1. Cossita come Davi, che domanda pol esser che anca noantri femo?

TUTI noantri volemo gaver una vita tranquila e sensa ansietà. Ma pol suceder qualcossa che ne fà restar ansiosi. Pol esser che anca noantri femo la medèsima domanda che Davi el ga fato a Geovà: “Quanto tempo ancora gavarò le ansietà, i pensieri e tristessa nel me cuor tuto el giorno?” — Sal. 13:2.

2. Cossa che ndaremo veder in questo stùdio?

² L’è vera che tuti noantri restemo ansiosi, ma ghen’è robe che le pol giutarne a restar pi tranquili. In questo stùdio, ndaremo veder parché che fursi restemo ansiosi. Dopo, ndaremo veder sei robe che le ne giuta a restar tranquili quando infrontemo problemi.

3. (a) Che robe le ne fà restar ansiosi? (b) Sarà che semo boni de fermar queste robe?

³ Ghen’è tante robe che le ne fà restar ansiosi. Par esémpio, guastemo cada volta de pi par gaver de magnar, robe de vestir e un posto de star. Anca pol esser che quei che i laora o stùdia con noantri i vol che femo robe imorai o altre robe sbaliade. E pol anca suceder tante robe rugne nel posto ndove semo de star. No semo boni de far queste robe fermarse parché vivemo nte un  mondo che quasi tute le persone no le ghe bada i prinsipi bìblichi. Sàtana, che l’è el dio de questo mondo, el sa che arquanti no i ndaria servir a Geovà par causa dela ansietà. (Mat. 13:22; 1 Gio. 5:19) Cossita, noantri capimo parché che ghen’è tante robe che le ne assa ansiosi!

4. Se noantri seitemo pensar nei problemi, cossa che pol suceder?

⁴ Noantri restemo ansiosi anca par causa de altre robe. Par esémpio, podemo restar preocupadi se gavaremo soldi che basta par viver. O podemo gaver paura de restar sensa laoro par causa de una malatia. Anca podemo restar preocupadi de far robe brute o de desobedir a Geovà. O anca restemo preocupadi con quel che ndaremo far quando Sàtana el ndarà atacar el pòpolo de Dio. Se seitemo pensar in queste robe podemo restar massa ansiosi. Cossita, pol esser che noantri se domandemo: ‘Sarà che l’è sbalià restar preocupadi con queste robe?’

5. Cossa che Gesù el volea dir cole parole: “Fermeve de star ansiosi”?

⁵ Gesù el ga dito ai so seghidori: “Fermeve de star ansiosi.” (Mat. 6:25) Gesù no l’era drio parlar che no podemo restar ansiosi. Tanti servi leai de Geovà del passà i ze restadi ansiosi e Geovà no l’è restà disgustà con lori. * (1 Rè 19:4; Sal. 6:3) Gesù el volea dir che ghemo de restar tranquili, parché se restemo massa ansiosi cole robe dela vita, no saremo boni de servir a Dio del tuto. Alora, cossa che podemo far par no restar ansiosi? — Vedi el quadro “ Come che podemo far questo?”.

6. De acordo con Filipensi 4:6, 7, cossa che pol giutarte?

⁶ (1) Seita pregar a Geovà. Quando te sì tanto ansioso, domanda el aiuto de Geovà. (1 Pie. 5:7) Alora, Dio el ndarà darte la so pace che la ze pi granda de quela che te pol capir. (Ledi Filipensi 4:6, 7. *) Geovà el ndarà giutarte a restar pi tranquilo par meso del so spìrito santo. — Gàl. 5:22.

7. Come che ghemo de far quando preghemo a Geovà?

⁷ Quando te sì drio pregar a Geovà, pàrlaghe sora el problema che te sì drio infrontar e sora quel che te sì drio sentir. Domanda a Geovà cossa che te pol far e la forsa par farla. Se no ghen’è come finir col to problema, domanda a Geovà che el te giute a restar manco ansioso. Quando te ghe parli quel che te ghè pròpio de bisogno, l’è pi fàcile capir la risposta de Geovà. Se la risposta ale to orassion no la vien suito, no stà mia desister. Geovà el vol che te seiti a domandarghe quel che te ghè pròpio de bisogno. — Luc. 11:8-10.

8. Cossa che anca ghemo de parlar nele nostre orassion?

⁸ Quando noantri semo drio parlar a Geovà sora le nostre ansietà, ghemo anca de ringrassiarlo. Cossita, semo boni de veder anca le bele robe che le ze  drio suceder nela nostra vita. Ma se ti te ghè tanta ansietà, che no te sè gnanca cossa dir, ricòrdate che Geovà el ndarà scoltarte anca se te dise sol: ‘Giùtame!’ — 2 Cró. 18:31; Rom. 8:26.

9. Ndove che se pol catar la vera protession?

⁹ (2) Fìdate in Geovà e nò in ti stesso. Nela època del profeta Isaia, la Assìria la volea far guera contra el pòpolo de Giudà. El pòpolo de Giudà el se ga spaurà e el ga domandà el aiuto del Egito. (Isa. 30:1, 2) Geovà el ga dito che, se lori i se fidesse nel Egito, le robe no le ndaria mia polito. (Isa. 30:7, 12, 13) Geovà el ga doperà el profeta Isaia par dir al pòpolo de Giudà come che lori i podaria gaver protession. Lu el ga dito: “Valtri gavaré forsa se resté tranquili e se valtri ve fidé in mi.” — Isa. 30:15b.

10. Quando che podemo mostrar che se fidemo in Geovà?

¹⁰ Come che te pol mostrar che te te fidi in Geovà? Proa imaginar che el to paron el te dise che te pol ciapar de pi soldi se te laori de pi, ma te sè che questo ndarà intrigar el to laoro a Geovà. O proa imaginar che una persona che laora insieme con ti e che no la serve mia a Geovà la vol smorosarte. O anca proa imaginar che qualchedun dela to fameia, che ti te ghe vol ben, el te dise: “Te toca scòlier intrà mi e el to Dio.” Sicuro che no l’è fàcile far quel che l’è giusto, ma Geovà el ndarà giutarte. (Mat. 6:33; 10:37; 1 Cor. 7:39) Se te sucede una roba de questa, veto fidarte in Geovà e obedir ale so orientassion?

11. Che esempi dela Bìblia i pol giutarne a restar tranquili quando infrontemo brute dificoltà?

¹¹ (3) Impara dei boni e bruti esempi. La Bìblia la ga tanti bei esempi che i mostra che l’è tanto importante restar tranquili e fidarse in Geovà. Questi esempi i ne mostra cossa che ga giutà i servi de Geovà a restar tranquili quando i ga infrontà brute dificoltà. Par esémpio, quando le autorità le ga dito ai apòstoli par lori fermarse de predicar, lori no i ga mia bio paura. Lori i ga bio coraio e i ga dito: “Gavemo de obedir a Dio come governante vanti che i òmini.” (Ati 5:29) Anca dopo de ciapar una fila de bote, i apòstoli i era tranquili. Parché? Parché lori i savea che i gavea el aiuto de Geovà e che lu l’era contento con lori. Cossita, lori i ze stati boni de seitar a predicar le bone notìssie. (Ati 5:40-42) Nantro bel esémpio l’è quel del dissìpolo Stevon. Quando l’era drio morir, lu l’era tanto tranquilo che la so fàcia la era come la fàcia de un àngelo. (Ati 6:12-15) Parché? Parché Stevon l’era sicuro che Geovà l’era contento con lu.

12. De acordo con 1 Piero 3:14 e 4:14, parché che podemo restar contenti quando infrontemo dificoltà?

¹² I apòstoli i era sicuri che lori i gavea el aiuto de Geovà. Par esémpio, lori i ga ricevesto el poder de far miràcoli. (Ati 5:12-16; 6:8) Ancoi, noantri no ricevemo pi questo poder, ma la Bìblia la mostra che Geovà el resta contento e el ne dà el so spìrito santo quando infrontemo qualche bruta dificoltà par obedirlo. (Ledi 1 Piero 3:14; * 4:14. *) Alora, no  stà mia preocuparte massa con quel che te ndarè far quando che scomìnsia la perseghission. Pitosto, l’è meio che te impari a fidarte de pi in Geovà adesso. Come i primi dissìpoli, fìdate nela promessa de Gesù: “Tuti i vostri nemighi no i sarà boni de parlar gnente contra valtri parché mi ve darò sabedoria e mi ve giutarò a saver cossa dir.” E lu anca el ga dito: “Par causa dela vostra perseveransa, valtri gavaré la vita.” (Luc. 21:12-19) No stà mai desmentegarte che, se un servo de Geovà el more, Geovà el va ressussitarlo pròpio come lu l’era vanti de morir.

13. Parché che l’è bon studiar i esempi de quei che no i ze restadi tranquili e no i se ga fidà in Geovà?

¹³ Parché che l’è bon studiar i esempi de quei che no i ze restadi tranquili e no i se ga fidà in Geovà? Parché noantri imparemo a no far i medèsimi sbali che lori. Par esémpio, nel scomìnsio del governo de Asa, un grando esèrsito l’è ndato contra Giudà. Asa el se ga fidà in Geovà e Geovà lo ga giutà a vinser quel esèrsito. (2 Cró. 14:9-12) Un tempo dopo, anca el rè Baasa de Israel el ga dito che el ndaria contra Giudà, sol che lu el ndaria far questo con un esèrsito pi pìcolo. Invesse de fidarse in Geovà, Asa el se ga fidà nel esèrsito dela Sìria. (2 Cró. 16:1-3) E pena vanti morir, quando l’era tanto malà, Asa no’l se ga mia fidà in Geovà. — 2 Cró. 16:12.

14. Cossa che imparemo dei sbali de Asa?

¹⁴ Nel scomìnsio, Asa el ndea in serca del aiuto de Geovà quando el gavea qualche dificoltà. Ma dopo de un tempo, lu no’l se ga mia pi fidà in Geovà e el se ga fidà in lu stesso. Par meso de un profeta, Geovà el ga dito a Asa che el rè dela Sìria no’l ndaria pi giutarlo. Questo ndaria suceder parché lu el se gavea fidà nel rè dela Sìria invesse de fidarse in Geovà. (2 Cró. 16:7) Nel scomìnsio, ghe parea a Asa che ndaria tuto polito, ma suito ga cambià tuto. Cossa che imparemo? Noantri ghemo de star atenti par no far quel che ne par meio invesse de ndar in serca del aiuto de Geovà. Anca quando sucede qualcossa de colpo, ghemo de restar tranquili e fidarse che Geovà el ndarà giutarne.

15. Cossa che noantri podemo far quando ledemo la Bìblia?

¹⁵ (4) Gàpia in mente arquanti testi dela Bìblia. Geovà el ga dito a Giosuè che el gavea de leder la lege e pensarghe sora di e note. (Giosuè 1:8, 9) Questo ndaria giutarlo a far quel che l’è giusto e anca gaver coraio par far el so laoro. Quando noantri ledemo la Bìblia, catemo arquanti testi che i ne giuta a restar pi tranquili e a fidarse de pi in Geovà. Alora, podemo proar gaver in mente questi versìcoli. Ma cossa che pol giutarne a far questo? Podemo scrìverli e meter nte un posto che podemo véderli sempre. Alora, quando noantri semo ansiosi o ghemo paura, gavaremo in mente questi versìcoli che i ndarà giutarne a restar pi tranquili. — Sal. 27:1-3; Pro. 3:25, 26.

16. Come che Geovà el dopera i nostri fradei par giutarne?

¹⁶ (5) Sìpia insieme con quei che i serve a Dio. Geovà el dopera i nostri fradei par giutarne a restar tranquili e a fidarse in lu. Par esémpio, nele nostre riunion, semo tanto incoraiadi par meso  dele parte, dei comentari e quando parlemo coi nostri fradei e sorele. (Ebr. 10:24, 25) Nantra roba che pol giutarne l’è parlar con un fradel che l’è nostro amigo e che se fidemo. Quel che lu el parla pol giutarne tanto a restar manco ansiosi. — Pro. 12:25.

17. De acordo con Ebrei 6:19, come che la nostra speransa la pol giutarne?

¹⁷ (6) Gàpia ben in mente la to speransa. La nostra speransa par el futuro la ze come una àncora par noantri parché la ne giuta a restar manco ansiosi quando infrontemo dificoltà. (Ledi Ebrei 6:19. *) Alora, proa pensar nela promessa de Geovà che no ghen sarà pi pensieri nel futuro. (Isa. 65:17) Proa imaginarte nel paradiso, ndove te ndarè viver sensa le robe che te assa ansioso. (Mic. 4:4) Fà tuto quel che te pol nel laoro de predicar e de insegnar ai altri sora Geovà. Cossita, ti te sarè ancora pi sicuro dela to speransa par el futuro. — Ebr. 6:11.

18. (a) Cossa che noantri ndaremo infrontar cada volta de pi? (b) Cossa che ndarà giutarne?

¹⁸ Come semo cada volta pi darente del fin, noantri ndaremo infrontar tante dificoltà che fursi le ne assarà ansiosi. El testo del ano de 2021 el mostra che noantri saremo boni de infrontar queste dificoltà se restemo tranquili e se se fidemo in Geovà. Alora, in questo ano ricòrdate de questa promessa: Fìdate in Geovà e resta tranquilo. Alora te gavarè forsa! — Isa. 30:15.