadi, noantri no volemo sol far finta che no ga sucedesto gnente. Se questa persona la ze nostro fradel o nostra sorela, volemo gaver pace nantra volta. (Mat. 5:23, 24) Par quela, invesse de restar inrabiadi, volemo mostrar misericòrdia e perdonar. (Ledi Romani 12:18-21; h 1 Pie. 3:9) Ma cossa pol giutarne a perdonar?
14. Cossa che ghemo de sforsarse par far, e parché?
14 Noantri ghemo de sforsarse par veder le persone come Geovà le vede, o sia, vardar quel che le ga de bon. (2 Cró. 16:9; Sal. 130:3) Parché? Se noantri proemo veder quel che i nostri fradei i ga de bon, saremo boni de veder le so bele qualità, e nò i so difeti. Cossita, sarà pi fàcile perdonarli. Un fradel de nome Geraldo el ga dito: “L’è stà pi fàcile perdonar un fradel che el me gavea disgustà quando go pensà in tute le bele qualità che el gavea invesse de pensar nel sbàlio che el gavea fato.”
15. Parché che l’è bon dir ala persona che la ne ga disgustà che la ghemo perdonada?
15 Nantra roba che ghemo de far la ze dir ala persona che ne ga disgustà che la ghemo perdonada. Parché? Naomi, che ghemo parlà prima, la ga dito: “Un giorno, el me omo el me ga domandà: ‘Ti te me ghè perdonà?’ Ma quando go verto la boca par dirghe che si, no son stata bona de dirlo. Me son nicorta che no lo gavea perdonà del tuto nel me cuor. Dopo un tempo, son stata bona de dirghe: ‘Mi te go perdonà.’ No ero gnanca bona de creder come questo lo ga giutà e nela pace che go sentio. Dopo, son stata bona de fidarme in lu nantra volta e semo tornadi a esser boni amighi.”
16. Cossa che te ghè imparà sora perdonar?
16 Geovà el vol che noantri perdonemo quei che ne ga disgustà. (Col. 3:13) Anca cossita, pol esser che femo fadiga perdonar. Ma come ghemo visto, no ghemo de far finta che gnente ga sucedesto. Invesse, ne ocore proar controlar la nostra ràbia e i sentimenti rugni che ghemo. Dopo, ghemo anca de pensarghe sora le robe bone e le qualità che la persona che ne ga disgustà la ga. — Varda el quadro “ Tre robe che ndarà giutarne a perdonar”.
PENSA NELE ROBE BONE CHE SUCEDE QUANDO TE PERDONI
17. Parché che l’è bon perdonar?
17 Sucede tante robe bone quando perdonemo i altri. Par esémpio, prima, femo compagno a Geovà e lo assemo tanto contento. (Luc. 6:36) Secondo, noantri mostremo che ghe demo tanto valor al perdon che Geovà el ne dà. (Mat. 6:12) E terso, noantri ghemo una salute meio e tanti boni amighi.
18-19. Cossa che sucede quando perdonemo i altri?
18 Quando perdonemo i altri, tante robe bone sucede che gnanca no speteino. Par esémpio, varda quel che ga sucedesto con Denise, la sorela che ghemo parlà prima. El omo del assidente che ga copà Bryan e che ga fato mal ai fioi de Denise el gavea pensà de coparse dopo el so giulgamento. Ma lu l’è restà tanto maraveià de veder che Denise lo gavea perdonà che lu el ga volesto scominsiar a studiar la Bìblia cole Testimònie de Geovà.
19 Pol esser che perdonar sìpia una dele robe pi fadiga che ghemo de far. Ma ghemo de ricordarse che anca l’è una dele robe che ne porta pi benedission. (Mat. 5:7) Par quela, tuti noantri volemo sforsarse del bon par perdonar compagno a Geovà.
CÀNTICO 125 Mostremo misericòrdia
a Arquanti nomi i ze stati cambiadi.
b In situassion cossita, cada persona la ga de far la so dessision.
c (Efesi 4:32) Ma sìpie bondosi un coi altri, e dimostré afeto e compassion. Gavé de perdonarve un al altro del tuto, cossita come Dio el ve ga perdonà del tuto par meso de Cristo.
d (Proverbi 12:18) Parole sensa pensar le fà mal come colpi de una spada, ma la léngua dei sabi la ze una cura.
e Varda nel jw.org i vìdei musicai “Perdoem uns aos outros”, “Me ajuda a perdoar” e “O que passou ficou pra trás”.
f (Proverbi 3:5, 6) Fìdate in Geovà de tuto el to cuor, no stà fidarte nel to pròpio saver. 6 Ricòrdate de Dio in tuto quel che te fè e lu el ndarà mostrarte quala che la ze la strada giusta.
g Anca se vardar pornografia l’è un pecato e fà tuti due sofrir nte un matrimònio, no l’è un motivo par divorsiarse de acordo cola Bìblia.
h (Romani 12:18-21) De acordo con quel che podé, fé el vostro meio par star in pace con tuti. 19 Cari, no sté mia vingarve, ma assé che Dio lo fae, parché l’è scrito: “‘La vingansa la ze mia. Mi ndarò darghe quel che i mèrita’, el dise Geovà.” 20 Ma, “se el to nemigo el ga fame, daghe de magnar; se el ga sen, daghe de bever. Quando te fè cossita, te ndarè imuciar bronse impissade sora la so testa”. 21 No sté mia assarve vinser par el mal, ma seité vinser el mal col ben.
