Maria e el so omo Gioani, i vive nte un posto che ghen’è tante persone dele Filipine. a Lori i resta pròpio contenti de predicar a queste persone. Nela pandemia del COVID-19, Maria la ze stata bona de scominsiar tanti studi con persone de diversi paesi. Cossa gala fato?

Maria la domandea ale so studiante: “Cognóssito qualchedun che volaria studiar la Bìblia?” Se la persona la disesse de si, Maria la ghe disea: “Te podarissi farme cognosserla?” L’è stà tanto bel far questa domanda parché quasi sempre quei che i era drio studiar la Bìblia belche i gavea in mente parlar a qualchedun dela so fameia o ai so amighi sora quel che i era drio imparar. Vedemo quel che ga sucedesto par causa de questa bela domanda.

Jasmin, una dele studiante de Maria, la ghe ga fato cognosser quatro dei so amighi che i volea studiar la Bìblia. Una de queste persone la era Cristina. Ghe ga piasesto pròpio tanto el stùdio che la ga domandà a Maria se la podea studiar due volte ala stimana. Quando Maria la ga domandà se la cognossea qualchedun che volea studiar la Bìblia, Cristina la ghe ga rispondesto: “Si. Vao farte cognosser un per de amighe.” Nele stimane dopo, Maria la ga scominsià a studiar con quatro amighe de Cristina. Dopo un tempo, Cristina la ghe ga fato cognosser anca altri amighi. E anca lori i ga fato Maria cognosser i so amighi che ghe piaseria studiar la Bìblia.

Cristina la volea che anca la so fameia, che la era de star nele Filipine, la imparesse dela Bìblia. Alora, la ga parlà sora el stùdio ala so fiola Andrea. De colpo, Andrea la ga pensà: “Le Testimònie de Geovà no me par mia una bona religion. Lore no le crede mia in Gesù e le dopera sol una parte dela Bìblia.” Ma dopo del primo stùdio, ela la ga capio che quel che la pensea sora le Testimònie de Geovà l’era sbalià. Sempre che la imparea qualcossa nova dela Bìblia, ela la disea: “Se l’è nela Bìblia, alora l’è vero.”

Dopo de un tempo, Andrea la ga anca parlà a Maria de due amighe e de una colega de laoro che le volea studiar la Bìblia. Sensa che Maria la savesse, Angela, una zia orba de Andrea, la scoltea el stùdio. Alora, un giorno, Angela la ga dito che la volea cognosser Maria par domandarghe un stùdio dela Bìblia. Ela la ze restada tanto contenta con quel che la imparea. Dopo de un mese, la gavea belche metesto in testa arquanti versìcoli dela Bìblia e la volea studiar quatro volte ala stimana. Angela la ga anca domandà che Andrea la giutesse a scoltar a tute le riunion par vìdeo.

 Maria la ga savesto che Giusepe, so omo de Cristina, l’era sempre lì intorno quando le era drio studiar. Lu restea lì parché el volea scoltar quel che lore parlea. Alora, Maria la ga domandà se Giusepe el volea studiar insieme. Lu ghe ga rispondesto: “Mi vao sol scoltarve. Alora, no stà farme domande. Se te me fè una domanda mi vao via!” Ma, pena che gavea scominsià el stùdio, Giusepe el ga tacà farghe una mùcia de domande e el ga volesto studiar la Bìblia anca lu.

Par causa dela domanda che Maria la fea, tante persone le ga volesto studiar la Bìblia. Alora, la ga domandà che altri fradei e sorele i giutesse arquante de queste persone. Par causa de quela bela domanda, 28 persone de 4 paesi difarenti le ga scominsià a studiar la Bìblia.

Cossa che ga sucedesto con arquanti de questi studianti? Jasmin, la se ga batesà in april de 2021. Cristina, la se ga batesà in maio de 2022 e la ze tornada ale Filipine par star insieme ala so fameia. Due amighe de Cristina che le gavea scominsià a studiar la Bìblia anca le se ga batesà. Angela, la se ga batesà un per de mesi dopo che ga scominsià a studiar e la ga tacà laorar come pioniera. Giusepe e Andrea, che i ze el omo e la fiola de Cristina, i seita a studiar la Bìblia e a far pi forte la so amicìssia con Geovà compagno a altri studianti.

Nel tempo dei apòstoli, arquanti dissìpoli i parlea ai so amighi e ala so fameia sora quel che i era drio imparar sora Geovà. (Gio. 1:41, 42a; Ati 10:24, 27, 48; 16:25-33) Te pol far la medèsima roba ancoi. Alora, proa sempre domandar ai to studianti: “Cognóssito qualchedun che volaria studiar la Bìblia?” Te restarè maraveià con quel che pol suceder par causa de questa domanda.