TANTE persone ancoi le pensa che le ga de esser meio che i altri. Par quela, le vol gaver de pi robe e esser tratade de una maniera spessial. Ma anca quando le ga queste robe, le vol ancora de pi. Persone cossita sol le pensa in lore stesse e no le ze mai contente. La Bìblia la dise che le persone le saria pròpio cossita nei ùltimi giorni. — 2 Tim. 3:2.

Sempre ghen’è stà persone che le ga pensà sol in lore stesse. Par esémpio, Adon e Eva i volea dessider lori stessi quel che l’era bon e quel che l’era rugno. Par quela i ga fato brute dessision e i ga sofrio tanto. Nantro esémpio, l’è stà el rè Uzia, de Giudà. Lu el ga pensà che podea ndar rento al témpio e brusar insenso, ma l’era pròpio sbalià far questo. (2 Cró. 26:18, 19) E i farisei e sadussei i credea che Dio el gavea de tratarli meio che i altri sol parché le so fameie le era vegneste de Abraon. — Mat. 3:9.

Ancoi ghen’è tante persone che sol le pensa in lore stesse, e se no stemo atenti, anca noantri podemo a pensar come lore. (Gàl. 5:26) Par esémpio, pol esser che scominsiemo a pensar che ghemo de esser tratadi meio che i altri. Cossa che pol giutarne a mai pensar cossita? Sforsarse de pensar compagno a Geovà. Ndemo veder due prinsipi dela Bìblia che i pol giutarne.

L’è Geovà che el desside quel che meritemo ricever. Vedemo arquanti esempi.

•   Nela fameia, el omo speta ricever el rispeto dela so dona, e la dona speta ricever el amor del so omo. (Efe. 5:33) Geovà el ga dito che un omo e la so dona i ga de tratarse con amor e de una maniera spessial. Alora, un omo e una dona maridadi i ga de mostrar questo amor spessial sol intrà de lori. (1 Cor. 7:3) I genitori i speta che i so fioi e i ghe obedissa e i fioi i speta ricever el amor e el aiuto dei so genitori. — 2 Cor. 12:14; Efe. 6:2.

• Geovà el dise che ghemo de rispetar i bravi ansiani che i laora tanto nela congregassion. (1 Tes. 5:12) Ma, i ansiani no i ga mai de pensar che i ga la autorità par comandar i so fradei e le so sorele. — 1 Pie. 5:2, 3.

• Geovà el ga dato la autorità ai governi. Alora, ghemo de pagar i imposti e rispetarli. — Rom. 13:1, 6, 7.

Geovà el ne ama tanto e el ne dà tanto de pi de quel che meritemo. Come semo pecadori, meritemo morir. (Rom. 6:23) Ma, come Geovà el ne ama tanto, el ne benedisse de tante maniere. (Sal. 103:10, 11) Geovà el ne benedisse parché el ne ama e nò parché meritemo. — Rom. 12:6-8; Efe. 2:8.

No stà pensar compagno ale persone del mondo de Sàtana. Pol esser che sensa nicorderse scominsiemo a pensar che meritemo de pi che i altri. Gesù el ga contà una ilustrassion par mostrar come l’è fàcile pensar cossita. Lu el ga dito che un per de laoradori i ga scominsià a laorar de matina bonora. Dopo, altri òmini i ga laorà sol par una ora. Quando el paron l’è ndato pagarghe, lu el ga dato la medèsima roba a quei che i gavea scominsià a laorar de matina bonora e a quei che i gavea laorà sol una ora. Ma, quei che i gavea laorà tuto el giorno i pensea che i meritea ciapar de pi che i altri. (Mat. 20:1-16) Par meso de questa ilustrassion, Gesù el ga mostrà che i so dissìpoli i ga de restar contenti con quel che Geovà el ghe dà.

Daghe valor a quel che te ricevi e no stà spetar massa dei altri. (1 Tes. 5:18) El apòstolo Paolo no’l ga spetà che i fradei in Corinto i ghe desse quel che el gavea de bisogno. (1 Cor. 9:11-14) Ghemo de esser compagno a lu e darghe valor a quel che i altri i ne fà e mai pensar che i ga de darne qualcossa.

 Sìpia ùmile. Quando qualchedun el scomìnsia a pensar massa in lu stesso l’è pròpio fàcile che el pense che el mèrita esser tratà meio che i altri. Ma, se noantri se sforsemo de esser ùmili, mai ndaremo pensar cossita.

El profeta Daniel l’è un bel esémpio. La so fameia la era importante e lu l’era tanto bel e bravo. Alora, lu podaria ver pensà che el meritea quel che el gavea e che gavea de esser tratà de una maniera spessial. (Dan. 1:3, 4, 19, 20) Ma, Daniel el ga seità a esser ùmile e Geovà el ghe volea tanto ben. — Dan. 2:30; 10:11, 12.

Sicuro che no volemo mia pensar che semo meio che i altri, compagno tanti i fà ancoi. Invesse, volemo darghe tanto valor ala bontà che Geovà el ne mostra e restar contenti con tuto quel che lu el ne dà.