Me pare e me mare i era ben catòlichi, ma dopo che i ga visto nela so Bìblia che el nome de Dio l’è Geovà, lori i ze deventadi Testimònie de Geovà. Alora, me pare el se ga fermà de far imàgine de Gesù. Ma, lu l’era un bravo marangon. Par quela, el ga fato nel poron dela nostra casa el primo Salon del Regno in San Juan del Monte, in Manila, la capital dele Filipine.

Son nassesto in 1952 e me pare e me mare me insegnea sora Geovà compagno i era drio far cole me tre sorele e quatro fradei pi veci. Me pare sempre el me ga incoraià a leder un capìtolo dela Bìblia tuti i giorni e el ga studià con mi arquante publicassion difarente. Me genitori sempre i convidea i superintendenti de sircuito e fradei che i laorea in Betel par restar casa nostra. La nostra fameia la ghe piasea tanto de scoltar le speriense de quei bravi fradei. Questo ne ga giutà a restar contenti e a meter la adorassion a Geovà in primo posto nela nostra vita.

I me genitori i era fedeli a Geovà, e go imparà tanto del so bel esémpio. Mi e me pare semo deventadi pionieri regolari in 1971, dopo che la me mama la ze morta par causa de una malatia. Due ani dopo, anca me pare l’è morto. Mi gavea 20 ani, e dopo che lori i ze morti, me go sentio perso e come se fusse mi mi sol. Ma la speransa dela Bìblia che la ze sicura e firme la me ga giutà a seitar darente de Geovà e a pensar in robe bone e nò sol nele dificoltà. (Ebr. 6:19) Poco tempo dopo dela morte del me pare, son deventà pioniero spessial nte una ìsola distante de nome Coron, nela Provìnsia de Palawan.

Son rivà in Coron quando gavea 21 ani. Mi son stà slevà nela cità, par quela l’era de gnanca creder veder una ìsola ndove no ghen’era luce  in tute le case, ghen’era poca àqua e pochi auti o moto. Lì ghen’era pochi fradei e mi ero el ùnico pioniero. Par quela, tante volte ndea ala predicassion mi mi sol. Nel primo mese, me ga mancà tanto la me fameia e i me amighi. De sera, mi vardea el cielo e piandea tanto. Go bio voia de assar de esser pioniero spessial e tornar casa.

In queste situassion, mi preghea a Geovà e parlea quel che ero drio pensar e sentir. Me ricordo che leder la Bìblia e le nostre publicassion me ga giutà a pensar in robe bone. Tante volte me ricordea del Salmo 19:14. Son nicorto che se mi pensesse sora quel che Geovà l’è drio far e le so qualità, lu podaria deventar “la me Ròcia e el me Salvador”. El artìcolo “Nunca está sozinho” a dela Sentinela me ga giutà tanto. Go ledesto questo artìcolo una volta drio man. Alora, quando ero mi mi sol, ero insieme a Geovà e go doperà questo tempo par pregar, studiar e pensarghe sora tuto quel che ero drio imparar.

Poco tempo dopo che son rivà in Coron, son deventà un ansiano. Come ero el ùnico ansiano lì, mi fea quasi tuta la riunion de meso la stimana, el stùdio bìblico cola congregassion e el stùdio dela Sentinela. Anca l’era mi che fea el discorso pùblico tute le stimane. Come gavea tante robe de far, no ghen’era mia come sentirme mi mi sol.

La predicassion in Coron la era tanto bela e arquanti dei me studianti i se ga batesà. Ma anca ghen’era tante dificoltà. Par esémpio, dele volte me tochea caminar par mesa giornada par rivar nel posto ndove ndaria predicar, e no savea ndove ndaria dormir. Nel teritòrio dela congregassion, ghen’era tante pìcole ìsole. Alora, me tochea ndar de barco in meso a tante onde, e no savea gnanca nadar. Ancora cossita, Geovà sempre el me ga tendesto e el me ga protegesto. Dopo, son nicorto che lu l’era drio pareciarme par dificoltà che ancora le vegnaria fora.

In 1978, son ndato a Papua Nova Ghinè, che l’è nel nort dela Austràlia. Quel paese l’è quasi tanto grando quanto la Spagna e ghen’è tante montagne. Son restà maraveià de saver che le 3 milioni de persone che le ze de star lì le parla de pi de 800 léngue difarente. Ma, quasi tute le persone le parla el Pidgin che tanti i cognosse come tok pisin.

Par un tempo, son restà nela congregassion de inglese in Port Moresby, la capital del paese. Ma dopo, son ndato par una congregassion de tok pisin. Go scominsià a far aula par imparar la léngua e a doperar quel che imparea nela predicassion. Cossita, go fato presto imparar quela léngua. In poco tempo, son stà bon de far un discorso pùblico in tok pisin. E manco de un ano dopo de rivar in Papua Nova Ghinè, son deventà superintendente de sircuito e visitea le congregassion de tok pisin in tanti posti difarenti. L’è stà de gnanca creder!

Le congregassion le era distante una del’altra. Par quela me tochea pareciar arquante assemblee de sircuito e viaiar tanto. De scomìnsio, me sentia mi sol parché ero nte un novo paese, ndove le persone no le parlea la me léngua e le gavea tanti costumi che no cognossea mia. Come ghen’era tante montagne intrà le congregassion, quasi tute le stimane me tochea viaiar de avion.  Dele volte, ero sol mi e el piloto nte un pìcolo avion, che parea che no saria gnanca bon de zolar. Viaiar in quei avioni me assea tanto ansioso come quando viaiea de barco.

Poche persone le gavea un telèfono e me tochea scriver carte ale congregassion. Alora, tante volte mi rivea ale congregassion prima dele me carte e nissuni savea che ero lì. Par quela, me tochea domandar ale persone ndove che i stea i fradei e sorele. Ma, quando li catea, lori sempre i me ricevea tanto ben e mi me ricordea parché fea tuto quel sforso de catarli. In tuto quel che ga sucedesto, Geovà me ga giutà tanto, e la me amicìssia con lu la ze restada cada volta pi granda.

Nela prima riunion che son ndato in Bougainville, un omo e una dona i ze rivadi darente a mi ben contenti e i me ga domandà: “Ricòrdito de noantri?” Me go ricordà che gavea parlà a lori due sora la Bìblia pena dopo che ero rivà in Port Moresby. Go scominsià a insegnarghe la Bìblia, e dopo go domandà che un fradel el seitesse a insegnarghe. Adesso, lori due i era batesadi. Questa la ze stata sol una de tante benedission che go ricevesto nei tre ani che son restà in Papua Nova Ghinè.

In 1978, vanti de ndar via de Coron, go cognossesto Adel, una bela e brava sorela che laorea tanto par giutar i altri. Ela la era pioniera, la slevea su i so due fioi, Samuel e Shirley, e la tendea dela so mama, che la era belche vècia. Alora, in maio de 1981, son tornà ale Filipine e mi e Adel se ghemo maridà. Dopo, ghemo tendesto dela nostra fameia e ghemo laorà insieme come pionieri regolari.

Anca se adesso mi gavesse una fameia, in 1983, son stà convidà par esser pioniero spessial in Linapacan, una ìsola nela Provìnsia de Palawan. Alora, tuta la fameia la ze ndata de star in quel posto tanto distante ndove no ghen’era gnanca una Testimònia de Geovà. Un ano dopo, la mare de Adel la ze morta. Èrino triste, ma seitar a predicar ne ga giutà a dàrghene fora con quela situassion. Ghemo scominsià arquanti studi bìblichi e tante persone le era drio ndar ale riunion. Par quela, ne ga tocà a noantri far un pìcolo Salon del Regno. L’è stà tanto bel veder che sol tre ani dopo che semo rivadi, ghen’era 110 persone nela Selebrassion e che arquante de quele persone le se ga batesà.

In 1986, son stà convidà par ndar a Culion, una ìsola ndove tante persone con lepra le ze de star. Dopo che semo rivadi, anca Adel la ze stata convidada a esser pioniera spessial. De scomìnsio, ghemo bio paura de predicar a persone che le gavea lepra. Ma i fradei e le sorele che i era de star lì i ne ga dito che quele persone le gavea belche fato tratamento e che no ne ocorea gaver paura de ciapar quela malatia. Arquante de lore le ndea ale riunion nela casa de una sorela. Quele persone le pensea che no le gavea mia valor par Dio e par i altri. Alora, dopo un tempo, ghemo visto che l’era tanto bel parlarghe sora la speransa  dela Bìblia. Lore le restea tanto contente de saver che nel futuro le podarà gaver una salute perfeta. — Luc. 5:12, 13.

E cossa che i nostri fioi i era drio far in Culion? Mi e Adel gaveino convidà due gióvene sorele de Coron par ndar insieme a noantri a Culion. Lore due le era bone amighe par i nostri fioi. Alora, Samuel, Shirley e quele due sorele i insegnea i fioi dei nostri studianti. In poco tempo, èrino drio insegnar la Bìblia a ùndese fameie. E come quele persone le era drio studiar tanto ben, suito ghemo bio una nova congregassion!

De scomìnsio, mi ero el ùnico ansiano in quel posto. Alora, Betel me ga domandà de far le riunion in Culion e dopo farle anca in Marily, una vila che ghe metea tre ore de viaio par rivar. Dopo le riunion in Marily, la nostra fameia la caminea in meso le montagne par tante ore fin rivar in Halsey, una pìcola vila ndove insegneino la Bìblia a tante persone.

Tante persone le ga scominsià a imparar la verità in Marily e in Halsey. Alora, ghemo fato Saloni del Regno in questi posti. Compagno ga sucedesto in Linapacan, i fradei e quei che studiea la Bìblia i ghe ga dato quel che ocorea par far su el Salon e i ga fato quasi tuto el laoro de costrussion. Nel Salon del Regno in Marily ghen’è posto par 200 persone, ma el pol deventar pi grando. Cossita, podemo far anca assemblee in quel Salon.

In 1993, quando i nostri fioi i era belche grandi, mi e Adel ghemo scominsià nel sircuito nele Filipine. Alora, in 2000, mi go fato la Scola de Trenamento Ministerial, par esser un istrutor dela scola. Mi pensea che no saria mia bon, ma Adel me ga incoraià. Ela la me ga ricordà che Geovà el me daria la forsa che gavaria de bisogno par far el laoro. (Fil. 4:13) Ela la savea che questo l’era pròpio vera parché la era drio laorar par Geovà intanto che gavea tanti problemi de salute.

In 2006, quando ero maestro nte una scola dela organisassion, ghemo savesto che Adel la gavea el mal de Parkinson. Semo restadi spauradi. Mi ghe go dito che podarìssino fermar el nostro laoro par  tenderla. Ma Adel la me ga dito: “Proa catar fora un dotor che ndarà giutarme, e son sicura che Geovà el ndarà giutarne a ndar avanti.” Adel la ga seità a laorar par Geovà sensa sbrontolar par 6 ani. Quando ela no la podea pi caminar, la ga seità a predicar nte una carega de rode. Quando l’era fadiga de parlar, ela la fea comentari con una o due parole nele riunion. Tanti fradei e sorele i ga mandà messagi par ringrassiarghe par el so bel esémpio. In 2013, Adel la ze morta. Son restà de pi de 30 ani insieme la me cara e fedele dona. Adesso, ero mi mi sol e me sentia triste nantra volta.

Adel la volea che mi seitesse a far tanto par Geovà. Par quela, go proà meterghela tuta nel me laoro a Geovà. Laorar tanto par Dio me giuta a dàrghene fora coi me sentimenti. De 2014 a 2017, go fato vìsite a congregassion de Tagalog in arquanti paesi ndove el governo no assa che i fradei i adore a Geovà. Dopo, go visità congregassion de Tagalog in Taiwan, nei Stati Unidi e nel Canadà. In 2019, son stato istrutor dela Scola de Vangelisadori in inglese nela Ìndia e nela Tailàndia. Go bio tanta alegria in far questi laori. Go visto che la roba che me assa pi contento la ze laorar par Geovà.

Tuto quel che go fato me ga giutà a amar de pi i me cari fradei e sorele. Par quela, l’era fadiga assarli quando me tochea ndar via par nantro posto. Sempre go sentio el aiuto de Geovà e go imparà a fidarme del tuto in lu. Cossita son stà bon de sempre ndar par ndove Geovà el me mandesse. Ancoi, son pioniero spessial nele Filipine, e i fradei e sorele dela me congregassion i ze deventadi una cara fameia par mi. Mi son tanto contento de veder che Samuel e Shirley i ze drio far compagno el bel esémpio dela so mama. — 3 Gio. 4.

Go infrontà tante brute situassion nela me vita. Par esémpio, l’è stà tanto fadiga veder la me cara dona sofrir par causa de una bruta malatia fin la so morte. Anca go bio de imparar cossa far in arquante situassion difarente. Mi go visto che Geovà “no l’è distante de cada un de noantri”. (Ati 17:27) Lu sempre el giuta e dà forsa ai so servi, anca se i ze in posti distanti de altre persone. (Isa. 59:1) Geovà l’è stà la me Ròcia par tuta la me vita e mi vui ringrassiarghe tanto. Par causa de lu, mai son restà mi mi sol.