1. Cossa che ga sucedesto dopo che un fradel el ga scoltà un discorso nel ano de 1935?

NEL ANO de 1926, ghen’era una fameia de Studianti dela Bìblia, che l’era come se ciamea le Testimònie de Geovà in quela època. I genitori i ga insegnà i so tre fioi e le so due fiole a servir a Geovà e a far compagno a Gesù. Un dei so fioi el gavea 18 ani quando el se ga batesà nel ano de 1926. In quela època, i Studianti dela Bìblia i magnea del pan e i bevea del vin nela Selebrassion. Alora, anca questo gióveno el fea questo, ma la so vita la ga cambià dopo del discorso “La granda moltitùdine” nte un congresso nei Stati Unidi. Questo discorso l’è stato fato par el fradel Joseph Rutherford nel ano de 1935. Nel congresso, i Studianti dela Bìblia i ga imparà una roba tanto importante. Ma cossa che i ga imparà?

2. Che verità importante el fradel Rutherford el ga parlà nel so discorso?

² I fradei in quel tempo i pensea che anca quei dela “granda moltitùdine” i ndaria al cielo, ma che i ze stati manco fedeli che i untadi. Ma nel so discorso, el fradel Rutherford el ga doperà la Bìblia par spiegar che la granda moltitùdine no la ndarà viver nel cielo. Invesse, quei dela granda moltitùdine i fà parte dele altre piégore * e  lori i ndarà passar con vita par la “granda tribolassion” par viver par sempre nela Tera. (Apo. 7:14; Mat. 25:31-33, 46) Gesù el ga prometesto: “E mi go altre piégore che no le ze de questo grupo e anca queste go de menarle in qua. Lore le scoltarà la me voce e le sarà un sol grupo con un sol pastor.” (Gioani 10:16) Ndemo veder come che questa verità la ga cambià la vita de quel gióveno e anca la vita de tante Testimònie de Geovà. — Sal. 97:11; Pro. 4:18.

3-4. Nel congresso de 1935, cossa che arquanti i ga capio e parché?

³ Una parte tanto importante del congresso la ze stata quando el fradel Rutherford el ga dito: “Tuti quei che i ga la speransa de viver nela Tera i pol levarse su.” Un fradel che l’era là, el ga dito che de pi dela metà de quele 20.000 persone le se ga levà su. Alora, el fradel Rutherford el ga dito: “Questa la ze la granda moltitùdine!” Alora, tuti i ze restadi tanto contenti e i ga osà de alegria. Quei che i se ga levà su i ga capio che no i gavea la speransa de viver nel cielo parché no i ze stati untadi col spìrito santo de Dio. Nel giorno dopo, 840 persone le se ga batesà e quasi tute le era dele altre piégore.

⁴ Dopo de quel discorso, el gióveno che ghemo parlà nel scomìnsio e miliari de persone, le se ga fermà de magnar del pan e de bever del vin nela Selebrassion. Tanti i se sentia come un fradel che el ga dito: “La ùltima volta che mi go magnà del pan e bevesto del vin l’è stato nela Selebrassion de 1935. Mi go capio che la me speransa la era de viver par sempre nela Tera e giutar a farla un paradiso. Alora, me son nicorto che Geovà no’l gavea metesto in mi la speransa de viver nel cielo.” (Rom. 8:16, 17; 2 Cor. 1:21, 22) Dopo de quel discorso, la granda moltitùdine la ze drio vegner cada volta pi granda e la ze drio giutar i untadi che i ze ancora vivi nela Tera.

5. Cossa che Geovà el pensa de quei che i se ga fermà de magnar del pan e bever del vin nela Selebrassion?

⁵ Cossa che Geovà el pensa de quei che i se ga fermà de magnar del pan e bever del vin nela Selebrassion dopo de 1935 e de quei che i se ferma ancoi? (1 Cor. 11:28) Pol esser che arquanti no i capia se la so speransa la era de viver nela Tera o nel cielo. Ma se lori i se ciama grami e i se ferma de magnar del pan e bever del vin e i seita fedeli, Geovà el va acetarli come parte dele altre piégore. Anca cossita, lori i seita a ndar ala Selebrassion parché i ze tanto grati par quel che Geovà e Gesù i ga fato par lori.

6. Cossa che Gesù el ga mandà i àngeli far?

⁶ Noantri savemo che la granda tribolassion la ze tanto darente. Alora, l’è bon ricordarse quel che Apocalisse, capìtolo 7 el parla sora i untadi e la granda moltitùdine. Lì, Gesù el manda i quatro àngeli tegner i quatro venti dela destrussion fin che tuti quei che i ndarà al cielo i riceva la aprovassion de Geovà. (Apo. 7:1-4) Cossita, questi fradei i sarà rè e sasserdoti con Gesù nel cielo parché i ga seità leai. (Apo. 20:6) Geovà,  Gesù e i àngeli i ze premosi de veder tuti i 144 mila ndar al cielo.

7. (a) De acordo con Apocalisse 7:9, 10, Gioani el vede a chi? (b) Cossa che lori i era drio far? (Vedi la ilustrassion dela capa.)

⁷ Dopo, Gioani el vede una roba maraveiosa: una “granda moltitùdine” che la vien fora del Armagedon. Questo grupo l’è tanto pi grando che i 144 mila e no ghen’è come contarlo. (Ledi Apocalisse 7:9, 10. *) Quei che i ze dela granda moltitùdine i ze “vestidi de longhe robe bianche”. Questo vol dir che lori i ze stati fedeli a Dio e a Cristo e i ze stati boni de “seitar distante dele robe sbaliade del mondo”. (Tiago 1:27) Lori i ringràssia a Geovà parché i sa che i ze stati salvi par causa de tuto quel che lu e Gesù, el Piegoreto de Dio, i ga fato par lori. Lori anca i ga foie de palmere in man e questo vol dir che lori i aceta a Gesù come el Rè scoliesto par Geovà. — Vedi anca Gioani 12:12, 13.

8. De acordo con Apocalisse 7:11, 12, cossa che sucede nel cielo quando la granda moltitùdine la vien fora dela granda tribolassion?

⁸ Ledi Apocalisse 7:11, 12. * Cossa che sucede quando la granda moltitùdine la vien fora dela granda tribolassion? Gioani el vede tuti nel cielo, contenti e lodando a Geovà. L’è sicuro che Geovà, Gesù, i àngeli e i untadi i restarà pròpio contenti quando questo ndarà suceder.

9. De acordo con Apocalisse 7:13-15, cossa che la granda moltitùdine la ze drio far adesso?

⁹ Ledi Apocalisse 7:13-15. * Gioani el ga scrito sora la granda moltitùdine: ‘Lori i ga lavà le so longhe robe e le ga fato vegner bianche nel sangue del Piegoreto.’ Questo vol dir che i ga una bona cossiensa e la aprovassion de Geovà. (Isa. 1:18) Lori i ze dedicadi, batesadi, i ga fede nel sacrifìssio de Gesù e i ze amighi de Geovà. (Gioani 3:36; 1 Pie. 3:21) Cossita, lori i sarà boni de ‘servir a Dio giorno e note’ qua nela Tera. L’è sicuro che anca ancoi, lori i fà el so meio nel laoro de predicassion e i mete el Regno in primo posto nela vita. — Mat. 6:33; 24:14; 28:19, 20.

10. (a) Quei dela granda moltitùdine i ze sicuri de che? (b) Che promessa lori i ndarà veder realisarse?

¹⁰ Quei dela granda moltitùdine, che i vegnarà fora dela granda tribolassion, i ze sicuri che Dio el seitarà a tender de lori parché Geovà el ga prometesto che el ndarà far questo. Cossita, la promessa de Dio la ndarà realisarse: “Lu el sugarà tute le làgrime dei so oci, e no ghen sarà pi la morte, gnanca pi tristessa, gnanca piander, gnanca dolor.” — Apo. 21:3, 4.

11-12. (a) De acordo con Apocalisse 7:16, 17, che benedission la granda moltitùdine la ndarà ricever? (b) Cossa che le altre piégore le pol far nela Selebrassion, e parché?

 ¹¹ Ledi Apocalisse 7:16, 17. * Tanti fradei i ze drio tribolar parché no i ga de magnar, no i ga soldi par viver e i sofre par causa dele guere e altri i ze in preson par causa dela so fede. Ma lori i resta contenti de saver che i ndarà viver nel paradiso, i gavarà tanto de magnar e i podarà imparar tanto sora Geovà. Dopo dela granda tribolassion, Gesù el ndarà ‘guidarli ale fontane dela àqua dela vita’. L’è sicuro che la ze una bela speransa parché dei bilioni de persone che i ga belche vivesto, lori i ga la speransa de passar con vita par la granda tribolassion e de mai morir! — Gioani 11:26.

¹² Le altre piégore le ringràssia tanto a Geovà e a Gesù parché le ga una bela speransa. Geovà no le ga scolieste par viver nel cielo, ma lore le ga tanto valor par lu. I untadi e anca le altre piégore i ga el privilègio de lodar a Geovà e a Gesù. Par esémpio, lori i pol far questo quando i va ala Selebrassion dela morte de Cristo.

13-14. Parché che tuti noantri ghemo de ndar ala Selebrassion dela morte de Cristo?

¹³ Nei ùltimi ani, intrà 1.000 persone, sol una la magna del pan e la beve del vin nela Selebrassion. Alora, de sei congregassion, sol in una ghen’è qualchedun che el magna del pan e beve del vin. Questo el mostra che quasi tute le persone che le va nela Selebrassion le ga la speransa de viver nela Tera. Ma parché che queste persone le va nela Selebrassion dela morte de Cristo? Parché questo el saria come ndar a un matrimònio de un amigo. Quei che i va al matrimònio i vol mostrar che i ghe vol ben a quei che i ze drio maridarse e i ze de acordo con lori. Cossita, le altre piégore le va  ala Selebrassion par mostrar che le ghe vol ben a Cristo e ai untadi e che le vol giutarli. Lore le vol anca mostrar che le dà valor al sacrifìssio de Gesù, che el pol darghe la vita eterna nela Tera.

¹⁴ Le altre piégore le va ala Selebrassion anca par obedir a Gesù. Quando lu l’era coi so apòstoli, nela prima Selebrassion, el ga dito: “Seité a far questo in ricordo de mi.” (1 Cor. 11:23-26) Alora, intanto che ghen sìpia untadi nela Tera, le altre piégore le seitarà a ndar ala Selebrassion dela morte de Cristo e anca le ndarà convidar le persone a far questo.

15. Come che noantri podemo lodar a Dio e a Cristo nela Selebrassion?

¹⁵ Nela Selebrassion, noantri podemo lodar a Dio e a Cristo quando cantemo i càntichi e preghemo a Dio insieme. Noantri ndaremo ricordarse che el pan e el vin i vol dir el corpo e el sangue de Gesù. Noantri anca ndaremo ricordarse che Geovà el ga mostrà tanto amor quando el ga mandà el so Fiol par morir e par salvar a noantri. (Mat. 20:28) El discorso de questo ano el sarà: “Mostra che te sì grato par quel che Dio e Cristo i ga fato par ti.” Questo discorso el ndarà giutarte a esser ancora pi grato par quel che Geovà e Cristo i ga fato. L’è sicuro che tuti quei che i ama a Geovà e so Fiol i ndarà a questa Selebrassion.

16. I untadi e le altre piégore i ze compagni in tante robe. Daghe esempi.

¹⁶ I untadi e le altre piégore i ze compagni in tante robe. Par esémpio, tuti due grupi i ze pressiosi par Geovà parché i ze stati compradi par meso del sacrifìssio de Gesù. Tuti due grupi anca i ga de seitar a esser leai a Geovà e a Gesù. (Sal. 31:23) I untadi e le altre piégore i riceve spìrito santo de Dio. E l’è bon ricordarse che Geovà el dà spìrito santo a una persona de acordo con quel che ela la ga de bisogno, no importa mia se la ze dei untadi o dele altre piégore. Questi due grupi i ze difarenti sol par causa dela speransa che lori i ga.

17. Cossa che i untadi i ze premosi de ricever?

¹⁷ I untadi no i ga la speransa de viver nel cielo da picinin. L’è Geovà che el mete questa speransa in lori. Lori i pensa in questa speransa, i prega a Geovà e i ze premosi de ricever la so ricompensa nel cielo. Lori no i sa come che i sarà quando i ndarà al cielo. (Fil. 3:20, 21; 1 Gio. 3:2) Ancora cossita, lori i vol tanto  star insieme de Geovà, Gesù e i àngeli e de far el so laoro insieme dei altri untadi che i ze belche nel cielo.

18. Cossa che le altre piégore le ze premose de far?

¹⁸ Tute le persone le vol viver par sempre e le altre piégore le ze premose de far questo. (Ecl. 3:11) Lore le ze premose de far dela Tera un paradiso, de far su le so case, laorar la tera e slevar su i so fioi con salute perfeta. (Isa. 65:21-23) Lore anca le vol tanto viaiar par cognosser le montagne, el mar, caminar in meso le piante e imparar tante robe sora quel che Geovà el ga creà. Lore le resta ancora pi contente parché le podarà far pi forte la so amicìssia con Geovà.

19. (a) Cossa che tuti noantri podaremo far nela Selebrassion? (b) Quando che sarà la Selebrassion in questo ano?

¹⁹ Geovà el ga dato a tuti i so servi la bela speransa de viver par sempre. (Ger. 29:11) Noantri podaremo ringrassiar a Geovà e a Gesù par tuto quel che i ga fato par noantri nela Selebrassion dela morte de Cristo. Sicuro che questa Selebrassion la ze la riunion pi importante par noantri. In questo ano, la Selebrassion la ndarà suceder dopo che el sol el va do nel sabo, 27 de marso de 2021. Tanti i sarà lìberi par ndar ala Selebrassion, altri i ndarà anca che i gàpia dificoltà e altri i farà questo in preson. Ghemo de ricordarse che Geovà, Gesù, i àngeli e i untadi che i ze nel cielo i sarà contenti con noantri. Che tute le congregassion, grupi e cada persona i gàpia una bona Selebrassion!